You will be redirected to the script in

seconds
Puthiyaseithi | புதிய செய்தி: June 2019

Wednesday, June 26, 2019

ஒரே இணைப்பு: டிவி, போன் உட்பட பல சேவைகளுடன் அறிமுகமாகமும் ஜிகா ஃபைபர்.!

இண்டர்நெட் மட்டுமின்றி அழைப்புகளுக்கும் இந்த டிவைஸை பயன்படுத்தி கொள்ளலாம். Reliance JioGigaFiber packs, launch, price: JioGigaFiber is said to cost Rs 600 per month for the plan that offers speeds of 50Mbps. ஜியோ நிறுவனம் தொடர்ந்து மலிவு விலையில் பல புதிய திட்டங்களை கொண்டுவர முயற்சி செய்துள்ளது, அதன்படி இப்போது ஜியோ ஜிகா ஃபைபர் இணைய சேவை தற்போது மிகவும் குறிப்பிட்ட நகரங்களில் மட்டும சோதனை முயற்சியாக நடத்தப்பட்டு வருகிறது. ஒரே இணைப்பில்... இந்த புதிய சேவை கூடிய விரைவில் அறிமுகமாக உள்ள நிலையில் டிவி, இணையம், போன் என மூன்று சேவைகளையும் ஒரே இணைப்பில் தரும் இந்த ஜிகா ஃபைபர் சேவைகளுக்கான கட்டணங்கள் வெளியாகி உள்ளன. டெபாசிட் கட்ட வேண்டும் இந்த சேவைக்கு செக்யூரிட்டி டெபாசிட் கட்ட வேண்டும் என்று 4500 ரூபாய் கட்டணம் விதிக்கப்பட்டதாகவும், அது 2500 ஆக குறைக்கப்படுகிறது என்றும் அந்த தகவல்களில் கூடுதலாக சில முக்கிய செய்திகள் இடம் பெற்றுள்ளன. அடிமட்ட விலையில் விற்பனை: வருகிறது இந்த ஆண்டிற்கான அமேசான் ப்ரைம் டே சேல்ஸ்! வருடாந்திர ஜியோ மாநாட்டில் .. புதிய தொழில்நுட்பத்தில் உருவான இந்த சிங்கிள் ரூட்டர், சிங்கிள் பேண்டில் மிக அதிகமான இண்டர்நெட் வேகத்தை தரும். அதாவது 50 Mbps வேகத்தில் இருந்து 100 Mbps வேகம் வரை இண்டர்நெட் வேகம் பெறக்கூடியது இந்த ஆப்டிக்கல் நெட்வொர்க் டெர்மினல் ஆகும். 50Mbps வேகத்தில் செயல்படும் இணைய சேவையை பெற ரூ. 600 கட்டணமாகும் என்றும் 100Mbps வேகத்தில் இயங்கும் இணைய சேவையைப் பெற ரூ. 1000 கட்டணமாகும் என்றும் அறிவிக்கப்பட்டுள்ளது. ஜூலை மாதத்தில் நடைபெற இருக்கும் வருடாந்திர ஜியோ மாநாட்டில் அதிகாரப்பூர்வ கட்டண அறிவிப்புகள் வெளியாகும்.  இந்த ஜியோ ஜிகாஃபைபர் டிவைஸ் 2.4GHz சப்போர்ட் செய்யும் என்றும் வைஃபை மற்றும் 5GHz பிராண்ட் வைஃபை பயன்படுத்தலாம் என்றும், 10/100 ஈதர்நெட் போர்ட் கொண்ட இந்த டிவைஸ் 9 x 5 இன்ச் அளவினை கொண்டது என்றும் இது கருப்பு நிறத்தில் இருக்கும் என்றும் அவர் தனது டுவிட்டரில் தெரிவித்துள்ளார். மேலும் இந்த டிவைஸில் மூன்று RJ45 போர்ட்டுக்க்ள், ஒரு மைக்ரோ யூஎஸ்பி 2.0 மற்றும் ஒரு RJ11 போர்ட் ஆகியவைகளும் உள்ளன. 

Monday, June 24, 2019

வாடகைக்கு வரிச்சலுகை பெற வீட்டு உரிமையாளர் பான் எண் தர மறுத்தால் என்ன செய்வது?

வாடகை வீட்டில் குடியிருப்பவர்கள், தாங்கள் செலுத்தும் வாடகை தொகைக்கு வரிச்சலுகை பெற முடியும். வீட்டு வாடகை படி (எச்ஆர்ஏ)யின் கீழ், வருமான வரி சட்டம் பிரிவு 10 (13ஏ) ன்படி இதற்கு வரி விலக்கு உண்டு. ஆனால், வாடகை செலுத்துபவர்கள் அதற்கான சான்றை சமர்ப்பிக்க வேண்டும். வாடகைதாரர்கள் தங்கள் வீட்டு உரிமையாளர்களுடன் செய்து கொண்ட வாடகை ஒப்பந்த நகலை சமர்ப்பிக்கலாம். இதில், வாடகை தொகை, வாடகை செலுத்த வேண்டிய நாள் அல்லது தேதி, பராமரிப்பு கட்டணம், இதர கட்டணங்கள் விவரம் கண்டிப்பாக இடம்பெற்றிருக்க வேண்டும். இதுதவிர, மின் கட்டணம் போன்ற சில பில் தொகைகள், சொத்து வரி போன்றவற்றை குடியிருப்போர் செலுத்துவதாக இருந்தால் இதுபற்றியும் ஒப்பந்தத்தில் தெளிவாக இடம்பெற்றிருக்க வேண்டும். இந்த ஒப்பந்தத்தில் வாடகைதாரர் மற்றும் வீட்டு உரிமையாளர் ஆகிய இரு தரப்பினரும் கையெழுத்து போட்டிருக்க வேண்டும். வீட்டு உரிமையாளர் உங்களது பெற்றோராக இருந்தாலும் இந்த ஒப்பந்தம் முக்கியம். ஒரு வேளை, ஒரே வீட்டில் இரண்டு வாடகைதாரர்கள் பகிர்ந்து கொண்டு வசித்தால், இருவருக்கும் ஒதுக்கப்பட்ட பரப்பளவு எவ்வளவு என்பது பற்றியும் ஒப்பந்தத்தில் இடம்பெற வேண்டும். இதன்படி, வாடகை, பில் தொகை இருவருக்கும் பிரித்து கணக்கிடப்படும். செலுத்தப்படும் வாடகைக்கு கண்டிப்பாக ரசீது வாங்க வேண்டும். அதிலும் 3,000 க்கு மேல் வாடகை இருந்தால் ரசீது முக்கியம். செலுத்தப்படும் வாடகை ஆண்டுக்கு ஒரு லட்சம் ரூபாய்க்கு மேல் (மாதம் 8,333க்கு மேல்) இருந்தால் வீட்டு உரிமையாளரின் பான் எண் கண்டிப்பாக சமர்ப்பிக்க வேண்டும். வீட்டு உரிமையாளரின் பான் எண் இல்லாவிட்டால் படிவம் 60 சமர்ப்பிக்க வேண்டும். இவை இல்லாமல் சமர்ப்பித்தால் வருமான வரி நோட்டீஸ் வரும. வீட்டு உரிமையாளர் பான் எண் வழங்க மறுத்தால், அவருடன் ஒப்பந்தம் செய்த வாடகை ஒப்பந்த பத்திரத்தை தாக்கல் செய்யலாம். அதில், நீங்கள் கொடுக்கும் வாடகை தொகை சரியாக குறிப்பிட்டிருக்க வேண்டும். அதோடு, ரசீதும் சமர்ப்பிக்கலாம். வாடகை தொகையை ரொக்கமாக கொடுக்காதீர்கள். ஒப்பந்தத்தில் இடம்பெற்ற அல்லது ரசீதில் இடம்பெற்ற தொகைக்கு மேல் ரொக்கமாக கொடுத்திருந்தால் வரிச்சலுகை பெற முடியாது. வங்கி கணக்கு மூலம் ஆன்லைன் வங்கி பரிவர்த்தனை அல்லது காசோலை மூலம் வழங்கியிருந்தால் அதை ஆதாரமாக காட்டலாம். இவற்றை வருமான வரி அதிகாரிகள் ஆய்வு செய்து உறுதி செய்வார்கள்.

Monday, June 17, 2019

பரிணாம வளர்ச்சியில் பறவைகள் தோன்றியது எப்படி?

பரிணாமம் என்பது ‘ஒரு வழிப் பாதை’ என்றே தொடக்ககால விஞ்ஞானிகள் கருதினர். அதாவது, பரிணாமத்தில் ஒரு பிரதான உயிரில் இருந்து மற்றொரு பிரதான உயிர் தோன்றியது என்றும், அதுவும் ஒன்றன்பின் ஒன்றாக ஒரே நேர்கோட்டில் தோன்றியது என்றும் கருதப்பட்டது.

உதாரணமாக, முதலில் ஒரு செல் உயிரியான பாக்டீரியாவில் இருந்து அமீபா, பின்னர் அமீபாவில் இருந்து பல செல் உயிரிகள், பின்னர் தாவரங்கள், பின்னர் அவற்றைத் தொடர்ந்து விலங்குகள் என்று ஒரே நேர்கோடாக உயிர்கள் தோன்றியதாகவே தொடக்கத்தில் கருதப்பட்டது. இதன் அடிப்படையில் ஒரு பரிணாம மரம் உருவாக்கப்பட்டது.

ஆனால், தொடர்ச்சியாக கண்டுபிடிக்கப்படும் புதைபடிமங்கள் மற்றும் அவற்றின் மீதான நவீன பரிணாம ஆய்வு களின் காரணமாக, அந்த பரிணாம மரம் கிளைக்கும் விதம் தொடர்ந்து மாற்றத்துக்கு உள்ளாகிக்கொண்டே இருக்கிறது என்பது குறிப்பிடத்தக்கது. அதனடிப்படையில் பரிணாம வளர்ச்சி என்பது கற்பனைக்கு எட்டாத அளவுக்கு கிளைத்த ஒரு மரம் என்பது நவீன கால ஆய்வுகள் மூலம் தொடர்ந்து நிரூபிக்கப்பட்டு வருகிறது.

அந்த வகையில், பறவைகள் மற்றும் ஆர்கியாப்டேரிக்ஸ் (Archaeopteryx) எனும் ஒரு டைனோசர்-பறவை இரண்டுக்கும் இடையிலான விலங்குகளில் மட்டுமே இருந்ததாக கருதப்பட்டு வந்த சிறகுகள், பறவைகள் தோன்றுவதற்கு சுமார் 10 கோடி ஆண்டுகளுக்கு முன்பே தோன்றிவிட்டன என்றும், டைனோசர்கள் தோன்றுவதற்கு முன்பே கூட தோன்றியிருக்கலாம் என்றும் ஒரு சமீபத்திய ஆய்வில் கண்டறியப்பட்டுள்ளது.

இங்கிலாந்தில் உள்ள பிரிஸ்டல் பல் கலைக்கழகத்தைச் சேர்ந்த விஞ்ஞானி மைக் பென்ட்டன் தலைமையிலான ஆய்வுக்குழுவினர் மேற்கொண்ட புதைபடிம ஆய்வில் இந்த தகவல் கண்டுபிடிக்கப்பட்டுள்ளது.

டீரோசார்ஸ் (Pterosaurs) எனும் ஒரு வகை ஊர்வன விலங்குகளின் புதைபடிம ஆய்வில், அவற்றின் உடலில் சிறகுகள் இருந்தது கண்டறியப்பட்டது. டைனோசர் களின் நெருங்கிய உறவினர்களாக கருதப்படும் டீரோசர்களின் சிறகுகள் அச்சு அசலாக டைனோசர்களின் சிறகுகள் போலவே இருந்ததும், அதன் காரணமாக சிறகுகள் தோன்றிய காலம் தற்போது குறைந்தது சுமார் 25 கோடி ஆண்டுகள் பின்னுக்கு தள்ளப்பட்டுள்ளதும் இங்கு கவனிக்கத்தக்கது.

தொடக்ககால ட்ரையாசிக் உலகமானது (Triassic world) மிக மிக மோசமான ஒரு பேரழிவில் இருந்து மீண்டு வந்துகொண்டிருந்த காலத்தில் சிறகுகள் தோன்றியிருக்க வேண்டும் என இந்த ஆய்வுத்தகவல்கள் சுட்டிக்காட்டுகின்றன என்கிறார் விஞ்ஞானி பென்ட்டன். முக்கியமாக, இந்த ஆய்வு மூலமாக, உலகின் முதல் பறவையாக கருதப்படும் ஆர்கியாப்டேரிக்ஸ் (Archaeopteryx) தோன்றுவதற்கு முன்பே சிறகுகள் தோன்றியிருக்க வேண்டும் என்றும், டைனோசர்களின் மூதாதையர்களான ஆர்கொசார்களுக்கும் (archosaurs) பாலூட்டிகளின் மூதாதையர்களுக்கு மிகப்பெரும் போர் நடந்த காலத்தில்தான் சிறகுகள் தோன்றியிருக்கின்றன என்றும் கூறப்படுகிறது.

இவ்விரு விலங்கினங்களுக்கும் இடையிலான போட்டியில் ஆர்கொசார்களுக்கு உடல் வெப்பத்தை அதிகப்படுத்தி உதவவே சிறகுகள் தோன்றி யிருக்கலாம் என்றும் கருதப்படுகிறது. அதன்பிறகு சிறகுகள் பறக்க பயன்படத் தொடங்கியிருக்கக் கூடும் என் கிறார் விஞ்ஞானி பென்ட்டன்.

முக்கியமாக, கடந்த 1994-ம் ஆண்டு சீனாவில் சிறகுகள் உடைய ஆயிரக்கணக்கான டைனோசர் புதைபடிமங்கள் கண்டுபிடிக்கப்பட்ட பின்னர் புதைபடிம ஆய்வாளர்கள் சிறகுகள் தோன்றிய காலம் டைனோசர்களுக்கு முந்தைய காலமாக இருக்கலாம் என்று எண்ணத் தொடங்கிவிட்டனர்.

ஆனால், கடந்த 2014-ம் ஆண்டு ரஷியாவில் கண்டறியப்பட்ட குளிண்டாட்ரோமியஸ் (Kulindadromeus) டைனோசர் புதைபடிமத்தின் உடல் முழுக்க இருந்த சிறகுகள், டைனோசர்கள் தோன்றும் முன்னரே சிறகுகள் தோன்றியிருக்கலாம் என்ற கருத்தை அழுத்தமாக முன்வைத்தது. ஏனெனில், குளிண்டாட்ரோமியஸ் இன டைனோசர்கள், பரிணாமத்தில் பறவைகள் தோன்றுவதற்கு மிக மிக நீண்ட காலத்துக்கு முன்பு தோன்றியவை என்பது குறிப்பிடத்தக்கது.

அதுமட்டுமல்லாமல், கடந்த 2017-ம் ஆண்டு மேற்கொள்ளப்பட்ட ஒரு மரபியல் ஆய்வில், ஊர்வன விலங்குகளின் செதில்கள், பறவைகளின் சிறகுகள் மற்றும் பாலூட்டிகளின் ரோமங்கள் ஆகியவற்றின் வளர்ச்சியானது அனைத்தும் ஒரு மரபியல் கட்டுப்பாட்டு அமைப்பினால் தூண்டப்பட்டது என்று கண்டறியப்பட்டது.

அதாவது, செதில்கள், சிறகுகள் மற்றும் பாலூட்டி ரோமங்கள் ஆகிய அனைத்து பாகங்களின் வேரானது சுமார் 42 கோடி ஆண்டுகளுக்கு முன்பு வாழ்ந்த ஒரு மூதாதையர் உயிரினத்தில் இருந்திருக்கலாம் என்று கூறப்படுகிறது. மேலும், சிறகுகள் டைனோசர்களின் அடிப்படை பண்புகளில் ஒன்றாகவே இருந்திருக்கும் என்றும், பின்னர் டைனோசர்கள் அளவில் பெரிதாக சிறகுகளின் வளர்ச்சி தடைபட்டு இருக்கலாம் என்றும் விஞ்ஞானிகள் கருதுகின்றனர்.

இது எல்லாம் ஒருபுறமிருக்க, பறவைகள் வெற்றிகரமாக வாழ சிறகுகள் அவற்றுக்கு மிக மிக முக்கியமான ஒரு பாகமாக இருந்தது என்பதில் மாற்றுக்கருத்து இல்லை என்கிறார் ஆய்வாளர் பென்ட்டன். மேலும், இந்த ஆய்வு மூலமாக, பறவைகள் ஊர்வன விலங்குகளில் இருந்து உடனே தோன்றவில்லை என்றும், மாறாக சுமார் 10 கோடி ஆண்டு காலத்தில், முப்பதுக்கும் மேற்பட்ட குணாதிசயங்களை உருவாக்கிக்கொண்ட பின்னரே பறவைகள் தோன்றின என்றும் கூறு கிறார் விஞ்ஞானி பென்ட்டன்.

இஸ்ரோவின் எதிர்கால திட்டங்கள்

2019
சந்திரனை ஆய்வு செய்வதற்காக, ‘சந்திரயான்-2’ செயற்கைக்கோள் ஜூலை 15-ந் தேதி விண்ணில் ஏவப்பட இருக்கிறது. இது செப்டம்பர் மாதம், நிலவின் தென் துருவ பகுதியில் தரை இறங்கி, நிலவு குறித்த ஆய்வுகளை மேற்கொள்ளும்.

2020
சந்திரன், செவ்வாய் கிரக ஆராய்ச்சிகளை தொடர்ந்து, சூரியன் பற்றிய ஆராய்ச்சிகளை 2020-ம் ஆண்டு தொடங்க உள்ளனர். ‘ஆதித்யா எல்-1’ என்ற திட்டத்தின் மூலம் சூரிய ஒளிவட்ட ஆய்வுகளையும், காலநிலை மாற்றத்திற்கான காரணங்களையும் தேட இருக்கிறார்கள்.சந்திரனுக்கு மனிதர்களை அனுப்புவது, செவ்வாய் கிரகம் மற்றும் சந்திரனில் மனித குடியிருப்புகளை அமைப்பது உள்ளிட்ட பல பணிகளையும், 2020-ம் ஆண்டிற்குள் செய்து முடிக்க இஸ்ரோ திட்டமிட்டிருக்கிறது.

2021 (ஜூலை)
ஆளில்லா விண்வெளி விமான ஆராய்ச்சிகள்

2021 (டிசம்பர்)
ஆளில்லா விண்வெளி விமான ஆராய்ச்சிகளுக்கு அடுத்ததாக, மனிதர்களை சுமந்து செல்லும் ‘ககன்யான்’ என்ற விண்வெளி விமான சோதனையில் ஈடுபட உள்ளனர். இஸ்ரோவின் இந்த திட்டம் வெற்றிப்பெற்றால், மனிதர்களை விண்வெளிக்கு சுமந்து செல்லும் முதல் விண்வெளி விமானம் என்ற பெருமை, ககன்யானுக்கு கிடைக்கும். 3 விண்வெளி வீரர்கள் பயணிக்கும்படி ககன்யானை வடிவமைக்க உள்ளனர்.

2023
வீனஸ் கிரக ஆராய்ச்சி

2030
ககன்யான் விண்வெளி விமானத்தில், அடிக்கடி பயணம் மேற்கொள்ளும் வீரர்களுக்கு ஏதுவாக, விண் வெளியில் மிதக்கும் பிரத்யேக விண்வெளி நிலையத்தை கட்டமைக்கும் முயற்சிகளில் இஸ்ரோ இறங்க உள்ளது. ‘‘இதன்படி 2030-ம் ஆண்டில், இந்தியாவிற்கு என பிரத்யேக விண்வெளி நிலையம் விண்ணில் மிதக்கும்’’, என இஸ்ரோ நிறுவன தலைவர் கே.சிவன் கூறியிருக்கிறார்.இந்த விண்வெளி நிலையம் 20 டன் எடையில் உருவாக உள்ளது.இதில் விண்வெளி வீரர்கள் 15 நாட்கள் வரை தங்கியிருக்கலாம்.இந்த விண்வெளி நிலையத்தை, பூமியில் இருந்து 400 கி.மீ. உயரத்தில் அமைக்க உள்ளனர்.

‘ட்ரூ காலர்’ அப்ளிகேஷனில் வாய்ஸ் கால் பேசும் வசதி

ஸ்மார்ட்போன் உலகில் ட்ரூ காலர் அப்ளிகேஷனிற்கு நல்ல வரவேற்பு இருக்கிறது. ஏனெனில் நமக்கு அறிமுகம் இல்லாத புது எண்களில் இருந்து வரும் அழைப்புகளின் தகவல்களை ட்ரூ காலர் அப்ளிகேஷன் திரட்டி கொடுக்கும். அதாவது புது நம்பர் அழைப்பு யாரிடமிருந்து வருகிறது, அழைப்பவரின் தகவல், எங்கிருக்கிறார், எப்படிப்பட்டவர், எந்த துறையை சார்ந்தவர், ஏன்..? சிலரது விலாசங்களை கூட, ட்ரூ காலர் அப்ளிகேஷன் காண்பித்துவிடும். இதனால் தேவையில்லாத அழைப்புகளை எளிதாக தவிர்த்துவிட முடியும். இத்தகைய சேவையை வழங்கிவந்த ட்ரூ காலர் அப்ளிகேஷன் தற்போது, இணையதளத்தை பயன்படுத்தி வாய்ஸ் கால் பேசும் வசதியையும் வழங்கியுள்ளது. உதாரணத்திற்கு வாட்ஸ் ஆப் கால் வசதியை போல சிம் கார்டு எண் இல்லாமல், கணக்கு ஐ.டி.-யை கொண்டே போன் கால் பேசமுடியும்.

மடங்கக்கூடிய தனிநபர் கணினி

வளைந்த திரையுடன் கூடிய ஸ்மார்ட்போன்கள், மடக்க முடிந்த ஸ்மார்ட்போன்கள் தயாராகிவிட்டாலும் இன்னும் அதிக அளவில் பயன்பாட்டிற்கு வரவில்லை. மடிக்கணினிகள் மற்றும் டேப்லட்களே கைகளில் எடுத்துச் செல்லும் வகையிலும், மடக்கும் வகையிலும் உள்ளன. லெனோவா நிறுவனம் உலகில் முதல் முறையாக தனிநபர் கணினியின் ஓ.எல்.இ.டி. திரையை மடக்கி எடுத்துச் செல்லும் வகையில் தயாரித்து பரிசோதனை செய்துள்ளது. சாம்சங் நிறுவனம் மடங்கக்கூடிய ஸ்மார்ட்போனை உருவாக்கி இருப்பது நினைவூட்டத்தக்கது.

Thursday, June 13, 2019

அடுத்த மாதம் 15-ந்தேதி கடைசி நாள்: 2,144 முதுகலை பட்டதாரி ஆசிரியர் பணியிடங்களுக்கு விண்ணப்பிக்கலாம் ஆசிரியர் தேர்வு வாரியம் அறிவிப்பு

முதுகலை பட்டதாரி ஆசிரியர் பணியிடங்களுக்கான அறிவிப்பை ஆசிரியர் தேர்வு வாரியம் நேற்று வெளியிட்டது. ஏற்கனவே கடந்த 2017-ம் ஆண்டு முதுகலை பட்டதாரி ஆசிரியர் பணியிடங்களுக்கான அறிவிப்பை வெளியிட்டு இருந்தது. அதன்பிறகு, தற்போது அறிவிப்பு வெளியாகி இருக்கிறது. மொத்தம் 2,144 பணியிடங்களுக்கு வருகிற 24-ந்தேதி முதல் ஆன்லைனில் விண்ணப்பிக்கலாம். பூர்த்தி செய்து விண்ணப்பங்களை சமர்ப்பிக்க கடைசி நாள் அடுத்த மாதம் (ஜூலை) 15-ந்தேதி ஆகும். தேர்வு தொடர்பான அறிவிப்பு விரைவில் அறிவிக்கப்படும். தேர்வு கட்டணமாக எஸ்.சி., எஸ்.சி.ஏ., எஸ்.டி. பிரிவினருக்கு ரூ.250-ம், மற்ற பிரிவினர்களுக்கு ரூ.500 நிர்ணயிக்கப்பட்டு இருக்கிறது. கட்டணத்தை ஆன்லைன் மூலமாகவே செலுத்த வேண்டும். டி.டி., அஞ்சல் வழியாக பணம் செலுத்துதல் ஏற்றுக்கொள்ளப்படமாட்டாது. முக்கிய பாடப்பிரிவுகளில் 110 மதிப்பெண்ணுக்கும், கல்வி முறை பிரிவில் 30 மதிப்பெண்ணுக்கும், பொது அறிவு பிரிவில் 10 மதிப்பெண்ணுக்கும் என மொத்தம் 150 மதிப்பெண்களுக்கு தேர்வு நடைபெற இருக்கிறது. மேலும் விண்ணப்பிப்பது எப்படி? என்னென்ன தகவல்களை பூர்த்தி செய்ய வேண்டும்? என்பது தொடர்பான விவரங்களை http://www.trb.tn.nic.in என்ற இணையதளத்துக்கு சென்று தெரிந்து கொள்ளலாம்.

Wednesday, June 12, 2019

வெளி சத்தங்களை செயலிழக்க செய்யும் ‘சோனிக் கிளவுட்’

கிராமங்களில் மட்டுமின்றி நகரங்களிலும் கூட செல்போனில் பேசும் போது, தெளிவாக கேட்காமல் போதல், இரைச்சல் அதிகமாக இருத்தல் போன்ற பிரச்சினைகள் ஏற்படுவதுண்டு. இவ்வளவு தொழில்நுட்ப வளர்ச்சி அடைந்திருக்கும் போதும் இது போன்ற சிக்கல்கள் இருக்கத் தான் செய்கின்றன. இதற்கு தீர்வாக சோனிக் கிளவுட் என்னும் செயலியை அறிமுகப்படுத்தியுள்ளனர். இது ஒரு தனி நபரின் கேட்கும் திறன், எவ்வளவு சத்தத்தில் பேச வேண்டும், கேட்க வேண்டும் என்று அவரவர் விருப்பத்திற்கேற்ப அதிர்வெண்ணை தேர்வு செய்கிறது. இதனால் முதியவர்கள் தங்களுக்கு அதிக சப்தம் வேண்டுமெனில் அதற்கேற்றவாறு செட் செய்து கொள்ளலாம். சில நுண்ணிய ஒலிகளை கூட தெளிவாக கேட்கும் படி செய்கிறது இந்த ஆப். வெளி சத்தங்களை செயலிழக்க செய்து நமது அழைப்புகளை நிம்மதியாக பேச வைக்கிறது இந்த சோனிக் கிளவுட் செயலி.

காற்றை சுத்திகரிக்கும் சாதனம்

குழந்தைகளுக்கான சர்வதேச அமைப்பான யுனிசெப் நிறுவனத்தின் ஆய்வுப்படி ஒரு வருடத்திற்கு ஆறு லட்சம் குழந்தைகள் மாசுபட்ட காற்றை சுவாசிப்பதால் இறக்கின்றனர் என்று தெரிவித்துள்ளது. அதிகரித்து வரும் சுற்றுப்புற மாசுகளில் சிக்காமல் பிள்ளைகளை வெளியே அழைத்து செல்வது பெற்றோருக்கு பயத்தை அளிப்பதாக உள்ளது. இதன் பொருட்டு பிரிசி பேபி ( BRISI BABY ) எனப்படும் ஒரு சாதனம் கண்டுபிடிக்கப்பட்டுள்ளது. தலையணை போன்றிருக்கும் இந்த சாதனத்தை குழந்தைகள் அமரும் ஸ்ட்ரோலர் (குழந்தைகளை வைத்து தள்ளி செல்லும் வண்டி ) மீது பொருத்திக் கொள்ள வேண்டும். இதில் இருக்கும் சென்சார்கள் கேடு விளைவிக்கும் நச்சு வாயுக்களை கண்டுபிடிக்கிறது. உடனே இதனுள் இருக்கும் மின் விசிறி சுற்ற ஆரம்பிக்கிறது. மாசுபட்ட காற்றை தன்னுள் இழுத்து அதை பில்டர் மூலம் தூய்மையாக்குகிறது. அதன் பின்னர், சுத்திகரிக்கப்பட்ட காற்றை வெளியே அனுப்புகிறது. இதனால் குழந்தையை சுற்றிலும் எப்போதும் சுத்தமான காற்றோட்டம் இருக்கும்படி செய்கிறது. பத்து நொடிகளுக்குள் ஒன்றரை லிட்டர் காற்றை சுத்திகரிக்கிறது இந்த சாதனம். இதன் செயலி அதிக மாசுபட்ட இடத்தை கடக்கும் போது, பெற்றோருக்கு ஸ்மார்ட் போன் மூலம் எச்சரிக்கை செய்கிறது.

த்ரீ இன் ஒன் சாதனம்

வேலைக்கு செல்லும் பெண்களுக்கு நேரத்தை மிச்சம் செய்வதற்காகவே அறிமுகமாகி இருக்கிறது ஹாமில்டன் பீச் நிறுவனத்தின் த்ரீ இன் ஒன் கிரில் மற்றும் கிரேடில். 180 சதுர அங்குலம் கொண்ட நான்ஸ்டிக் கல்லில் இரண்டு விதமான வேலைகளை ஒரே நேரத்தில் செய்யலாம். இதனை சுலபமாக கழற்றி, மாட்டி நமது வசதிக்கேற்ப அட்ஜஸ்ட் செய்து கொள்ள முடியும். இரு வெப்பநிலைகளில் வெவ்வேறு உணவுகளை ஒரே நேரத்தில் சமைக்கலாம். இதில் முக்கியமான சிறப்பம்சம் என்னவெனில் இதன் நடுப்பகுதியில் இருக்கும் தட்டில் உணவில் இருக்கும் அதிகப்படியான எண்ணெய் மற்றும் கொழுப்பு வடிந்து விடுகிறது. பி.எப்.ஓ.ஏ ( PFOA ) எனப்படும் கெடுதலான ஆசிட் கலப்பின்றி இந்த நான்ஸ்டிக் பரப்பு உருவாக்கப்பட்டுள்ளது. இதில் இருக்கும் கிரில் பகுதியில் சிக்கன், ஆட்டுக்கறி போன்ற மாமிச வகைகள், மசாலா தடவிய மீன் அல்லது காய்கறிகள் போன்றவற்றை எண்ணெய் குறைவாக சேர்த்து சமைக்கலாம். இன்னொரு புறமிருக்கும் கிரேடில் பகுதியில் பான்கேக் தோசை வகைகள், முட்டை ஆம்லெட் மற்றும் பிரட் போன்றவற்றை சமைக்கலாம். ஒரே நேரத்தில் இரு வகையான உணவுகளை சமைத்தாலும், இடையில் தடுப்பு இருப்பதால் ஒரு உணவின் வாடை மற்றொன்றை பாதிக்காது. எனவே கிரில், கிரேடில் மற்றும் இவைகளை ஒரே நேரத்தில் உபயோகிப்பது என்று மூன்று விதமாக இந்த சாதனத்தை பயன்படுத்தலாம். இதன் விலை சுமார் ரூ.4,260.

விலை குறைந்த எல்.இ.டி. டி.வி.

டி .வி. தயாரிப்பு நிறுவனமான டிடெல் தற்போது விலை குறைந்த எல்.இ.டி. டி.வி.யை அறிமுகம் செய்துள்ளது. 17 அங்குலம் கொண்ட இந்த டி.வி.யின் விலை ரூ.3,699 மட்டுமே. இதில் 5 வாட் ஸ்பீக்கர் மற்றும் ஹெச்.டி.எம்.ஐ. போர்ட் வசதியும் உள்ளது. டி1 என்ற பெயரில் வந்துள்ள டி.வி.க்கு ஓராண்டு உத்தரவாதத்தையும் இந்நிறுவனம் அளித்துள்ளது. இந்த டி.வி.யை வாங்க விரும்புவோர் டிடெல் மொபைல் ஆப் மூலம் ஆர்டர் செய்யலாம். இதில் உள்ள ஹெச்.டி.எம்.ஐ. போர்ட் மூலம் தொலைக்காட்சி நிகழ்ச்சிகளை பார்க்கலாம். யு.எஸ்.பி. போர்ட் மூலம் மல்டிமீடியா வசதி, வி.ஜி.ஏ. இன்புட் வசதியும் இதில் உள்ளது. இந்தியாவில் 33 சதவீத மக்கள் இன்னமும் டி.வி. வசதி இல்லாமல் உள்ளனர். இதனால் விலை குறைந்த தங்கள் தயாரிப்புக்கு மிகுந்த வரவேற்பு இருக்கும் என இந்நிறுவனம் உறுதியாக நம்புகிறது.

சிக்கலான பாதைகளில் உதவும் ஜி.பி.எஸ். கருவி

செயற்கைக்கோள் தொழில்நுட்பம் மூலம் வழிகாட்டும் ஜி.பி.எஸ். வந்த பின்பு வழி தெரியாமல் தேடி அலையும் சிரமம் பெருமளவு குறைந்திருக்கிறது. ஹாங்காங் நகரை சேர்ந்த விஞ்ஞானிகள் ஜி.பி.எஸ். நுட்பத்தை மேலும் எளிதாக்கக் கூடிய வகையில் ஒரு புதிய கருவியை அறிமுகப்படுத்தியுள்ளனர். இந்த கருவியை ஸ்மார்ட் போனுடன் இணைத்துக் கொண்டுவிட்டால் வாகன ஓட்டிகள் தவறான பாதையில் செல்லும் போது அறிவிக்கிறது. அடுக்கடுக்கான ப்ளை ஓவர்களில் என்னதான் ஜி.பி.எஸ். இருந்தாலும் மேலே இருக்கிறோமா, கீழே இருக்கிறோமா என்று ஓட்டுனர்கள் குழம்பும் சூழ்நிலை ஏற்படும். இது போன்ற சிக்கலான பாதைகளில் இந்த கருவி வாகனத்திற்கும், சாலைக்கும் இடையே உள்ள கோணத்தை அளந்து சரியான பாதையில் வண்டி செல்கிறதா என்பதை தெரிவிக்கும். தற்போது நடைமுறையில் இருக்கும் எந்த ஜி.பி.எஸ். மாடலிலும் இந்த வசதி இல்லை. இந்த கருவி நூறு சதவிகிதம் துல்லியமாக செயல்படுகிறது என்று சோதனை முயற்சியில் நிரூபிக்கப்பட்டுள்ளது. சீனாவில் கூடிய விரைவில் இந்தக் கருவி அறிமுகப்படுத்தப்படும் என்று கூறுகின்றனர்.

ஸ்மார்ட் சுவிட்ச்

இந்த ஸ்மார்ட் யுகத்தில் நமது வீடுகளில் பயன்படுத்தப்படும் ஸ்விட்சுகளும் ஸ்மார்ட்டாக இருக்க வேண்டாமா? கோல்டுமெடல் எலெக்ட்ரிகல்ஸ் நிறுவனம் வை-பை சுவிட்சுகளை அறிமுகம் செய்துள்ளது. இதன் மூலம் வீடுகளின் சுவிட்சுகளை கண்ட்ரோல் செய்யலாம். வழக்கமான சுவிட்ச் போல இதை இயக்கலாம். ரிமோட் கண்ட்ரோல் மூலமும் இதை செயல்படுத்தலாம். ஸ்மார்ட்போன் செயலி (ஆப்) மூலம் தொலை தூரத்திலிருந்தும் இதை இயக்க முடியும். அனைத்துக்கும் மேலாக இப்போது புழக்கத்துக்கு வந்துள்ள அமேசான், அலெக்ஸா மற்றும் கூகுள் அசிஸ்டன்ட் ஸ்மார்ட் கருவிகள் மூலமும் இந்த சுவிட்சை செயல்படுத்த முடியும். இதனால் குரல் வழி கட்டுப்பாடு மூலமும் இந்த ஸ்விட்சை செயல்படுத்தலாம். இதன் விலை ரூ.5,900-லிருந்து ஆரம்ப மாகிறது. இந்த சுவிட்சில் மைக்ரோ கண்ட்ரோலர் சிப் உள்ளது. இதன் மூலம் நிரந்தரமாக செயல்படுத்த வேண்டிய பணிகளை செயல்படுத்த முடியும். இத்துடன் ஐவேர்ல்டு மொபைல் ஆப் மூலம் வாடிக்கையாளர்கள் ஸ்மார்ட்போன் மூலம் இதை செயல்படுத்தலாம். இது கண்ணாடியில் ஆன மேல் பாகத்தைக் கொண்டுள்ளது. இதன் மூலம் தொடு திரையாக இதை லேசாக தொட்டே செயல்படுத்த முடியும். பின்னணியில் எல்.இ.டி. பொத்தான்கள் உள்ளன. ஐவேர்ல்டு மொபைல் ஆப்-ஐ கூகுள் அசிஸ்ட் அல்லது அமேசான் அலெக்ஸாவுடன் இணைத்துக் கொள்ள முடியும். அதன் பிறகு குரல் வழி கட்டுப்பாடு மூலமும் இந்த சுவிட்சை செயல்படுத்தலாம். இந்த புதிய ஸ்மார்ட் ஸ்விட் நான்கு சுவிட்ச் அல்லது இரண்டு சுவிட்சுகளைக் கொண்ட தொகுப்பாக வந்துள்ளது. இதன் மூலம் லைட், பேன் போன்றவற்றை கட்டுப்படுத்தலாம். பேனின் சுழற்சி வேகத்தை அதிகரிக்கவோ அல்லது குறைக்கவோ முடியும். முன்னணி மின்சாதன விற்பனையகங்களில் இது கிடைக்கிறது.

இசை கற்றுத் தரும் ‘சவுண்ட் பாப்ஸ்’

குழந்தைகளின் விளையாட்டு பொம்மைகள் வெறுமனே பொழுதுபோக்குக்காக மட்டுமின்றி பயனுள்ள வகையில் இருக்கும்படி, சில நிறுவனங்கள் தயாரித்து வருகின்றன. ஸ்காட்லாந்து நாட்டை சேர்ந்த பொம்மை பொருட்கள் வடிவமைப்பாளர் மைக்கேல் டபார் குழந்தைகளுக்குள் இருக்கும் இசை ஆர்வத்தை தூண்டும் வகையில் ஒரு கருவியை உருவாக்கிஉள்ளார். இதன் பெயர் ‘சவுண்ட் பாப்ஸ்’. வெள்ளை பலகையின் மீது பல வண்ணங்களில் பாப்ஸ் என்று சொல்லக்கூடிய வட்ட வடிவ அமைப்புகள் இருக்கின்றன. இவை ஒவ்வொன்றும் ஒரு இசைக் குறிப்பை உள்ளடக்கியுள்ளன. இந்த அமைப்புகளை குழந்தைகள் மேலும் கீழும் சுற்றி அசைத்து புதுப்புது இசை ஒலியை உருவாக்கி மகிழ்வார்கள். விளையாட்டுடன் கற்றலையும் இணைத்துத் தருவதே இவர்களின் நோக்கம். இந்த விளையாட்டுக் கருவியுடன் தரப்படும் புத்தகத்தை பார்த்து பெற்றோர் குழந்தைகளுக்கு நிறைய கற்றுத் தரலாம். குட்டி இசை மேதைகளை உருவாக்கும் இந்த கருவியை ஐ பாட்டில் இருக்கும் இசை செயலிகளுடன் இணைத்துக் கொண்டு எண்ணற்ற புது முயற்சிகளை செய்யலாம். மூன்று வயது பிள்ளைகள் தொடங்கி எல்லா வயதினருக்கும், விளையாட்டாகவே இசையை கற்றுத் தருகிறது இந்த சவுண்ட் பாப்ஸ்.

பாடும் அலைகளின் நகரம் தரங்கம்பாடி

டிரான்கோபார் என்று ஒருகாலத்தில் அழைக்கப்பட்ட தரங்கம்பாடி நாகை மாவட்டத்தில், காரைக்காலுக்கு வடக்கே இருந்து 15 கி.மீ. தொலைவில் உள்ளது. இது ஒரு டச் காலனியாக விளங்கியது. இங்கே இருக்கும் புகழ்பெற்ற டான்ஸ்பர்க் கோட்டை 150 ஆண்டுகளுக்கு டச் ஆளுநர் மாளிகையாக இருந்தது. நானூறு வருட பழமை வாய்ந்த கோட்டை இது. இந்த கோட்டையின் உள்ளே இருக்கும் மியூசியத்தில் டச்சுகாரர்களின் வரலாறுகள், அவர்கள் பயன்படுத்திய தட்டுகள், பீங்கான் சாமான்கள் மற்றும் பல கலைப் பொருட்கள் இடம்பெற்றுள்ளன. மேலும் உயரமான தாழிகள் மற்றும் மிகப் பெரிய திமிங்கலத்தின் எலும்புகளும் இங்கே காட்சிப்படுத்தப்பட்டுள்ளன. டென்மார்க் மன்னர்களின் புகைப்படங்கள், அவர்கள் பயன்படுத்திய கப்பல்களின் புகைப்படங்கள் ஆகியவற்றை பார்க்கையில் அந்த காலத்து பிரமாண்டங்களை எண்ணி வியக்காமல் இருக்க முடியாது. தரங்கபாடியில் எழுநூறு வருட பழமை வாய்ந்த மாசிலாமணி நாதர் கோவில் உள்ளது. மாறவர்மன் குலசேகர மன்னரால் கட்டப்பட்ட இந்த கோவில் எங்கும் காண முடியாத வகையில் சீனா மற்றும் தமிழக கட்டுமானக் கலையை இணைத்து கட்டப்பட்டுள்ளது. மேலும் 1718-ம் ஆண்டு ஜெர்மனியர்களால் கட்டப்பட்ட நியூஜெருசலேம் தேவாலயமும் இந்த ஊரில் பார்க்க வேண்டிய இடங்களில் ஒன்று. கட்டப்பட்டு ஒரு நூற்றாண்டுக்கும் மேலான தபால் அலுவலகம் ஒன்றும் இங்கே இயங்கி வருகிறது. தரங்கம்பாடி என்ற வார்த்தைக்கு ‘பாடும் அலைகளின் நகரம்’ என்று பொருள். பெயருக்கு ஏற்றார் போல ஆர்ப்பரிக்கும் அலையோசையை கேட்டு கொண்டே கடற்கரையில் சிறிது நேரம் பொழுதை கழிக்கலாம். மற்ற கடற்கரைகளை போலில்லாமல் இங்கே அலை ஓசையை தவிர வேறு எந்த ஒலிகளும் கேட்காமல், ஒரு விதமான அமைதி நிலவுகிறது. பழமையின் குறியீடாய் நின்றிருக்கும் தரங்கம்பாடிக்கு சென்று வந்தால் காலச்சக்கரத்தின் மீதேறி பின்னோக்கி போன உணர்வு நிச்சயம் ஏற்படும்.

மனதைக் கொள்ளை கொள்ளும் முதுமலை

குடும்பத்தினருடன் சுற்றுலா செல்லும்போது அந்த இடம் மனதுக்கு மகிழ்ச்சி தரக் கூடியதாகவும், குழந்தைகளுக்கு விஷயங்களை கற்றுத் தரக் கூடியதாகவும் இருப்பது நல்லது. வெளியூர் பயணத்தில் பல நல்ல விஷயங்களை நேரில் பார்த்து அனுபவிக்கும் வசதியை அளிப்பதே சுற்றுலாதான். அந்த வகையில் தமிழகத்தில் மிகவும் பிரபலமான சுற்றுலா பகுதியாக விளங்குகிறது முதுமலை. இது நீலகிரி மலை அடிவாரத்தில் தமிழ்நாடு, கேரளா, கர்நாடகா ஆகிய மூன்று மாநிலங்கள் முக்கோண வடிவில் சந்திக்கும் விதமாக அமைந்துள்ளது. தென்னிந்தியாவில் உள்ள மிக முக்கியமான வனப் பகுதியும் இதுவே. 1940-ம் ஆண்டு தொடங்கப்பட்ட இந்த வனக் காப்பகம், தென்னிந்தியாவில் அமைந்த முதலாவது வனக் காப்பகம் ஆகும். 60 சதுர கிலோமீட்டர் பரப்பளவில் தொடங்கப்பட்ட இந்த காப்பகம், பின்னர் 295 கிலோ மீட்டராக விரிவுபடுத்தப்பட்டது. தற்போது இது 321 கிலோமீட்டர் வரை பரவியுள்ளது. யுனெஸ்கோ அமைப்பால் அங்கீகரிக்கப்பட்ட வனக் காப்பகங்களுள் இதுவும் ஒன்றாகும். முதுமலை தேசிய வனப் பூங்கா 103 கி.மீ. பரப்பளவில் அமைந்துள்ளது. இதன் தொடர்ச்சியாக கர்நாடகத்தில் பந்திப்பூர் சரணாலயமும், கேரளாவில் வயநாடு வன விலங்கு சரணாலயமும் உள்ளன. முதுமலை சரணாலயத்தில் வனத்துறையின் உதவியோடு காட்டுக்குள் சென்று வந்தால் திரில் நிச்சயம். யானை, மான், மலை அணில், சிறுத்தை, காட்டு மாடுகள், புலிகளைக் கூட பார்க்கலாம். இங்குள்ள தெப்பக்காடு யானைகள் காப்பகத்தில் யானைகளுக்கு காலை, மாலை உணவு அளிப்பதைப் பார்க்கலாம். தெப்பக்காடு அருகே வனத்துறை விடுதிகள் உள்ளன. மசினகுடி ஊருக்குள்ளும் விடுதிகளும், ரிசார்ட்களும் உள்ளன. முன்பதிவு செய்துவிட்டு செல்லலாம். இயற்கை வளங்களும், வன விலங்குகளையும் அதன் வாழ்விடத்திற்கே சென்று பார்ப்பது அழகானது.

இந்தியாவின் வெனிஸ் ‘மன்றோ தீவு’

உப்பங்கழியில் (BACK WATERS) மூழ்கிய முத்தென்று வர்ணிக்கப்படுகிறது கேரளா மாநிலம், கொல்லம் நகரில் இருக்கும் ‘மன்றோ தீவு’. சிறிய கால்வாய்களால் பிரிக்கப்பட்ட எட்டு தீவுகளின் கூட்டமே இந்த மன்றோ தீவு. கொல்லம் நகரில் இருந்து 25 கி.மீ. தொலைவில் இருக்கும் இந்த தீவிற்கு சாலை, ரெயில் மற்றும் உள்ளூர் நீர்வழி என்று அனைத்து வகை போக்குவரத்து வசதிகளும் உள்ளன. எனவே இங்கே சென்று வருவது சுலபம். குறுக்கு நெடுக்காக செல்லும் கால்வாய்கள், அதற்கு நடுவே பாலங்கள், ஓங்கி வளர்ந்த தென்னை மரக் கூட்டங்கள், காதுகளை மகிழ்விக்கும் பறவைகளின் சங்கீதம் என்று நம்மை பரவசத்தின் உச்சத்திற்கே கொண்டு செல்கிறது இந்த தீவு. இங்கே இருக்கும் தங்கும் விடுதிகளில் வீட்டு உணவு போலிருக்கும் கேரள சாப்பாடு சமைத்து தரப்படுகிறது. வாழை இலையில் வேகவைக்கப்பட்ட மீன், தேங்காய் எண்ணெய்யில் சமைக்கப்பட்ட கோழி என்று நாவூறும் உணவுகளை தீவின் அழகை ரசித்துக் கொண்டே திறந்த வெளியில் உண்டு மகிழலாம். மூங்கில் துடுப்புகள் கொண்டு நகர்த்தப்படும் பலா கட்டைகளால் செய்யப்பட்ட ‘வல்லம்’ எனப்படும் படகில் தீவை சுற்றி வரலாம். ஓவியங்களில் காணப்படும் வெனிஸ் நகரத்து நதிகளின் படகு காட்சிகளுக்கு இணையான சுக அனுபவத்தை ஏற்படுத்தும் இந்த எழில் மிகு படகு சவாரி. இதனாலேயே மன்றோ தீவு இந்தியாவின் வெனிஸ் என்றழைக்கப்படுகிறது. இங்கே மோட்டார் படகுகள் இயக்கப்படுவதில்லை. நீரின் போக்கிலேயே நகர்ந்து செல்லும் இந்த பயணம், ‘அமைதியான நதியினிலே ஓடம்’ என்று நம்மை பாட வைக்கும். கடல் மட்டத்திலிருந்து ஒன்பதடி உயரத்திலிருக்கும் இந்த தீவில் ஏராளமான தென்னை மரங்கள் இருப்பதால் கயிறு திரித்தல், தேங்காய் வெட்டுதல் போன்ற தொழில்கள் இங்கே காணப்படுகின்றன. வலை விரித்து மீனவர்கள் மீன்பிடிக்கும் அழகை நாள் முழுவதும் பார்க்கலாம். இடம் பெயர்ந்து வந்த பல வண்ணப் பறவைகளை இங்கே காண முடிகிறது. 1878-ம் ஆண்டு கேரள கட்டிடக்கலையில் கட்டப்பட்ட தேவாலயம் ஒன்றும் இங்கே இருக்கிறது. இயற்கை ஒலிகள் மட்டுமே கேட்கும் ஓரிடம் இன்னமும் இந்த பூமியில் இருக்கிறதா என்ற கேள்விக்கு விடையாக நிற்கிறது ‘மன்றோ தீவு’.

ஒரு நாள் சுற்றுலாவுக்கு ஏற்ற மாமல்லபுரம்

பள்ளிகளுக்கு கோடை விடுமுறை முடிந்து பள்ளிகள் ஆரம்பிக்கப்பட்டுள்ளன. இத்தகைய சூழலில் வார இறுதி நாட்கள் மற்றும் ஒரு நாள் சுற்றுலா செல்லும் இடங்களைத் தேர்வு செய்வது சரியாக இருக்கும். அந்த வகையில் சென்னையில் இருப்பவர்கள் அருகிலுள்ள மாமல்லபுரத்துக்கு சென்று வரலாம். சென்னைக்கு சுற்றுலா வரும் பிற மாவட்டத்தினர் மாமல்லபுரம் சென்று தங்கி அங்கு பல அரிய விஷயங்களைப் பார்த்து ரசிக்கலாம்.

பொதுவாக கோடைகாலங்களில் இங்கும் வெயில் தகிக்கும். காரணம் சுற்றியும் பாறைகள், பாறைகளில் செதுக்கப்பட்ட சிற்பங்கள். இதனால் செப்டம்பர் முதல் ஏப்ரல் வரையான காலங்களில் இங்கு செல்வதே சிறந்தது. எனவே காலாண்டு விடுமுறைக்கு திட்டமிடுங்கள். சென்னை வாசிகள் காலையில் புறப்பட்டு மாலையில் திரும்பிவிடலாம். குழந்தைகளுடன் சென்றால் பல்வேறு வரலாற்று விஷயங்களை அவர்களுக்கு எடுத்துக் கூறவும் இது வாய்ப்பாக இருக்கும்.

வரலாற்று முக்கியத்துவம் வாய்ந்த இடங்களில் இதுவும் ஒன்று. 7-ம் நூற்றாண்டில் பல்லவ நாட்டின் முக்கியத் துறைமுகமாக விளங்கிய நகரமாகும். மகாபலிபுரம் என்றும் இது அழைக்கப்படுகிறது.

சென்னைக்கு தெற்கே 62 கி.மீ. தொலைவிலும் காஞ்சிபுரத்திலிருந்து 67 கி.மீ. தொலைவில் உள்ளது. பல்லவர் கால வரலாற்றைப் போற்றும் வகையில் சிற்பக் கலை மிகுந்த பகுதிகள் இங்குள்ளன. குடைவரைக் கோவில்கள், மண்டபங்கள், ஒற்றைக்கல் கோவில்கள், ரதங்கள், கட்டுமானக் கோவில்கள் இங்குள்ளன.

இவை தவிர புடைப்புச் சிற்பத் தொகுதிகள் வெளிப்புறத்திலும், கோவில்களின் உட்புறத்திலும் காணப்படுகின்றன. சிற்பக் கலைக்காகவே யுனெஸ்கோ அமைப்பு இதை உலக பாரம்பரிய தளங்களில் ஒன்றாக அறிவித்துள்ளது. இங்குள்ள கடற்கரை கோவில் 7-ம் நூற்றாண்டிலேயே கிரானைட்டால் கட்டப்பட்டது. பல்லவ மன்னர்களின் சிற்பக் கலைக்கு மிகச்சிறந்த எடுத்துக்காட்டாக இது திகழ்கிறது.

யுனெஸ்கோ அமைப்பால் உலகின் பாரம்பரியம் மிக்க இடங்களுள் ஒன்றாக இது போற்றப்படுகிறது. இங்கு ஆண்டுதோறும் ஜனவரி மற்றும் பிப்ரவரி மாதங்களில் இங்கு நடன விழா நடைபெறும்.

அர்ஜுனன் தபஸ் கோலத்தில் உள்ள சிற்பம் பல்லவர் கால சிற்பக் கலையின் நயத்தை வெளிப்படுத்தும். இங்குள்ள பஞ்ச ரதங்கள் ஒற்றைக் கல்லால் செதுக்கப்பட்டவை. இங்குள்ள மலைப் பகுதியில் கண்ணனின் வெண்ணெய் எனக் கூறப்படும் ‘பட்டர் பால்’ மலைப்பகுதியில் வெகு நேர்த்தியாக இருக்கும். இதை நகர்த்த 7 யானைகளைக் கொண்டு பல்லவ மன்னன் முயன்றும் அது முடியாமல் போனது. செல்பி பிரியர்கள் இந்த பட்டர் பால் அருகே புகைப்படம் எடுத்தும் மகிழலாம்.

வந்துவிட்டது போர்டு தண்டர்

போர்டு நிறுவனத்தின் எகோ ஸ்போர்ட் மாடலில் தண்டர் என்ற பெயரிலான புதிய எஸ்.யு.வி. மாடல் காரை அறிமுகம் செய்துள்ளனர். எகோ ஸ்போர்ட் மாடலில் இது வேறு ஒரு ரகம். இந்த மாடலின் விலையை குறைவாக நிர்ணயித்ததால் ஏற்கனவே சந்தையில் உள்ள அனைத்து மாடல்களின் விலையையும் குறைத்துள்ளது போர்டு. போர்டு எகோ ஸ்போர்ட் மாடலில் ஆம்பியன்ட், எம்.டி. டிரென்ட், எம்.டி. டைட்டானியம், ஏ.டி. டைட்டானியம், எகோ பூஸ்ட் எஸ் ஆகிய மாடல்களில் பெட்ரோல் மற்றும் டீசலில் ஓடக்கூடிய கார்களை இந்நிறுவனம் அறிமுகப்படுத்தியுள்ளது. புதிய மாடல் தண்டர் விலை ரூ.10.18 லட்சத்தில் ஆரம்பமாகிறது. இதனால் முன்னர் அறிமுகமான மாடல்களின் விலையில் ரூ.20 ஆயிரம் முதல் ரூ.60 ஆயிரம் வரை இந்நிறுவனம் குறைத்துள்ளது. புதிதாக அறிமுகமாகியுள்ள தண்டர் மாடலில் பெட்ரோலில் ஓடும் காரின் விலை ரூ.10.18 லட்சமாகவும், டீசலில் ஓடும் மாடல் விலை ரூ.10.68 லட்சமாகவும் நிர்ணயிக்கப்பட்டுள்ளது. இது பார்ப்பதற்கு உயர் ரக எஸ்.யு.வி. தோற்றத்தைக் கொண்டுள்ளது. இதன் முகப்பு தோற்றம் கிரில், முகப்பு விளக்கு, பனிப்பிரதேசங்களில் ஒளியை துல்லியமாக வீசும் பாக் விளக்கு, கிரில், விங் மிரர் ஆகியன கம்பீரமான தோற்றத்தை அளிக்கிறது. 17 அங்குல அலாய் சக்கரங்களும், இரட்டை வண்ணத்திலான பானட், அழகிய கதவுகள் இதன் தரத்தை மேலும் மெருகூட்டுகிறது. இதன் உள்புறமும் மிகவும் சிறப்பாக வடிவமைக்கப்பட்டுள்ளன. இரட்டை வண்ணம் மிகச் சிறப்பான அலங்கார வடிவமைப்பு, கதவின் பேனல், மத்தியில் கன்சோல் அமைப்பு, இன்ஸ்ட்ருமென்ட் பேனல் ஆகியன சிறப்பாக உள்ளன. எலெக்ட்ரிக் சன் ரூப் வசதி, 9 அங்குல இன்போடெயின்மென்ட் சிஸ்டம் சொகுசு காருக்கான தோற்றத்தை அளிக்கிறது. 123 ஹெச்.பி. திறன், 1.5 லிட்டர் பெட்ரோல் என்ஜினுடனும், 100 ஹெச்.பி., 1.5 லிட்டர் டீசல் என்ஜினுடனும் இது கிடைக்கிறது. புதிய கார் அறிமுகம், முந்தைய மாடல்களுக்கு விலை குறைப்பு ஆகியன போர்டு கார்களின் விற்பனையை மேலும் அதிகரிக்கும் என்று நிறுவனம் உறுதியாக நம்புகிறது.

Monday, June 10, 2019

நிதி நெருக்கடியில் சிக்கிய பாகிஸ்தான்

 நாடு கடுமையான நிதி நெருக் கடியில் சிக்கியிருக்கும்போது அதில் இருந்து மீள்வதற்கு கடன் வாங்குவது என்பது சாதாரண காரியமல்ல. பாகிஸ்தான் நிலைமை அப்படித்தான் இருக்கிறது. சர்வதேச நிதியம் (ஐஎம்எப்) பாகிஸ்தான் கேட்டதும் அள்ளிக் கொடுக்கத் தயாராக இல்லை. தருவதாக ஒப்புக் கொண்ட 600 கோடி டாலரைக் கூட இப்போது தருவதற்கு தயங்கி வருகிறது. பொதுவாக கடன் கொடுக்கும்போது, வாங்கும் நாடுகளுக்கு பலவிதமான நிபந்தனைகளை சர்வதேச நிதியம் விதிக்கும்.

குறிப்பாக வளரும் நாடுகளில் மானியங்களைக் குறைக்கச் சொல்லி வலியுறுத்தும். இது அங்கிருக்கும் ஏழை மக்களைப் பெரிதும் பாதிக்கும். பாகிஸ்தான் ராணுவம் தானாகவே தனது பட்ஜெட்டைக் குறைத்துக் கொண்டதற்கு பிரதமர் இம்ரான் கான் பாராட்டு தெரிவித்துள்ளார். உண்மையான நிலவரம் எல்லோ ருக்குமே தெரியும்.

ராணுவத்தின் பட்ஜெட் தொகை எவ்வளவு என இன்னமும் முடிவாக வில்லை. ஆனால் மொத்த உள்நாட்டு உற்பத்தியில் 4 சதவீதத்துக்கும் குறைவாகத்தான் செலவிடப்பட வேண்டும். ஸ்டாக்ஹோம் சர்வதேச அமைதி ஆராய்ச்சி மையத்தின் அறிக்கையின்படி, கடந்த 2018-ம் ஆண்டில் ராணுவத்துக்கு அதிகம் செலவிட்ட நாடுகளின் பட்டியலில், பாகிஸ்தான் 20-வது இடத்தில் இருக்கிறது. 1140 கோடி டாலரை செலவிட்டுள்ளது.

2004-ம் ஆண்டில் இருந்து இதுவரை மிகவும் அதிகம் செலவிடப்பட்டது இந்த ஆண்டில்தான். பாகிஸ்தானின் தீவிரவாதம் தொடர்பான நடவடிக்கை களை கவனிக்க நிதி நடவடிக்கை பணிக்குழு முடிவு செய்துள்ள இந்த நேரத்தில், பாகிஸ்தான் ராணுவம் தனது செலவுகளைக் குறைத்துக் கொள்ளும்படி வலியுறுத் தப்பட்டுள்ளது. இந்த பணிக்குழுவின் ஆய்வு ஜூலை மாதம் வருவதால், என்னாகுமோ என்ற பயத்தில் பாகிஸ்தான் இருக்கிறது.

ஏகப்பட்ட பாதுகாப்பு சவால்களை சந்தித்து வரும் பாகிஸ்தான் ராணு வத்தின் செலவைக் குறைத்துக் கொள்ளும் முடிவை பிரதமர் இம்ரான் கான் பாராட்டியிருப்பது, உண்மையான சூழலை மூடி மறைக்கும் விளம்பர நோக்கம்தான். ராணுவமும் ஐஎஸ்ஐ உளவு அமைப்பும் விரும்பினால்தான் எந்தத் தலைவரும் ஆட்சியே நடத்த முடியும் என்ற நிலையில் இருக்கும் நாட்டில், அந்த நாட்டின் ராணுவம் தானாகவே பெருந்தன்மையாக செலவைக் குறைத்துக் கொள்வதாகக் கூறியிருப்பது நம்பும்படியாகவா இருக்கிறது?

இதில் அடுத்த கட்ட சுவாரஸ்யமான விஷயம் என்னவென்றால், எந்த செலவை ராணுவம் குறைக்கப் போகிறது என்பதுதான். தீவிரவாதத் துக்கு எதிராக நடவடிக்கை எடுக்கப் போவதாகச் சொல்லி, உலக நாடு களிடம் இருந்து வாங்கும் நிதியை, இந்தியாவுக்கு எதிரான தீவிரவாதத்தை வளர்க்கவே பாகிஸ்தான் பயன் படுத்துகிறது என்ற குற்றச்சாட்டு ஏற்கனவே இருக்கிறது. கடந்த 2001-ம் ஆண்டு முதல் தீவிரவாதத்தை ஒடுக்க அளித்த நிதியை, பாகிஸ்தான் எப்படியெல்லாம் பயன்படுத்தியது என்பதை அமெரிக்காவை கேட்டால் விலாவாரியாக எடுத்துச் சொல்லும்.

இம்ரான் கானுக்கு சர்வதேச நிதியம் விதித்திருக்கும் நிபந்தனைகள் எல்லாம் பிரச்சினையே இல்லை. ஆனால் நாட்டின் பொருளாதார நிலைமை மிகவும் மோசமாகி, கடன் வாங்கினால்தான் ஆட்சியே நடத்த முடியும் என்ற சூழலில் இந்த நிபந்தனைகளை நிறைவேற்ற வேண்டி யிருக்கிறதே என்பதுதான். கடந்த ஆண்டு ஆகஸ்ட் மாதம் பதவிக்கு வந்ததில் இருந்தே, இம்ரானுக்கு ஒன்று மாற்றி ஒன்று கெட்ட செய்தியாகவே வந்து கொண்டிருக்கிறது. கடைசியாக வந்த கெட்ட செய்தி... கராச்சி அருகே அரபிக் கடலில், பெரிதும் பேசப்பட்ட கச்சா எண்ணெய் வளம் கண்டுபிடிப்பு முயற்சி, கடைசியில் தோல்வியில் முடிந்துவிட்டது. எண்ணெய் கிணறுகள் துளையிடும் பணிக்காக, ஏறக்குறைய 10 கோடி டாலர்கள் செலவிட்ட பிறகு எண்ணெய் கிடைக்காததால், அந்த திட்டம் கைவிடப்பட்டது. பாகிஸ்தானின் நடப்பு கணக்கு பற்றாக்குறை 1800 கோடி டாலராக உள்ள நிலையில், நாட்டின் பெட்ரோலியத் தேவையில் 85 சதவீதத்தை இறக்குமதி செய்யும் போது, பொருளாதாரம் இன்னும் மோசமாகத்தான் செய்யும். இதுபோக, ஆசியாவிலேயே மிகவும் மதிப்பிழந்த கரன்சியான பாகிஸ்தானின் ரூபாய், ஒரு டாலருக்கு 150 ரூபாய் என்ற அளவில் சரிந்துள்ளது.

பாகிஸ்தான் ராணுவத்தின் செலவுக் குறைப்பு நடவடிக்கை இந்தியாவில் இருக்கும் பாதுகாப்பு ஆய்வு நிபுணர்களை கவரவில்லை. இந்த நடவடிக்கையால், இந்தியாவுட னான தனது நிலையில் பாகிஸ்தான் எந்த மாற்றத்தையும் கொண்டு வரப்போவதில்லை என்கிறார்கள் அவர்கள். அதேபோல், ஆயுதங்கள் வாங்கிக் குவிப்பதையும் இந்தியா வுக்கு எதிராக தீவிரவாதத்தை தூண்டி விடுவதையும் பாகிஸ்தான் நிறுத்தாது என்கிறார்கள். பாகிஸ்தான் நிர்வாகத் தில் இருக்கும் சில புத்திசாலிகள், தீவிரவாதத்துக்கு ஆகும் செலவுகளை நினைத்துப் பார்த்தாலே பாகிஸ்தானில் மட்டுமல்லாது தெற்கு ஆசியாவிலும் ஏன், உலகம் முழுவதிலுமே நல்ல மாற்றங்கள் ஏற்படும். பிரதமர் நரேந்திர மோடி கூறியிருப்பதைப் போல், தீவிரவாத பிரச்சினை குறித்துப் பேசாமல், இரு நாடுகளுக்கு இடையிலும் எந்த உறவுக்கும் சாத்தியமில்லை.

Saturday, June 8, 2019

மெட்ரோ ரயில் ‘Daily Pass’ பற்றித் தெரியுமா ?

சென்னை மெட்ரோ ரயில் ‘Daily Pass’ பற்றித் தெரியுமா உங்களுக்கு? சென்னை மெட்ரோ ரயில் சேவையில் Daily Pass என்ற திட்டம் ஒன்று உள்ளது. இது குறித்து விளம்பரங்கள் ஏதும் செய்யவில்லை என்பதால் மக்களிடம் சென்று சேரவில்லை. எனவே சென்னை மெட்ரோ ரயில் சேவையில் வழங்கப்படும் ‘Daily Pass’ குறித்து இங்கு விளக்கமாகப் பார்க்கலாம்... சென்னை மெட்ரோ சேவையில் வெறும் 100 ரூபாய் கட்டணத்தில் காலை 6 மணி முதல் இரவு 10 மணி வரை எத்தனை முறை வேண்டுமானாலும் எந்த மெட்ரோ ரயில் நிலையங்கள் வேண்டுமானாலும் சென்று வரலாம்... இந்த ‘Daily Pass’-ஐ மெட்ரோ ரயில் நிலைய டிக்கெட் கவுன்ட்டர்களில் 150 ரூபாய் செலுத்துவதன் மூலம் பெறலாம். ஒரு நாள் முழுவதும் இந்த ‘Daily Pass’-ஐ பயன்படுத்திச் சுற்றிவிட்டு அதைத் திருப்பி அளித்தால் 50 ரூபாய் திருப்பி அளிக்கப்படும்... மேலும் இந்த ‘Daily Pass’-ஐ யார் வாங்கினார்களோ அவர்களே தான் பயன்படுத்த வேண்டும் என்ற அவசியமும் இல்லை... உங்களது குடும்ப உறுப்பினர்களும், நண்பர்களும் பயன்படுத்தலாம்...!!! இதுவே பேருந்து ‘Daily Pass’-ஐ- வாங்கியவர்கள் மட்டும் தான் பயன்படுத்த முடியும். பயணிகளின் எண்ணிக்கையை அதிகரிப்பதற்காக சென்னை மெட்ரோ ரயில் நிர்வாகம் புதிய திட்டமாக இதனை அறிமுகப்படுத்தியுள்ளது. மற்றவர்களும் அறிய பகிரலாமே...!

இந்தியாவிலேயே முதல்முறையாக ஆந்திராவில் 5 துணை முதல்வர்கள் முதல்வர் ஜெகன்மோகன் அறிவிப்பு

முதல்வர் ஜெகன்மோகன் ரெட்டி தலைமையில் ஒய்எஸ்ஆர் காங்கிரஸ் கட்சியின் செயற்குழு கூட்டம் தாடேபல்லியில் உள்ள அவரது இல்லத்தில் நேற்று நடைபெற்றது. படம்: பிடிஐ ஆந்திர அமைச்சரவை இன்று விரிவாக் கம் செய்யப்படுகிறது. புதிதாக 25 அமைச்சர்கள் பதவியேற்கின்றனர். நாட்டில் முதல்முறையாக மாநிலத்தில் 5 பேர் துணை முதல்வர்களாகப் பதவி யேற்க உள்ளனர். அமைச்சர்களின் பெயர்கள் அடங்கிய பட்டியலை ஆளு நர் நரசிம்மனிடம் முதல்வர் ஜெகன் மோகன் ரெட்டி நேற்று வழங்கினார். அண்மையில் நடந்த ஆந்திர சட்டப்பேரவைத் தேர்தலில் ஒய்எஸ்ஆர் காங்கிரஸ் கட்சி அமோக வெற்றி பெற்றது. மொத்தமுள்ள 175 தொகுதி களில் அந்த கட்சி 151 தொகுதிகளைக் கைப்பற்றியது. தெலுங்கு தேசத்துக்கு 23, ஜனசேனா கட்சிக்கு ஒரு தொகுதி மட்டுமே கிடைத்தன. ஆந்திராவில் மொத்தம் 25 மக்களவைத் தொகுதிகள் உள்ளன. இதில் 22 தொகுதிகளில் ஒய்எஸ்ஆர் காங்கிரஸ் வெற்றி பெற்றது. தெலுங்கு தேசம் கட்சிக்கு 3 இடங்கள் மட்டுமே கிடைத்தன. கடந்த 30-ம் தேதி ஆந்திராவின் புதிய முதல்வராக ஒய்எஸ்ஆர் காங்கிரஸ் தலைவர் ஜெகன் மோகன் ரெட்டி பதவியேற்றுக் கொண்டார். அன்றைய தினம் அவருடன் அமைச்சர்கள் யாரும் பதவியேற்கவில்லை. இதைத் தொடர்ந்து புதிய அமைச் சர்களை தேர்வு செய்வது தொடர்பாக முதல்வர் ஜெகன்மோகன் ரெட்டி தலைமையில் கட்சியின் செயற்குழு கூட்டம் தாடேபல்லியில் உள்ள அவரது இல்லத்தில் நேற்று நடைபெற்றது. இக்கூட்டத்தில் கட்சியின் 151 எம்.எல்.ஏக் களும் கலந்து கொண்டனர். முதல்வர் ஜெகன்மோகன் ரெட்டி பேசியபோது, " எனது அரசில் ஊழலுக்கு இடமில்லை. ஊழல் செய்பவர்கள் யாராக இருந்தாலும் தப்ப முடியாது" என்று தெரிவித்தார். கூட்டத்தில் யார் யாருக்கு அமைச் சர் பதவி வழங்குவது என்பது குறித்து ஆலோசனை நடத்தப்பட்டது. இறுதி யில் 25 பேர் கொண்ட அமைச்சரவை பட்டியல் தயாரிக்கப்பட்டது. இதில் 5 பேர் துணை முதல்வர்களாக பதவியேற்க உள்ளனர். புதிய அமைச்சர்களின் பட்டியலை விஜயவாடாவுக்கு வந்த ஆளுநர் நரசிம்மனிடம் முதல்வர் ஜெகன்மோகன் ரெட்டி வழங்கினார். ஒரு முஸ்லிம், ஒரு சத்திரியர், ஒரு வைசியர், 4 காப்பு சமுதாயத்தினருக்கு அமைச்சரவை யில் வாய்ப்பு வழங்கப்பட்டுள்ளது. மேலும் 7 பிற்படுத்தப்பட்டோர், 4 ரெட்டி சமுதாயத்தினர், 5 தலித்துகளும் அமைச்சரவையில் இடம்பெற்றிருப்ப தாகத் தெரிகிறது. சட்டப்பேரவைத் தலைவராக தம்மி னேனி சீதாராம், துணைத் தலைவராக கே. ரகுபதி ஆகியோர் பட்டியலில் இடம்பெற்றுள்ளனர். சித்தூர் மாவட்டம், நகரி தொகுதியில் இருந்து 2-வது முறையாக வெற்றி பெற்ற நடிகையும் கட்சியின் மகளிர் அணி தலைவியுமான ரோஜாவுக்கு அமைச்சர் பதவி வழங்கப்படவில்லை. அவருக்கு உள் துறை, மின்வாரியம் போன்ற துறைகள் வழங்கப்படலாம் என எதிர்பார்க்கப்பட்ட நிலையில் அவரது பெயர் புதிய அமைச்சரவை பட்டி யலில் இடம் பெறாதது கட்சி வட்டாரத்தில் பரபரப்பாகப் பேசப்படுகிறது. அமராவதியில் இன்று காலை நடைபெறும் விழாவில் 25 அமைச் சர்களுடன் கூடிய புதிய அமைச்சரவை பதவியேற்க உள்ளது. பேரவை வளாகத்தில் இதற்கான ஏற்பாடுகள் செய்யப்பட்டுள்ளன. காலை 11.49 மணிக்கு பதவி ஏற்பு விழா தொடங்க உள்ளது. இதில் சுமார் 5 ஆயிரம் பேர் கலந்து கொள்ள உள்ளனர். ஒரு மாநிலத்தில் 5 துணை முதல்வர்கள் பதவியேற்பது இதுவே முதல்முறையாகும். முன்னாள் முதல்வர் சந்திரபாபு நாயுடு அமைச்சரவையில் 2 துணை முதல்வர்கள் இருந்தனர். இதேபோல பல்வேறு மாநிலங்களில் இரு துணை முதல்வர்கள் பதவி வகித்துள்ளனர். உத்தரபிரதேசத்தில் தற்போது 2 துணை முதல்வர்கள் உள்ளனர். புதிதாக பதவியேற்கும் 5 துணை முதல்வர்களில் எஸ்சி, எஸ்டி, பிற்படுத்தப்பட்டோர், சிறுபான்மை யினர். காப்பு சமுதாயத்தினருக்கு வாய்ப்பளிக்கப்பட்டுள்ளதாக ஜெகன் மோகன் அறிவித்தார். வரும் 12-ம் தேதி ஆந்திர சட்டப் பேர வைக் கூட்டம் தொடங்குகிறது. முதல் நாளில் தற்காலிக சபாநாயகர் சம்பங்கி அப்பளநாயுடு புதிய எம்எல்ஏக் களுக்கு பதவிப் பிரமாணம் செய்து வைக்கிறார். வரும் 13-ம் தேதி சபாநாயகர் தேர்தலும், துணை சபாநாயகர் தேர்தலும் நடைபெற உள்ளது. புதிய சட்டப்பேரவையில் வரும் 14-ம் தேதி ஆளுநர் நரசிம்மன் உரையாற்றுகிறார். அன்றைய தினம் அலுவல் ஆய்வுக் குழு கூடி சட்டப்பேரவையை எவ்வளவு நாட்கள் நடத்துவது என்பது குறித்து தீர்மானம் செய்கிறது. ஆந்திர சட்டப்பேரவையில் தெலுங்கு தேசத்துக்கு 23 எம்எல்ஏக்கள் உள்ளனர். எனவே எதிர்க்கட்சித் தலைவராக சந்திரபாபு நாயுடுவின் செயல்பாடு எவ்வாறு இருக்கும் என்பதை அறிய அனைவரும் காத் திருக்கின்றனர் என்று அரசியல் நோக் கர்கள் தெரிவித்துள்ளனர்.

Friday, June 7, 2019

வங்கிகளுக்கான கடன் வட்டி விகிதங்களை ரிசர்வ் வங்கி 0.25 சதவீதம் குறைத்தது

பாரத ரிசர்வ் வங்கி நேற்று தனது நிதிக்கொள்கை முடிவுகளை அறிவித்தது. வங்கிகளுக்கான கடன் வட்டி விகிதங்களை இவ்வங்கி 0.25 சதவீதம் குறைத்துள்ளது. எனவே ரெப்போ ரேட் 5.75 சதவீதமாக குறைந்து இருக்கிறது. அதற்கேற்ப ரிவர்ஸ் ரெப்போ ரேட்டும் 5.50 சதவீதமாக குறைந்துள்ளது. பாரத ரிசர்வ் வங்கி நடப்பு நிதி ஆண்டில் (2019-20) இரண்டாவது முறையாக தனது நிதிக்கொள்கை ஆய்வறிக்கையை வெளியிட்டுள்ளது. சக்தி கந்ததாஸ் கவர்னராக பொறுப்பேற்ற பிறகு மூன்றாவது முறையாக ரிசர்வ் வங்கி தனது கடன் கொள்கை முடிவுகளை வெளியிட்டு இருக்கிறது. அவரது தலைமையின் கீழ் 6 உறுப்பினர்களைக் கொண்ட நிதிக்கொள்கை கமிட்டி வட்டி விகிதங்களை நிர்ணயித்துள்ளது. நிதிக்கொள்கை கமிட்டியின் 6 உறுப்பினர்களும் (சக்தி கந்ததாஸ் உள்பட) வட்டி விகிதத்தை 0.25 சதவீதம் குறைக்க வாக்களித்தனர். இந்த நிலையில் ரெப்போ மற்றும் ரிவர்ஸ் ரெப்போ விகிதங்கள் 0.25 சதவீதம் குறைக்கப்பட்டு முறையே 5.75 சதவீதம் மற்றும் 5.50 சதவீதமாக இருக்கின்றன. கடந்த 2018-ஆம் ஆண்டில் ஜூன் மாதம் 6-ந் தேதி அன்று வங்கி வட்டி விகிதங்கள் 4 ஆண்டுகளுக்குப் பின் முதல் முறையாக 0.25 சதவீதம் உயர்த்தப்பட்டது. பின்னர் ஆகஸ்டு 1-ந் தேதி மேலும் 0.25 சதவீதம் அதிகரிக்கப்பட்டது. எனவே ரெப்போ மற்றும் ரிவர்ஸ் ரெப்போ விகிதங்கள் முறையே 6.50 சதவீதம் மற்றும் 6.25 சதவீதமாக உயர்ந்தன. அக்டோபர் 5-ந் தேதி அன்று இந்த வட்டி விகிதங்கள் கூட்டப்படவோ, குறைக்கப்படவோ இல்லை. கடந்த ஆண்டு டிசம்பர் 5-ந் தேதி அன்றும் வட்டி விகிதங்களில் மாற்றம் செய்யப்படவில்லை. ஆனால் பிப்ரவரி 7-ந் தேதி அன்று 0.25 சதவீதம் குறைக்கப்பட்டது. ஏப்ரல் 5-ந் தேதி மீண்டும் 0.25 சதவீதம் குறைக்கப்பட்டது. இப்போது மேலும் 0.25 சதவீதம் குறைக்ப்பட்டுள்ளது. கடன் வட்டி விகிதங்கள் தொடர்பான ரிசர்வ் வங்கியின் கொள்கை முடிவுகளை பணவீக்கம்தான் நிர்ணயிக்கிறது. எனவே வழக்கம்போல் அது பற்றிய மதிப்பீடுகளையும் ரிசர்வ் வங்கி வெளியிட்டுள்ளது. இப்பணவீக்கம், நடப்பு நிதி ஆண்டின் முதல் அரையாண்டில் (ஏப்ரல்-செப்டம்பர்) 3-3.1 சதவீதமாக அதிகரிக்கும் என்றும், இரண்டாவது அரையாண்டில் (2019 அக்டோபர்-2020 மார்ச்) 3.4-3.7 சதவீதமாக குறையும் என்றும் இவ்வங்கி தெரிவித்து இருக்கிறது. நடப்பு நிதி ஆண்டில் (2019-20) பொருளாதார வளர்ச்சி 7 சதவீதமாக இருக்கும் என்று ரிசர்வ் வங்கி மறுமதிப்பீடு செய்துள்ளது. முந்தைய ஆய்வறிக்கையில் அது 7.2 சதவீதமாக இருக்கும் என தெரிவிக்கப்பட்டு இருந்தது. பாரத ரிசர்வ் வங்கியின் பணக்கொள்கை ஆய்வறிக்கை இரண்டு மாதங்களுக்கு ஒரு முறை வெளியாகிறது. இவ்வங்கியின் அடுத்த ஆய்வுக் கூட்டம் ஆகஸ்டு 5-ந் தேதி தொடங்கி தொடர்ந்து மூன்று தினங்கள் நடைபெறும். வட்டி விகிதங்கள் பற்றிய அறிவிப்பு அம்மாதம் 7-ந் தேதி (புதன்கிழமை) வெளிவரும்.

இந்தியாவில், 2025-ஆம் ஆண்டுக்குள் 8.8 கோடி 5ஜி இணைப்புகள் இருக்கும் ஜி.எஸ்.எம்.ஏ. அமைப்பு தகவல்

இந்தியாவில், 2025-ஆம் ஆண்டுக்குள் 8.8 கோடி 5ஜி இணைப்புகள் இருக்கும் என ஜி.எஸ்.எம்.ஏ. அமைப்பு தெரிவித்துள்ளது. 5ஜி என்பது செல்போன்களுக்கு மட்டுமே உரிய அகண்ட அலைவரிசை தொழில்நுட்பமாகும். நம் நாட்டில் இது விரைவில் அறிமுகமாக உள்ளது. தற்போது ஆரம்ப நிலையில் உள்ள இத்தொழில்நுட்பத்திற்கான களப்பரிசோதனைகள் நடப்பு ஆண்டு இறுதிக்குள் தொடங்கும் என எதிர்பார்க்கப்படுகிறது. 3ஜி, 4ஜி நெட்வொர்க்குகளை விட பத்து மடங்கு அதிகமான அழைப்புகள் மற்றும் தகவல் போக்குவரத்தை கையாளும் விதத்தில் 5ஜி தொழில்நுட்பம் இருக்கும் என்பது குறிப்பிடத்தக்கது. தகவல் பதிவிறக்க வேகம் 4ஜி நெட்வொர்க்கை விட பல நூறு மடங்கு அதிகமாக இருக்கும் என நிபுணர்கள் கூறுகின்றனர். உலகில் தற்போது 4ஜி தொழில்நுட்பம் பயன்பாட்டில் உள்ளது. நம் நாட்டில் 2020-ஆம் ஆண்டின் இடைப்பகுதியில் வணிகரீதியில் 5ஜி சேவை தொடங்கி விடும் என இத்துறையைச் சேர்ந்தவர்கள் கூறுகின்றனர். இந்நிலையில், அடுத்த 6 ஆண்டுகளில் (2025-ஆம் ஆண்டுவாக்கில்) தொடர் பயன்பாட்டில் 92 கோடி செல்போன் இணைப்புகள் இருக்கும் என்றும், அதில் 8.8 கோடி 5ஜி இணைப்புகள் இருக்கும் என்றும் ஜி.எஸ்.எம்.ஏ. முன்னறிவிப்பு செய்து இருக்கிறது. இதே காலத்தில் சுமார் 100 கோடி ஸ்மார்ட்போன்கள் பயன்பாட்டில் இருக்கும் என அந்த அமைப்பு கணித்துள்ளது. ரிலையன்ஸ் ஜியோ நிறுவனம் 2016-ஆம் ஆண்டு செப்டம்பர் 5-ந் தேதி 4ஜி செல்போன் சேவையை தொடங்கியது. இந்நிறுவனத்தின் வரவு இந்திய செல்போன் துறையில் பெரும் திருப்பத்தை ஏற்படுத்தியது. செல்போன் சேவையில் அடுத்த கட்ட வளர்ச்சிக்கு தயாராகி வரும் இந்நிறுவனம் 5ஜி தொழில்நுட்பத்தை அறி முகம் செய்ய தயாராகி வருவதாக கூறப் படுகிறது.

தொடர்ந்து தங்கம் விலை உயர்வு: ஒரு பவுன் ரூ.25 ஆயிரத்தை தொடுகிறது

தொடர் விலை உயர்வு காரணமாக தங்கம் விலை ஒரு பவுன் ரூ.25 ஆயிரத்தை தொடுகிறது. தங்கம் விலை கடந்த மாதம் (மே) தொடக்கத்தில் இருந்தே ஏற்ற இறக்கத்துடன் காணப்பட்டு வந்தது. கடந்த மாதம் 22-ந்தேதிக்கு பிறகு தொடர்ச்சியாக தங்கம் விலை உயர்ந்து கொண்டே இருக்கிறது. கடந்த 4-ந்தேதி ஒரு பவுனுக்கு ரூ.168-ம், நேற்று முன்தினம் பவுனுக்கு ரூ.152-ம் என தங்கம் விலை உயர்ந்து இருக்கிறது. நேற்றும் அதன் விலை அதிகரித்து தான் காணப்பட்டது. கடந்த 10 நாட்களில் ஒரு பவுன் ரூ.680 வரை உயர்ந்துள்ளது. நேற்று முன்தினம் ஒரு கிராம் ரூ.3 ஆயிரத்து 116-க்கும், ஒரு பவுன் ரூ.24 ஆயிரத்து 928-க்கும் தங்கம் விலை விற்பனை செய்யப்பட்டது. நேற்று மாலை நேர நிலவரப்படி, கிராமுக்கு 6-ம், பவுனுக்கு ரூ.48-ம் உயர்ந்து ஒரு கிராம் ரூ.3 ஆயிரத்து 122-க்கும், ஒரு பவுன் ரூ.24 ஆயிரத்து 976-க்கும் விற்பனை ஆனது. தங்கம் விலை இன்றும் (வெள்ளிக்கிழமை) உயரும் பட்சத்தில், ஒரு பவுன் ரூ.25 ஆயிரத்தை தொட்டுவிடும். இதேபோல், கடந்த ஜனவரி மாதம் 28-ந்தேதி தங்கம் விலை தொடர்ந்து உயர்ந்து, ஒரு கிராம் ரூ.3 ஆயிரத்து 129-க்கும், ஒரு பவுன் ரூ.25 ஆயிரத்து 32-க்கும் விற்பனை ஆனது. அதன் தொடர்ச்சியாக விலை அதிகரித்து கொண்டே சென்றது. அதிகபட்சமாக பிப்ரவரி மாதம் ஒரு கிராம் ரூ.3 ஆயிரத்து 230-க்கும், ஒரு பவுன் ரூ.25 ஆயிரத்து 840-க்கும் தங்கம் விற்பனை செய்யப்பட்டது. அதன்பிறகு விலை சற்று குறைந்தது. இந்த நிலையில் தற்போது விலை உயர்வு காரணமாக, ஒரு பவுன் தங்கம் ரூ.25 ஆயிரத்தை மீண்டும் தொடுகிறது. அதன்பின்னரும், விலை உயரும் என்றே தங்கம் வியாபாரிகள் தெரிவிக்கின்றனர். இதுகுறித்து சென்னை வைரம் மற்றும் தங்கம் வியாபாரிகள் சங்க தலைவர் ஜெயந்திலால் ஷலானி நிருபர்களிடம் கூறுகையில், ‘அமெரிக்கா, சீன பொருட்கள் மீது மறைமுகமாக பொருளாதார தடைவிதித்து கூடுதலாக சுங்கவரி விதித்து வருகிறது. அதேபோல், சீனாவும் அமெரிக்கா இறக்குமதி செய்யும் பொருட்களுக்கு அதிகமான வரி விதிக்கிறது. இப்படியாக இந்த இரு நாடுகளுக்கும் இடையே பொருளாதார போர் நிலவுகிறது. அதன் தாக்கம் காரணமாகவே தங்கம் விலை உயருகிறது. இந்த தாக்கம் நீடிக்கும் வரை தங்கம் விலை தொடர்ந்து அதிகரித்து கொண்டே தான் இருக்கும்’ என்றார்.

தொழில் வளர்ச்சி, வேலைவாய்ப்பை அதிகரிக்க நடவடிக்கை 24 மணி நேரமும் கடைகளை திறந்து வைக்கலாம் தமிழக அரசு அறிவிப்பு

தொழில் வளர்ச்சியை அதிகரிக்கும் வகையிலும், வேலைவாய்ப்பை பெருக்கும் நோக்கத்திலும் மத்திய அரசு சட்ட மசோதா ஒன்றை உருவாக்கி மாநில அரசுகளுக்கு அனுப்பி வைத்தது. கடைகள் மற்றும் வர்த்தக நிறுவனங்களை நாள் முழுவதும் திறந்து வைக்க இந்த மசோதா அனுமதி வழங்குகிறது. தங்கள் தேவைக்கு ஏற்ப இந்த சட்ட அனுமதியை பயன்படுத்திக் கொள்ளலாம் என்றும் மாநிலங்களை மத்திய அரசு கேட்டுக்கொண்டது. இதைத்தொடர்ந்து, இதுபற்றி தீவிரமாக ஆலோசித்து வந்த தமிழக அரசு, கடைகள் மற்றும் வர்த்தக நிறுவனங்களை 24 மணி நேரமும் திறந்து வைக்க தற்போது அனுமதி வழங்கி உள்ளது. இதுகுறித்து தமிழக தொழிலாளர் மற்றும் வேலைவாய்ப்பு துறை முதன்மைச் செயலாளர் சுனில் பாலிவால் வெளியிட்டுள்ள அரசாணையில் கூறப்பட்டு இருப்பதாவது:- மத்திய அரசின் தொழிலாளர் மற்றும் வேலை வாய்ப்பு துறை செயலாளர், கடைகள் மற்றும் நிறுவனங்கள் (வேலைவாய்ப்பு ஒழுங்குமுறைகள் மற்றும் சேவைகளில் கட்டுப்பாடுகள்) என்ற 2016-ம் ஆண்டுக்கான மாதிரி மசோதா ஒன்றை அனுப்பி இருந்தார். இந்த மசோதா மீது தொழிலாளர்கள், அவர்களின் பிரதிநிதிகள், சங்கங்கள் மற்றும் மாநில அரசுகளின் கருத்துகள் கேட்கப்பட்டன என்றும், அந்தந்த மாநிலங்கள் அங்குள்ள உள்ளூர் தேவைகளுக்கு ஏற்ப அதை திருத்தி சட்டமாக்கிக் கொள்ளலாம் என்றும் அதில் குறிப்பிடப்பட்டு உள்ளது. நாடு முழுவதும் பணி நிலைகளில் சமமான கட்டுப்பாடுகள் இருக்க வேண்டும் என்பதற்காகவும், தொழிலை ஊக்குவிப்பதோடு அதனுடன் வேலைவாய்ப்பையும் அதிகரிக்கச் செய்யும் நோக்கத்தில் இந்த மசோதா தயார் செய்யப்பட்டு இருப்பதாகவும் மத்திய அரசு கடிதம் எழுதி உள்ளது. மேலும், ஆண்டு முழுவதும் கடைகள், நிறுவனங்களை திறந்து வைக்கும் நேரம், மூடும் நேரம் ஆகியவற்றுக்கு இந்த மசோதா முழு சுதந்திரம் வழங்குகிறது. அதோடு, பாதுகாப்பு, கழிவறை, பெண்களின் கண்ணியத்துக்கு பாதுகாப்பு, அவர்களின் போக்குவரத்து வசதி போன்றவை அளிக்கப்படும் நிலையில் பெண்களுக்கு இரவு நேரப் பணிகள் வழங்கலாம். பெண்களை வேலையில் சேர்ப்பது, பயிற்சி வழங்குவது, பதவி உயர்வு மற்றும் இடமாற்றம் செய்வதில் பாலின பாகுபாடு காட்டக்கூடாது என்றும், பாதுகாப்பு மற்றும் தொழிலாளர் நலனுக்கு முக்கியத்துவம் வழங்கவேண்டும் என்றும் அந்த மசோதாவில் கூறப்பட்டு உள்ளது. இதுகுறித்து அரசுக்கு தமிழக தொழிலாளர்கள் ஆணையர் கடிதம் எழுதி உள்ளார். அதில், ஆரம்பமாக 3 ஆண்டுகளுக்கு 24 மணி நேரமும் கடைகள், நிறுவனங்களை திறக்க அனுமதிப்பது குறித்த முன்மொழிவை தெரிவித்து இருக்கிறார். அதன் அடிப்படையில், தமிழ்நாடு கடைகள் மற்றும் நிறுவனங்கள் சட்டம் 1947-ல் திருத்தம் செய்யப்படுகிறது. அதன்படி தமிழகத்தில் உள்ள அனைத்து கடைகள் மற்றும் நிறுவனங்களை, 3 ஆண்டுகளுக்கு 24 மணி நேரமும் திறந்து வைக்க நிபந்தனைகளுடன் அனுமதி அளிக்கப்படுகிறது. அதன்படி, பணியாளருக்கு வாரம் ஒரு நாள் சுழற்சி முறையில் விடுமுறை அளிக்க வேண்டும். ஒவ்வொரு நிறுவனத்திலும் அனைவருக்கும் தெரியும் இடத்தில் பணியாளர்களின் விவரங்கள் வைக்கப்பட வேண்டும். அவர்களின் விடுமுறை பற்றிய தகவல்களும் தெரிவிக்கப்பட வேண்டும். சம்பளம், கூடுதல் நேர பணிக்கான சம்பளம் போன்றவை வேலையாளின் வங்கி வைப்பு கணக்குக்கு அனுப்பப்பட வேண்டும். நாளொன்றுக்கு 8 மணிநேரத்துக்கு மேல் மற்றும் வாரம் ஒன்றுக்கு 48 மணி நேரத்துக்கு மேல் பணி அளிக்கக்கூடாது. கூடுதல் பணி அளித்தால் அது நாளொன்றுக்கு 10.30 மணி நேரத்துக்கு மேல், வாரத்துக்கு 57 மணி நேரத்துக்கு மேல் நீடிக்கக்கூடாது. கூடுதல் பணி நேரம் அளிக்காத நிலையில் பணியாளர் யாராவது வேலை செய்வது கண்டறியப்பட்டால் வேலை அளித்தவர் அல்லது மேலாளருக்கு தண்டனை விதிப்பதற்கான நடவடிக்கை எடுக்கப்படும். பொதுவான காலகட்டங்களில் பெண் ஊழியர்கள் இரவு 8 மணிக்கு மேல் பணியாற்ற தேவை இல்லை. பெண் பணியாளரிடம் எழுத்துப்பூர்வமான ஒப்புதல் பெற்ற பிறகே, அவருக்கு போதிய பாதுகாப்பு அளித்து இரவு 8 மணி முதல் மறுநாள் காலை 6 மணிவரை பணியாற்ற அனுமதிக்கலாம். ‘ஷிப்டு’ முறையில் பணியாற்றும் பெண்களுக்கு போக்குவரத்து வசதி செய்துதரப்பட வேண்டும். இந்த வசதி குறித்து நிறுவனத்தின் பிரதான வாசலில் நோட்டீஸ் ஒட்டப்பட்டிருக்க வேண்டும். பெண்களுக்கு எதிரான பாலியல் குற்றங்களை விசாரிப்பதற்கான குழுவை, நிறுவன உரிமையாளர் அமைக்க வேண்டும். இந்த நிபந்தனைகளில் ஏதாவது ஒன்று மீறப்பட்டாலும், அது தண்டனைக்கு உரிய குற்றமாக கருதப்பட்டு நடவடிக்கை எடுக்கப்படும். இவ்வாறு அதில் கூறப்பட்டு உள்ளது.

Wednesday, June 5, 2019

பயோ சென்சார் பேண்ட்

மருத்துவ துறையில், மனிதர்களுக்கு உதவும் பல நவீன முன்னேற்றங்கள் அதிகரித்து வரும் இந்த காலத்தில், இன்னொரு கருவியும் இந்த பட்டியலில் இணைந்துள்ளது. ரூட்கேர்ஸ் பல்கலைக்கழகத்தை சேர்ந்த பொறியாளர்கள் குழு கையில் வாட்ச் போன்று அணிந்து கொள்ளக்கூடிய பேண்ட் ஒன்றை தயாரித்துள்ளது. இந்த பேண்ட் ரத்தத்தில் இருக்கும் அணுக்களை அளவிடுகிறது. இதனுள்ளே இருக்கும் மிகச்சிறிய பயோ சென்சார் ஒரு சிறு துளி ரத்தத்தை ஆய்வு செய்து எவ்வளவு சிகப்பு அணுக்கள் இருக்கின்றன, எவ்வளவு வெள்ளை அணுக்கள் உள்ளன, ரத்த சோகை இருக்கிறதா என்பன போன்ற தகவல்களை அளிக்கிறது. உடனடியாக ரத்த பரிசோதனை செய்ய விரும்புபவர்கள் இந்த கருவியை உபயோகித்து எளிதாக தெரிந்து கொள்ளலாம். இது மட்டுமின்றி, லுகேமியா என்று சொல்லக்கூடிய ரத்த புற்றுநோயையும் இந்த பேண்ட் கண்டறிகிறது. இதனால் நோயின் ஆரம்ப நிலையிலேயே சிகிச்சை எடுத்து குணமாக்கலாம்.சர்க்கரை நோய் மட்டுமின்றி ரத்த சம்பந்தப்பட்ட அனைத்து வகையான நோய்களையும் இந்த சென்சார் கருவி கண்டறிகிறது. காற்றில் இருக்கும் நச்சு பொருட்களின் அளவையும் கூட சொல்லி விடுகிறது இந்த பேண்ட்.

ஆன்லைன் வாசிப்பிற்கு துணை நிற்கும் விளக்கு

ஆன்லைனில் புத்தகம் வாசிப்பது பலரின் பொழுபோக்காக இருக்கிறது. லேப்டாப் போன்ற கருவிகளை குறைவான வெளிச்சத்தில் அதிக நேரம் பார்ப்பதால் கண்களுக்கு பாதிப்பு ஏற்படும். பென் க்யூ ஸ்க்ரீன் பார் எனப்படும் இந்த சிறிய விளக்கை லேப்டாப்பின் மீது பொருத்திக் கொள்ளலாம். இதை பொருத்துவதற்கு ஸ்க்ரூ அல்லது டேப் ஏதும் தேவையில்லை. அடிப்புறத்தில் இருக்கும் கிளிப் மூலம் இதனை எளிதாக மாட்டிக் கொள்ளலாம். சுற்றுப்புற வெளிச்சத்திற்கு ஏற்ப இந்த பென் க்யூ தனது வெளிச்சத்தை அட்ஜஸ்ட் செய்து கொள்கிறது. இதனால் அதிக வெளிச்சத்தால் கண்கூச்சம் ஏற்படாமல் பார்த்துக் கொள்கிறது. மேலும் இதன் சமசீரற்ற ஆப்டிகல் வடிவம் மேசை வரை வெளிச்சத்தை பாய்ச்சும் என்றாலும், ஸ்க்ரீன் மீது அதிக ஒளியை உமிழாது. எந்த யு.எஸ்.பி. அவுட்லெட் மூலமாகவும் இந்த பென் க்யூ பாரை சார்ஜ் ஏற்றிக் கொள்ளலாம். திரையில் தோன்றும் வண்ணங்களுக்கு ஏற்ப ஒளியின் அளவை மாற்றி அமைத்துக் கொள்கிறது. நமது மனநிலைக்கு ஏற்ப மிதமான வெளிச்சத்தை உருவாக்கியும் ஆச்சரியப்படுத்துகிறது. ஆன் செய்த பிறகு இது தானியங்கியாகவே செயல்படும். தேவைப்பட்டால் வெளிச்சத்தின் அளவை நமக்கு ஏற்றார் போல வைத்துக் கொள்ளலாம்.

பயணத்துக்கு உதவும் ‘ஆஸ்ட்ரிச் பில்லோ’

இந்த தலையணை வெளியூர் பயணங்கள் அடிக்கடி மேற்கொள்வோருக்கு மிகவும் உபயோகமானது. பொதுவாக பாலைவனத்தில் எதிரிகளைப் பார்த்தால் தலையை மண்ணுக்குள் புதைத்துக் கொள்ளும் பழக்கம் கொண்டது நெருப்புக் கோழி (ஆஸ்ட்ரிச்). உங்கள் முகத்தை முழுவதுமாக மூடும் வகையில் வடிவமைக்கப்பட்டுள்ள இந்த தலையணைக்கு அந்தப் பெயர் வைக்கப்பட்டுள்ளது. இது மிகவும் மிருதுவான, நெளியும் வகையில் வடிவமைக்கப்பட்டுள்ளது. கண், காது ஆகியவை நன்கு மூடியுள்ளதால் இதைப் போட்டுக் கொண்டால் நிம்மதியான உறக்கம் நிச்சயம். இதைப் போட்டு தூங்கினால் புத்துணர்ச்சி கிடைக்கும். எந்த இடத்திலும், எத்தகைய சூழலிலும் இதை அணிந்து கொண்டு தூங்க முடியும். குட்டித் தூக்கம் போட நினைப்பவர்கள் கூட இதை அணிந்து கொண்டு தூங்கி புத்துணர்ச்சி பெறலாம். இதன் விலை ரூ.2,400.

பல்லில் ஒட்டிக் கொள்ளும் குட்டி சென்சார்

மருத்துவத் துறை தொழில்நுட்ப வளர்ச்சிகள் உலகின் பல்வேறு இடங்களில் உருவாக்கப்பட்டு செயல்படுத்தப்பட்டு வருகின்றன. மாசசூசெட்ஸ் நகரை சேர்ந்த டப்ட்ஸ் பல்கலைக்கழகத்தை சேர்ந்த பொறியாளர்கள் மிகச் சிறிய சென்சார் ஒன்றை கண்டுபிடித்துள்ளனர். இந்த சென்சாரை பல்லில் ஒட்டி வைத்து விட்டால் வாய் மூலமாக உடலினுள் செல்லும் பொருட்களை ஆய்வு செய்கிறது. இந்த குட்டி சென்சார் மூன்று அடுக்குகளால் ஆனது. ரேடியோ அலைகளின் அதிர்வெண்ணை வைத்து இது பொருட்களை ட்ராக் செய்கிறது. உடம்பில் எவ்வளவு க்ளுகோஸ் செல்கிறது, ஆல்கஹால் அளவு எவ்வளவு ரத்தத்தில் கலந்திருக்கிறது, உப்பின் அளவு எவ்வளவு இருக்கிறது போன்ற தகவல்களை செல்போனுக்கு செயலி மூலம் தகவலாக அனுப்புகிறது. உடலில் இருக்கும் சர்க்கரை, உப்பு, ஆல்கஹால் ஆகியவற்றின் அளவுகளை தெரிந்து கொள்வதால் நாம் எச்சரிக்கையுடன் இருக்கலாம்.ஆபத்து வரும் முன்னரே தற்காத்துக் கொள்ள இந்த சென்சார் உதவுகிறது. இந்த சென்சாரை பல்லில் மட்டுமின்றி தோலிலும் ஒட்டிக் கொள்ளலாம். ஒவ்வொன்றையும் அறிய தனித்தனியாக ரத்த பரிசோதனை மேற்கொள்ளாமல் ஒரு சிறிய சென்சார் மூலமே அத்தகவல்களை அவ்வப்போது அறிந்து கொள்ள முடியும் என்பதால் இந்த சென்சாருக்கு மருத்துவர்கள் பாராட்டு தெரிவித்து வருகின்றனர்.

சோலார் போர்டபிள் விளக்கு

வெளியூருக்கு செல்லும் போதெல்லாம் அவசர தேவைக்கு டார்ச் லைட் போன்றவற்றை எடுத்துச் செல்வது அவசியமாகும். ஆனால் இவற்றுடன் பேட்டரி உள்ளிட்டவற்றையும் எடுத்துச் செல்வதைத் தவிர்க்கும் வகையில் சூரிய ஆற்றலில் இயங்கும் விளக்குகள் இப்போது விற்பனைக்கு வந்துள்ளன. அந்த வகையில் பயோலைட் நிறுவனம் சுற்றுப் பயணம் செய்யும்போது எடுத்துச் செல்லும் வகையில் போர்டபிள் விளக்கை அறிமுகம் செய்துள்ளது. ஒருங்கிணைந்த சோலார் பேனலைக் கொண்டதாக இது வந்துள்ளது. அதாவது விளக்கு ஒருபுறமும், மறுபக்கத்தில் சோலார் பேனலும் உள்ளன. இதனால் இந்த விளக்கின் மீது சூரிய ஒளி படும்படி இருந்தாலே போதும். சூரிய ஒளியில் 7 மணி நேரத்தில் இதில் உள்ள பேட்டரி முழுமையாக சார்ஜ் ஆகிவிடும். இந்த விளக்கில் வெளிச்சம், கொண்டாட்டங்களுக்கான பலவித ஒளி என தனித்தனியாக வெளிச்சத்தைப் பெற முடியும். சூரிய ஒளி இல்லாத பகுதியில் யு.எஸ்.பி. சாக்கெட் மூலம் சார்ஜ் செய்தால் 2 மணி நேரத்தில் இது முழுவதுமாக சார்ஜ் ஆகிவிடும். இது தொடர்ந்து 50 மணி நேரம் எரியும். இதன் விலை சுமார் ரூ.1,600.

செவிலியர்களுக்கு உதவும் தானியங்கி சக்கர நாற்காலி

மருத்துவமனைகளில் நோயாளிகளை சக்கர நாற்காலிகளில் அமர வைத்து நீண்ட தூரம் நடப்பது மருத்துவமனை ஊழியர்களுக்கும் செவிலியர்களுக்கும் மிகுந்த சிரமமாக இருப்பதை அறிந்த சிங்கப்பூர் நிறுவனம் ஒன்று தானியங்கி சக்கர நாற்காலிகளை உருவாகியுள்ளது. சிங்கப்பூரின் ஆராய்ச்சி மற்றும் தொழில்நுட்ப நிறுவனத்துடன் எம்.ஐ.டி. விஞ்ஞானிகள் குழுவும் இணைந்து ஸ்மார்ட் என்னும் உலகின் முதல் தானியங்கி சக்கர நாற்காலிகளை தயாரித்துள்ளது. நோயாளி இதில் ஏறி அமர்ந்ததும் தானாகவே இந்த நாற்காலி நகர்ந்து அவரது அறைக்கு கூட்டி செல்கிறது. இந்த நாற்காலியில் பொருத்தப்பட்டுள்ள கணினியில் இருக்கும் கட்டளைகளுக்கு ஏற்ப இது செயல்படுகிறது குறுகலான பாதைகளிலும் நோயாளியை இடித்து விடாமல் செல்கிறது இந்த நாற்காலி. எதிரே ஏதேனும் தடைகள் தென்பட்டால் சட்டென்று நிறுத்தி விடுகிறது. இதற்கு ஆறு சக்கரங்கள் பொருத்தப்பட்டுள்ளன. அதனால் நோயாளிகள் கீழே விழுந்து விடுவோமோ என்கிற பயமின்றி பாதுகாப்பாக அமரலாம். சிங்கப்பூரில் இருக்கும் சங்கி மருத்துவமனையில் இது சோதனை செய்யப்பட்டு பாராட்டுகளையும் பெற்றது. இனி செவிலியர்கள் நாற்காலி தள்ளுவதில் அதிக நேரம் கழிக்காமல் நோயாளிகளுக்கு தேவையான பணிகளை செய்வதில் தங்கள் நேரத்தை பயனுற செலவழிக்கலாம் என்று தெரிவிக்கின்றனர் இந்நிறுவனத்தினர்.

லீவ் டிராவல் அலவன்ஸ் பெறுவது எப்படி?

பெரும்பாலும் அரசு நிறுவனங்களில் நான்கு ஆண்டுகளுக்கு ஒரு முறை சுற்றுலா செல்வதற்கான தொகையை அளிக்கின்றனர். எல்.டி.ஏ. (Leave Travel Allowance) எனப்படும் இந்த சலுகையை நான்கு ஆண்டுகளுக்கு ஒரு முறைப் பயன்படுத்திக் கொள்ளலாம். சில தனியார் நிறுவனங்களும் இத்தகைய வசதியை பணியாளர்களுக்கு வழங்குகின்றன. இதன் மூலம் ஒரு குடும்பத்தில் கணவன், மனைவி, இரண்டு குழந்தைகள், உடனிருக்கும் பெற்றோர், உடன் பிறந்தோரையும் அழைத்துச் செல்லலாம். இந்த சலுகை இதற்கு கிடைக்கும் வருமான வரிசலுகை பற்றிய விவரங்களைப் பார்ப்போம். சுற்றுலா என்கிற போது இதற்கேற்ப எல்.டி.ஏ. விடுப்பாக இருக்க வேண்டும். மருத்துவ விடுப்பை பயன்படுத்தி சுற்றுலாவுக்கு சென்று வந்து சுற்றுலா செலவு கோர முடியாது.பொதுவாக சுற்றுலாவுக்கு ஆகும் மொத்த செலவயையும் திரும்பப் பெறலாம் (கிளெய்ம்) என்று நினைக்கின்றனர். ஆனால் சுற்றுலா செல்வதற்கான போக்குவரத்து செலவுகளை மட்டுமே திரும்பப் பெற முடியும். ரெயிலில் (முதல் ஏ.சி. வகுப்பு), விமானத்தில் (எகானமி வகுப்பு), கார், பஸ் உள்ளிட்டவற்றில் பயணித்தால் அதற்குரிய ரசீதை சமர்ப்பிப்பதன் மூலம் திரும்பப் பெறலாம். பொதுவாக இந்தியாவில் சுற்றுலா மேற்கொள்வதற்கு மட்டுமே எல்.டி.ஏ. அனுமதி உண்டு. வெளிநாட்டு சுற்றுலாவுக்கு அனுமதி கிடையாது. எல்.டி.ஏ. அளிக்கப்படும் தொகைக்கு வரிச் சலுகையை வருமான வரிச் சட்டம் பிரிவு 10 (5)ன் கீழ் பெற முடியும். கணவன், மனைவி இருவரும் பணி புரிபவராக இருந்தாலும், தனித்தனியே எல்.டி.ஏ. திரும்பப் பெறலாம். இருவரின் எல்.டி.ஏ. தொகைக்கும் வரிச்சலுகை உண்டு. இதனால் இருவர் பணிபுரிந்தால் இரண்டு இடங்களுக்கு சுற்றுலா செல்லலாம்.

மேகங்கள் வரவேற்கும் மேகமலை

தமிழகத்தில் கோடைக்காலத்தில் சுற்றுலா செல்ல பல பகுதிகள் இருந்தாலும், கோடைக் காலத்திலும் சுற்றுலாப் பயணிகள் நெரிசல் குறைவாக இருக்கும் பகுதிகளுள் ஒன்றாக திகழ்கிறது மேக மலை. மேகங்கள் தவழ்ந்து செல்லும் மலைப் பகுதியாக இருப்பதால் இதற்கு இந்தப் பெயர் வந்திருக்கலாம். தேனி மாவட்டத்தில் உள்ள கம்பம் பள்ளத்தாக்கின் கிழக்குப் பகுதியில் உயர்ந்து நிற்கும் இந்த மலைத் தொடர், மேற்குத் தொடர்ச்சி மலை மற்றும் வருஷநாடு மலைத் தொடரால் இணைந்துள்ளது. இதனால் திடீரென பெய்யும் மழை, மேகங்கள் தவழ்ந்து செல்லும் பசுமை போர்த்திய பகுதியைப் பார்க்கும்போதே பரவசம் பீறிடும். இது மதுரையிலிருந்து சுமார் 145 கி.மீ தொலைவில் அமைந்துள்ளது. சின்னமனூர் சென்று அங்கிருந்து மேகமலைக்கு செல்வது எளிது. இந்த மலை உச்சிக்கு செல்ல 18 கொண்டை ஊசி வளைவுகளைக் கடந்தாக வேண்டும். ஒற்றை சாலை என்பதால் கார் பயணம் மட்டுமே சிறப்பானது. அதிலும் எஸ்.யு.வி. ரக கார்களை மட்டுமே பயன்படுத்தவும். சாலைகள் சற்று மோசமாக இருப்பதால் சிறிய ரக கார்களைத் தவிர்ப்பது நல்லது. மலை உச்சிக்கு செல்வதற்கு பக்கவாட்டில் தடுப்புச் சுவர் உள்ளிட்ட பாதுகாப்பு ஏற்பாடுகள் கிடையாது. எனவே ஜாக்கிரதையாக செல்வது நல்லது. இரண்டு மலைத் தொடர்களுக்கு இடையே ஆங்காங்கே பசுமையான தேயிலைச் செடிகள் சூழ அழகான நீர் தேக்கங்கள் இருக்கின்றன. மலையின் மேல் பகுதியில் மகாராஜா மெட்டு என்ற இடத்திலிருந்து கம்பம் பள்ளத்தாக்கின் முழு அழகையும் ரசிக்கலாம். இப்பகுதியிலிருந்துதான் வைகை ஆறு உருவாவதாகக் கூறப்படுகிறது. மேக மலைக்கு ஹைவேஸ் மவுன்டெய்ன் என்ற பெயரும் உண்டு. மேற்குத் தொடர்ச்சி மலையின் ஒரு பகுதியாக இது உள்ளது. இங்கு தேயிலை மற்றும் ஏலக்காய், காபி எஸ்டேட்கள் அதிகம். இது கடல் மட்டத்திலிருந்து 1,500 மீட்டர் உயரத்தில் அமைந்துள்ளது. மலை சிகரங்களுக்கு நடுவை அமைந்துள்ள ஒரு பள்ளத்தாக்கு இது. இரண்டு மலைகளுக்கு இடையே கட்டப்பட்டுள்ள அணையை இங்கே பார்க்க முடியும். நீர்தேக்கத்திலிருந்து வெளியேறும் நீர்தான் சுருளி அருவிக்குச் செல்கிறது. அருவியிலிருந்து வெளியேறும் நீர் தூவானமாக காற்றில் சிதறி தூவானம் என்ற பகுதியில் சிலீரென்று வீசுகிறது. இதனாலேயே இப்பகுதி தூவானம் என்றழைக்கப்படுகிறது. மலைப் பகுதியில் தங்குவதற்கு முன்பதிவு செய்ய வேண்டும். மேலே 13 அறைகள் மட்டுமே உள்ளன. இங்கு தங்குவதாயிருந்தால் முன்பதிவு செய்யவேண்டும். யானைகள் நடமாட்டம் அதிகமாக இருப்பதால் மலை உச்சிக்கு செல்பவர்கள் மாலையே திரும்ப வேண்டும் என வனத்துறை வலியுறுத்துகிறது. இங்கிருந்து தேக்கடிக்கும் செல்லலாம். அமைதியை விரும்பும் இயற்கை ஆர்வலர்களுக்கு ஏற்ற சுற்றுலா இடமாக மேகமலை திகழ்கிறது.

கடற்கரைகளின் எழில் நகரம் புதுச்சேரி

இந்தியாவில் உள்ள யூனியன் பிரதேசங்களில் தமிழகத்தை ஒட்டியுள்ள ஒரே பகுதி புதுச்சேரிதான். பிரெஞ்சு காலனியாதிக்கத்திலிருந்த இந்தப் பகுதியில் பிரான்ஸின் தாக்கத்தை பார்க்கலாம். உள்நாட்டு சுற்றுலாப் பயணிகள் மட்டுமின்றி அதிக அளவில் வெளிநாட்டு பயணிகளை ஈர்க்கும் நகராகவும் இது உள்ளது.அழகான கடற்கரை பகுதிகள், சாலைகள், நேர்த்தியான தெருக்கள் என பல பெருமைகளை உள்ளடக்கியது புதுச்சேரி.
பிரெஞ்சு கட்டிடக் கலையைப் பறைசாற்றும் புராதன கட்டிடங்கள், விளையாட்டுப் பூங்காக்கள், குதூகலிக்க கடற்கரை நீர் விளையாட்டு, கடல் பயணம், அருங்காட்சியகம் என அனைத்தும் உள்ள ஒரே ஊர் புதுச்சேரி. இந்த நகரின் சாலைகள் ஒரே நேர்க்கோட்டில் அமைந்துள்ளது இதன் தனிச் சிறப்பு. எந்தச் சாலையில் சென்றாலும் அது கடற்கரையில்தான் போய் முடியும்.

புதுச்சேரியில் பொழுது போக்கிற்கான முக்கிய இடங்களுள் கடற்கரை முக்கியமானது. தலைமைச் செயலகம் அருகே அமைந்துள்ள கடற்கரை 1.5 கிலோமீட்டர் நீளமுடையது. கடற்கரையை ஒட்டி அமைந்துள்ள சாலையில் ரசித்தபடி நடந்து செல்வது அழகான சுகம்தரும். மாலை நேரங்களில் காந்தி சிலை அருகே கலை நிகழ்ச்சிகள் நடைபெறுவதைக் காணலாம்.

கடற்கரைக்கு அருகே உள்ளது பாரதிபூங்கா. அங்கே குழந்தைகள் விளையாட வசதி உண்டு. குடும்பத்துடன் உட்கார்ந்து அமைதியாக பொழுதைக் கழிக்கலாம். மிகவும் ரம்மியமான பகுதி இது. இந்தப் பூங்காவை ஒட்டியே புதுச்சேரி சட்டப் பேரவை வளாகம், ஆளுநர் மாளிகை, மணக்குள விநாயகர் ஆலயம், அரவிந்தர் ஆசிரமம் ஆகியன உள்ளன. இவற்றை சற்று காலாற நடந்தே சென்று பார்க்க முடியும். அந்த அளவுக்கு இவை இப்பகுதியில் அருகருகே அமைந்துள்ளன. இங்குள்ள அருங்காட்சியகத்தில் ஏராளமான கலைப் பொக்கிஷங்கள் உள்ளன. ஆனந்தரங்கம் பிள்ளை அருங்காட்சியகம், பாரதியார், பாரதிதாசன் வாழ்ந்த வீடுகளையும் பார்க்கலாம். பேருந்து நிலையம் அருகே உள்ளது தாவரவியல் பூங்கா. இது 1826-ம் ஆண்டு அமைக்கப்பட்டதாகும். பிரெஞ்சு வடிவமைப்பில் உருவாக்கப்பட்ட இந்த தாவரவியல் பூங்கா, தென்னிந்தியாவின் சிறந்த பூங்காக்களுள் ஒன்றாகக் கருதப்படுகிறது. 1,500-க்கும் மேற்பட்ட தாவர வகைகள் இங்கு உள்ளன. இங்குள்ள இசை நீரூற்று அனைவரையும் கவரும்.

ரோமானியர்களின் வர்த்தக மையமாகத் திகழ்ந்த இடம் அரிக்க மேடு பகுதியாகும். புதுச்சேரியிலிருந்து 4 கி.மீ. தொலைவில் அரியாங்குப்பம் ஆற்றின் கரையில் அமைந்துள்ளது. ரோமானியர்கள், சோழர்கள், பிரான்ஸ் நாட்டவர்கள் சார்ந்த குறிப்புகள் இங்குள்ளன.இங்குள்ள கடற்கரை பகுதிகளில் 6 கடற்கரை பகுதிகள் மிகவும் பிரசித்தமானது. ஆரோவில் கடற்கரை, புரோமினேட் கடற்கரை, பாரடைஸ் பீச், செரினிடி பீச், மாஹே பீச், காரைக்கால் பீச்.

புதுச்சேரியிலிருந்து கடலூர் செல்லும் சாலையில் 7 கி.மீ. தூரத்தில் இயற்கை எழில் கொஞ்சும் வகையில் சுண்ணாம்பாறு படகுத்துறை உள்ளது. வங்கக் கடலை ஒட்டி சுண்ணாம்பாறு கடலில் கலக்கும் பகுதியில் இப்படகுத்துறை உள்ளது. சுண்ணாம்பாற்றில் பயணம் செய்வது கடலில் செல்வது போன்ற உணர்வைத் தரும். பயணம் முடிவில் பாரடைஸ் பீச்சை அடையலாம். அழகான தீவு போல இது காட்சி தருகிறது. சுண்ணாம்பாற்று தண்ணீரும், கடலில் இருந்து வரும் பேக் வாட்டரும், எதிரே கடலும் தீவு போன்ற கடற்கரைப்பகுதி மணல் வெளியும் ரம்மியமான சூழலை அளிக்கும். இந்த பகுதியைப் பார்க்கும்போதே வெளிநாட்டில் இருப்பதை போன்ற உணர்வு மேலிடும். இங்கு நீர் விளையாட்டுகள் பல உள்ளன. சாகசப் பிரியர்களுக்கு ஏற்ற இடம்.

ஆரோவில் பீச்

இது 1968-ம் ஆண்டு உருவாக்கப்பட்டது. 121 நாடுகள் மற்றும் இந்தியாவின் அனைத்து மாநிலங்களிலிருந்தும் மண் எடுத்துவரப்பட்டு தாமரை மொட்டு வடிவமைப்பு உள்ள இடத்தில் வைக்கப்பட்டுள்ளது. இங்கு மாத்ரி மந்திர் என்ற தியான மண்டபமும் உள்ளது. இதைச் சுற்றி 12 பூங்காக்கள் உள்ளன. ஆரோவில் நுழைவுப் பகுதியிலேயே பார்வையாளர்கள் மையமும் உள்ளது. ஆரோவில் பற்றிய கண்காட்சி, படக்காட்சி ஆகியவற்றை காணலாம். உணவு விடுதியும் உள்ளது. ஆரோவில்லில் உற்பத்தி செய்யப்படும் கைவினைப் பொருட்களை விற்பனை செய்யும் அங்காடிகளும் இங்கு உள்ளன. காரைக்கால், மாஹே, ஏனாம் ஆகிய பகுதிகளும் இதன் கட்டுப்பாட்டில் வருவதால் இங்குள்ள கடற்கரைப் பகுதிகளும் சிறப்பாக பராமரிக்கப்பட்டு சுற்றுலாப் பயணிகளை ஈர்க்கின்றன. இப்பகுதியில் 50 வெவ்வேறு நாடுகளைச் சேர்ந்த குடிமக்களையுடைய சர்வதேச நகராக இது திகழ்கிறது.

புதுச்சேரியில் தங்குமிடங்கள் அதிகம் உள்ளன. அவரவர் வசதிக்கேற்ப அறைகளில் தங்கலாம். குடும்பத்தினருடன் தங்குவதற்கேற்ற விடுதிகளும் உள்ளன. அனைத்து வகையான உணவுகளும் கிடைக்கும். புதுச்சேரியை நடந்தே ரசிக்கலாம். மாலையில் சைக்கிள் ரிக்ஷாக்களில் பயணிப்பது சுகமான அனுபவமாக இருக்கும். சைக்கிளில் நகரைச் சுற்றி வர வாடகை சைக்கிளும் கிடைக்கிறது. குறைந்த செலவில் சுற்றுலா செல்ல விரும்புவோர் அவசியம் செல்ல வேண்டிய நகரங்களில் புதுச்சேரியும் ஒன்று.

டொயோட்டா ‘கிளன்ஸா’

கார் தயாரிப்பில் முன்னணியில் உள்ள டொயோட்டா நிறுவனம் தனது புதிய மாடல் காரை கிளன்ஸா என்ற பெயரில் அறிமுகம் செய்ய உள்ளது. ஜப்பானைச் சேர்ந்த டொயோட்டா நிறுவனம் மற்றொரு கார் தயாரிப்பு நிறுவனமான சுஸுகியுடன் கூட்டு சேர்ந்தது. இதன் அடிப்படையில் சுஸுகியின் பிரபல மாடலான பலேனோவைப் போன்ற வடிவமைப்பில் புதிய காரை டொயோட்டா உருவாக்கியுள்ளது. இதற்கு கிளென்ஸா என பெயர் சூட்டப்பட்டுள்ளது. புதிய கார் பாரத் புகை விதி 6-க்கு ஏற்ப உருவாக்கப்பட்டுள்ளது. இது நடுத்தர ரக ஹைபிரிட் மாடல் காராகும். இதில் 1.2 லிட்டர் கே.12சி டியூயல் என்ஜின் உள்ளது. இத்தகைய என்ஜின்தான் சமீபத்தில் பலேனோ மாடலிலும் பயன்படுத்தப்பட்டது. இது 90 ஹெச்.பி. திறனையும் 113 நியூட்டன் மீட்டர் டார்க் இழுவிசையையும் வெளிப்படுத்தக் கூடியது. இதில் 5 ஸ்பீடு கியர் பாக்ஸ் உள்ளன. இது தவிர 1.2 லிட்டர் பெட்ரோல் என்ஜின், கே.12பி. மாடலும் தயாராகிறது. இது 83 ஹெச்.பி. திறனும் 113 நியூட்டன் மீட்டர் டார்க் இழுவிசையும் கொண்டது. இதில் சி.வி.டி. கியர் பாக்ஸ் மற்றும் 5 ஸ்பீடு மானுவல் கியர் வசதியும் உள்ளது. இந்தக் கார் சோதனை ஓட்டத்தில் ஒரு லிட்டருக்கு 21.01 கி.மீ. தூரம் ஓடியதாக இந்நிறுவனம் தெரிவித்துள்ளது. இதில் ஜி.எம்.டி. (ஸ்மார்ட் ஹைபிரிட்) மாடலானது ஒரு லிட்டருக்கு 23.87 கி.மீ. தூரம் ஓடியது. இதில் சி.வி.டி மாடல் 19.56 கி.மீ. தூரம் ஓடியதாக இந்நிறுவனம் தெரிவித்துள்ளது. இவை அனைத்துமே மாருதி சுஸுகி பலேனோ வழக்கமாக சாலைகளில் ஓடும் அளவிற்கு இணையாக உள்ளது. இதில் ஆட்டோமேடிக் கிளைமேட் கண்ட்ரோல் வசதி, 7 அங்குல தொடுதிரை கொண்ட இன்போடெயின்மென்ட் சிஸ்டம், ஆண்ட்ராய்டு ஆட்டோ, ஆப்பிள் கார் பிளே, நேவிகேஷன் வசதி, குரல் வழி கட்டுப்பாடு ஆகியன உள்ளன. பாதுகாப்பு வசதியாக முன்புறம் 2 ஏர் பேக்குகள், இ.பி.டி. வசதி, ரியர் பார்க்கிங் சென்சார் வசதி, ரிவர்ஸ் கேமரா ஆகியன இதில் உள்ள சிறப்பம்சங்களாகும். வேகக் கட்டுப்பாடு மற்றும் சீட் பெல்ட் அறிவுறுத்தல் வசதி ஆகியனவும் இதில் உள்ளது. இந்த காருக்கும் டொயோட்டா நிறுவனம் மூன்று ஆண்டு அல்லது ஒரு லட்சம் கி.மீ. தூரத்துக்கு உத்தரவாதம் அளிக்கும் என்று தெரிகிறது. இந்தகார் ஹூண்டாய் ஐ 20, ஹோண்டா ஜாஸ், ஆகிய கார்களுக்கு போட்டியாக இருக்கும் என்று கருதப்படுகிறது.

மீண்டும் வருகிறது ஸ்கோடா ஆக்டாவியா ஆர்.எஸ்.

கார்களைத் தயாரிக்கும் ஸ்கோடா நிறுவனம் தனது பிரபல மாடல் ஆர்.எஸ். ரக கார்களை மீண்டும் இந்தியாவில் விற்பனை செய்ய திட்டமிட்டுள்ளது. ஆர்.எஸ். 245 மாடல் முந்தைய மாடலைக் காட்டிலும் 15 ஹெச்.பி. கூடுதல் திறன் கொண்டது. இது 370 நியூட்டன் மீட்டர் டார்க் இழுவிசையைக் கொண்டது. இந்த ஆர்.எஸ். மாடலானது 2017-ம் ஆண்டு செப்டம்பர் மாதம் அறிமுகம் செய்யப்பட்டது. இந்த மாடல் தொடக்கத்தில் 300 மட்டுமே வெளிநாட்டிலிருந்து இறக்குமதி செய்யப்பட்டு இங்கு விற்பனை செய்யப்பட்டது. கூடுதலாக முன்பதிவுகள் இருக்கவே 200 கார்களை மேலும் இறக்குமதி செய்து விற்பனை செய்தது. அதன் பிறகு இந்த மாடல் விற்பனையை முற்றிலுமாக நிறுத்திவிட்டது ஸ்கோடா. இப்போது வெளிநாட்டிலிருந்து கார்களை இறக்குமதி செய்து விற்பதற்கான விதிமுறைகளை அரசு தளர்த்திஉள்ளது. புதிய விதிமுறையின்படி நிறுவனங்கள் ஆண்டுக்கு 2,500 கார்களை முழுதாகவோ அல்லது உதிரி பாகங்களாகவோ இறக்குமதி செய்து கொள்ளலாம் என அரசு அறிவித்துள்ளது. இதனால் ஆர்.எஸ். மாடல் கார்களை மீண்டும் விற்பனை செய்ய ஸ்கோடா திட்டமிட்டுள்ளது. சமீபத்தில் இந்நிறுவனத்தின் கரோக் மாடல் இந்த முறையில் இறக்குமதி செய்யப்பட்டு விற்பனை செய்யப்பட்டது. இந்தியாவில் இறக்குமதி செய்யப்பட உள்ள ஆர்.எஸ். மாடல் காரானது ஐரோப்பிய நாடுகளில் அதிகம் விரும்பும் வடிவமைப்பில் தயாரிக்கப்பட்டதாகும். இது இந்திய மாடலைக் காட்டிலும் 15 மி.மீ. உயரம் குறைவு. ஆனால் சக்கரங்கள் 18 அங்குலம் கொண்டவை. இதில் 10.25 அங்குல தொடுதிரை, ஸ்போர்ட்ஸ் வியூ, வெர்ச்சுவல் காக்பிட் டிஜிட்டல் இன்ஸ்ட்ரூமென்ட் கிளஸ்டர் உள்ளது. முந்தைய 230 ஹெச்.பி. திறன் கொண்ட ஆக்டாவியா ஆர்.எஸ். விலை ரூ.25.50 லட்சமாகும். புதிய மாடல் விலை ரூ.40 லட்சமாக இருக்கும் எனத் தெரிகிறது. இறக்குமதி செய்யப்படும் காருக்கு இந்த விலை தருவதற்கும் வாடிக்கையாளர்கள் உள்ளனர். இதனால் ஆர்.எஸ். மாடல் பெரும் வரவேற்பைப் பெறும் என நிறுவனம் கருதுகிறது.

இந்திய சந்தைக்கு வரும் ஸ்மார்ட் கார்

சமீபத்தில் அறிமுகமாகியுள்ள ஹூண்டாய் வென்யூ காரில் புளூ லிங்க் இணைப்பு வசதி ஏற்படுத்தப்பட்டுள்ளது. இதன் மூலம் உங்களுக்கும் உங்கள் காருக்குமான இடை வெளி வெகுவாகக் குறைந்துவிடும் இது முழுக்க முழுக்க செயற்கை நுண்ணறிவு (ஆர்டிபிஷியல் இன்டெலிஜன்ஸ்) தொழில்நுட்பத்தின் அடிப்படையில் செயல்படுகிறது. இதன் மூலம் தூரத்திலிருந்தே காரை ஆன் செய்வது, ஆப் செய்வது போன்ற இயக்கங்களை மேற்கொள்ள முடியும். கார் திருடு போனால் அது எங்கிருக்கிறது என்பதையும் எளிதில் கண்டறிய முடியும். காரை மேற்கொண்டு நகராமல் நிறுத்த முடியும்.

ஸ்மார்ட்போன் ஆப் (செயலி) மூலம் காரின் ஹாரன், விளக்குகளை தொலை தூரத்திலிருந்தே செயல்படுத்த முடியும். அவசரகால தகவலையும் அனுப்ப முடியும்.

காரின் செயல்பாடுகள், அதன் என்ஜின் நிலை உள்ளிட்டவற்றை உங்கள் ஸ்மார்ட்போனில் பெற முடியும். காரின் வேகத்தை கட்டுப்படுத்த முடியும். நிர்ணயிக்கப்பட்ட வேகத்தைக் கடந்தால் ஸ்பீட் அலெர்ட் எச்சரிக்கை வரும். இலக்கு மாறி பயணித்தால் அதுகுறித்த எச்சரிக்கையும் வரும். கார் நீண்ட நேரம் செயல்படுத்தாமல் நியூட்ரலில் இருந்தால் அது குறித்தும் எச்சரிக்கும்.

காரின் இடத்தை உடனுக்குடன் தெரிந்து கொள்ள முடியும். சாலையில் வாகன நெரிசல் குறித்த தகவல் உடனடியாக கிடைக்கும். இதன் மூலம் மாற்று வழியில் செல்லலாம். இந்த தொழில்நுட்பம் பிற நாடுகளில் கடந்த 10 ஆண்டுகளாக பயன்படுத்தப்படுகிறது. தற்போதுதான் அது இந்தியாவுக்கு வந்து உள்ளது. குரல் வழி சேவையில் இந்தியர்களின் உச்சரிப்புக்கு ஏற்ப (ஆங்கில உச்சரிப்பு) மாற்றியுள்ளது ஹூண்டாய். காருக்கான இ.சிம். கார்டை வோடபோன் மற்றும் ஐடியா நிறுவனங்களுடன் கூட்டு சேர்ந்து வழங்குகிறது ஹூண்டாய். அமேசானுடன் இணைந்து இணையம் சார்ந்த கிளவுட் சேவைகளையும் அளிக்கிறது.

குடும்பத்தினர் காரை எடுத்துச் சென்றால் வாகனம் செல்லும் திசை, செயல்பாடுகளை அனைவருமே அறிந்து கொள்ளும் வகையில் பகிர்ந்து கொள்ளவும் முடியும்.

புதிய கார்களில் இத்தகைய புளூ லிங்க் வசதியை 3 ஆண்டுகளுக்கு இலவசமாக அளிக்கிறது ஹூண்டாய். அதன் பிறகு இந்த சேவை உங்களுக்குத் தேவைப்பட்டால் அப்போது விதிக்கப்படும் கட்டணத்தை செலுத்த வேண்டியிருக்கும். கார் நேவிகேஷன் சிஸ்டம் அல்லது ஸ்மார்ட்போன் ஆப் (செயலி) மூலம் புளூ லிங்க் சேவையைப் பெறலாம். ஏற்கனவே வாங்கிய காரிலும் இத்தகைய இணைப்பு வசதியை பெறலாம். வாகனத்துக்கு வாரண்டி இருந்தால் பழைய காராக (செகன்ட் ஹேண்ட்) இருந்தாலும் இத்தகைய சேவையை அளிக்கிறது.

டி.வி.எஸ். அபாச்சே ஆர்.ஆர் 310 அறிமுகம்

டி.வி.எஸ். நிறுவனம் தனது பிரபல மாடலான அபாச்சேயில் புதிய மோட்டார் சைக்கிளை அறிமுகம் செய்துள்ளது. அபாச்சே ஆர்.ஆர் 310 என்ற பெயரில் வந்துள்ள இந்த மோட்டார் சைக்கிளின் விலை ரூ.2.27 லட்சமாகும். இதில் ஸ்லிப்பர் கிளட்ச் வசதி உள்ளது கூடுதல் சிறப்பாகும். முந்தைய மாடலைக் காட்டிலும் ரூ.3 ஆயிரம் கூடுதல் விலையில் பல்வேறு சிறப்பம்சங்களை உள்ளடக்கியதாக இந்த மோட்டார் சைக்கிள் திகழ்கிறது. ஸ்லிப்பர் கிளட்ச் வசதி இதுபோன்ற சாகச மோட்டார் சைக்கிள் பிரிவில் இது நிரந்தர வசதியாக இடம்பெற்றுவிட்டது. இந்த வசதி இருப்பதால் வாகன ஓட்டிகள் மிக எளிதாக கியர் மாற்ற முடிகிறது. இப்புதிய மாடல் பான்டம் பிளாக் நிறத்தில் கிடைக்கிறது. இதில் சிவப்பு வண்ண மோட்டார் சைக்கிள் வெள்ளை நிற ஸ்டிக்கருடன் பார்ப்பதற்கே அழகாக வந்துள்ளது. இது 312.2 சி.சி. திறன் கொண்டது. ஒற்றை சிலிண்டர், டி.ஓ.ஹெச்.சி. மோட்டார் உள்ளது. 34 ஹெச்.பி. திறன், 27.3 நியூட்டன் மீட்டர் டார்க் இழுவிசையை வெளிப்படுத்தக் கூடியது. புதிய மாடல் மிகச் சிறப்பாக இருப்பதோடு சிறந்தசெயல் திறன் கொண்டதாக இளைஞர்களை பெரிதும் ஈர்க்கும் என்று நிறுவனம் பெரிதும் நம்புகிறது.

ஹோண்டா ஆக்டிவா 5 ஜி ஸ்பெஷல் எடிஷன்

ஹோண்டா நிறுவனத் தயாரிப்புகளில் அதிகம் விற்பனையாகும் மாடல் ஆக்டிவா. இந்த மாடலில் இரண்டு புதிய வண்ணங்களைக் கொண்ட ஸ்பெஷல் எடிஷனை இந்நிறுவனம் அறிமுகப்படுத்தி உள்ளது. ஸ்டாண்டர்டு மற்றும் டி.எல்.எஸ். வேரியன்ட்களாக இவை வந்துள்ளன. கண்கவர் வண்ணத்தில் வந்துள்ள இந்த மாடல்கள் மந்தைய மாடலைக் காட்டிலும் ரூ.400 மட்டுமே அதிகமாகும். லிமிடெட் எடிஷன் ஸ்டாண்டர்டு மாடல் விலை ரூ.55,035. டீலக்ஸ் மாடல் விலை ரூ.56,900. ஸ்பெஷல் எடிஷனை வாங்க விரும்பும் வாடிக்கையாளர்கள் விற்பனையாளர்களிடம் முன்பதிவு செய்யலாம். சில்வர் பிளாக் இரட்டை வண்ணங்கள் இணைந்தது மற்றும் முத்து வெள்ளை மற்றும் தங்க நிறம் இணைந்த கலவை ஆகிய இரண்டு புதிய வண்ணங்களில் ஸ்பெஷல் எடிஷன் ஸ்கூட்டர்களை அறிமுகப்படுத்துகிறது இந்நிறுவனம். என்ஜினில் எவ்வித மாற்றமும் செய்யப்படவில்லை. இது வழக்கம் போல 109.1 சி.சி. திறன் கொண்டது. 8 ஹெச்.பி. மற்றும் 9 நியூட்டன் மீட்டர் டார்க் இழுவிசையைக் கொண்டது. பி.எஸ்.6 புகை விதிகளைப் பூர்த்தி செய்யும் வகையில் இவை உருவாக்கப்பட்டுள்ளன. சமீப காலமாக ஸ்கூட்டர் விற்பனை சற்று மந்தமடைந்துள்ளது. இந்த நிலையைப் போக்க முடுக்கிவிடப்பட்ட முயற்சியின் ஒரு வெளிப்பாடுதான் ஸ்பெஷல் எடிஷனாகும்.

ஹோண்டா சி.பி. ஷைன்

இந்நிறுவனத்தின் மோட்டார் சைக்கிள் பிரிவில் அதிகம் விற்பனையாகும் மாடல் ஷைன். 125 சி.சி. பிரிவிலான இந்த மோட்டார் சைக்கிளில் ஸ்பெஷல் எடிஷன் அறிமுகம் செய்யப்பட்டுள்ளது. இந்த மாடல் விலை ரூ.60 ஆயிரமாகும். டிஸ்க் பிரேக் மாடல் விலை ரூ.63,750 ஆகும். கருப்பு சிவப்பு வண்ணக் கலவையில், சில்வர் வண்ண சேர்க்கையோடு இது வந்துள்ளது. இரண்டு வண்ணத்திலான (டூயல் டோன்) பெட்ரோல் டேங்க், முகப்பு விளக்கை சுற்றி கிராபிக்ஸ், பக்கவாட்டு பகுதி மற்றும் பின்பகுதியில் வித்தியாசமான கண்ணைக் கவரும் வகையிலான ஸ்டிக்கர் ஆகியன சிறப்பம்சமாகும். மற்றபடி என்ஜினில் எவ்வித மாற்றமும் செய்யப்படவில்லை. வழக்கமான 124.70 சி.சி. திறன், ஏர் கூல்டு, ஒற்றை சிலிண்டர் என்ஜினைக் கொண்டுள்ளது. இது 10.1 ஹெச்.பி. திறனை 7,500 ஆர்.பி.எம். வேகத்திலும், 103 நியூட்டன் மீட்டர் டார்க் இழுவிசையை 5,500 ஆர்.பி.எம். வேகத்திலும் வெளிப்படுத்தக் கூடியது.

Tuesday, June 4, 2019

தேசிய பாதுகாப்பு ஆலோசகராக அஜித் தோவல் மீண்டும் நியமனம்

தேசிய பாதுகாப்பு ஆலோசகராக அஜித் தோவல் மீண்டும் நியமிக்கப்பட்டார். அவருக்கு கேபினட் மந்திரி அந்தஸ்து அளிக்கப்பட்டுள்ளது. நாட்டின் 5-வது தேசிய பாதுகாப்பு ஆலோசகராக அஜித் தோவல், கடந்த 2014-ம் ஆண்டு மே மாதம் நியமிக்கப்பட்டார். அவருக்கு மத்திய இணை மந்திரி அந்தஸ்து அளிக்கப்பட்டது. அவரது பதவிக்காலம் மே மாதத்துடன் நிறைவடைந்தது. இந்நிலையில், அவர் தேசிய பாதுகாப்பு ஆலோசகராக மீண்டும் நியமிக்கப்பட்டுள்ளார். இந்த பதவிக்கு 2-வது தடவையாக நியமிக்கப்பட்ட முதல் நபர் இவரே ஆவார். இவரது நியமனத்துக்கு நியமனங்களுக்கான கேபினட் கமிட்டி ஒப்புதல் அளித்தது. அவருக்கு கேபினட் மந்திரி அந்தஸ்து அளிக்கவும் ஒப்புதல் அளிக்கப்பட்டது. அதையடுத்து, இதுதொடர்பான உத்தரவை மத்திய பணியாளர் நலத்துறை அமைச்சகம் பிறப்பித்துள்ளது. அதில், “மே 31-ந்தேதியில் இருந்து 5 ஆண்டுகளுக்கு தேசிய பாதுகாப்பு ஆலோசகர் பதவியில் அஜித் தோவல் நீடிப்பார். அவரது பதவிக்காலம், பிரதமரின் பதவிக்காலத்துடன் இணைந்ததாக இருக்கும். இந்த பதவிக்காலத்தில், அஜித் தோவலுக்கு கேபினட் மந்திரி அந்தஸ்து அளிக்கப்படும்” என்று கூறப்பட்டுள்ளது. தேசிய பாதுகாப்பு ஆலோசகருக்கு கேபினட் மந்திரி அந்தஸ்து அளிக்கப்படுவது, இதுவே முதல்முறை ஆகும். தேச பாதுகாப்பு விவகாரங்களில் அவர் ஆற்றிய பணியை பாராட்டும் வகையில் இந்த அந்தஸ்து அளிக்கப்பட்டுள்ளது. அஜித் தோவல், 1968-ம் ஆண்டு ஐ.பி.எஸ். அதிகாரி ஆனவர். சில ஆண்டுகள் போலீஸ் பணிக்கு பிறகு, 33 ஆண்டுகள் உளவுத்துறை அதிகாரியாக பணியாற்றி உள்ளார். காஷ்மீர், வடகிழக்கு மாநிலங்கள், பஞ்சாப் உள்ளிட்ட மாநிலங்களில் பணிபுரிந்துள்ளார். உளவுத்துறை இயக்குனராக 2004-ம் ஆண்டு நியமிக்கப்பட்டார். 2005-ம் ஆண்டு ஜனவரி மாதம் ஓய்வு பெற்றார். உளவுத்துறை வட்டாரங்களில் மூளைபலம் மிகுந்தவராக அறியப்பட்டார். அவர் தேசிய பாதுகாப்பு ஆலோசகராக பணியாற்றிய காலத்தில், 2016-ம் ஆண்டு செப்டம்பர் மாதம் நடந்த துல்லிய தாக்குதல், 2017-ம் ஆண்டு, சீனாவுக்கு எதிராக டோக்லாமில் நடந்த நேருக்குநேர் மோதல் சம்பவம், கடந்த பிப்ரவரி மாதம் நடந்த பாலகோட் பயங்கரவாத முகாம் தாக்குதல் சம்பவம் ஆகியவற்றில் அவரது பங்கு பெரும் பாராட்டை பெற்றது. இந்த நிகழ்வுகள், அஜித் தோவலின் கண்காணிப்பிலேயே நடத்தப்பட்டன. மேலும், 1999-ம் ஆண்டு, இந்திய விமானத்தை காந்தகாருக்கு கடத்திச்சென்ற பயங்கரவாதிகளுடன் இந்தியா சார்பில் பேச்சுவார்த்தை நடத்திய முக்கியமான அதிகாரியாக அஜித் தோவல் திகழ்ந்தார். ‘கீர்த்தி சக்ரா’ விருது பெற்றுள்ளார்.