You will be redirected to the script in

seconds
Puthiyaseithi | புதிய செய்தி: March 2019

Friday, March 29, 2019

எமிசாட்’ உள்ளிட்ட 29 செயற்கைகோள்களுடன் பி.எஸ்.எல்.வி. சி-45 ராக்கெட் 1-ந்தேதி விண்ணில் ஏவப்படும் இஸ்ரோ விஞ்ஞானிகள் தகவல்

‘எமிசாட்’ உள்ளிட்ட 29 செயற்கைகோள்களுடன் பி.எஸ்.எல்.வி. சி-45 ராக்கெட் வருகிற 1-ந்தேதி விண்ணில் ஏவப்படும் என இஸ்ரோ விஞ்ஞானிகள் தெரிவித்து உள்ளனர். இந்திய விண்வெளி ஆய்வு நிறுவனம் (இஸ்ரோ) பி.எஸ்.எல்.வி. மற்றும் ஜி.எஸ்.எல்.வி. வகை ராக்கெட்டுகளை தயாரித்து, அவற்றில் செயற்கைகோள்களை பொருத்தி விண்வெளிக்கு வெற்றிகரமாக ஏவி வருகிறது. அந்தவகையில் தற்போது இஸ்ரோ தயாரித்துள்ள பி.எஸ்.எல்.வி. சி-45 ராக்கெட் வருகிற 1-ந்தேதி காலை 9.30 மணிக்கு விண்ணில் செலுத்தப்படுகிறது. இதற்கான பணியில் இஸ்ரோ விஞ்ஞானிகள் தீவிரமாக ஈடுபட்டு வருகின்றனர். அதுவும் இந்த ராக்கெட் முதன் முறையாக வெவ்வேறு புவிவட்டப்பாதையில் செயற்கைகோள்களை நிலை நிறுத்தும் வகையில் வடிவமைக்கப்பட்டு உள்ளது. இந்த ராக்கெட்டில் மின்னணு நுண்ணறிவு செயற்கைகோளான ‘எமிசாட்’ உடன் 28 வணிக ரீதியிலான செயற்கைகோள்களும் ஏவப்படுகிறது. இதுகுறித்து இஸ்ரோ விஞ்ஞானிகள் கூறியதாவது:- ஆந்திர மாநிலம் ஸ்ரீஹரிகோட்டாவில் உள்ள சதீஷ் தவான் விண்வெளி ஆய்வு மையத்தில் உள்ள 2-வது ஏவுதளத்தில் இருந்து வருகிற 1-ந்தேதி ஏவப்பட உள்ள பி.எஸ்.எல்.வி. சி-45 ராக்கெட் பி.எஸ்.எல்.வி. ரகத்தில் 47-வது திட்டமாகும். இந்த ஏவுதளத்தில் இருந்து ஏவப்படும் 71-வது ராக்கெட், இந்த ஆண்டு ஏவப்படும் 2-வது ராக்கெட் மற்றும் பி.எஸ்.எல்.வி.- க்யூஎல் ரகத்தில் முதல் ராக்கெட் என்ற பெருமைகளை இந்த ராக்கெட் பெறுகிறது. பொதுவாக ஒரே ஒரு புவிவட்டப்பாதையில் தான் செயற்கைகோள்களை ராக்கெட்டுகள் நிலை நிறுத்துவது வழக்கம். ஆனால் இந்த ராக்கெட்டில் வெவ்வேறு வகையான 3 புவிவட்டப்பாதையில் செயற்கைக்கோள்களை நிலை நிறுத்த இருக்கிறது. இறுதிகட்ட பணியான கவுண்ட்டவுன் வரும் 30-ந்தேதி தொடங்க வாய்ப்பு உள்ளது. இவ்வாறு விஞ்ஞானிகள் கூறினார்கள்.

Wednesday, March 27, 2019

இழந்த அடையாளத்தை மீண்டும் பெறுகிறது ‘கூவம் ஆறு’ நீர்வழி போக்குவரத்து தொடங்கவும் திட்டம்

சென்னையில் இழந்த அடையாளத்தை மீண்டும் கூவம் ஆறு பெற இருக்கிறது. இதில் நீர் வழி போக்குவரத்து தொடங்கவும் திட்டமிடப்பட்டு உள்ளது.கூவம், அடையாறு மற்றும் கொசஸ்தலை ஆகிய 3 ஆறுகள் சென்னை மாநகரில் ஓடுகின்றன. கூவம் ஆற்றில் ஒரு காலத்தில் தூயநீர் ஓடியது. மீன்பிடி தொழிலும், படகு போட்டிகளும் நடைபெற்றன. மக்கள் தொகை பெருக்கத்தின் விளைவாக மாசு நிறைந்த ஆறாக ஓடுகிறது. இந்த ஆறு மொத்தம் 75 கி.மீ. ஓடுகிறது. புறநகரில் 40 கி.மீ., மாநகருக்குள் 15.94 கி.மீ. ஓடுகிறது. கூவம் ஆறு,திருவள்ளூர் மாவட்டம் கேசாவரம் என்ற சிற்றூரில் கல்லாறின் கிளையாறாக உருவாகிறது. இங்கு உருவாகும் இந்த ஆறு சென்னை நேப்பியர் பாலம் அருகே கடலில் கலக்கிறது.2004-ம் ஆண்டு ஏற்பட்ட சுனாமியின்போது இந்த ஆறு ஒரு வடிகாலாக செயல்பட்டதால் சென்னை மாநகரம் பெரும்பாதிப்புக்கு உள்ளாகாமல் தப்பியது.

சென்னைக்கு அழகு சேர்த்த கூவம் ஆறு தற்போது கழிவுநீர் ஓடும் ஆறாக உள்ளது. ஒருங்கிணைந்த கூவம் ஆறு சுற்றுசூழல் சீரமைப்பு திட்டம் மூலம் கூவம் ஆற்றை சுத்தப்படுத்தும் பணியில் தமிழக அரசு இறங்கி உள்ளது. கூவம் நதியை சீரமைக்க ரூ.3,833.62 கோடியில் புதிய திட்டம் உருவாக்கப்பட்டு செயல்படுத்தப்பட்டு வருகிறது.இதற்காக திருவேற்காடு நகராட்சிக்கு உட்பட்ட பருத்திப்பட்டு என்ற இடத்தில் தொடங்கி, கடலில் கலக்கும் இடம் வரை, 32 கிலோ மீட்டர் தூரத்துக்கு முதல் கட்டமாக, ரூ.604 கோடி மதிப்பில் பணிகள் தொடங்கப்பட்டுள்ளன.

பொதுப்பணித்துறை, மாநகராட்சி, நகராட்சி, ஊராட்சி, கழிவுநீர் அகற்று வாரியம் உள்ளிட்ட அரசு துறைகளுடன் சென்னை நதிகள் சீரமைப்பு அறக்கட்டளை ஒருங்கிணைந்து பணிகளை விரைவுபடுத்தி வருகிறது.

ஒருங்கிணைந்த கூவம் நதி சுற்றுச்சூழல் சீரமைப்பு திட்டத்தின் முக்கிய நோக்கம், கழிவுநீர் கூவம் நதியில் கலப்பதை தடுக்க மாற்று ஏற்பாடு செய்தல், திடக்கழிவு மேலாண்மை, நதியின் வெள்ளநீர் கொள்ளளவை மேம்படுத்தி பராமரித்தல், கூவம் ஆற்றங்கரையில் வாழும் மக்களுக்கான மறுவாழ்வு மற்றும் மறுகுடியமர்வுக்கான திட்டமிடல், பல்லுயிர் பெருக்கத்தை மீட்டு சுற்றுச்சூழலை மேம்படுத்தி நகர்ப்புறங்களில் நதியின் கரையோரங்களில் வளர்ச்சி பணிகளை மேற்கொள்வதே ஆகும். அத்துடன் வரும் காலங்களில் நீர் வழி போக்குவரத்தை தொடங்கவும் திட்டமிடப்பட்டு உள்ளது.

இதுகுறித்து, மாநகராட்சி அதிகாரி ஒருவர் கூறியதாவது:-

கூவம் ஆற்றின் ஓரம் உள்ள ஆக்கிரமிப்பு குடிசைகளை அகற்றி, 9 இடங்களில் பூங்காக்களை அமைக்கும் பணிகள் தொடங்கப்பட்டு உள்ளன. இதில் சேத்துப்பட்டு பகுதியில் முதல் கட்டமாக பூங்கா அமைக்கும் பணிகள் நடந்து வருகிறது. இதற்காக சென்னை குடிநீர் வாரியம் தற்போது தேவையான பல இடங்களில் கழிவுநீர் சுத்திகரிப்பு மையங்களை அமைத்து வருகிறது.

திட்ட அறிக்கையின்படி புதிதாக அமைய உள்ள கழிவுநீர் சுத்திகரிப்பு மையங்களுக்கான பணிகளை குடிநீர் வாரியம் மேற்கொண்டு வருகிறது. பேபி கால்வாய் என்ற பெயரில் ஆற்றின் இருபுறமும் கற்கள் பதித்து நீர் ஓட்டத்தை முறைப்படுத்தும் பணிகள் தொடங்கியுள்ளன. கூவம் கரையோரம் முழுவதும் பாதுகாப்பு சுவர் கட்டும் பணி வேகமாக நடந்து வருகிறது. ஆற்றில் கழிவுகளை அப்புறப்படுத்தும் பணிகளை பொதுப்பணி துறை செய்யும். மறு குடியமர்வு திட்டங்களை குடிசை மாற்று வாரியம், மாநகராட்சியுடன் இணைந்து மேற்கொண்டு வருகிறது.இவ்வாறு அவர் கூறினார்.

இதுகுறித்து பொதுப்பணித்துறை அதிகாரிகள் கூறியதாவது:-
கூவம் நதியை முழுமையாக சீரமைத்திட ஒருங்கிணைந்த கூவம் நதி சுற்றுச்சூழல் சீரமைப்பு திட்டப் பணிகள் 3 கட்டங்களாக செயல்படுத்தப்பட்டு வருகிறது. கூவம் நதியின் தற்போதைய நிலை, பகுதிவாரியாக நீரின் தன்மை, ஆக்கிரமிப்புகள் விவரம், மழைநீர் வடிகால்களில் இருந்தும், பெரிய நிறுவனங்களில் இருந்து நேரடியாகவும் எங்கெங்கு கழிவுநீர் கலக்கிறது போன்ற விவரங்கள் முதலில் சேகரிக்கப்பட்டன. முதல்கட்டமாக முதல் 3 ஆண்டுகளில் குறுகிய கால திட்டமாக 60 துணை திட்டங்களும், இரண்டாம் கட்டமாக 4 முதல் 8 ஆண்டுகளில் 7 துணை திட்டங்களும், மூன்றாம் கட்டமாக சீரமைப்பு பணிகள் முடிவடைந்தவுடன் பராமரிப்பு பணிகளும் மேற்கொள்ளப்பட உள்ளது. இத்திட்டம் ரூ.1,934 கோடியே 84 லட்சம் மதிப்பில் செயல்படுத்தப்பட உள்ளது.

சென்னை நதிகள் சீரமைப்பு அறக்கட்டளை மூலம் ஆவடி அருகேயுள்ள பருத்திப்பட்டு அணையில் இருந்து கூவம் முகத்துவாரம் வரையிலான 27.3 கிலோ மீட்டர் நீளமுள்ள கூவம் நதிப் பகுதிகளை சீரமைத்திட ரூ.604 கோடியே 77 லட்சம் செலவிலான ஒருங்கிணைந்த கூவம் நதி சுற்றுச் சூழல் சீரமைப்பு திட்டத்திற்கு மறைந்த முதல்-அமைச்சர் ஜெயலலிதா அடிக்கல் நாட்டி இருந்தார். தற்போது போர்க்கால அடிப்படையில் தூர்வாரும் பணிகள் நடந்து வருகிறது. இதில் கூவம் ஆறு தூர்வாரும் பணி 40 சதவீதம் முடிவடைந்து உள்ளது. ஆற்றின் நீர்பிடிப்பு பகுதி 400 சதுர கிலோ மீட்டராகும். ஆற்றுப்படுகையின் அகலம் 40 முதல் 120 மீட்டர் வரை உள்ளது. ஆற்றின் அதிகபட்ச கொள்ளளவு நொடிக்கு 22 ஆயிரம் கன அடி ஆகும். தூர்வாரி எடுக்கப்பட்ட மணல் மூலம் கூவம் ஆற்றின் கரையும் பலப்படுத்த பயன்படுத்தவும் திட்டமிடப்பட்டு உள்ளது. இழந்த அடையாளத்தை கூவம் ஆறு மீண்டும் பெறும் காலம் விரைவில் வரும். இவ்வாறு அதிகாரிகள் கூறினர்.

மாமரம் தோன்றிய நாடு

கீழே உள்ள குறிப்புகளின் உதவியுடன் அவை உணர்த்தும் நாடு எது என்பதைக் கண்டுபிடியுங்கள்.

1. தெற்கு ஆசியாவிலுள்ள ஒரு நாடு. இந்தியப் பெருங்கடல், அரபிக் கடல், வங்காள விரிகுடா என மூன்று கடல்களால் சூழப்பட்டுள்ளது.

2. மிகப் பழமையான நாகரிகத்தைக்கொண்ட நாடு.

3. பரப்பளவில் உலகின் ஏழாவது பெரிய நாடு. இங்கே சுமார் 120 கோடி மக்கள் வசிக்கின்றனர்.

4. 29 மாநிலங்களும் 6 ஒன்றியங்களும் தலைநகரமும் இருக்கின்றன.

5. 1947-ம் ஆண்டு சுதந்திரம் பெற்றது. இந்த நாட்டிலிருந்து இரண்டு நாடுகள் பிரிந்து சென்றன.

6. சந்திரயான் விண்கலத்தைச் சந்திரனுக்கும் மங்கல்யான் விண்கலத்தைச் செவ்வாய்க் கோளுக்கும் அனுப்பிய நாடு.

7. தேசிய விளையாட்டு ஹாக்கி. பிரபலமான விளையாட்டு கிரிக்கெட்.

8. இந்த நாட்டின் உயர்ந்த மலைச் சிகரம் கஞ்சன்ஜங்கா.

9. மாமரம் இந்த நாட்டில் தோன்றியது என்பதால் ‘மாஞ்சிஃபெரோ இண்டிகா’ என்று அறிவியல் பெயர் சூட்டப்பட்டிருக்கிறது. தேசியப் பழம் மாம்பழம்.

10. இந்த நாட்டின் கொடியில் அசோகச் சக்கரம் இருக்கிறது.

விடை: இந்தியா

யார் சிறந்த மாணவர்?

இன்று இறுதிப் பரிசோதனை. போட்டியில் இருக்கும் மாணவர்களை எல்லாம் ஓர் அறையில் வைத்து, கதவைப் பூட்டிவிட்டனர். ஒருவருக்கும் காரணம் புரியவில்லை.

“பூட்டிய அறைக்குள் என்ன பரிசோதனை?” என்று மயில் வாத்திடம் கேட்டது.

“அக்கா, எனக்கு மட்டும் எப்படித் தெரியும்? உன்னை மாதிரிதான் நானும் யோசிச்சிட்டு இருக்கேன்” என்று மைனாவைப் பார்த்தது வாத்து. அது பதில் சொல்லாமல், பாடிக்கொண்டிருந்தது.

“இந்த ஆந்தையைக் காணோமே? இதுவரை எல்லாப் பரிசோதனைகளிலும் அதிக மதிப்பெண் எடுத்துவிட்டு, இறுதிப் பரிசோதனைக்கு வராமல் எங்கே போனதோ?” என்று சிட்டுக்குருவி கவலைப்பட்டுக்கொண்டது.

“இங்கேதான் இருக்கேன் தங்கை. கொஞ்சம் நன்றாக உற்றுப் பார். நாற்காலியும் நானும் ஒரே வண்ணமாக இருப்பதால் உனக்குத் தெரியவில்லை” என்று கண்களை உருட்டியது ஆந்தை.

“கண்ணை உருட்டாதே. எனக்குக் கொஞ்சம் பயமா இருக்கு” என்று சிட்டுக்குருவி சற்றுத் தள்ளி உட்கார்ந்துகொண்டது.

“எனக்குத் தெரிந்து அழகிய மயில், வலிமையான கழுகு, இரவில் அலையும் ஆந்தை, புத்திசாலி வாத்து… இவர்களில் ஒருவருக்குத்தான் சிறந்த மாணவர் பட்டம் கிடைக்கப் போகிறது” என்று புறா சொன்ன உடன், கிளி, குயில் போன்ற பறவைகள் சண்டைக்கு வந்தன.

அப்போது கதவு திறக்கும் சத்தம் கேட்டு, எல்லோரும் அமைதியானார்கள். இரண்டு கொக்குகள் சிறிய வண்டியை இழுத்துக்கொண்டு வந்தன. அதிலிருந்து உணவை எடுத்து, ஒவ்வொருவருக்கும் தட்டு நிறைய வைத்தன.

“எல்லோரும் சாப்பிடுங்கள்” என்று சொல்லிவிட்டு, கொக்குகள் மீண்டும் கதவைத் தாழிட்டன.

“ஆஹா, இன்று ராஜ விருந்து!” என்றபடி சிட்டுக்குருவி உணவைக் கொத்த ஆரம்பித்தது.

“இப்படி ஒரு உணவை இதுவரை சாப்பிட்டதில்லை” என்றது கிளி.

காகம் மட்டும் சாப்பிடாமல், ஜன்னல் அருகில் தட்டைத் தூக்கிக்கொண்டு சென்றது. ஜன்னல் திண்டில் அமர்ந்துகொண்டு, “நண்பர்களே, எல்லோரும் இங்கே வாருங்கள். சுவையான உணவு கிடைத்திருக்கிறது. பகிர்ந்து உண்ணலாம்” என்று அழைத்தது.

அருகில் பறந்துகொண்டிருந்த காகங்கள் ஜன்னலை நோக்கி வந்தன. ஆளுக்குக் கொஞ்சம் தங்கள் அலகில் கவ்விக்கொண்டன. அருகில் அமர்ந்து சாப்பிட ஆரம்பித்தன.

சிறிது நேரத்தில் எல்லாப் பறவைகளும் சாப்பிட்டு முடித்தன. குருவி, கிளி, புறா போன்ற சிறு பறவைகள் கால் பகுதி உணவை மட்டுமே சாப்பிட்டிருந்தன. கழுகு போன்ற பெரிய பறவைகளாலும் முழு உணவையும் சாப்பிட முடியவில்லை. எல்லோர் தட்டிலும் உணவு மீதி இருந்தது.

காகம் ஒவ்வொரு பறவை அருகிலும் சென்று, “உங்கள் வயிறு நிறைந்துவிட்டதா? வீணாகும் இந்த உணவை எடுத்துக்கொள்ளலாமா?” என்று கேட்டது.

சகப் பறவைகள் ஏளனப் பார்வையுடன் உணவை எடுத்துக்கொள்ளச் சம்மதித்தன. ஆர்வத்தோடு தட்டுகளை எடுத்துக்கொண்டு ஜன்னல் அருகே வைத்தது காகம். வெளியே ஏராளமான காகங்கள் வந்துவிட்டன. அனைத்தும் சந்தோஷமாகச் சாப்பிட்டு முடித்தன. காலியான தட்டுகளை ஓர் ஓரமாக அடுக்கி வைத்தது காகம்.

அப்போது கதவு திறக்கப்பட்டது. “உங்கள் அனைவரையும் தலைமை ஆசிரியர் மேடைக்கு வரச் சொன்னார்” என்றது கொக்கு.

போட்டியில் பங்கேற்ற பறவைகள் மேடை நோக்கிச் சென்றன. காகம் வகுப்பறையைப் பார்த்தது. உணவுப் பொருட்கள் அறை முழுவதும் சிதறிக் கிடந்தன. வெளியில் இருந்த தன் நண்பர்களை அழைத்து, சுத்தம் செய்யச் சொன்னது. இரண்டே நிமிடங்களில் அறை சுத்தமானது. பிறகு மேடை நோக்கி வேகமாகச் சென்றது காகம்.

“இத்தனை நேரம் என்ன பண்ணிட்டிருந்தே?”

“அறையைச் சுத்தம் செய்தேன்.”

“அதுக்குதான் நாங்க இருக்கோமே. சீக்கிரம் போ” என்றது கொக்கு.

காகம் மேடையில் ஏறி ஓரமாக நின்றுகொண்டது.

தலைமை ஆசிரியர் இருவாட்சி மேடைக்கு வந்தது. “உங்களுக்கான பரிசோதனைகள் அனைத்தும் முடிந்துவிட்டன. யார் சிறந்த மாணவர் என்று அறிவிக்கும் நேரம் வந்துவிட்டது. யாராக இருக்கும் என்று மேடையில் உள்ளவர்கள் சொல்லலாம்” என்று கேட்டது.

சிலர் தாங்கள்தான் என்று தன்னம்பிக்கையோடு சொன்னார்கள். இன்னும் சிலர் மகிழ்ச்சியோடு மற்றவர்களைப் பரிந்துரைத்தார்கள்.

“உங்கள் எல்லோருக்கும் திறமை இருக்கிறது. ஒருவரின் திறமையை இன்னொருவருடன் ஒப்பிட முடியாது. அதனால் குணத்தை வைத்துதான் இப்போது யார் சிறந்த மாணவர் என்பதைத் தேர்வு செய்திருக்கிறோம். அதுக்காக வைக்கப்பட்ட பரிசோதனையில் நீங்கள் யாருமே சொல்லாத ஒரு பெயர்தான் வெற்றி பெற்றிருக்கிறது. இந்த ஆண்டின் மிகச் சிறந்த மாணவர் காகம். அறையில் அடைத்து வைத்தாலும்கூட, தான் மட்டுமே உண்ணாமல் தன் நண்பர்களை அழைத்து உணவைப் பகிர்ந்துகொண்டது. நீங்கள் அனைவரும் சாப்பிடாமல் வீணாக்கிய உணவை, மற்றவர்களுக்குக் கொடுத்தது. நீங்கள் சிந்திய உணவுப் பொருட்களைச் சுத்தம் செய்தது. நீங்களே சொல்லுங்கள், காகத்தைவிட வேறு யாரைத் தேர்ந்தெடுக்க முடியும்? இந்த முடிவை அனைவருமே ஏற்றுக்கொள்வீர்கள்” என்று இருவாட்சி சொன்னதும், கரகோஷம் அதிர்ந்தது.

காகத்தின் தலையில் அழகான சிறிய கிரீடம் அணிவிக்கப்பட்டது.கதை

ஒரு மேஜையின் கதை

அந்தப் பவுத்த மடாலயத்தில் மூத்த ஆசிரியர் ஒருவர் வசித்துவந்தார். அவரது அறையில் பெரிய பழைய மேஜை ஒன்று இருந்தது. காலையில் தூங்கி எழுந்ததும் தலையைக் குனிந்து அந்த மேஜையை வணங்குவார். இரவு படுக்கைக்குப் போகும் முன்பு மீண்டும் ஒரு வணக்கம். சில நேரம், தன் நடுங்கும் கையால் அந்த மேஜையை இதமாக வருடிக் கொடுப்பார். ஒரு பூனையை அல்லது நாய்க்குட்டியை வருடிக் கொடுப்பதுபோல!

இவர் உண்மையில் என்னதான் செய்கிறார்? இவரைப் பார்க்க உலகம் முழுவதிலுமிருந்து அறிஞர்கள் திரண்டுவருவது வழக்கம். ஆனால், இவரிடம் ஏன் இப்படி ஒரு குழந்தைத்தனம்?

போயும் போயும் ஒரு மேஜைக்கு ஏன் இவர் செல்லம் கொடுக்கிறார்? ஏன் இப்படி விநோதமாக நடந்துகொள்கிறார்?

ஒரு நாள் ஆசிரியர் வகுப்பெடுத்து முடித்துக் கிளம்பும்போது, இளம் மாணவர் ஒருவர் எழுந்து நின்றார். ‘‘ஐயா, உங்களுடைய மேஜை பற்றி எனக்கு ஒரு சந்தேகம். கேட்கலாமா?’’

‘‘ஓ தாராளமாகக் கேளேன்” என்றார் ஆசிரியர்.

‘‘உங்கள் மேஜையில் தேவதையோ வேதாளமோ புகுந்துகொண்டிருக்கிறதா?” ஆசிரியர் சத்தமாகச் சிரித்தார். ‘‘அதெல்லாம் ஒன்றுமில்லையே. அது ஒரு பழைய மேஜை.அவ்வளவுதான்.”

‘‘பிறகு ஏன் நீங்கள் மேஜையைத் தினமும் வணங்குகிறீர்கள்?”

‘‘ஓ, அதுவா? இந்த மேஜைதான் என்னுடைய ஆசிரியர். இந்த உலகை நான் புரிந்துகொண்டதற்குக் காரணமே இந்த மேஜைதான்.”

கேள்வி கேட்ட மாணவர் மட்டுமல்ல, ஒட்டுமொத்த வகுப்பறையும் விழிப்பதைக் கண்டு ஆசிரியர் புன்னகை செய்தார்.

‘பல ஆண்டுகளுக்கு முன்பு நடந்த விஷயம் இது. என்னை அறிவில் வெல்ல இந்த உலகில் யாருமே இல்லை என்று நான் நினைத்துக்கொண்டிருந்த நேரம் அது. ஒருநாள் என் கனவில் இந்த மேஜை வந்தது. ‘ஏ, மானிடனே! உனக்கு எல்லாம் தெரியும் என்று அகந்தையோடு இருக்கிறாயே. முதலில் என்னைப் பற்றி உனக்கு என்ன தெரியும் சொல்’ என்று கேட்டது. ‘நீ ஒரு மேஜை, அவ்வளவுதானே. இதில் என்ன இருக்கிறது’ என்று நான் கேட்டேன். உடனே அந்த மேஜை சிரித்தது. ‘நான் ஒரு மேஜை என்பது மட்டும்தான் உனக்குத் தெரியுமா? சரி, நான் எந்த மரத்தில் இருந்து வந்தேன்? அந்த மரம் எந்தக் காட்டில் வளர்ந்திருந்தது? அந்தக் காட்டில் வேறு என்னென்ன மரங்கள் இருந்தன? நான் முழுக்க ஒரே மரத்தில் செய்யப்பட்டவன் என்று உறுதியாக உன்னால் சொல்ல முடியுமா? உன் அறைக்கு என்னை யார் சுமந்து வந்தார்கள்? அவர்களை உனக்குத் தெரியுமா? எந்த வண்டி என்னைச் சுமந்து வந்தது? அந்த வண்டியை யார் ஓட்டியது? யார் அதை வண்டியில் ஏற்றியது?’’

ஆசிரியர் தொடர்ந்தார். ‘‘அதற்கு முன்பு, மரத்தை வெட்டியவர்கள் யார்? சுமந்தவர்கள் யார்? பல்வேறு கருவிகளைக்கொண்டு என்னை உருவாக்கியவர்கள் யார்? அதற்கும் முன்பு போவோம். நான் ஒரு விதையாக இருந்தபோது எந்தப் பறவை என்னைச் சுமந்து சென்றது? அந்தப் பறவை எந்தக் கூட்டில் வசித்தது? எப்போது பெய்த மழையில் நான் வளர ஆரம்பித்தேன்? எந்த மண்ணைத் துளைத்துக்கொண்டு என் வேர் சென்றது? என் இலைகளின் நிறம் என்ன? என் பூக்களைப் பார்த்திருக்கிறாயா? என் கனிகளை எந்தெந்தப் பறவைகள் உண்டன என்று தெரியுமா? அவை மகிழ்ச்சியாக என்னென்ன பாடல்களைப் பாடின என்று தெரியுமா? அந்தப் பாடலின் மொழி தெரியுமா?’’

சற்று மூச்சுவிட்டுக்கொண்டார். ‘‘என் மூதாதையர்களை உனக்குத் தெரியுமா? வெள்ளத்திலும் வெப்பத்திலும் வறட்சியிலும் நாங்கள் எப்படி வாழ்ந்தோம் என்று தெரியுமா? சூரியனுக்கும் எனக்கும் உள்ள உறவு உனக்குத் தெரியுமா? நான் எப்படிப்பட்ட இரவுகளைக் கண்டிருக்கிறேன் என்று தெரியுமா? ஒரு சாதாரண மேஜையான என்னை நீ தெரிந்துகொள்ள வேண்டுமானால்கூட ஒட்டுமொத்த உலகையும் நீ ஆழ்ந்து கற்க வேண்டும். நான் எங்கிருந்து வந்தேன் என்பதை அறிந்துகொள்ள இந்த உலகம் எங்கிருந்து வந்தது என்பதை நீ அறிந்துகொள்ள வேண்டும். நான் எப்படி உருவாக்கப்பட்டேன் என்னும் ரகசியம் தெரிய வேண்டுமானால் நீ அறிவியலும் சூழலியலும் தொழில்நுட்பமும் வரலாறும் கணக்கும் இசையும் உயிரியலும் இன்னும் எத்தனை எத்தனையோ துறைகளையும் கற்றாக வேண்டும். சாதாரண மேஜையான என்னைக் கற்கவே இவ்வளவு விஷயங்கள் தேவைப்படும்போது, உலகைத் தெரிந்துகொள்ள நீ எவ்வளவு கற்க வேண்டும் என்று நினைத்துப் பார்.’’

சற்று நிறுத்திவிட்டு மாணவர்களைக் கூர்ந்து கவனித்தார் ஆசிரியர். ‘‘எனக்கு எல்லாம் தெரியும் என்னும் நினைப்பு அன்றோடு அழிந்தது. என்னுடைய கண்களைத் திறந்து உலகைக் காட்டியது இந்த மேஜைதான். அதனால்தான் நான் அதை மதிக்கிறேன். இந்த மேஜையை முழுக்கப் புரிந்துகொள்ளும்வரை நான் கற்றுக்கொண்டே இருப்பேன், உங்களுக்கெல்லாம் கற்றுக் கொடுத்துக்கொண்டும் இருப்பேன்.’’

ஆசிரியர் வெளியேறியதும் மாணவர்கள் பெருமூச்சு விட்டனர். ‘‘இந்த மேஜைக்கே இவ்வளவு கதையா? அப்படி என்றால் பானை, பாய், பலகை, கூரை, பல்லி என்று இந்த அறையில் இருக்கும் ஒவ்வொன்றையும் நாம் எப்போது படித்து முடிப்பது?’’

கிளம்பிவிட்டார் என்று நினைத்த ஆசிரியரின் குரல் தொலைவில் இருந்து ஒலித்தது. ‘‘எதையும் யாராலும் படித்து முடிக்க முடியாது. முடியும்போது எல்லலாம் படித்துக்கொண்டே இருக்க வேண்டியதுதான்.’’

பான் கார்டு-ஆதார் கார்டு இணைப்புக்கு மார்ச் 31 வரை கெடு

வருமான வரி கணக்கு தாக்கல் செய்பவர்கள் தங்கள் நிரந்தர கணக்கு எண்ணுடன் (பான்) ஆதார் அடையாள அட்டை கார்டை இணைக்க வேண்டும். இதற்கான இறுதி கெடு இம்மாதம் 31-ம் தேதி என்று வருமான வரித்துறையினர் தெரிவித்துள்ளனர். இவ்விதம் இணைக்காதவர்கள் தங்களது வருமான வரி கணக்கை தாக்கல் செய்ய முடியாது. மேலும் பான் எண்ணையும் ரத்து செய்ய முடியாது. நிரந்தர கணக்கு எண்ணுடன் ஆதாரை இணைப்பதற்கு பல் வேறு கட்டங்களில் கால அவ காசம் வழங்கப்பட்டது. ஆனால் இம்முறை இறுதியாக இம்மாதம் 31 என கெடு நிர்ணயிக்கப்பட்டுள்ளது. கடந்த ஆண்டு செப்டம்பர் மாதம் ஆதார் எண் தொடர்பாக உச்ச நீதிமன்ற உத்தரவு பிறப்பித்தது. ஆதாருக்கு அரசியலமைப்பு சட் டத்தின் கீழான அங்கீகாரம் குறித்த நீதிமன்ற உத்தரவை அடுத்து வரித்துறையினர் இந்த அறி விப்பை வெளியிட்டுள்ளனர். இதன் படி வருமான வரி சட்டம் 139 ஏஏ (2)-ன் கீழ் நிரந்தர கணக்கு எண் ணுடன் ஆதாரை இணைக்க வேண் டியது கட்டாயம் என தெரிவிக்கப் பட்டுள்ளது. அத்துடன் வருமான வரி தாக்கலுக்கு ஆதாரை இணைக்க வேண்டியது அவசியம் என தெரிவித்தது. பான்-ஆதார் இணைப்பை இணையதளம் மூலம் எளிதாக மேற்கொள்ள முடியும். என்எஸ் டிஎல் மற்றும் யுடிஐஐடிஎஸ்எல் ஆகி யவை பான் கார்டு எண் மற்றும் ஆதார் எண்களை அளித்துள்ளன. வருமான வரித்துறை இணைய தளத்துக்கு சென்று உங்களது பான் நம்பர் மற்றும் ஆதார் எண்ணை அளித்தால் இணைப்புக்கான இணையதளத்தை அளிக்கும். ஆதார் கார்டில் உள்ள பெயருக் கும் பான்கார்டில் உள்ள பெயருக் கும் வித்தியாசம் இருந்தால் இணைப்பு கிடைக்காது. இணைப்பு நடவடிக்கையை மேற்கொள்ள இயலாது என வரித் துறையினர் தெரிவித்துள்ளனர். அவ்விதம் இணைப்பு மேற்கொள்ள இயலா தவர்கள் என்எஸ்டிஎல் மற்றும் யுடிஐஐடிஎஸ்எல் மையத்துக்கு சென்று ஆதார் அங்கீகாரத்தை உறுதி செய்ய வேண்டும். சிறிதளவு மாற்றம் இருப்பின் வருமான வரித்துறையினர் ஒரு முறை கடவுச் சொல்லை (ஓடிபி) மொபைல் போனுக்கு அனுப்பி சம்பந்தப்பட்டவரை உறுதி செய்வர் என்றும் வருமான வரித்துறையினர் தெரிவித்துள்ளனர்.

நூறு நாள் வேலை திட்டத்தின் ஊதியத்தை உயர்த்த அனுமதி கோருகிறது மத்திய அரசு

நூறுநாள் வேலை திட்டம் என்று அழைக்கப்படும் மகாத்மா காந்தி ஊரக வேலைவாய்ப்பு திட்டத்தின் கீழ் வழங்கப்படும் ஊதியத்தை ஏப்ரல் 1 முதல் மாற்றியமைக்க தேர்தல் ஆணையத்தின் ஒப்புதலை மத்திய அரசு கோரியுள்ளது. இதுகுறித்து ஊரக வளர்ச்சி அமைச்சக வட்டாரங்கள் கூறும் போது, “விவசாயத் தொழிலாளர் களுக்கான நுகர்வோர் விலைக் குறியீட்டுடன் (சிபிஐ-ஏஎல்) மகாத்மா காந்தி ஊரக வேலை வாய்ப்புத் திட்டத்தின் கீழ் வழங் கப்படும் ஊதியம் இணைக்கப் பட்டுள்ளது. இதன்படி வரும் ஏப்ரல் 1 முதல் புதிய ஊதியம் வழங்கப்பட வேண்டும். இவ்வாறு ஊதியம் மாற்றி அமைக்கப்படுவது வழக்கமான நடைமுறையாகும். தற்போது தேர்தல் நடத்தை விதி முறைகள் அமலில் இருப்பதால் புதிய ஊதியத்தை அறிவிப்பது தொடர்பாக தேர்தல் ஆணை யத்தை அணுகியுள்ளோம்” என்று தெரிவித்தன. அமைச்சக வட்டாரங்கள் மேலும் கூறும்போது, “நூறு நாள் வேலை திட்டத்தின் கீழ் வெவ் வேறு மாநிலத்திலும் வெவ்வேறு ஊதியம் வழங்கப்படுகிறது. எனவே ஊதிய உயர்வும் வேறுபட்ட தாக இருக்கும். இந்த உயர்வு 5 சதவீதம் வரை இருக்கும்” என்று தெரிவித்தன. 2019-20-ம் ஆண்டுக்கான இடைக்கால பட்ஜெட்டில் மகாத்மா காந்தி ஊரக வேலைவாய்ப்பு உறுதி திட்டத்துக்கு மத்திய அரசு ரூ.60 ஆயிரம் கோடி ஒதுக்கி யுள்ளது குறிப்பிடத்தக்கது. - பிடிஐ

மாணவிகளுக்கு பாலியல் தொந்தரவு கரூர் அரசுக் கல்லூரி பேராசிரியர் கைது

கரூர் அரசு கலைக் கல்லூரியில் பொருளாதாரத் துறை தலைவராக இருப்பவர் இளங்கோவன்(52). இவர், மாணவிகளுக்கு பாலியல் தொந்தரவு அளித்து வந்ததாகக் கூறப்படுகிறது. இதுகுறித்து மாணவிகள் கல்லூரி முதல்வரிடம் கடந்த 21-ம் தேதி புகார் அளித்துள்ளனர். இதையடுத்து, 5 பெண் பேராசிரியர்கள் கொண்ட குழு அமைக்கப்பட்டு இதுகுறித்து விசாரணை நடத்தப்பட்டு, கடந்த 23-ம் தேதி சென்னையில் உள்ள கல்லூரிக் கல்வி இயக்குநரகத்துக்கு அறிக்கை அனுப்பப்பட்டது. இந்நிலையில், கடந்த சில தினங்களாக கல்லூரிக்கு வராமல் இருந்த இளங்கோவன், நேற்று கல்லூரிக்கு வந்துள்ளார். இதனால் அதிர்ச்சியடைந்த மாணவ, மாணவிகள் 50-க்கும் மேற்பட்டோர், பாலியல் தொந்தரவு குறித்து காவல் கண்காணிப்பாளர் அலுவலகத்தில் புகார் அளிப்பதற்காக கல்லூரியில் இருந்து ஊர்வலமாக புறப்பட்டுச் சென்றனர். இதுகுறித்து தகவலறிந்த காவல் துணைக் கண்காணிப்பாளர் மா.கும்மராஜா, காளியப்பனூர் பகுதியில் மாணவ, மாணவிகளை நிறுத்தி புகாரைப் பெற்றுக்கொண்டு, கல்லூரிக்கு திரும்பிச் செல்லுமாறு கேட்டுக்கொண்டார். இதையடுத்து, தாந்தோணிமலை போலீஸார், பேராசிரியர் இளங்கோவனை கைது செய்து விசாரணை நடத்தி வருகின்றனர்.

Monday, March 25, 2019

‘ஆண்ட்ராய்டு கியூ’ இயங்குதளத்தில் புதிய வசதிகள்

கூகுள் நிறுவனத்தின் ஆண்ட்ராய்டு இயங்குதளம்தான், தற்போதைய ஸ்மார்ட்போன்களின் உயிர்நாடியாக உள்ளது. உலகின் அதிகப்படியான மொபைல்களை இயக்கும் ஆண்ட்ராய்டு தளத்தின் புதிய பதிப்பாக ஆண்ட்ராய்டு கியூ அறிமுகமாகி உள்ளது. இந்த இயங்குதளத்தில் செயல்படும் ‘பீட்டா-1’ ஸ்மார்ட்போன் சமீபத்தில் விற்பனைக்கு வந்துள்ளது. ஆண்ட்ராய்டு கியூவில் பல்வேறு பயனுள்ள வசதிகளும் புதிதாக சேர்க்கப்பட்டு உள்ளன. அவை பற்றிய சிறு பார்வை...

புதிய இயங்குதளம்

ஆண்ட்ராய்டு கியூ அறிமுகமாகும் முன்பே அது பற்றிய பல்வேறு தகவல்கள் அவ்வப்போது கசிந்த வண்ணம் இருந்தன. ஏராளமான வசதிகள் கொண்ட இந்த புதிய இயங்குதளம் 2019-ம் ஆண்டின் பிற்பகுதியில் செயல்பாட்டிற்கு வரும் என்று எதிர்பார்க்கப்பட்டது. ஆனால் கடந்த வாரம் இந்த இயங்குதளத்துடன்கூடிய பீட்டா 1 ஸ்மார்ட்போன் விற்பனைக்கு வந்து எதிர்பார்ப்பை அதிகரிக்கச் செய்துள்ளது. செல்போனின் ஆயுள், வேகம் மற்றும் பாதுகாப்பு விஷயங்களில் முக்கியத்துவம் கொண்டதாக பேசப்படுகிறது ஆண்ட்ராய்டு கியூ.

இடத்திற்கேற்ப வசதிகள்

இந்த இயங்குதளத்தின் சிறப்புகளில் ஒன்று ‘லொக்கேசன்’ வசதி. சில போன்களில் நீங்கள் இருக்கும் இடத்தை தானாக காட்டிக் கொடுக்கும் லொக்கேசன் வசதி எப்போதும் செயல்பாட்டில் இருக்கும். ஆண்ட்ராய்டு கியூ தளத்தில் உங்கள் பாதுகாப்பு கருதி அந்த வசதியை இன்னும் மேம்படுத்தி வழங்கியிருக்கிறார்கள். எந்த அப்ளிகேசனுக்கு லொக்கேசன் வசதி தேவையோ அந்த அப்ளிகேசனை திறக்கும்போது மட்டும் லொக்கேசன் வசதி செயல்படும் வகையில் இதில் பதிவு செய்ய முடியும். அப்ளிகேசனை மூடிவிட்டால் லொக்கேசன் வசதியும் செயல்படுவதில்லை.

கோப்புகளை பரிமாற

தகவல்களை பரிமாறவும் சிறப்பு வசதிகள் உள்ளன. கூடுதல் ஷேரிங் அப்ளிகேசன்கள் இருப்பதுடன், வேகமான பரிமாற்றத்திற்கும் இயங்குதளம் சிறப்பான ஒத்துழைப்பு தரும். ‘காப்பி’ செய்யப்படும் யூ.ஆர்.எல். லிங்க், மெனுவில் காட்டப்படும் என்பதால் தேவைப்பட்டால் அதை நகல் எடுத்து அனுப்பவும் முடியும்.

பேட்டரி எச்சரிக்கை

பேட்டரி சக்தி எவ்வளவு இருக்கிறது என்பது இதுவரை திரையின் ஒரு முகப்பில் எப்போதும் காட்டப்பட்டுக் கொண்டிருக்கும். ஆண்ட்ராய்டு கியூ தளத்தில் இந்த வசதி மாற்றப்பட்டிருக்கிறது. பேட்டரி தீர்வதற்கு சிறிது அவகாசம் இருக்கும்போது, இன்னும் எவ்வளவு நேரத்திற்கு பேட்டரி சக்தி நீடிக்கும் என்பது எழுத்து (டெக்ஸ்ட் ) மூலம் காட்டப்பட்டுக் கொண்டிருக்கும். பயனாளர் அதை கவனிக்கும் வரை காட்டப்படும். சார்ஜிங் செய்யாதபோது குறித்த இடைவேளைகளில் மீண்டும் நினைவூட்டவும் செய்யும்.

முக்கிய தகவல்களுக்கு வண்ணம்

அப்ளிகேசன்களின் லோகோக்கள் பல வண்ணங்களிலும், அடையாளங்களிலும் காணப்படுவதுபோல தீம்களையும் பல வண்ணங்களில் தருகிறது ஆண்ட்ராய்டு கியூ. நீங்கள் செட்டிங்ஸ் சென்றாலோ அல்லது ஒவ்வொரு வசதியின் உள்ளே சென்றாலும், அதன் முக்கிய கருத்துகள் வெவ்வேறு வண்ணங்களில் காட்டப்படும். இது முக்கிய தகவல்களை கருத்தூன்றி கவனிக்கவும், பயன்படுத்தவும் வசதியாக இருக்கும்.

வைபை பாஸ்வேர்டு தேவையில்லை

திடீரென இணைய டேட்டா தீர்ந்துபோனால், நட்புக்குரியவரிடம் பாஸ்வேர்டு கேட்டு இணைப்பு கொடுத்து பயன்படுத்துவோம். பொது இடத்தில் பாஸ்வேர்டை கேட்டுக் கொண்டிருப்பதும், கொடுப்பதும் பாதுகாப்பானதல்ல. இந்த பிரச்சினையை தீர்த்திருக்கிறது ஆண்ட்ராய்டு கியூ இயங்குதளம். இதில் வைபை இணைப்பு கொடுக்க பாஸ்வேர்டு தேவையில்லை. அதனால் பாதுகாப்பு இல்லாமல் உங்கள் வைபை பயன்படுத்தப்படுமோ என்று அச்சப்பட வேண்டாம். கியூ.ஆர். கோடு மூலமாக ஸ்கேன் செய்து இரு போன்களுக்கு இடையே எளிமையாக வைபை இணைப்பு கொடுக்கலாம்.

படங்களிலும் சிறப்பு வசதி

செல்பிகளிலும், புகைப்படங்களிலும் மகிழ்ச்சி கொள்ளும் இளைய தலைமுறையினரை கவரும் விதத்தில் படங்கள் எடுக்கும் வசதியிலும் நவீனங்களை புகுத்தியிருக்கிறது ஆண்ட்ராய்டு கியூ. படம் பிடிக்கும் கேமராவுக்கும், பொருளுக்கும்/ உங்களுக்குமான இடைவெளியை காட்டுவதுடன், எவ்வளவு நெருக்கம் இருந்தால் இன்னும் தெளிவான சிறப்பான படத்தை எடுக்கலாம் என்பதையும் காட்டும் வசதி இதில் உள்ளது. இதர புகைப்பட அப்ளிகேசன்களுடன் இணைந்தும் இந்த வசதி செயல்படும் என்பது குறிப்பிடத்தக்கது.

இசைப் பிரியர்களுக்கு

புகைப்படங்களுக்கு, அடுத்தபடியாக பலரையும் மகிழ்விப்பது, இசையும், வீடியோ காட்சிகளும்தான். யூடியூப் சென்றோ அல்லது படங்களை பதிவிறக்கம் செய்தோ வீடியோ காட்சிகளை பார்த்தால் வேகமாக சார்ஜ் தீர்ந்துவிடும். இதில் சிறப்பம்சமாக குறைந்த அலைக்கற்றையில் தரமான வீடியோவை பதிவு செய்யவும் கேட்கவும் முடியும் என்பதால் குறைந்த பேட்டரி சார்ஜில் நிறைவான இசை மற்றும் காட்சிகளை ரசிக்க முடியும்.

அப்ளிகேசன் அலெர்ட்

அப்ளிகேசன்களை பதிவிறக்கம் செய்யும்போதும், பயன்படுத்தும்போதும் பல்வேறு நோட்டிபிகேசன் குறிப்புகள் வருவதை கவனிக்கலாம். முந்தைய ஆண்ட்ராய்டு போன்களில் நோட்டிபிகேசன்களை தடுக்கவும், காட்டவும் வசதி உண்டு. ஆண்ட்ராய்டு கியூ பதிப்பில் நோட்டிபிகேசன்களை தடுக்கவும், அமைதியாக காண்பிக்கவும், அச்சுறுத்தும் நோட்டிபிகேசன்களை தனியே காட்டவும் வசதிகள் உள்ளன. ஒவ்வொரு அப்ளிகேசனின் மீதும் நோட்டிபிகேசன்கள் எண்களாக காட்டப்படும். அப்ளிகேசன் ஐகான்களை தொடர்ந்து அழுத்துவதன் (லாங்பிரஸ்) மூலம் நோட்டிபிகேசன்களை பார்க்க முடியும்.

Wednesday, March 20, 2019

அரசியல் கட்சிகளின் எண்ணிக்கை 2,301 ஆக உயர்வு

இந்தியாவில் அரசியல் கட்சிகளின் எண்ணிக்கை 2,301 ஆக உயர்ந்துள்ளது. இவற்றில் வித்தியாசமானப் பெயர்களில் புதிய கட்சிகள் பதிவாகி இருப்பதும் தெரியவந்துள்ளது. வித்தியாசமானப் பெயர்களில் டுவென்டி 20 கட்சி, ஜாக்தே ரஹோ பார்ட்டி(விழித்திரு கட்சி), இந்திய காதலர்கள் கட்சி, அமைதியான வாழ்க்கை கட்சி, சூப்பர் தேசியக் கட்சி, வாக்காளர்கள் கட்சி, எம்எல்ஏ கட்சி, நம்பிக்கை கட்சி, அனைத்தையும் விட பெரிய கட்சி எனப் பட்டியல் தொடர்கிறது. இவை பதிவானவை என்றாலும் இன்னும் இவற்றுக்கு தேர்தல் ஆணையத்தின் அங்கீகாரம் கிடைக்கவில்லை என்பதால் அவர்கள் தம் சின்னங்களில் போட்டியிட முடியாது. இதற்காக அரசியல் கட்சிகளுக்காக ஆணை யம் ஒதுக்கி உள்ள பொதுச் சின்னங்களில் ஒன்றை அவர்கள் தேர்ந்தெடுக்க வேண்டும். இந்த பட்டியலில் தற்போது 86 சின்னங்கள் இடம் பெற்றுள்ளன. இது குறித்து ’இந்து தமிழ்’ நாளேட்டிடம் மத்திய தேர்தல் ஆணைய வட்டாரம் கூறும்போது, ‘20/20 கிரிக்கெட் போட்டியைக் கண்டு கவர்ந்த கேரளவாசிகளால் டுவென்டி 20 கட்சி துவக்கப்பட்டுள்ளது. இந்திய காதலர்கள் கட்சியின் சின்னம், தாஜ்மகாலின் உள்ளே இதயம் வரையப்பட்டு அதில் அம்புக்குறி எய்தபடி வரையப்பட்டுள்ளது. புதிய சந்ததியின் மக்கள் கட்சி கோயம்புத்தூரில் இருந்து பதி வாகி உள்ளது. தேர்தல் சமயங் களில் பதிவாகும் பெரும்பாலானக் கட்சிகள் கறுப்புப்பணத்தை வெள்ளையாக்கவே பயன் படுத்தப்பட்டு வருகின்றன’ எனத் தெரிவித்தன. தேர்தல் எனும் பெயரில் வெளிநாடு மற்றும் உள்நாடுகளில் நிதி திரட்டும் கட்சிகளை தேர்தல் ஆணையம் தீவிரமாகக் கண்காணித்து வருகிறது. இதில் கடந்த 2006-ம் வருடம் சிக்கிய 255 கட்சிகள் மீது மத்திய நேரடிய வரிகள் வாரியத்தால் வழக்குகள் பதிவாகி நடைபெற்று வருகிறது. புதிய கட்சிகள் சட்டப்பேரவை அல்லது மக்களவை தேர்தலில் போட்டியிடுகையில் குறிப்பிட்ட சதவிகிதம் வாக்குகளுடன் தொகுதிகளிலும் வெற்றி பெற வேண்டும். அப்போதுதான் அவர் களின் கட்சிக்கு தேர்தல் ஆணை யம் அங்கீகாரம் கிடைக்கும். அங்கீ காரத்திற்கு பின் அவை எந்த தேர்தலிலும் போட்டியிடாமல் இருந்தால் குறிப்பிட்ட காலத்திற்கு பின் அதுவும் ரத்தும் செய்யப் பட்டுவிடும். மக்களவை தேர்தல் அறிவிக்கப் பட்ட மார்ச் 10 ஆம் தேதிக்கு முன்தினம் வரை ஆணையத்தில் பதிவான மொத்த அரசியல் கட்சிகளின் எண்ணிக்கை 2,301 ஆகும். இதில் தேசியக்கட்சிகளாக ஏழு, மாநிலக்கட்சிகளாக 59-ம் அங் கீகாரம் பெற்றுள்ளன. மக்களவை தேர்தலை குறி வைத்து பிப்ரவரி முதல் மார்ச் வரை என 37 நாட்களில் மட்டும் 149 கட்சிகள் புதிதாகப் பதிவு பெற்றுள்ளன. தேர்தலில் போட்டியிடாமல் உள்ள புதிய கட்சிகளின் பதிவை ரத்து செய்ய வேண்டும் என ஆணை யம் அனுப்பிய யோசனை பல ஆண்டுகளாக மத்திய சட்டத்துறை அமைச்சகத்தால் சட்டத்திருத்தம் செய்ய நிலுவையில் உள்ளது.

அரசுப் பள்ளிகளில் ஏப்ரல் 1 முதல்  மாணவர் சேர்க்கை தொடங்க வேண்டும் பள்ளிக் கல்வித் துறை உத்தரவு 

அரசுப் பள்ளிகளில் அனைத்து வகுப்புகளுக்கும் மாணவர் சேர்க் கையை ஏப்ரல் 1-ம் தேதி முதல் நடத்த வேண்டும் என்று பள்ளிக் கல்வித் துறை உத்தரவிட்டுள்ளது. இதுகுறித்து பள்ளிக் கல்வித் துறை இயக்குநர் வி.சி.ராமேஸ்வர முருகன், மாவட்ட முதன்மை கல்வி அதிகாரிகளுக்கு அனுப்பிய சுற்றறிக்கையில் கூறியிருப்பதாவது: நடப்பு கல்வியாண்டு (2018-19) நிறைவடைய இருக்கிறது. பொது வாக பள்ளிகளில் மாணவர் சேர்க் கையை கல்வி ஆண்டு தொடக்கத் தில் ஜூன் மாதம் மேற்கொள்வதே வழக்கம். ஆனால், தனியார் கல்வி நிறுவனங்கள் ஏப்ரல் இறுதிக்குள் மாணவர் சேர்க்கையை முடித்து விடுகின்றனர். இதனால் அரசுப் பள்ளி களில் சேர்க்கையை தொடங்கு வதற்கு முன்பே பெற்றோர்கள் தங் கள் பிள்ளைகளை அருகே உள்ள தனியார் பள்ளிகளில் சேர்த்துவிடு கின்றனர். எனவே, அரசுப் பள்ளி களில் அதிக மாணவர்கள் சேருவதை உறுதிபடுத்த அடுத்த கல்வி ஆண்டுக் கான மாணவர் சேர்க்கையை ஏப்ரல் 1-ம் தேதி முதல் தொடங்க முடிவு செய்யப்பட்டுள்ளது. அதன்படி, மழலையர் வகுப்புகள் தொடங்கி பிளஸ் 2 வரையுள்ள அனைத்து வகுப்புகளுக்கும் ஏப்ரல் 1-ம் தேதி முதல் மாணவர் சேர்க்கை நடத்தப்பட வேண்டும். சேர்க்கை யின்போதே அனைத்து சான்றிதழ் களையும் பெற வேண்டிய அவசிய மில்லை. பின்நாளில் வழங்கினால் கூட போதுமானது. மாணவர் சேர்க் கையை கல்வி தகவல் மேலாண்மை (எமிஸ்) இணையதளத்தில் கட்டாயம் பதிவு செய்ய வேண்டும். பிளஸ் 1 மாணவர்களுக்கும் ஏப்ரல் முதல் மாணவர் சேர்க்கையை நடத்தலாம். தேர்வு முடிவுகள் வந்த பின்னர் அவர்களுக்கான இடங்களை உறுதி செய்ய வேண்டும். இவ்வாறு அதில் கூறப்பட்டுள்ளது.

Monday, March 4, 2019

181 காலி இடங்களுக்கான குரூப்-1 முதல்நிலை தேர்வு ஒரு பதவிக்கு 925 பேர் போட்டி

181 காலி இடங்களுக்கான குரூப்-1 முதல்நிலை தேர்வு தமிழகம் முழுவதும் நேற்று நடைபெற்றது. ஒரு பதவிக்கு 925 பேர் போட்டியிடுகின்றனர். தமிழ்நாடு அரசு பணியாளர் தேர்வாணையம் (டி.என்.பி.எஸ்.சி.) குரூப்-1 பதவிகளுக்கான அறிவிப்பை கடந்த ஜனவரி மாதம் வெளியிட்டது. அதில், சப் கலெக்டர்- 27, துணை போலீஸ் சூப்பிரண்டு- 90, வணிகவரி உதவி கமிஷனர்- 18, கூட்டுறவு சங்கங்களின் துணை பதிவாளர்- 13, மாவட்ட பதிவாளர் - 7, கிராம மேம்பாடு உதவி இயக்குனர்- 15, மாவட்ட வேலைவாய்ப்பு அலுவலர்- 8, தீயணைப்பு மற்றும் மீட்புத்துறை மாவட்ட அலுவலர்- 3 ஆகிய 181 காலி பணியிடங்களுக்கான அறிவிப்பு இருந்தது. இதற்காக விண்ணப்பிக்க கடந்த ஜனவரி மாதம் 31-ந் தேதி வரை அவகாசம் வழங்கப்பட்டது. இந்த பதவிகளுக்கு 2 லட்சத்து 30 ஆயிரத்து 588 பேர் விண்ணப்பித்து இருந்தனர். குரூப்-1 முதல்நிலை தேர்வு 2 லட்சத்து 30 ஆயிரத்து 588 பேர் விண்ணப்பித்து இருந்ததில், 1,150 பேரின் விண்ணப்பங்கள் சரியாக பூர்த்தி செய்யாத காரணத்தினால் நிராகரிக்கப்பட்டதாக டி.என்.பி.எஸ்.சி. அறிவித்துள்ளது. இதையடுத்து, 2 லட்சத்து 29 ஆயிரத்து 438 பேரின் விண்ணப்பங்கள் ஏற்றுக்கொள்ளப்பட்டன. இந்த 181 காலி பணியிடங்களுக்கான குரூப்-1 முதல்நிலை தேர்வு தமிழகம் முழுவதும் நேற்று நடைபெற்றது. 32 மாவட்ட தலைநகரங்களிலும் மையங்கள் அமைக்கப்பட்டு, 773 இடங்களில் இந்த தேர்வு நடந்தது. சென்னையில் மட்டும் 156 இடங்களில் தேர்வு நடைபெற்றது. அதில், 48 ஆயிரத்து 652 பேர் கலந்துகொண்டு தேர்வு எழுதுவதாக டி.என்.பி.எஸ்.சி. அறிவித்து இருந்தது. ஒரு பதவிக்கு 925 பேர் போட்டி நேற்று காலை 10 மணிக்கு தொடங்கிய இந்த தேர்வு பிற்பகல் 1 மணி வரை நடந்தது. தேர்வு தொடங்குவதற்கு முன்பு தேர்வர்களை முறையான கண்காணிப்புக்கு பிறகே தேர்வு எழுத அனுமதித்தனர். விண்ணப்பம் ஏற்றுக்கொள்ளப்பட்டு இருந்த 2 லட்சத்து 29 ஆயிரத்து 438 பேரில், ஒரு லட்சத்து 67 ஆயிரத்து 490 பேர் (73 சதவீதம் பேர்) தேர்வு எழுதியதாக டி.என்.பி.எஸ்.சி. நேற்று மாலை அறிவித்தது. சென்னையில் மட்டும் 35 ஆயிரத்துக்கும் மேற்பட்டோர் தேர்வு எழுதியதாக தெரிகிறது. தேர்வு எழுதியவர்களின் எண்ணிக்கையை வைத்து பார்க்கும்போது, ஒரு பதவிக்கு 925 பேர் போட்டியிடுகின்றனர். சற்று எளிதாக இருந்தது நேற்று நடந்த முதல்நிலை தேர்வு சற்று எளிதாக இருந்ததாக தேர்வர்கள் கருத்து தெரிவித்தனர். முதல்நிலை தேர்வில் வெற்றி பெறுபவர்கள், முதன்மை தேர்வுக்கு தகுதி பெறுவார்கள். முதன்மை தேர்வு குறித்த அறிவிப்பு விரைவில் வெளியாகும் என்று டி.என்.பி.எஸ்.சி. நிர்வாகம் தெரிவித்து இருக்கிறது.