மாணவியிடம் சில்மிஷத்தில் ஈடுபட்ட தலைமை ஆசிரியர் பணியிடை நீக்கம்

மாணவியிடம் சில்மிஷத்தில் ஈடுபட்ட தலைமை ஆசிரியர் பணியிடை நீக்கம் செய்யப்பட்டார். திருவண்ணாமலை அருகே கலசபாக்கம் ஆதமங்கலம் புதூரில் ஊராட்சி ஒன்றிய தொடக்கப்பள்ளி உள்ளது. இந்த பள்ளியின் தலைமை ஆசிரியராக சுப்பிரமணியன் என்பவர் பணியாற்றி வருகிறார். இந்த பள்ளியில் நல்லான்பிள்ளைபெற்றான் பகுதியை சேர்ந்த 10 வயது சிறுமி 5-ம் வகுப்பு படித்து வருகிறார். கடந்த சில நாட்களுக்கு முன்பு தலைமை ஆசிரியர் சுப்பிரமணியன் தனக்கு தலைவலி என்று கூறி அந்த 5-ம் வகுப்பு மாணவியை தைலம் தேய்த்து விடுமாறு அழைத்துள்ளார். மாணவியும், தலைமை ஆசிரியருக்கு தைலம் தேய்த்து விட்டதாக தெரிகிறது. இதுகுறித்து மாணவி அவரது பெற்றோரிடம் கூறியுள்ளார். இதையடுத்து மாணவியின் பெற்றோர் பள்ளிக்கு சென்று தலைமை ஆசிரியரிடம் கேட்டுள்ளனர். மேலும் தகவலறிந்த அந்த பகுதியை சேர்ந்த விடுதலை சிறுத்தைகள் கட்சியினர், மாணவியிடம் தலைமை ஆசிரியர் சில்மிஷம் செய்ததாக மாவட்ட முதன்மை கல்வி அலுவலருக்கு புகார் செய்தனர். முதன்மை கல்வி அலுவலர் உத்தரவின் பேரில் வட்டார கல்வி அலுவலர் சுப்பிரமணியன் அந்த பள்ளியில் விசாரணை மேற்கொண்டார். பணியிடை நீக்கம் இதையடுத்து வட்டார கல்வி அலுவலர் கொடுத்த விசாரணை அறிக்கையை தொடர்ந்து முதன்மை கல்வி அலுவலர் ஜெயக்குமார், ஆதமங்கலம் புதூர் பள்ளி தலைமை ஆசிரியர் சுப்பிரமணியனை பணியிடை நீக்கம் செய்து உத்தரவிட்டார். இதற்கிடையில் சுப்பிரமணியன் கடந்த 10 நாட்களுக்கு முன்பு கோவையில் உள்ள உறவினர் வீட்டிற்கு சென்று இருந்தாகவும், பணியிடை நீக்கம் செய்யப்பட்ட தகவலறிந்த அவர் அதிகப்படியான மாத்திரைகள் சாப்பிட்டு மயங்கி விழுந்ததால் தனியார் மருத்துவமனையில் அனுமதிக்கப்பட்டு சிகிச்சை பெற்று வருவதாகவும் போலீசார் தெரிவித்தனர்.

30 ஆண்டுகளாக தூங்காத மனிதர்!

சவுதி அரேபியாவில் 70 வயது முதியவர் ஒருவர் கடந்த 30 ஆண்டுகளாக ஒரு வினாடி கூடத் தூங்கவில்லை என்ற விந்தைத் தகவல் வெளியாகி உள்ளது. அந்த நபர் தூக்கமின்மைக்காக பல மருத்துவர்களை அணுகியும் அவர்களால் இதுவரை உறுதியான காரணத்தைக் கண்டு பிடிக்க முடியவில்லை. சவுதி ராணுவத்தில் பணியாற்றிய காலகட்டத்தில், தொடர்ந்து பல காலம் அவர் தூங்காமல் கண்விழித்து இருந்திருக்கிறார். ராணுவப் பணியிலிருந்து ஓய்வுபெற்ற பின்னர் மருத்துவமனை சென்று, தனது நிலைக்குக் காரணம் என்ன என பரிசோதித்துள்ளார். அதைத் தொடர்ந்து, 4 நாடுகளைச் சேர்ந்த சிறப்பு மருத்துவர்கள் குழு ஒன்று சேர்ந்து அவரைப் பரிசோதித்தது. அவர்களால் உரிய காரணத்தைக் கண்டறிய முடியவில்லை என்றபோதிலும், தூக்கமின்மைக்கு அந்த நபரின் மன அழுத்தமே காரணமாக இருக்கலாம் எனத் தெரிவித்துள்ளனர். தொடர்ந்து அந்த முதியவருக்கு சிகிச்சை அளித்து வந்தாலும் இதுவரை அவரால் தூங்க முடியவில்லை. இதற்கிடையில், அல் பஹா பகுதி ஆட்சியாளர் இவரது நிலை குறித்து அறிந்து நலம் விசாரித்திருக்கிறார். அப்போது அவரிடம் தமக்கு ஒரு கார் மட்டும் தர முடியுமா என அம்முதியவர் கேட்டாராம். அதையடுத்து அவருக்கு புதிய கார் ஒன்றை பரிசாக அளித்தது மட்டுமின்றி, எஞ்சிய காலம் முழுவதும் அவருக்கான அனைத்துத் தேவைகளையும் பூர்த்தி செய்து தருவதாகவும் வாக்குறுதி அளித்துள்ளார், அல் பஹா ஆட்சியாளர். தூங்கா மனிதரின் துயரம் நீங்கட்டும்!

14 ஆயிரம் ஆண்டுகளுக்கு முன்பே ரொட்டி தயாரிப்பு!

பல்லாயிரம் ஆண்டுகளுக்கு முன்பு ரொட்டி தயாரிக்கப்பட்ட பகுதி சுமார் 14 ஆயிரம் ஆண்டுகளுக்கு முன்பே ரொட்டி தயாரிக்கப்பட்டதற்கான ஆதாரங்களை விஞ்ஞானிகள் கண்டுபிடித்துள்ளனர். தீயில் சுடப்பட்ட அந்த உணவுப்பொருள், தட்டையான ரொட்டி போன்றும், இன்றைய பல தானிய உணவுகள் போன்றும் ருசித்திருக்கும் என்று கூறப் படுகிறது. அந்த ரொட்டிக்குள், வறுத்த இறைச்சியை வைத்து அக்கால மக்கள் சாப்பிட்டிருக்கக்கூடும். அதுவே பழமையான ‘சாண்ட்விச்’சாக இருந்திருக்கிறது. ஜோர்டான் நாட்டின் பாலைவனத்தில் இதற்கான ஆதாரங்கள் கண்டுபிடிக்கப்பட்டிருக்கின்றன. பார்லி மற்றும் கோதுமையில் இருந்து தயாரிக்கப்பட்ட மாவில், பொடியாக்கப்பட்ட கிழங்குகள் மற்றும் தண்ணீர் சேர்க்கப்பட்டு, கற்காலத்தில் ரொட்டிகள் சுடப்பட்டிருக்கின்றன. ஜோர்டானில் 14 ஆயிரம் ஆண்டுகளுக்கு முன் ரொட்டி செய்யப்பட்டது எப்படித் தெரியுமா? கோதுமை மற்றும் பார்லியில் இருந்து மாவு தயாரிக்கப்பட்டது. நீரில் வளரும் காட்டுத் தாவரங்களின் கிழங்குகள் அரைக்கப்பட்டு உலர வைக்கப்பட்டது. அதில் தண்ணீர் சேர்த்து பிசையப்பட்டது. பின், நெருப்பினால் சூடாக்கப்பட்ட கற்களில் ரொட்டி சுடப்பட்டது. ‘‘பல்வேறு உணவுப் பொருட்கள் ஒன்று சேர்க்கப்பட்டு, சமையல் செய்ததற்கான பழமையான ஆதாரம் இது’’ என்று லண்டன் பல்கலைக்கழகப் பேராசிரியர் டொரியன் புல்லர் கூறினார். தட்டையான ரொட்டிகளுடன், வறுத்த மான் இறைச்சி போன்றவற்றை அவர்கள் உண்டுள்ளனர். உலகில் உள்ள பல நாடுகளில் ரொட்டிகள் பிரதான உணவாக இருக்கின்றன. ஆனால், இது எப்போது தோன்றியது என்ற தகவல் தெளிவாக இல்லை. தற்போது வரை, துருக்கியில் ரொட்டி தயாரிக்கப்பட்டதற்கான பழமையான ஆதாரங்கள் உள்ளன. அந்தக் கண்டுபிடிப்புகள் 9 ஆயிரம் ஆண்டுகள் பழமைவாய்ந்தவை. இதுதொடர்பாக இரண்டு கட்டிடங்களை விஞ்ஞானிகள் கண்டுபிடித்துள்ளனர். பெரிய வட்டமான நெருப்புத் தகடுகளும், அவற்றில் ரொட்டித் துகள்களும் இருந்தது கண்டறியப்பட்டது. கடந்த காலத்துக்கும் நிகழ்காலத்துக்கும் இருக்கும் உணவுக் கலாசாரத்தின் இணைப்பாக ரொட்டி திகழ்வதாக கோபன்ஹேகன் பல்கலைக்கழகப் பேராசிரியர் அமையா கூறுகிறார். அக்காலத்தில் மக்கள் வேட்டைக்காரர்களாக இருந்தார்கள். மான்கள், முயல்கள், பறவைகள் போன்றவற்றை அவர்கள் வேட்டையாடி உண்டிருக்கின்றனர். மேலும், உணவுக்காக பழங்கள் மற்றும் தானியங்களையும் அவர்கள் நம்பியிருந்தனர். கொண்டாட்டம் அல்லது விருந்துக் காலங்களில் மக்கள் கூடும்போது ரொட்டிகள் தயாரிக்கப்பட்டிருக்கலாம் என்று ஆய்வாளர்கள் கருதுகின்றனர். இவையெல்லாம், மனிதன் முறையான விவசாயத்தில் ஈடுபடுவதற்கு முன் நடந்தவை. முறையான விவசாயத்துக்கு முன்பாக அக்கால மக்கள் தானியப் பயிர்களை வளர்க்க ஆரம்பித்தனர். அப்போது தயாரிக்கப்பட்ட ரொட்டிகள் மெல்லியதாக இருந்திருக்கக்கூடும் என்றும் விஞ்ஞானிகள் கூறுகின்றனர். நாம் சாப்பிடும் ரொட்டி, மிக நீண்ட தூரத்தைக் கடந்து வந்திருக்கிறது!

மக்களை ஈர்க்கும் ‘பிசாசு நகரம்'!

ஆஸ்திரேலியாவில் ‘பிசாசு நகரம்’ என்று வர்ணிக்கப்படும் ஊருக்கு, அரசாங்கத்தின் எச்சரிக்கையையும் மீறி அதிகம் பேர் சுற்றுலா செல்கிறார்கள். ஆஸ்பெஸ்டாஸ் சுரங்கம் ஒன்றை ஒட்டி அமைந்திருக்கும் அந்த நகரம், மேற்கு ஆஸ்திரேலியாவில் உள்ளது. இந்த ‘பிசாசு நகரத்துக்கு’ச் செல்ல வேண்டாம் என்று அரசு அதிகாரிகள் எச்சரிக்கின்றனர். ஆனால் மக்கள் அதைக் கேட்பதாக இல்லை. சுற்றுலாப் பயணிகள், திகிலூட்டும் இடங்களைப் பார்க்கும் ஆர்வம் கொண்ட மக்கள் எனப் பலரும் தினமும் இந்த விட்டிநூம் நகரத்துக்கு வருகிறார்கள். இங்குள்ள ஆஸ்பெஸ்டாஸ் சுரங்கம் 1970-ம் ஆண்டிலேயே மூடப்பட்டுவிட்டது. இந்தச் சுரங்கம், ஆஸ்திரேலியாவின் பெர்த் நகருக்கு வடக்கே 1,100 கி.மீ. தொலைவில் அமைந்திருக்கிறது. சரி, இது ஏன் பிசாசு நகரம் என்று அழைக்கப்படுகிறது? ஒரு காலத்தில் இது பரபரப்பான சுரங்கப்பகுதியாக இருந்தது. தினமும் ஆயிரக்கணக்கானோர் இந்தச் சுரங்கத்தில் பணிபுரிந்தனர். ஆனால், இந்தச் சுரங்கத்தால் ஏற்பட்ட தாகத்தால், இரண்டாயிரத்துக்கும் மேற்பட்டோர் பலியாகிவிட்டனர். அதைத் தொடர்ந்து இந்தப் பகுதி சுற்றுச்சூழல் பாதிப்புக்கு உள்ளான பகுதியாக அறிவிக்கப்பட்டது. இப்பகுதிக்குச் செல்வதும் தடை செய்யப்பட்டது. உக்ரைனின் செர்னோபில், இந்தியாவின் போபாலில் நடந்த விபத்தைவிட மோசமான விபத்து அது. ஆஸ்திரேலிய அரசாங்கம், பாதுகாப்பு மற்றும் சுகாதார பெரும் விபத்து என்று அதை வர்ணித்தது. விட்டிநூம் நகரத்துக்குச் செல்வது பாதுகாப்பானது இல்லை. அங்குள்ள சுற்றுப்புற மாசுபாட்டால் உடல்நலக் கேடுகள் ஏற்படலாம், அங்கு செல்லாதீர்கள் என்று எச்சரிக்கும் வண்ணம் வழி நெடுகிலும் எச்சரிக்கைப் பலகைகள் வைக்கப்பட்டுள்ளன. ஆனால் பலரும் அதைக் கண்டுகொள்வதில்லை. ஒரு சுவாரசியத்துக்காக தினமும் திரளான மக்கள் விட்டிநூம் நகரத்துக்குச் செல்கிறார்கள். சிறிது நேரம் அங்கு இருப்பதால் ஒன்றும் ஆகிவிடாது என்பது அவர்கள் கருத்து. தடைசெய்யப்பட்ட குறிப்பிட்ட சுரங்கம், அருவிகள் நிறைந்த கரிஜினி தேசியப் பூங்காவுக்குச் செல்லும் வழியில் இருக்கிறது. மேற்கு ஆஸ்திரேலியாவை சேர்ந்த ஆஷ்லி ஒயிட் தனது தோழியுடன் கரிஜினி தேசியப் பூங்காவுக்கு சென்று இருக்கிறார். அப்போது அவர் மட்டும் இந்தச் சுரங்க பகுதியைப் பார்வையிட்டுள்ளார். தான் அந்தப் பகுதிக்குச் செல்லும் முன்பே அப்பகுதி குறித்து படித்துவிட்டு தான் சென்றேன் என்கிறார் ஆஷ்லி ஒயிட். அந்தப் பகுதி குறித்த எந்தத் தகவலும் இவருக்கு அச்சமூட்டவில்லை. தைரியமாக அங்கு சென்று வந்திருக்கிறார். சிறிது நேரத்தை அங்கு கழிப்பதால் ஒன்றும் பிரச்சினையில்லை என்று ஒயிட் கூறுகிறார். மேலும் அவர், அந்த பிசாசு நகரத்தையும், கைவிடப்பட்ட அதன் சுற்றுப்புறத்தையும் பார்ப்பது மிக சுவாரசியமான அனுபவமாக இருந்தது என்றார். பாதுகாப்பு குறித்து எந்தக் கவலையும் இல்லாமல் ஒயிட் அந்த சுரங்கப் பகுதிக்குச் சென்று இருந்தாலும், அவரது தோழி அந்நகரத்துக்கு வரத் தயாராக இல்லை. இந்தச் செயல் மிகவும் ஆபத்தானது என்று அதிகாரிகள் கூறுகின்றனர். அந்தப் பகுதி முழுவதும் ஆஸ்பெஸ்டாஸ் மாசு கலந்து இருப்பதாக அவர்கள் எச்சரிக்கின்றனர். ஒயிட்டை போல சிலர் அந்த சுரங்கத்தைப் பார்வையிட்டு, அதை படம்பிடித்து யுடியூபிலும் பதிவேற்றி இருக்கிறார்கள். அந்தக் காணொளிக்கு இருவகையான கருத்துகளும் வந்திருக்கின்றன. சிலர் அதை தீரமிக்க செயல் என பாராட்ட, சிலரோ அதை கடுமையாக கண்டித்திருக்கின்றனர். அக்காணொளியை சமூக ஊடகத்தில் கண்ட அரசு அதிகாரிகள், அங்கு செல்வது எந்த வகையிலும் பாதுகாப்பானது இல்லை என்று கடுமையாக எச்சரிக்கை விடுத்துள்ளனர். அங்கு செல்வதால் நுரையீரல் புற்றுநோய்கூட வரலாம் என்று அவர்கள் கூறுகின்றனர். ஆபத்தை அருகே சென்று பார்ப்பதில் சிலருக்கு ஒரு ‘திரில்’!

ஒவ்வொரு நாளும் ரூ. 1200 கோடி வருமானம்!

அமேசான் நிறுவனரும், அதன் தலைமை செயல் அதிகாரியுமான ஜெப் ெபசோசின் சொத்து மதிப்பு கடந்த ஆண்டு ஒவ்வொரு நாளும் ரூ. 1200 கோடி அளவுக்கு அதிகரித்திருக்கிறது. உலகிலேயே மிகப் பெரிய பணக்காரர்கள் பட்டியலில் முதலிடம் பிடித்திருப்பவர், ஜெப் ெபசோஸ். இவரது சொத்து மதிப்பு 150 பில்லியன் அமெரிக்க டாலர்கள் (ரூபாய் மதிப்பில், 7 லட்சத்து 70 ஆயிரம் கோடி!). அதாவது, 49 ஏழைநாடுகளின் ஜி.டி.பி. (மொத்த உள்நாட்டு உற்பத்தி) மதிப்பைக் காட்டிலும் ஜெப் ெபசோசின் சொத்து மதிப்பு அதிகம். உலகப் பெரும் பணக்காரர்கள் பட்டியலில் 2-வது இடத்தில் உள்ள பில்கேட்சை விட ஜெப் ெபசோசுக்கு 56.7 பில்லியன் டாலர்கள் சொத்து அதிகம் உள்ளது. கடந்த 1998-ம் ஆண்டு ஒரு பில்லியன் அமெரிக்க டாலராக இருந்த இவரது சொத்து மதிப்பு சுமார் 20 ஆண்டுகளில் 150 பில்லியன் டாலராக உயர்ந்துள்ளது. கடந்த ஆண்டில் மட்டும் ஒவ்வொரு நாளும் ரூ. 1200 கோடி அளவுக்கு ஜெப் ெபசோசின் சொத்து மதிப்பு உயர்ந்துள்ளது. இது பண மழையல்ல, பண அடைமழை!

உலகிலேயே அமைதியான நாடு எது தெரியுமா?

உலகிலேயே அமைதியான நாடு எது தெரியுமா? முதலிடத்தில் ஐஸ்லாந்து... கடைசி இடத்தில் சிரியா... உலகிலேயே அமைதியான நாடுகள் பட்டியலில் ஐஸ்லாந்து முதலிடத்தைத் தக்கவைத்துக் கொண்டிருக்கிறது. அதற்கு அடுத்த இடங்களில் நியூசிலாந்து, ஆஸ்திரியா ஆகிய நாடுகள் உள்ளன. இங்கிலாந்தில் இருந்து வெளியாகும் இதழ் ஒன்றும், பொருளாதாரம் மற்றும் அமைதி குறித்து ஆய்வு செய்யும் ஆஸ்திரேலிய நிறுவனமும் இணைந்து உலகின் அமைதியான நாடுகள் குறித்த இந்த ஆய்வை மேற்கொண்டன. சர்வதேச அளவில் 163 நாடுகளில் இந்த ஆய்வு நடத்தப்பட்டது. இதில், ஐஸ்லாந்து தொடர்ந்து முதலிடத்தில் கம்பீரமாக நீடிக்கிறது. அதேவேளையில், உலக அளவில் அமைதியான நாடுகளில் ஒன்றாகக் கருதப்படும் சுவிட்சர்லாந்து, பின்னடைவைச் சந்தித்துள்ளது. கடந்த ஆண்டு 9-வது இடத்தில் இருந்த சுவிட்சர்லாந்து இந்த ஆண்டு 12-வது இடத்துக்குத் தள்ளப்பட்டுள்ளது. இதற்கு முக்கிய காரணமாக கூறப்படுவது, ராணுவமயமாக்கல் பிரிவில் சுவிட்சர்லாந்து பெற்றிருக்கும் மோசமான மதிப்பீடு. அத்துடன், சமீபகாலமாக சுவிட்சர்லாந்தில் இருந்து சர்வதேச நாடுகளுக்கு ராணுவ தளவாட ஏற்றுமதி அதிகரிப்பும் பின்னடைவைத் தந்திருப்பதாகக் கூறப்படுகிறது. மேலும் இந்த விவகாரத்தில் ரஷியா, இஸ்ரேல் மற்றும் பாகிஸ்தான் உள்ளிட்ட நாடுகளின் பட்டியலில் சுவிட்சர்லாந்தையும் சர்வதேச பார்வையாளர்கள் ஒப்பீடு செய்யத் துவங்கியுள்ளனர் எனவும் தெரியவந்துள்ளது. மிகவும் அமைதியான நாடுகள் பட்டியலின் கடைசி இடங்களில் தெற்கு சூடான், ஆப்கானிஸ்தான், சிரியா ஆகியவை உள்ளன. சர்வதேச அளவில் 91 நாடுகளின் அமைதி சீர்கெட்டு வருவதாகவும், கடந்த ஆண்டைவிட 71 நாடுகள் அமைதி வழியில் முன்னேறியுள்ளதாகவும் குறிப்பிட்ட ஆய்வு கூறுகிறது.

இந்தத் திருடன் ‘ரொம்ப’ நல்லவன்!

இந்தத் திருடன் ‘ரொம்ப’ நல்லவன்! மன்னிப்புக் கடிதத்துடன் அனுப்பப்பட்ட 5 பவுண்டு நோட்டு... இங்கிலாந்தில், 40 ஆண்டுகளுக்கு முன் கடையொன்றில் திருடிய சாக்லேட்டுக்கான பணத்தை அனுப்பி, நெகிழ வைத்திருக்கிறார் ஒரு முன்னாள் ‘திருடர்’. இங்கிலாந்தின் லிவர்பூல் பகுதியில் உள்ள பெல்லிவேல் ஷாப்பிங் சென்டரில் திருடிய சாக்லேட்டுக்குத்தான் இத்தனை ஆண்டுகளுக்குப் பின் பணம் அனுப்பியிருக்கிறார் குறிப்பிட்ட நபர். சமீபத்தில் அந்த வணிக வளாகத்துக்கு ஓர் அனாமதேய கடிதம் வந்தது. அதில், ‘1975-ம் ஆண்டு நான் சிறுவனாக இருந்தபோது உங்கள் வூல்ஸ்வர்த் கடையில் இருந்து இரண்டு சாக்லேட்களைத் திருடிச் சென்றுவிட்டேன். அதற்காக நான் மன்னிப்புக் கேட்டு கொள்கிறேன். அந்த சாக்லேட்டுகளுக்கான பணத்தையும் இத்துடன் அனுப்பியுள்ளேன்’ என்று எழுதப்பட்டிருந்தது. அந்த கடிதத்துடன் ஐந்து பவுண்டு நோட்டு ஒன்றும் இணைக்கப்பட்டிருந்தது. வேடிக்கை என்னவென்றால் தற்போது அங்கு வூல்ஸ்வர்த் கடை இல்லை. எனவே அந்தப் பணம் நன்கொடையாக கொடுக்கப்பட உள்ளது. இது குறித்து கூறிய சம்பந்தப்பட்ட ஒருவர், ‘‘இந்தக் காலத்தில் இப்படி ஒரு நல்ல விஷயத்தைப் பார்ப்பது மகிழ்ச்சியாக இருக்கிறது. அந்தக் கடிதத்தை அனுப்பியவருக்கு பெல்லிவேல் வணிக வளாகத்தின் சார்பில் நன்றியைத் தெரிவித்துக்கொள்வதோடு, அவரது மன்னிப்பையும் ஏற்றுக் கொள்கிறோம்’’ என்று கூறியிருக்கிறார்.

இணையதளம் மூலம் 20 சான்றிதழ்களை பெறலாம் கலெக்டர் தகவல்.

சென்னை மாவட்ட கலெக்டர் வெ.அன்புச்செல்வன் வெளியிட்டுள்ள செய்திக்குறிப்பில் கூறப்பட்டுள்ளதாவது:- இருப்பிடச்சான்று, சாதிச்சான்று, வருமானச்சான்று உள்ளிட்ட 20 வகையான வருவாய்த்துறை சான்றிதழ்களை இணையதளம் மூலம் பொதுமக்கள் வீட்டில் இருந்தபடியே தங்கள் ‘ஸ்மார்ட் போன்’ அல்லது கணினி மூலம் விண்ணப்பித்து பெறும் முறை அறிமுகப்படுத்தப்பட்டுள்ளது. சான்றிதழ்களை பெற https://www.tnesevai.tn.gov.in/citizen/ என்ற இணையதள முகவரியில் தங்களை பதிவுசெய்து பயனர் பெயர் (யூசர் நேம்) பெற்ற பின்னர் விண்ணப்பத்தை பதிவேற்றம் செய்யலாம். இதற்கான வழிமுறைகளை https://www.tnesevai.tn.gov.in/videotutorial.html மற்றும் https://www.tnesevai.tn.gov.in/UserManual.html ஆகிய இணையதள முகவரிகளில் தெரிந்துகொள்ளலாம். மேலும் UM-A-NG என்ற செல்போன் செயலி மூலமாகவும் வருமான சான்றிதழ், பிறப்பிடம் மற்றும் இருப்பிடம் ஆகிய 3 சான்றிதழ்களையும் பெறலாம். இதற்கான சேவை கட்டணம் ரூ.60. எனவே பொதுமக்கள் இந்த வசதியை உபயோகித்து பயன்பெறுமாறு கேட்டுக்கொள்கிறேன். இவ்வாறு அதில் கூறப்பட்டுள்ளது.

வோடபோன், ஐடியா இணைப்புக்கு மத்திய அரசு ஒப்புதல் ஐடியா பங்கு 4% உயர்வு

வோடபோன் இந்தியா மற்றும் ஐடியா செல்லுலார் ஆகிய நிறுவனங்கள் இணைவதற்கு தொலைத்தொடர்பு துறை அனுமதி வழங்கி இருக்க்றது. ஒரு முறை ஸ்பெக்ட்ரம் கட்டணம் செலுத்துவது தொடர்பாக இதுவரை நீடித்து வந்த இழுபறி முடிவுக்கு வந்ததை அடுத்து அனுமதி வழங்கப்பட்டிருக்கிறது. ரூ.3,900 கோடியை ரொக்கமாகவும், மீதமுள்ள ரூ.3,300 கோடிக்கு வங்கிகள் உத்திரவாதம் அளித்த நிலையில் இந்த இணைப்புக்கு அனுமதி வழங்கப்பட்டிருக்கிறது. தொலைத்தொடர்பு துறை அனுமதி வழங்கியதை அடுத்து கம்பெனி பதிவாளரிடம் விண்ணப்பிக்க இந்த நிறுவனங்கள் முடிவு செய்திருக்கின்றன. ஏற்கெனவே அறிவித்ததன்படி வோடபோன் ஐடியா என நிறுவனத்தின் பெயர் மாற்றம் செய்யப்பட இருக்கிறது. இந்த இரு நிறுவனங்கள் இணைவதால்இந்தியாவில் பெரிய தொலைத்தொடர்பு நிறு வனமாகவும், உலகின் இரண்டா வது பெரிய தொலைத்தொடர்பு நிறுவனமாகவும் மாற இருக்கிறது. இந்த இணைப்புக்கு ஜூலை 9-ம் தேதி நிபந்தனை அடிப்படையில் ஒப்புதல் வழங்கப்பட்டது. புதிய நிறுவனத்தின் வசம் 35 சதவீத சந்தை இருக்கும். தவிர 43 கோடி வாடிக்கையாளர்கள் இருப்பார்கள் இரு நிறுவனங்களின் இணைப் புக்கு இறுதி ஒப்புதல் கிடைத்து விட்டதால், ஐடியா செல்லுலார் நிறுவனத்தின் பங்கு நேற்று 4 சதவீதம் அளவுக்கு உயர்ந்தது. வர்த்தகத்தின் முடிவில் 3.46 சதவீதம் உயர்ந்து 56.80 ரூபாயில் இந்த பங்கு முடிந்தது. இதனால் ஒரே நாளில் ரூ.872 கோடி அளவுக்கு நிறுவனத்தின் சந்தை மதிப்பு உயர்ந்தது. 

'வாட்ஸ் ஆப்' சேவைக்கு கட்டணம் மத்திய அரசு தீவிர பரிசீலனை.

வதந்திகளை கட்டுப்படுத்துவது தொடர்பாக நடந்த ஆலோசனை கூட்டத்தில், 'வாட்ஸ் ஆப்' சேவைக்கு கட்டணம் வசூலிப்பது தொடர்பாக விவாதிக்கப்பட்டதாக, தகவல் வெளியாகி உள்ளது.வாட்ஸ் ஆப் எனப்படும் தகவல் பரிமாற்ற சேவையை, உலகம் முழுவதும், 130 கோடி பேர், பயன்படுத்தி வருகின்றனர். நம் நாட்டில் மட்டும், 20 கோடி பேர், வாட்ஸ் ஆப் பயன்படுத்துகின்றனர்.இதன் வாயிலாக, தவறான தகவல்களும், வதந்திகளும் எளிதில் பரப்பப்படுகின்றன. இதன் காரணமாக, நாடு முழுவதும், பல அப்பாவிகள் அடித்து கொல்லப்பட்ட சம்பவங்கள், சமீபத்தில் நடந்தன. இதையடுத்து, வதந்திகள் பரப்பப்படுவதை கட்டுப்படுத்த, தொழில்நுட்ப ரீதியாக நடவடிக்கை எடுக்கும்படி, வாட்ஸ் ஆப் நிர்வாகத்துக்கு, மத்திய அரசு, 'நோட்டீஸ்' அனுப்பியது. இந்நிலையில், மத்திய தகவல் தொழில்நுட்ப துறை செயலர், அஜய் பிரகாஷ் சாஹ்னியை, வாட்ஸ் ஆப் நிறுவனத்தின் தலைமை செயல் அதிகாரி, மாத்யூ ஐடிமா, நேற்று சந்தித்து பேசினார்.வாட்ஸ் ஆப் வாயிலாக வதந்திகள் பரவுவதை, உடனடியாக கட்டுப்படுத்துவதன் அவசியம் குறித்து, இருவரும் விவாதித்தனர். அப்போது, வாட்ஸ் ஆப் சேவைக்கு கட்டணம் வசூலிப்பது தொடர்பாக இருவரும் விவாதித்ததாக, தகவல் தொழில்நுட்ப அமைச்சகத்தின் மூத்த அதிகாரி தெரிவித்தார். கட்டணம் வசூலிக்கும் பட்சத்தில், வாட்ஸ் ஆப் மூலம் பரிமாறிக் கொள்ளப்படும் தகவல்கள், எங்கு பாதுகாக்கப்படும் என்பதில், மத்திய அரசு அதிக அக்கறை காட்டியதாக கூறப்படுகிறது. தகவல்கள் அனைத்தும், இந்தியாவில் தான்பாதுகாக்கப்பட வேண்டும் என்ற நிபந்தனையை, மத்திய அரசு முன் வைத்ததாக, அதிகாரிகள் தெரிவித்தனர்

நடத்துனர் இல்லாமல் அரசு பஸ்கள் இயக்குவதை எதிர்த்த வழக்கு தள்ளுபடி ஐகோர்ட்டு உத்தரவு.

நடத்துனர் இல்லாமல் தமிழக அரசு பஸ்களை இயக்குவதை எதிர்த்து தொழிற்சங்கம் தொடர்ந்த வழக்கை சென்னை ஐகோர்ட்டு தள்ளுபடி செய்து உத்தரவிட்டது. சென்னை ஐகோர்ட்டில், மாநில போக்குவரத்து ஊழியர்கள் சம்மேளனத்தின் பொதுச்செயலாளர் ஆறுமுகநயினார் தாக்கல் செய்துள்ள மனுவில், ‘மோட்டார் வாகன சட்டத்தின்படி பொதுமக்கள் பயணம் செய்யும் பஸ்சில் கண்டிப்பாக நடத்துனர் இருக்க வேண்டும். ஆனால் தமிழக அரசு தற்போது ஓட்டுனர் மட்டும் உள்ள பஸ்களை இயக்குகிறது. எனவே மோட்டார் வாகன சட்டத்துக்கு புறம்பாக அரசு போக்குவரத்து கழகங்களில் நடத்துனர்கள் இல்லாமல் பஸ்களை இயக்கக்கூடாது என்று அரசுக்கு உத்தரவிட வேண்டும்’ என்று கூறியிருந்தார். இந்த மனு நீதிபதி எஸ்.எம்.சுப்பிரமணியம் முன்பு விசாரணைக்கு வந்தது. அப்போது தமிழக போக்குவரத்து துறையின் சார்பில் தாக்கல் செய்யப்பட்ட பதில் மனுவில், ‘நடத்துனர்கள் இல்லாமல், ஓட்டுனரை மட்டும் வைத்து அரசு பஸ்களை இயக்குவதில் எந்த தவறும் இல்லை. இந்த திட்டம் பல மாநிலங்களில் உள்ளன. அதே நேரம், எல்லா அரசு பஸ்களும் நடத்துனர் இல்லாமல் இயக்கப்படவில்லை. ஒரு இடத்தில் இருந்து மற்றொரு இடத்துக்கு, இடையில் நிற்காமல் செல்லும் ‘பாயிண்ட் டூ பாயிண்ட்’ பஸ்கள் மட்டுமே நடத்துனர் இல்லாமல் இயக்கப்படுகிறது. பஸ்சில் ஏறும்போதே பயணிகள் டிக்கெட் எடுத்து விடுவதால், நடத்துனர் தேவையில்லை. எனவே, இந்த வழக்கை தள்ளுபடி செய்ய வேண்டும்’ என்று கூறப்பட்டு இருந்தது. இந்த வழக்கை விசாரித்த நீதிபதி எஸ்.எம்.சுப்பிரமணியம் பிறப்பித்த உத்தரவில், ‘சட்ட விதிகளின்படி நடத்துனர்கள் இல்லாமல் பஸ்களை இயக்குவதற்கு எந்த தடையும் இல்லை. காலத்தின் மாற்றத்திற்கு ஏற்ப இதுபோன்ற நவீன தொழில்நுட்ப சேவைகளை நாமும் ஏற்றுக்கொள்ள வேண்டும். இடையில் நிற்காமல் செல்லும் ‘பாயிண்ட் டூ பாயிண்ட்’ சேவை வழங்கும் பஸ்களில் ஏறும் பயணிகள் முதலிலேயே ‘டிக்கெட்’ எடுத்து விடுவதால், அதை ஓட்டுனரே கொடுத்துவிடுவார். அந்த பஸ்களில் நடத்துனர் தேவையில்லை. இதுதொடர்பான அரசின் கொள்கை முடிவில் தலையிட முடியாது. இந்த மனுவை தள்ளுபடி செய்கிறேன்’ என்று கூறியுள்ளார்.

சமூக வலைத்தளங்களை பார்த்து, வீட்டில் சுகப்பிரசவத்திற்கு முயன்ற ஆசிரியை சாவு

சமூக வலைத்தளங்களை பார்த்து வீட்டில் வைத்து சுகப்பிரசவத்திற்கு முயன்ற ஆசிரியை இறந்தார். குழந்தைக்கு ஆஸ்பத்திரியில் சிகிச்சை அளிக்கப்பட்டு வருகிறது. ஆசிரியை திருப்பூர் புதுப்பாளையம் அருகே உள்ள ரத்தினகிரீஸ்வரர் நகரை சேர்ந்தவர் கார்த்திகேயன் (வயது 34). பனியன் வர்த்தக நிறுவனத்தில் வேலை செய்து வருகிறார். இவருடைய மனைவி கிருத்திகா (28). தனியார் பள்ளியில் ஆசிரியையாக வேலை செய்து வந்தார். இவர்களுக்கு 3 வயதில் ஒரு பெண் குழந்தை உள்ளது. இந்த நிலையில் கிருத்திகா, 2-வது முறையாக கர்ப்பமானார். சுகப் பிரசவத்தில் குழந்தை பிறக்க வேண்டும் என்பதற்காக சமூக வலைத்தளத்தில் உள்ள தகவல்படி ஒவ்வொரு மாதமும் அவர் உணவு உட்கொண்டு வந்துள்ளார். பிரசவத்தின்போது சாவு இந்த நிலையில் நிறைமாத கர்ப்பிணியான கிருத்திகாவுக்கு கடந்த 22-ந் தேதி பிரசவ வலி ஏற்பட்டுள்ளது. இதையடுத்து கார்த்திகேயன் தனது நண்பர் பிரவீன் என்பவருக்கு தகவல் தெரிவித்தார். உடனே பிரவீன் தனது மனைவியுடன், கார்த்திகேயன் வீட்டிற்கு வந்தார். அப்போது வீட்டில் கிருத்திகா வலியால் துடித்துக்கொண்டிருந்தார். இதையடுத்து சமூகவலைத்தளத்தில் சுகப்பிரசவம் பார்ப்பது எப்படி? என்று செல்போனில் தெரிந்து கொண்டு அதன்படி கிருத்திகாவுக்கு பிரசவம் பார்த்துள்ளனர். சிறிது நேரத்தில் கிருத்திகாவுக்கு பெண் குழந்தை பிறந்தது. ஆனால் கிருத்திகாவின் உடலில் இருந்து அதிக அளவு ரத்தம் வெளியேறியதால் அவர் மயக்கம் அடைந்தார். உடனே கிருத்திகாவையும், குழந்தையையும் திருப்பூர் அரசு ஆஸ்பத்திரியில் சேர்த்தனர். அங்கு கிருத்திகாவை பரிசோதனை செய்த டாக்டர்கள் அவர் ஏற்கனவே இறந்துவிட்டதாக தெரிவித்தனர். குழந்தை ஆரோக்கியமாக உள்ளது ஆனால் குழந்தை நல்ல ஆரோக்கியமாக உள்ளது. இந்த குழந்தை ஆஸ்பத்திரியில் வைத்து பராமரிக்கப்பட்டு வருகிறது. இதுகுறித்து மாநகராட்சி நகர்நல அதிகாரி திருப்பூர் போலீசில் புகார் செய்தார். அதில் கிருத்திகாவிற்கு வீட்டில் பிரசவம் பார்த்தது எதற்காக? என்று விசாரிக்க வேண்டும் என்று கூறியிருந்தார். அதன்பேரில் போலீசார் விசாரித்து வருகிறார்கள். அரசு ஆஸ்பத்திரிகளில் பிரசவம் இலவசமாக பார்க்கும்போது அங்குபோகாமல் சமூக வலைத்தளம் மூலம் பிரசவம் பார்க்க காரணம் என்ன? என்று போலீசாருக்கு சந்தேகம் எழுந்துள்ளது.

தற்காலிக செவிலியர்களுக்கு ஊதியம் ரூ.14 ஆயிரமாக உயர்வு சுகாதாரத்துறை அமைச்சர் அறிவிப்பு.

தற்காலிக செவிலியர்களுக்கு தொகுப்பூதியம் ரூ.14 ஆயிரமாக உயர்த்தப்பட்டுள்ளது என்று சுகாதாரத்துறை அமைச்சர் டாக்டர் சி.விஜயபாஸ்கர் அறிவித்துள்ளார். தற்காலிக செவிலியர்கள் தமிழகத்தில் அரசு ஆரம்ப சுகாதார நிலையங்கள், அரசு மருத்துவமனைகள் மற்றும் அரசு மருத்துவக்கல்லூரி மருத்துவமனைகளில் பணிபுரிய தற்காலிக செவிலியர்கள் நியமிக்கப்பட்டு ஆரம்பத்தில் மாத ஊதியமாக ரூ.7,700 வழங்கப்படுகிறது. இந்த தற்காலிக செவிலியர்கள் நிரந்தர செவிலியர்கள் பணியிடங்கள் காலியாகும்போது அந்த பணியிடங்களில் நிரந்தர செவிலியர்களாக பணிநிரந்தரம் செய்யப்படுகிறார்கள். தற்காலிக செவிலியர்கள் நிரந்தர செவிலியர்களாக பணியமர்த்தும் இந்தமுறை இந்தியாவில் தமிழகத்தில் மட்டும்தான் பின்பற்றப்படுகிறது என்பது குறிப்பிடத்தக்கது. ரூ.14 ஆயிரமாக உயர்வு நிரந்தரமாக்கப்பட்ட செவிலியர்களுக்கு காலமுறை ஊதியம் நிர்ணயிக்கப்படும்போது குறைந்தபட்சம் ரூ.36 ஆயிரம் ஊதியமாக வழங்கப்படுகிறது. இத்தற்காலிக செவிலியர்களின் பணிகளையும், வாழ்வாதாரத்தையும் கருத்தில்கொண்டு அவர்களின் ஊதியத்தை உயர்த்த முதல்-அமைச்சர் உத்தரவின் பேரில் சுகாதாரத்துறை அமைச்சர் டாக்டர் சி.விஜயபாஸ்கர் சட்டப்பேரவையில் உறுதியளித்தார். இதனைத்தொடர்ந்து தற்காலிக செவிலியர்களுக்கு வழங்கப்பட்டு வரும் தொகுப்பூதியத்தை ரூ.7 ஆயிரத்து 700-ல் இருந்து ரூ.14 ஆயிரமாக உயர்த்தி வழங்க முதல்-அமைச்சர் ஆணை வெளியிட்டார். 12 ஆயிரம் பேர் பயன்அடைவார்கள் இந்த ஊதிய உயர்வு முன்தேதியிட்டு 1.4.2018 முதல் வழங்கப்படும். மேலும், இவர்களுக்கு ஆண்டுதோறும் ரூ.500 ஊதிய உயர்வும் அளிக்கப்படும். இதுதவிர தொழிலாளர் வருங்கால வைப்புநிதி திட்டம் மற்றும் தொழிலாளர் அரசு ஈட்டுறுதி திட்டங்களுக்கான தொகையும் செலுத்தப்படும். இதன் மூலம் தொகுப்பூதியம் பெறும் 12 ஆயிரம் செவிலியர்கள் பயன்அடைவார்கள். மேற்கண்ட தகவல்கள் சுகாதாரத்துறை அமைச்சர் டாக்டர் சி.விஜயபாஸ்கர் வெளியிட்டுள்ள அறிக்கையில் தெரிவிக்கப்பட்டுள்ளது.

அரசு தேர்வுகள் இயக்ககம் வசமிருந்த தமிழக பள்ளி மாணவர்களின் விவரங்கள் திருட்டு : அதிர்ச்சி தகவலால் பரபரப்பு.

அரசு தேர்வுகள் இயக்ககத்தின் பாதுகாப்பில் வைக்கப்பட்டிருந்த தமிழக பள்ளி மாணவ மாணவிகளின் செல்போன் நம்பர், ஜாதி மற்றும் பாடப்பிரிவு உள்ளிட்ட முழுமையான விவரங்கள் திருடப்பட்டுள்ளதாக வெளியான தகவல் கடும் அதிர்ச்சியை ஏற்படுத்தியுள்ளது. ஒரு மாவட்ட மாணவர்களின் விவரங்கள் ரூ.2 ஆயிரம் ரூபாய்க்கு தனியார் நிறுவனங்கள் மூலம் விற்கப்படும் அவல நிலை ஏற்பட்டுள்ளது. மாணவர்களுக்கு இட ஒதுக்கீடு அடிப்படையில் நலத்திட்ட உதவிகள் வழங்கவும், அரசு பொது தேர்வு முடிவுகளை மாணவ ,மாணவிகளுக்கு விரைவாக அனுப்பவும், மாணவர்களின் முழு விவரங்கள் சேகரிக்கப்பட்டு அரசு தேர்வுகள் இயக்ககத்தில் பாதுகாக்கப்பட்டு வந்தது. அதில் சம்பந்தபட்ட மாணவ, மாணவிகளின் பெயர், செல்போன் எண்கள், ஜாதி, பயிலும் பாடப்பிரிவு , வீட்டு முகவரி உள்ளிட்ட அனைத்து விவரங்களும் இடம் பெற்று இருக்கும். இந்நிலையில் தமிழகத்தில் உள்ள அரசு மற்றும் தனியார் பள்ளிகளில் பயிலும் லட்சக்கணக்கான மாணவர்களின் விவரங்கள் முழுமையாக திருடப்பட்டு விற்பனை செய்யப்படுவதாக அதிர்ச்சி தகவல் வெளியாகி உள்ளது. திருடப்பட்ட மாணவர்களின் தகவல்கள் மார்க்கெட்டிங் டேடா பேஸ் இந்தியா என்ற தனியார் நிறுவனம் தனியார் பொறியியல் கல்லூரிகளுக்கும், கலை அறிவியல் கல்லூரிகளுக்கும், தனியார் பயிற்சி நிறுவனங்களுக்கும் பகிரங்கமாக விற்று வருவது வெளிச்சத்திற்கு வந்துள்ளது. அதாவது ஒரு மாவட்ட மாணவ மாணவிகளின் விவரங்களை ரூ.2,000 - ரூ.5,000 வரை விலை வைத்து பேரம் பேசி விற்பதாக தகவல் வெளியாகியுள்ளது. மாணவர்களின் முழுவிவரங்களை பெறும் பொறியியல் கல்லூரிகள் 12-ம் வகுப்பு படிக்கின்ற மாணவ மாணவிகளை தொடர்பு கொண்டு, தேர்வுக்கு பின்னர் தங்கள் கல்லூரில் சேர தொல்லை கொடுப்பதாக புகார் கூறப்பட்டுள்ளது. ஆதிதிராவிடர் மாணவர்களுக்கு அரசே முழு கல்வி செலவுகளையும் தனியார் கல்லூரிகளுக்கு வழங்கி விடுவதால் அவர்களை அடையாளம் கண்டு தொடர்பு கொள்வதற்காகவே இந்த விவரங்கள் அதிக அளவில் பெறப்படுவதாக கூறப்படுகின்றது. சமூக விரோதிகளால் ஆயிரக்கணக்கான மாணவிகளின் செல்போன் நம்பர்களும், அவர்களது வீட்டு முகவரிகளும் விலைகொடுத்து வாங்கப்பட்டால் என்ன விபரீதம் நிகழும் என்பதை யோசித்தாலே மனம் பதைபதைக்கிறது.

புதிய பாடத்திட்டம் தொடர்பாக ஆசிரியர்களுக்கு விரிவான பயிற்சி டாக்டர் அன்புமணி ராமதாஸ் வலியுறுத்தல்

புதிய பாடத்திட்டம் தொடர்பாக ஆசிரியர்களுக்கு விரிவான பயிற்சி அளிக்க வேண்டும் என்று தமிழக அரசை டாக்டர் அன்புமணி ராமதாஸ் வலியுறுத்தியுள்ளார். பா.ம.க. இளைஞரணித் தலைவர் டாக்டர் அன்புமணி ராமதாஸ் வெளியிட்டுள்ள அறிக்கையில் கூறியிருப்பதாவது:- மருத்துவம் மற்றும் தொழில்நுட்பப் படிப்புகளுக்கான நுழைவுத்தேர்வுகளை மாணவர்கள் எதிர்கொள்ள வசதியாக தயாரிக்கப்பட்டுள்ள பாடத்திட்டம் வலிமையாக அமைந்திருப்பது மகிழ்ச்சியளிக்கும் நிலையில், புதிதாக தயாரிக்கப்பட்டுள்ள பாடங்கள், குறிப்பாக அறிவியல் பாடங்கள் மிகவும் கடினமாக இருப்பதாக மாணவர்களிடையே சலசலப்புகள் எழுந்துள்ளன. இது மிகவும் எளிதாக சரி செய்யக்கூடிய சிக்கல் தான் என்றாலும், அதற்கான நடவடிக்கைகளை தமிழக அரசு மேற்கொள்ளாதது கண்டிக்கத்தக்கது. புதிய பாடத்திட்டத்தை அறிமுகம் செய்வதற்கு முன்பாக, புதிய பாடங்களை மாணவர்களுக்கு புரியும் வகையில் நடத்துவதற்கு வசதியாக ஆசிரியர்களுக்கு பயிற்சி அளிக்கப்பட்டிருக்க வேண்டும். ஆனால், புதிய கல்வியாண்டு தொடங்கி 50 நாட்களுக்கு மேலாகியும் ஆசிரியர்களுக்கான பயிற்சி இன்னும் நிறைவடையவில்லை. செப்டம்பர் முதல் வாரத்தில் 11-ம் வகுப்புக்கு காலாண்டுத் தேர்வுகள் நடைபெறவுள்ள நிலையில், ஆசிரியர்களுக்கு இன்னும் பயிற்சியளித்து முடிக்கப்படவில்லை என்பதில் இருந்தே இந்த விஷயத்தில் பள்ளிக் கல்வித்துறை எந்த அளவுக்கு அக்கறை காட்டுகிறது என்பதை புரிந்துகொள்ள முடியும். எனவே, புதிய பாடத்தின் மீதான புரிதல் குறித்து ஆசிரியர்கள் மற்றும் மாணவர்களிடம் கருத்துகளைக் கேட்டறிந்து, அதற்கேற்றவாறு ஆசிரியர்களுக்கு விரிவான பயிற்சி அளிப்பது உள்ளிட்ட நடவடிக்கைகளை பள்ளிக்கல்வித்துறை மேற்கொள்ள வேண்டும். இவ்வாறு அவர் கூறியுள்ளார்.

யுடியூபில் வீடியோ எண்ணிக்கை முக்கியமல்ல

யுடியூபில் வீடியோ எண்ணிக்கை முக்கியமல்ல  வாசு கார்த்தி வினோத் சந்தர் , நிறுவனர்- சூ சூ டிவி எதிர்காலத்தை ஓரளவுக்கு கணிக்க கூடியவர்களே தொழிலில் வெற்றியடை கிறார்கள். இந்த வகையில் யுடியூப் வளர்ச்சியை முன்கூட்டியே கணித்தவர் சூ சூ டிவியின் நிறுவனர் மற்றும் தலைமைச் செயல் அதிகாரி வினோத் சந்தர். யுடியூப் என்பது கூகுள் தொடங்கிய நிறுவனம் அல்ல, வாங்கிய நிறுவனம். 2006-ம் ஆண்டு 165 கோடி டாலர் கொடுத்து யுடியூப் நிறுவனத்தை கூகுள் வாங்கியது. அப்போதே வரும் காலத்தில் யுடியூப் வளர்ச்சி பெரிய அளவில் இருக்கும் என நம்பினார் வினோத் சந்தர். சூ சூ டிவி என்பது குழந்தைகளுக்கான பாடல், கார்டூன்களை உருவாக்கும் சேனல். இந்த சேனல் உருவான மற்றும் வளர்ந்த விதம் குறித்து வினோத் சந்தர் கூறியதாவது: ஆரம்பத்தில் பட்டீஸ் இன்போடெக் என்னும் நிறுவனத்தை நண்பர்களுடன் இணைந்து 2001-ம் ஆண்டு தொடங் கினோம். இதில் வெளிநாட்டு நிறுவனங்களுக்கு வெப் டிசைன் உள்ளிட்ட சில சேவைகளை செய்து வந்தோம். 2006-ம் ஆண்டு யுடியூப் நிறுவனத்தை கூகுள் வாங்கியதை தொடர்ந்து வரும் காலத்தில் யுடியூப் பெரிய வளர்ச்சி அடையும் என நம்பினோம். என்ன செய்வது என்னும் திட்டமெல்லாம் இல்லை. ஆனாலும் யுடியூபினை கவனித்து வந்தோம். என்னுடைய அப்பா சந்திரபோஸ் இசையமைத்த சில பாடல்களை 2006ம் ஆண்டே யுடியூபில் ஏற்றினோம். தொடர்ந்து கவனித்து வந்தாலும் எந்த யோசனையும் இல்லை. சில வீடியோக்கள் 10 கோடி நபர்கள் வரை பார்த்திருப்பதையும் நாங்கள் கவனித்தோம். ஆனால் ஏற்கெனவே தொடங்கிய நிறுவனத்தில் உள்ள வேலை பளு காரணமாக எதையும் யோசிக்க முடியவில்லை. ஆனால் 2010-11-ம் ஆண்டில் நாங்கள் தொடங்கிய நிறுவனத்தில் பெரிய அளவிலான பிஸினஸ் இல்லை. அதே சமயம் என்னுடைய குழந்தைக்கு யுடியூப் வீடியோ காண்பித்தேன். அதன் பிறகு என்னுடைய குழந்தையை வைத்தே சில வீடியோக்களை எடுத்து வெளியிட்டேன். ஏன் சிறிய குழந்தையை வைத்து வீடியோ எடுக்க வேண்டும் என நினைத்து, அனிமேஷன் மூலம் அவளுக்காக ஒரு வீடியோ தயாரித்து காண்பித்தேன். அவளுக்கு மிகவும் பிடித்திருந்தது. நிறைய முறை அந்த வீடியோவை பார்த்தார். என் குழந்தையை சூ சூ என்று கூப்பி டுதால் சூ சூ டிவி என பெயர் வைத்து அந்த அனிமேஷன் வீடியோவை யுடியூப்பில் ஏற்றினேன். 2 வாரத்தில் 3 லட்சம் நபர்கள் பார்த்திருந்தனர். இதனை தொடர்ந்து இன்னொரு வீடியோவை எடுத்து பதிவேற்றினேன். அந்த வீடியோ ஏற்கெனவே எடுத்திருந்த வீடியோவை விட அதிக நபர்கள் பார்த்தனர். அதனை தொடர்ந்து இனியும் சோதனை முயற்சியாக இருக்க வேண்டாம் என முடிவெடுத்து நாங்கள் ஐந்து நண்பர்கள் இணைந்து நிறுவனத்தை தொடங்கினோம். இதுவரை நர்சரி பாடல்கள் எல்லாம் அர்த்தமற்றவையாகவும், எதிர்மறை அர்த்தம் உடையவையாக இருப்பதாகவும் இதனை மாற்றி சாதகமாக இருக்கும்படி மாற்ற வேண்டும் என்னுடைய நண்பர் கிருஷ்ணா தெரிவித்தார். ஜேக் அண்ட் ஜில் பாடல் வரிகளை பாசிட்டிவாக மாற்றி வெளியிட்டோம். இதுவும் மிகப்பெரிய வெற்றி. இதுவரை நாங்கள் பகுதி நேரமாகவே இந்த நிறுவனத்தை இயக்கினோம். அதனை தொடர்ந்து முழு நேரமாக புதிய நேரத்தில் கவனம் செலுத்தினோம். ஆரம்பத்தில் ஆங்கிலத்தில் கவனம் செலுத்தினோம். இதை தவிர வேறு எந்த மொழியில் கவனம் செலுத்தலாம் என யோசித்த போது ஸ்பானிஷ் மொழியில் வீடியோ செய்யத்தொடங்கினோம். காரணம் அமெரிக்காவில் 50 சதவீதத்தினருக்கு ஸ்பானிஷ் தெரியும். போர்ச்சுகீஸ், பிரெஞ்சு உள்ளிட்ட மொழிகளில் மாற்றம் செய்து வீடீயோ வெளியிட்டோம். சமீபத்தில் தமிழில் தொடங்கினோம். இந்த ஆண்டுக்குள் ஹிந்தி, தெலுங்கு, ரஷிய மொழிகளில் குழந்தைகளுக்கான வீடியோக்களை வெளியிட திட்டமிட்டிருக்கிறோம். ஆரம்பத்தில் யுடியூப்பில் மட்டுமே வீடியோக்களை வெளியிட்டோம். இது மூலமாக கிடைக்கும் வருமானம் மட்டுமே எங்களுக்கு கிடைத்தது. சில ஆண்டுகளுக்கு முன்பு நிதி திரட்டுவது குறித்து யோசித்தோம். இதற்காக பல முதலீட்டாளர்களிடம் பேசினோம். அப்போது அவர்கள் குறிப்பிட்ட ஒரு விஷயம் நீங்கள் யுடியூப் வருமானத்தை மட்டுமே நம்பி இருக்கிறீர்கள் என்பதுதான். அதனை தொடர்ந்து அமேசான் பிரைம் உடன் ஒப்பந்தம் செய்தோம். தவிர எங்களுடைய சொந்த செயலியை கொண்டுவந்தோம். இப்போது கொரியாவில் உள்ள ஒரு நிறுவனத்திடம் ஒப்பந்தம் போட்டிருக்கிறோம். சீனாவில் உள்ள ஒரு நிறுவனத்துடன் பேச்சு நடத்தி வருகிறோம். சர்வதேச அளவில் உள்ள பல தொலைக்காட்சி நிறுவனங்களும் எங்களுடன் பேசி வருகின்றன. எங்களுடைய வாடிக்கையாளர் களை வகைப்படுத்த வேண்டும் என்றால் 5 வயது வரை உள்ள குழந்தைகள் என சொல்லலாம். ஐந்து வயதுக்கு மேலே உள்ள குழந்தைகளிடம் செல்ல `ஸ்கூல்போ’ என்னும் நிறுவனத்துடன் இணைந்திருக்கிறோம். கார்ட்டூன் என்னும் நிலையில் இருந்து அறிவு என்னும் அடுத்த கட்டத்துக்கு மாற திட்டமிட்டிருக்கிறோம். இப்போதைக்கு செயலியை அறிமுகம் செய்திருக்கிறோம். ஆனால் இந்த செயலியில் செய்ய வேண்டியது நிறைய இருக்கிறது. செயலியை முழுமையாக வடிவமைத்த பிறகு நிதி திரட்டுவது குறித்து திட்டமிடுவோம். எங்கள் நிறுவனத்தின் முதல் வீடியோ வெற்றியடையும் போதே டிஸ்னி போன்ற ஒரு நிறுவனத்தை உருவாக்க வேண்டும் என யோசித்தோம். குழந்தைகளுக்கான பொருட்கள், திரைப்படங்கள், பொழுதுபோக்கு மையம் என பல விஷயங்களையும் செய்ய திட்டமிட்டிருக்கிறோம் என கூறினார். தற்போது பலர் யுடியூப் சானல் கள் தொடங்கி இருக்கிறார்கள். அவர்களுக்கு உங்களது ஆலோசனை கள் என்ன என்று கேட்டதற்கு, ``நீங்கள் உண்மையாக இருங்கள். பலர் திரைக்காக ஒரு முகமும் உண்மையில் ஒரு முகமாகவும் இருக்கிறார்கள். இப்படிப்பட்ட நபர்கள் அதிகம் வென்றதாக நான் பார்த்தில்லை. இயல்பாக இருக்கும் மக்கள் வெறுப்பதில்லை. ஒரு வீடியோ ஹிட்டாகவில்லை எனில் அதற்காக சோர்வடைய தேவையில்லை. ஒரே இரவில் பெரிய சானலாக மாற முடியாது. அனைத்து வீடியோக்களும் ஹிட்டாகாது. தொடர்ச்சியாக புதுமைகளை புகுத்திக்கொண்டே இருக்க வேண் டும். யுடியூப்பை பொறுத்தவரை எண்ணிக்கையைவிட, தரமே முக்கியம். தரமில்லாமல் அதிக எண்ணிக்கை யில் வீடியோவை அப்லோடு செய்தாலும் அவை வீண்தான்’’ என்றார்.

பி.ஆர்க்., 'ரேண்டம்' எண் வெளியீடு.

பி.ஆர்க்., கவுன்சிலிங்கில் பங்கேற்க விண்ணப்பித்தவர்களுக்கு, 'ரேண்டம்' எண் வெளியிடப்பட்டுள்ளது. அண்ணா பல்கலை இணைப்பில் உள்ள, 50க்கும் மேற்பட்ட, கட்டட வடிவமைப்பியல் படிப்புக்கான, 'ஆர்கிடெக்' கல்லுாரிகளில், பி.ஆர்க்., பட்டப்படிப்புக்கான மாணவர் சேர்க்கை கவுன்சிலிங், அண்ணா பல்கலையால் நடத்தப்படுகிறது. இந்த ஆண்டு கவுன்சிலிங்கில் பங்கேற்போருக்கு, கடந்த, 4ல், 'ஆன்லைன்' விண்ணப்ப பதிவு துவங்கி, 15ல் முடிந்தது.இதில், அரசு ஒதுக்கீட்டில், 2,200 இடங்களுக்கு, 1,874 பேர் விண்ணப்பித்து உள்ளனர். அவர்களுக்கு, தரவரிசை பட்டியலை நிர்ணயம் செய்வதற்கான, ரேண்டம் எண், நேற்று வெளியிடப்பட்டது. இந்த விபரங்களை, அண்ணா பல்கலையின் மாணவர் சேர்க்கைக்கான, www.tnea.ac.in/barch2018, என்ற, இணையதளத்தில் தெரிந்து கொள்ளலாம்.

Youtube #hastag - விரைவில் வருகிறது

தற்போது உள்ள சமூக வலைத்தளங்களில் ட்விட்டர், ஃபேஸ்புக், வாட்ஸ்அப் உள்ளிட்டவை குறிப்பிடத்தக்கவை. இதில் வாட்ஸ்அப் என்பது தொலைபேசி நண்பர்களுடன் கலந்துரையாடும் தளமாக உள்ளது. ஆனால் ஃபேஸ்புக், ட்விட்டர் என்பது பிரபலங்கள், நண்பர்கள் என அனைவரும் சங்கமிக்கும் இடமாக இருக்கிறது. இந்த இரண்டு தளங்களிலும் நாம் ஒரு பதிவை வெளியிடும் போது, அதனை எளிதில் நெட்டிசன்கள் பார்க்கும் வகையில் # என்ற குறியீட்டுடன் பதிவிடுகிறோம். இந்த # என்பது ஃபேஸ்புக்கை விட, ட்விட்டரில் பிரபலம் வாய்ந்ததாக உள்ளது. ஏனெனில் ட்விட்டரில்அதிக முறை பயன்படுத்தப்படும் ஹேஷ்டேக்குகள் ட்ரெண்டிங்கில் இடம்பிடிக்கும். இதனால் ஏதேனும் ஒரு செய்தி அன்றைய தினத்தில் வைரலானால், அதை # மூலம் நெட்டிசன்கள் பரப்பி ட்ரெண்டிங்காக செய்வனர். இதேபோன்று யுடியூப்பிலும் நாம் # பயன்படுத்தி வீடியோ பதிவை வெளியிட முடியும். ஆனால் இது அனைத்து தரப்பு வீடியோக்களை காண்பிக்கும்இந்நிலையில் யுடியூப் நிறுவனமே அதிகாரப்பூர்மாகக ஹபர்லிங்க் வசதியுடன் கூடிய ஹேஷ்டேக்குகளை கொண்டுவருகிறது. ஒரு வீடியோவில் 15 ஹேஷ்டேக்குகள் மட்டுமே பயன்படுத்த முடியும். இந்த ஹேஷ்டேக்குகளை பயன்படுத்தி தேடும், ஒரு சம்பவம் தொடர்பான வீடியோக்கள் மட்டுமே திரையில் வரும். உதாரணத்திற்கு ட்விட்டரில் பயன்படுத்தப்படும் ஹேஷ்டேக் போல. இதில் ஆபாச, பாலியல் தொடர்பான, அவதூறு ஹேஷ்டேக்குகளை பயன்படுத்த முடியாது. இது தற்போது சோதனை முறையில் உள்ளது. விரைவில் அனைத்து பயன்பாட்டாளர்களின் உபயோகத்திற்கும் வரும்.

வதந்தி பரவுவதை தடுக்க வாட்ஸ்அப் திட்டம்

வாட்ஸ்அப் செயலி மூலம் வதந்தி பரவுவதால் தேவையற்ற குழப்பங்கள் ஏற்படுகின்றன. இதனை தடுப்பதற்கு வாட்ஸ்அப் நிறுவனம் திட்டமிட்டு வருகிறது. இதற்காக பல நிறுவனங்களுடன் இணைந்து வாட்ஸ்அப் செயல்பட இருப்பதாக தகவல்கள் தெரி விக்கின்றன. சமூக ஆய்வு மையம் உள்ளிட்ட பல நிறுவனங்களுடன் வாட்ஸ்அப் இணைந்து செயல்பட்டு வருகிறது. போலி செய்திகளை எப்படி கண்டுபிடிப்பது, அதில் இருந்து எப்படி கவனமாக இருப்பது என்பது குறித்து மக்களுக்கு விளக்க பல நிறுவனங்களுடன் நாங்கள் இணைந்து செயல்பட்டு வருகிறோம் என வாட்ஸ்அப் தெரிவித்திருக்கிறது. இந்தியாவில் 20 கோடிக்கும் மேலானவர்கள் வாட்ஸ்அப் பயன்படுத்துகின்றனர். வாட்ஸ்அப் மூலமாக போலி செய்திகளும், வதந்திகளும் பரவுவதாகவும் இதனை தடுக்க நிறுவனம் முயற்சி எடுக்க வேண்டும் என மத்திய அரசு கூறியிருந்தது. இதனை தொடர்ந்து வாட்ஸ்அப் இந்த நடவடிக்கையை எடுத்து வருகிறது. தகவல் தொழில் நுட்ப அமைச்சகத்தின் மூத்த அதிகாரி ஒருவர் கூறும்போது, அரசு கூறியிருந்த குற்றச்சாட்டுகள் குறித்து வாட்ஸ்அப் நிறுவனம் இதுவரை தேவையான நடவடிக்கைகளை எடுக்கவில்லை என்றும், இன்னும் சில நாட்களில் மீண்டும் வாட்ஸ்அப் நிறுவனத்தை மீண்டும் தொடர்புகொள்வோம் என கூறினார். அதே சமயத்தில் சில நாட்களாக வாட்ஸ்அப் நிறுவனமும் சில பாதுகாப்பு நடவடிக்கைகளை எடுத்திருப்பதாக தகவல்கள் தெரிவிக்கின்றன. தவிர நாளிதழ்களில் இது தொடர்பான விளம்பரங்களையும் நிறுவனம் வெளியிட்டுள்ளது. Facebook Google Twitter EmailShare © 2017 All Rights Reserved. Powered by Summit exclusively for The Hindu

செயலி மூலம் தொலைபேசி சேவை பி.எஸ்.என்.எல். அறிமுகம்

செயலி மூலம் தொலைபேசி சேவையை பி.எஸ்.என்.எல். அறிமுகம் செய்துள்ளது. பி.எஸ்.என்.எல். தொலைத்தொடர்பு நிறுவனத்தின் (தமிழ்நாடு) தலைமை பொதுமேலாளர் ஆர்.மார்ஷல் அந்தோனி லியோ சென்னையில் நேற்று நிருபர்களுக்கு பேட்டியளித்தார். அப்போது அவர் கூறியதாவது:- இந்தியாவில் முதல்முறையாக அதி நவீன என்.ஜி.என். (அடுத்த தலைமுறை நெட்வொர்க்) மூலம் இணையதள தொலைபேசி வசதியை பி.எஸ்.என்.எல். அறிமுகம் செய்துள்ளது. இதற்காக ‘விங்ஸ்’ என்ற பெயரில் செயலி (ஆப்) உருவாக்கப்பட்டுள்ளது. இந்த செயலியை செல்போன், கம்ப்யூட்டர், ‘லேப்-டாப்’ போன்றவற்றில் பதிவிறக்கம் செய்து, இந்தியாவில் உள்ள அனைத்து தொலைத்தொடர்பு நிறுவனத்தின் செல்போன் மற்றும் தொலைபேசி எண்களில் இருந்து அழைப்புகளை இலவசமாக ஏற்கவும், பேசவும் முடிவும். குறுந்தகவல் அனுப்ப முடியாது ‘வாட்ஸ்-அப்’பில் குரல் அழைப்பு விடுக்கிற போது, இருதரப்பிலும் ‘டேட்டா’ அல்லது ‘வை-பை’ வசதி நிச்சயம் இருக்க வேண்டும். ‘விங்ஸ்’ ஆப் வைத்திருக்கும் நபரிடம் ‘டேட்டா’ அல்லது ‘வை-பை’ வசதி இருந்தால் மட்டுமே போதுமானது, மறுமுனைக்கு குரல் அழைப்பு தானாக சென்றுவிடும். ஆனால் ‘விங்ஸ்’ ஆப் மூலம் குறுந்தகவல், படங்கள், ‘வீடியோ’ போன்றவற்றை அனுப்பவும், பகிரவும் முடியாது. ஆண்டு கட்டணம் எவ்வளவு? ‘விங்ஸ் ஆப்’ சேவையை வருகிற 25-ந் தேதி முதல் வாடிக்கையாளர்கள் பெற்றுக்கொள்ளலாம். இதற்காக bsnl.co.in என்ற ‘ஆன்-லைன்’ முகவரியில் அல்லது பி.எஸ்.என்.எல். வாடிக்கையாளர் சேவை மையத்தில் ஆதார் கார்டு எண்ணுடன் விண்ணப்பிக்க வேண்டும். இந்த புதிய சேவையை பெறுதற்கு ஓராண்டு கட்டணமாக ரூ.1,099 நிர்ணயிக்கப்பட்டுள்ளது. கட்டணத்துடன் விண்ணப்பிக்கும் வாடிக்கையாளர்களுக்கு செல்போன் நம்பர் போன்று 10 இலக்க எண் ஒதுக்கீடு செய்யப்படும். பின்னர் ‘இ-மெயில்’ (மின் அஞ்சல்) முகவரிக்கு 16 இலக்க ரகசிய குறியீட்டு எண் அனுப்பப்படும். அந்த ரகசிய எண்ணை ngn.bsnl.co.in என்ற இணையதள முகவரியில் பதிவு செய்தால், ‘விங்க் ஆப்’ செயல்பட தொடங்கும். இவ்வாறு அவர் கூறினார்.

சாதிக்கொடுமையால் இடமாற்றம் செய்யப்பட்ட பெண் சமையலர் மீண்டும் அதே பள்ளியில் பணியாற்ற உத்தரவு

சாதிக்கொடுமையால் இடமாற்றம் செய்யப்பட்ட அரசு பள்ளி பெண் சமையலர் மீண்டும் அதே பள்ளியில் பணியாற்ற உத்தரவிடப்பட்டுள்ளது. சமையலருக்கு எதிர்ப்பு திருப்பூர் மாவட்டம் சேவூர் அருகே உள்ள திருமலைகவுண்டன்பாளையம் அரசு உயர்நிலைப்பள்ளியில் சத்துணவு சமையலர் பணிநிறைவு பெற்றார். இதனால் ஒச்சம்பாளையம் பள்ளியில் சமையலராக பணியாற்றி வந்த பாப்பாள் (வயது 42), திருமலைகவுண்டன்பாளையம் அரசு பள்ளிக்கு நியமிக்கப்பட்டார். அவர் 16-ந்தேதி பணிக்கு வந்தார். பாப்பாள் ஆதிதிராவிடர் வகுப்பை சேர்ந்தவர் என்பதால் சமையல் செய்யக் கூடாது என்றும், அவர் சமையல் செய்தால் குழந்தைகள் சாப்பிட மாட்டார்கள் என்றும் அப்பகுதி மக்கள் மற்றும் மாணவர்களின் பெற்றோர் சிலர் பள்ளிக்கு வந்து போராட்டத்தில் ஈடுபட்டனர். மேலும் அவரை சாதி பெயரை சொல்லி திட்டியதுடன், சமையல் பாத்திரங்களை தூக்கி வீசியதாகவும் கூறப்படுகிறது. இதனால் பாப்பாள் மீண்டும் ஒச்சம்பாளையம் பள்ளிக்கே செல்லும்படி உத்தரவிடப்பட்டது. உத்தரவு ரத்து இது பற்றி அறிந்ததும் நேற்று காலை தி.மு.க., இந்திய கம்யூனிஸ்டு கட்சி, விடுதலை சிறுத்தைகள் கட்சி உள்பட பல்வேறு அமைப்புகளை சேர்ந்தவர்கள் தீண்டாமை ஒழிப்பு கூட்டமைப்பு சார்பில் பாப்பாளுக்கு ஆதரவாக சேவூர் கைகாட்டி பகுதியில் சாலைமறியல் போராட்டத்தில் ஈடுபட்டனர். இதையடுத்து போலீசார் மற்றும் அரசு அதிகாரிகள் திருமலைகவுண்டன்பாளையம் வந்த மாணவர்களின் பெற்றோர் மற்றும் அப்பகுதி மக்களுடன் பேச்சுவார்த்தையில் ஈடுபட்டனர். பேச்சுவார்த்தை முடிவில், பாப்பாள் மீண்டும் திருமலைகவுண்டன்பாளையம் பள்ளியிலேயே பணியாற்ற அனைவரும் ஒப்புக்கொண்டனர். இதைத்தொடர்ந்து ஒச்சம்பாளையம் பள்ளிக்கு சென்று பணியாற்ற வேண்டும் என்று பாப்பாளுக்கு போடப்பட்ட உத்தரவு ரத்து செய்யப்பட்டது. தீண்டாமை ஒழிப்புக்கான கூட்டமைப்பினர் நேற்று இரவு வரை தொடர்ந்து மறியலில் ஈடுபட்டனர். பாப்பாளை சாதிப்பெயர் சொல்லி திட்டியதுடன், சமையல் பாத்திரங்களை தூக்கி எறிந்த 12 பேர் மீது நடவடிக்கை எடுக்க வேண்டும் என அவர்கள் வலியுறுத்தினர்.

வெளிர் நீல நிறத்தில் விரைவில் புதிய 100 ரூபாய் நோட்டு வெளியீடு ரிசர்வ் வங்கி அறிவிப்பு

வெளிர் நீல நிறத்தில் புதிய 100 ரூபாய் நோட்டு வெளியிடப்படும் என்று ரிசர்வ் வங்கி அறிவித்துள்ளது. பணமதிப்பு நீக்க நடவடிக்கையை தொடர்ந்து, கடந்த 2 ஆண்டுகளில் அடுத்தடுத்து புதிய ரூபாய் நோட்டுகளை ரிசர்வ் வங்கி வெளியிட்டு வருகிறது. முதலில் 2 ஆயிரம் ரூபாய் நோட்டுகளையும், பிறகு 200 ரூபாய், 500 ரூபாய், 50 ரூபாய், 10 ரூபாய் நோட்டுகளையும் வெளியிட்டது. ஒவ்வொரு நோட்டும் ஒவ்வொரு வண்ணத்தில் இருந்தது. இந்நிலையில், புதிய 100 ரூபாய் நோட்டு விரைவில் வெளியிடப்படும் என்று ரிசர்வ் வங்கி நேற்று அதிகாரபூர்வமாக அறிவித்தது. இந்த நோட்டு, வெளிர் நீல நிறத்தில் இருக்கும். இதன் அளவு 66 மி.மீ.க்கு 142 மி.மீ. ஆக இருக்கும். இது, தற்போது உள்ள நோட்டுகளின் அளவை விட குறைவாகும். நோட்டின் முன்பக்கத்தில் மகாத்மா காந்தி படம் இடம்பெற்று இருக்கும். பின்பக்கத்தில், குஜராத் மாநிலத்தில் சரஸ்வதி ஆற்றங்கரையில் உள்ள ‘ராணி கி வாவ்’ என்ற கிணற்றின் படம் அமைந்துள்ளது. இந்த புதிய 100 ரூபாய் நோட்டுகள், வங்கிகள் மூலம் வாடிக்கையாளர்களுக்கு வழங்கப்படுவது படிப்படியாக அதிகரிக்கும் என்று ரிசர்வ் வங்கி கூறியுள்ளது. புதிய நோட்டுகள் வெளியிடப்பட்ட போதிலும், புழக்கத்தில் உள்ள பழைய 100 ரூபாய் நோட்டுகளும் வழக்கம்போல் செல்லும் என்றும் ரிசர்வ் வங்கி தெரிவித்துள்ளது.

தமிழகத்தின் அனைத்து மாவட்டங்களிலும் அறிவியல் அருங்காட்சியகங்கள் வினாடி வினா போட்டி

தமிழகத்தின் அனைத்து மாவட்டங்களிலும் அறிவியல் அருங்காட்சியகங்கள் அமைக்க நடவடிக்கை எடுக்கப்பட்டு வருவதாக அமைச்சர் க.பாண்டி யராஜன் கூறினார். சென்னை கேலக்ஸி ரோட்டரி சங்கம் சார்பில் பள்ளி மாணவர்களுக்கான அறிவியல், தொழில்நுட்ப வினாடி வினா போட்டி காமராஜர் அரங்கில் நேற்று நடந்தது. இதில் சென்னையைச் சேர்ந்த 125 பள்ளிகளில் இருந்து தலா 3 பேர் கொண்ட 400-க்கும் மேற்பட்ட அணிகள் பங்கேற்றன. முதல் 3 இடங்களைப் பிடித்த அணிகளுக்கு பரிசுகள் வழங்கப் பட்டன. தமிழ் ஆட்சிமொழி, பண்பாடு மற்றும் தொல்லியல் துறை அமைச்சர் க.பாண்டியராஜன் விழாவில் கலந்துகொண்டு பரிசுகளை வழங்கினார். அவர் பேசியதாவது: மாணவர்கள் தங்கள் சுய வாழ்க்கைச் சூழல், தங்களை சுற்றியுள்ள வாழ்க்கைச் சூழல் குறித்து புரிந்துகொள்ள வினாடி வினா போட்டி வழிவகை செய்கிறது. உலகின் எல்லைக்கோடு தொடர்ந்து மாற்றி எழுதப்பட்டு வருகிறது என்பதை மாணவர்கள் புரிந்துகொள்ள வேண்டும். தற்கால மாணவர்கள் தங்கள் எதிர்காலத்தை நிர்ணயித்துக் கொள்ள ஏராளமான வாய்ப்பு கள் உள்ளன. இன்றைய இளைஞர்களே இந்தியாவின் எதிர்காலம். மாண வர்களின் அறிவுத் திறனை மேம்படுத்தும் நோக்கில் தமிழகத்தில் அனைத்து மாவட் டங்களிலும் அருங்காட்சியகங்கள், அறிவியல் அருங்காட்சியகங்கள் அமைக்க நடவடிக்கை எடுக்கப்பட்டு வருகிறது. அகழ்வாராய்ச்சி பணிகளை மேம்படுத்தவும், இத்துறைகளில் உள்ள காலிப் பணியிடங்களை நிரப்பவும் முயற்சி எடுக்கப்பட்டு வருகிறது. இவ்வாறு அவர் கூறினார். நிகழ்ச்சியில் ரோட்டரி சங்க மாவட்ட ஆளுநர் பாபு, கேலக்ஸி ரோட்டரி சங்கத் தலைவர் அலெக்ஸ் பெஞ்சமின் உள்ளிட்ட நிர்வாகிகள், பள்ளிகளின் ஆசிரியர்கள் உள்ளிட்டோர் கலந்துகொண்டனர். Facebook Google Twitter EmailShare © 2017 All Rights Reserved. Powered by Summit exclusively for The Hindu

எம்.ஜி.ஆர். பெயரில் மக்கள் சேவை: ரூ.1,000 கோடி நிதி திரட்ட இலக்கு குடும்ப சொத்தை விற்று ரூ.50 கோடி வழங்கப்போவதாக சைதை துரைசாமி அறிவிப்பு

எம்.ஜி.ஆர். பெயரில் மக்கள் சேவை ஆற்றுவதற்கு ரூ.1,000 கோடி நிதி திரட்ட இலக்கு நிர்ணயிக்கப்பட்டுள்ளது. இதற்காக குடும்ப சொத்தை விற்று ரூ.50 கோடி வழங்கப்போவதாக சைதை துரைசாமி அறிவித்துள்ளார். உலக எம்.ஜி.ஆர். பேரவை பிரதிநிதிகள் மாநாட்டில் சைதை துரைசாமி வரவேற்புரை ஆற்றினார். அப்போது அவர் பேசியதாவது:- திராவிட இயக்கம் பட்டி, தொட்டி எங்கும் பரவி, நான் முதல்-அமைச்சர் ஆவதற்கு எம்.ஜி.ஆர்.தான் காரணம் என்று அண்ணா சொன்னார். ‘உன்னால் உயர்வடைந்த என் போன்றோர் உள்ளம் எல்லாம் மகிழ வேண்டும்’ என்று கருணாநிதி, எம்.ஜி.ஆரால் முதல்-அமைச்சர் ஆனதை அவருடைய வாக்குமூலமாகவே கொடுத்தார். எம்.ஜி.ஆரின் பிம்பமாக இருந்த ஜெயலலிதா முதல்-அமைச்சர் ஆனார். ஜெயலலிதாவுக்கு முன்பாக போற்றுதலுக்குரிய ஜானகி அம்மையார் முதல்-அமைச்சராக இருந்தார். இன்று வரை தமிழக அரசியலில் ஒரு மாற்றத்தை, புரட்சியை உருவாக்கிய ஒப்பற்ற தலைவர் எம்.ஜி.ஆர். எம்.ஜி.ஆரின் ராசி அவர் யாருக்கு எல்லாம் பதவி கொடுத்தாரோ, அவர்கள் எல்லாம் விசுவாசமாக இல்லை. எம்.ஜி.ஆரை தங்களுடைய இதய தெய்வமாக பொதுமக்களும், தொண்டர்களும் இன்று வரை ஏற்றுக்கொண்டிருக்கிறார்கள். எம்.ஜி.ஆர். மறைந்து 30 ஆண்டுகள் கடந்தநிலையிலும், பட்டி-தொட்டி முதல் நகர்ப்புறம் வரையில் வாழ்கின்ற படித்தவர்கள், பாமரர்கள் என பலத்தரப்பட்ட மக்களும் இன்றளவும் அவரது நினைவாக வாழ்ந்து கொண்டிருக்கிறார்கள். சினிமா, அரசியல் என எல்லா நிலைகளிலும் நிழலாக பின் தொடர்ந்து எம்.ஜி.ஆரின் பெரும் புகழுக்கு உறுதுணையாக நின்ற ஆர்.எம்.வீரப்பனுக்கு இந்த மாநாடு நன்றியை தெரிவித்துக்கொள்கிறது. ஆர்.எம்.வீரப்பனின் இப்போதைய அரசியல் நிலைப்பாட்டில் நமக்கு எந்த விதமான உடன்பாடும் இல்லை. அவர் எடுத்த முடிவு தவறு என்று இந்த இடத்தில் நான் உறுதியாக தெரிவித்துக்கொள்கிறேன். ஆனால் அவர் எம்.ஜி.ஆருக்காக ஆற்றிய பங்களிப்பை இந்த நேரத்தில் தெரிவிப்பது எங்களுடைய கடமை என்று நான் கருதுகிறேன். எம்.ஜி.ஆரால் அடையாளப்படுத்தப்பட்டு, அவரிடம் அரசியல் பயின்ற பலர் இன்றைக்கு பல்வேறு அரசியல் கட்சிகளில் பொறுப்புகளில் இருக்கிறார்கள். இன்று அவர்களுக்கு கிடைத்துள்ள இந்த பெரும் புகழுக்கும், பெயருக்கும் எம்.ஜி.ஆர். தான் காரணம் என்பதை உலகமறியும். எதற்காக இந்த மாநாடு? இந்த அமைப்பு? என்று பல பேர் பல்வேறு கோணங்களில் ஆய்வு செய்துகொண்டிருக்கிறார்கள். உலக எம்.ஜி.ஆர். பேரவை என்பது ஒரு தொண்டு நிறுவனம். எம்.ஜி.ஆர். வாழ்ந்துகொண்டிருந்த போது ஒரு நாளைக்கு குறைந்தது 10 பேர் முதல் ஆயிரம் பேர் வரை பயன்பெற்றார்கள். இந்த சமூகத்தில் கடைசி மனிதன் இருக்கும் வரையில் எம்.ஜி.ஆர். வாழ்ந்து கொண்டிருக்க வேண்டும் என்று நாங்கள் விரும்புகிறோம். ஆகவே அரசியல் சார்பற்ற முறையில் இந்த அமைப்பை வலுப்படுத்துவதற்கு என்ன செய்யலாம் என்று யோசித்து, எம்.ஜி.ஆரை இன்றளவும் நினைவில் வைத்துக்கொண்டிருக்கும் தொண்டர்கள், பொதுமக்களுக்கு இந்த அமைப்பு உதவிகரமாக இருக்க வேண்டும் என்று முடிவு எடுத்தோம். எம்.ஜி.ஆரின் புகழ், பெருமையை காப்பதற்கு, சேவை செய்வதற்கு நிதி வேண்டும். அந்த நிதியில் முதல் தவணையாக நான் ரூ.50 கோடியை இந்த அமைப்புக்கு தர இருக்கிறேன். ரூ.1,000 கோடி இலக்கு. எம்.ஜி.ஆரால் பயனடைந்தவர்கள் தமிழகத்தில் 1,000 பேர் இருப்பார்கள். ஒருவர் ஒரு கோடி கொடுத்தாலும் ரூ.1,000 கோடி கிடைக்கும். இந்த ஆயிரம் கோடியை வைப்புநிதியாக வைத்து வாழ்நாள் முழுக்க, உலகம் இருக்கிற வரையில் எம்.ஜி.ஆர். வாழ்ந்துகொண்டிருக்கிறார் என்பதை நாம் நிரூபிக்கவேண்டும். இது ஒன்று தான் மாநாட்டின் நோக்கம் தவிர, வேறு எந்த சிந்தனையும் கிடையாது. என்னுடைய குடும்ப நிதி, குடும்ப உறுப்பினர்கள் பெயரில் உள்ள சொத்துகளை விற்று ரூ.50 கோடியை முதல் தவணையாக கொடுக்க இருக்கிறேன். அதற்கு பிறகு என்னுடைய சகாக்களான எம்.ஜி.ஆரால் அடையாளப்படுத்தப்பட்ட, பெரும் புகழ், பெரும் செல்வந்தர்களாக, இந்த சமூகத்தில் உயர்ந்த நிலையில் உள்ள அத்தனை பேரையும் சந்தித்து, அனைவரும் ஒன்று சேர்ந்து, யார் எல்லாம் நன்கொடை தருகிறார்களோ, அவர்களை உறுப்பினர்களாகி அந்த தொகையை சேவையாக நாட்டு மக்களுக்கு நாள்தோறும் வழங்கி எம்.ஜி.ஆர். வாழ்ந்து கொண்டிருக்கிறார். எப்போதும் வாழ்வார் என்பதை நிரூபிக்கின்ற வகையில் இந்த மாநாடு தொடங்கப்பட்டு இருக்கிறது. இவ்வாறு அவர் பேசினார்.

10 மாதங்களுக்குப் பிறகு மேட்டூர் அணையின் நீர்மட்டம் 80 அடியாக உயர்வு முழு கொள்ளளவை எட்ட 52.06 டிஎம்சி தேவை

10 மாதங்களுக்குப் பிறகு மேட்டூர் அணை நீர் மட்டம் 80 அடியை எட்டியுள்ளது. இருந்தபோதும், அணையின் முழு கொள்ளளவை எட்ட 52.06 டிஎம்சி நீர் தேவையுள்ளது என பொதுப்பணித்துறை அதிகாரிகள் தெரிவித்தனர். கர்நாடக மாநிலத்தில் தென்மேற்கு பருவமழை தீவிரமடைந்துள்ள நிலையில், கடந்த சில நாட்களாக அங்குள்ள கபினி அணையில் இருந்து காவிரியில் நீர் திறக்கப்பட்டுள்ளது. இதனால், மேட்டூர் அணைக்கான நீர்வரத்து கடந்த சில நாட்களாக படிப்படியாக அதிகரித்து வருகிறது. நேற்று முன்தினம் அணையின் நீர்மட்டம் 75.36 அடியாக இருந்தது. அணைக்கான நீர்வரத்து விநாடிக்கு 38,916 கனஅடியாக இருந்த நிலையில், நேற்று காலை 46,613 கனஅடியாக உயர்ந்துள்ளது. கடந்தாண்டு செப்டம்பருக்கு பின்னர் தற்போது நீர்வரத்து அணைக்கு விநாடிக்கு 45,000 கனஅடிக்கு மேல் அதிகரித்துள்ளது. இதனிடையே, அணையின் நீர்மட்டம் ஒரே நாளில் நான்கரை அடி உயர்ந்து நேற்று மதியம் 80 அடியை எட்டியது. கடந்தாண்டு செப்.23-ம் தேதி அணையின் நீர்மட்டம் 80.19 அடியாக இருந்தது. தற்போது குடிநீர் தேவைக்காக அணையில் இருந்து விநாடிக்கு 1,000 கனஅடி நீர் திறக்கப்பட்டுள்ளது. நீர் இருப்பு 41.41 டிஎம்சி இதுகுறித்து பொதுப்பணித்துறை அதிகாரிகள் கூறியதாவது: மேட்டூர் அணையின் முழு கொள்ளளவான 120 அடி உயரத்துக்கு நீர் தேங்கும்போது, நீர் இருப்பு 93.47 டிஎம்சியாக இருக்கும். தற்போது, அணை 80 அடியாக உள்ள நிலையில், நீர் இருப்பு 41.41 டிஎம்சியாக உள்ளது. அணையின் நீர் தேங்கும் பரப்பு 59.25 சதுர மைல் பரப்பு கொண்டது. எனவே, இனி நீர் தேங்கும் பரப்பு அதிகரிக்கும் என்பதால் மீதமுள்ள 40 அடி உயரத்தை நீர் மட்டம் எட்ட மேலும் 52.06 டிஎம்சி நீர் தேவைப்படும். இவ்வாறு பொதுப்பணித்துறை அதிகாரிகள் கூறினர்.

அரசு மானியம், சலுகைகள் பெறும் அனைத்து பள்ளிகளும் தகவல் அறியும் உரிமை சட்டத்தின் வரம்புகளுக்கு உட்பட்டவைதான் மாநில தகவல் ஆணையத்தின் உத்தரவுக்கு கல்வியாளர்கள் வரவேற்பு

அரசு மானியம், சலுகைகள் பெறும் அனைத்து பள்ளிகளும் தகவல் அறியும் உரிமை சட்டத்தின் வரம்புகளுக்கு உட்பட்டவைதான் மாநில தகவல் ஆணையத்தின் உத்தரவுக்கு கல்வியாளர்கள் வரவேற்பு க.சக்திவேல் அரசிடம் மானியம், சலுகைகள் பெறும் அனைத்து பள்ளிகளும் தகவல் அறியும் உரிமை சட்ட வரம்புக்கு உட்பட்டவைதான் என மாநில தகவல் ஆணையம் உத்தரவிட்டுள்ளதற்கு கல்வியாளர்கள் வரவேற்பு தெரிவித் துள்ளனர். வேலூர் மாவட்டம் கொண்டா புரத்தைச் சேர்ந்த ஜெ.முகமது அலி சித்திக் என்பவர் தகவல் அறியும் உரிமை சட்டத்தின் கீழ் வேலூர் மாவட்ட முதன்மை கல்வி அலுவலரிடம் சில தகவல்களைக் கோரியிருந்தார். அதில், “வேலூரில் உள்ள செயின்ட் ஜோசப் மெட்ரிக் மேல்நிலைப் பள்ளியில் மாணவர்களின் பாதுகாப்புக்கு என்ன நடவடிக்கைகள் மேற்கொள்ளப்பட்டுள்ளன. அந்தப் பள்ளி வளாகம், பள்ளி வாகனங்களை ஆய்வு செய்த அறிக்கையை அளிக்க வேண்டும். பள்ளியில் உள்ள கோப்புகளை ஆய்வு செய்யவும் அனுமதி அளிக்க வேண்டும்” என்று தெரிவித்திருந்தார். ஆய்வாளருக்கு உத்தரவு இதையடுத்து, அந்தத் தகவல்களை அளிக்குமாறு திருவண்ணாமலை மாவட்ட மெட்ரிக் பள்ளிகள் ஆய்வாளருக்கு உத்தரவிடப்பட்டது. ஆனாலும், எந்தத் தகவலும் அளிக்கப்படவில்லை. இதையடுத்து முகமது அலி சித்திக் மாநில தகவல் ஆணையத்தில் மேல்முறையீடு செய்தார். இந்த மனுவை விசாரித்த மாநில தகவல் ஆணையர் எஸ்.முத்துராஜ் பிறப்பித்துள்ள உத்தரவில் கூறியிருப்பதாவது: கல்வி உரிமை சட்டத்தின் கீழ் தமிழகம் முழுவதும் உள்ள பள்ளிகள் நிதியைப் பெறுகின்றன. அறக்கட்டளை சட்டத்தின் கீழ் பதிவு செய்யப்பட்டுள்ள பள்ளிகளுக்கு பல்வேறு நிதிச் சலுகைகள் அளிக்கப்படுகின்றன. மேலும், பள்ளிகளுக்கு வருமானவரி விலக்கு அளிக்கப்படுகிறது. இதுதவிர, பள்ளிகள் பயன்படுத்தும் மின்சாரம், தண்ணீருக்கு மாநகராட்சிகள், நகராட்சிகள் மானியம் அளிக்கின்றன. பள்ளி வாகனங்கள் பதிவின்போதும் சலுகை அளிக்கப்படுகிறது. எனவே, அரசிடமிருந்து நேரடியாகவோ, மறைமுகமாகவோ மேற்கண்ட மானியம், நிதி, சலுகைகள் பெறும் பள்ளிகள் அனைத்தும் தகவல் அறியும் உரிமைச் சட்டப் பிரிவு 2(எச்)-ன்படி பொது நிறுவனமாகவே கருதப்படும். பொது முக்கியத்துவம் வாய்ந்த அனைத்து தகவல்களையும் தகவல் அறியும் உரிமைச் சட்டப்பிரிவு 4-ன் கீழ் பொது தகவல் அலுவலர்கள் தெரிவிக்க வேண்டும். சில கல்வி நிறுவனங்களில் குழந்தைகளுக்கு எதிரான குற்றங்கள் நடைபெற்றுள்ளன. எனவே, பள்ளியை நிர்வகிக்கும் நபர்கள், பணியாற்றும் ஆசிரியர்கள், இதர பணியாளர்கள் குறித்தும் தெரிந்துகொள்ளும் உரிமை பெற்றோருக்கு உண்டு. வழக்குகள் நிலுவையிலிருந்தால் எனவே, தமிழகத்தில் உள்ள அனைத்து கல்வி நிறுவனங்கள், பள்ளிகள் தங்களது வலை தளத்தில் தங்கள் பள்ளியின் தலைவர், அறங்காவலர்கள், முதல்வர், ஆசிரியர்கள், ஓட்டுநர் உள்ளிட்ட இதர பணியாளர்கள் யார் மீதாவது குற்ற வழக்குகள் நிலுவையில் இருந்தால் அதைத் தெரிவிக்க வேண்டும். இந்தத் தகவல் இருப்பதை உறுதிப்படுத்துமாறு பள்ளி கல்வி இயக்குநர், அனைத்து மாவட்ட முதன்மை கல்வி அலுவலர்களுக்கும் சுற்றறிக்கை அனுப்ப வேண்டும். குற்ற வழக்குகள் தொடர்பாக மாவட்ட முதன்மை கல்வி அலுவலர்கள் கேட்கும் தகவல்களை அளிக்குமாறு மாவட்ட குற்ற ஆவண காப்பகங்களுக்கு மாநில குற்ற ஆவண காப்பகத்தின் இயக்குநர் அறிவுறுத்த வேண்டும். 16-ம் தேதிக்குள்... இதுதொடர்பாக எடுக்கப்பட்ட நடவடிக்கைகள் குறித்து பள்ளிக் கல்வி இயக்குநரக பொது தகவல் அலுவலர், மாநில குற்ற ஆவண காப்பக பொது தகவல் அலுவலர் ஆகியோர் ஆணையத்தில் ஜூலை 16-ம் தேதி அறிக்கை தாக்கல் செய்ய வேண்டும். இவ்வாறு அவர் உத்தர விட்டுள்ளார். அரசிடம் சலுகைகள் பெறும் தனியார் பள்ளிகளும் ஆர்டிஐ வரம்புக்குள் வரும் என தகவல் ஆணையம் தெரிவித்துள்ளது குறித்து ‘மாற்றம் இந்தியா’ அமைப்பின் இயக்குநர் அ.நாராயணனிடம் கேட்டதற்கு, “தகவல் அறியும் உரிமை சட்டம் வந்து பல ஆண்டுகளுக்குப் பிறகு மாநில தகவல் ஆணையம் இந்த விளக்கத்தை அளித்துள்ளது. தாமதமாக வந்தாலும் இந்த உத்தரவு வரவேற்கத்தக்கது. பெற்றோர்கள், கல்வியாளர்கள் இந்த உத்தரவை பயன்படுத்திக்கொள்ள வேண்டும்” என்றார். அரசாங்கத்தின் ஓர் அங்கம் கல்வியாளர் பிரின்ஸ் கஜேந்திரபாபு கூறும்போது, “பள்ளிகளை யார் நடத்தினாலும் அது அரசாங்கத்தின் ஓர் அங்கமாகவே கருதப்படும். அதை தனி நிறுவனமாகக் கருத முடியாது. எனவே, மாநில தகவல் ஆணையத்தின் உத்தரவு வரவேற்கத்தக்கது. பள்ளிகள் குறித்த பொதுவான தகவல்களை ஒளிவுமறைவின்றி பெற்றோர்கள், மக்கள் தெரிந்துகொள்ள இந்த உத்தரவு வழி வகுக்கும்” என்றார்.

ஐ.ஏ.எஸ்., ஐ.பி.எஸ். உள்ளிட்ட பணிகளுக்கான சிவில் சர்வீசஸ் முதல்நிலை தேர்வு முடிவு வெளியீடு.

ஐ.ஏ.எஸ்., ஐ.பி.எஸ். உள்ளிட்ட பணிகளுக்கான சிவில் சர்வீசஸ் முதல்நிலை தேர்வு முடிவு நேற்று வெளியானது. இதில் சைதை துரைசாமி மனிதநேய மையத்தில் படித்த 55 பேர் தேர்ச்சி பெற்றனர். ஐ.ஏ.எஸ்., ஐ.பி.எஸ். உள்ளிட்ட 26 வகையான பணிகளுக்கான சிவில் சர்வீசஸ் தேர்வை மத்திய அரசு பணியாளர் தேர்வாணையம் (யு.பி.எஸ்.சி.) ஒவ்வொரு ஆண்டும் நடத்துகிறது. இந்த பணிகளுக்கு முதல்நிலை தேர்வு, முதன்மை தேர்வு, நேர்முகத்தேர்வு என 3 கட்டங்களாக தேர்வு நடைபெறும். அந்த வகையில் இந்த ஆண்டுக்கான சிவில் சர்வீசஸ் தேர்வு குறித்த அறிவிப்பு கடந்த பிப்ரவரி மாதம் வெளியிடப்பட்டது. மொத்தம் 782 காலிப்பணியிடங்களுக்கு கடந்த மார்ச் 6-ந்தேதி வரை விண்ணப்பிக்க தேர்வர்களை அறிவுறுத்தி இருந்தனர். அதன்படி, சிவில் சர்வீசஸ் முதல்நிலை தேர்வு கடந்த மாதம் (ஜூன்) 3-ந்தேதி நடைபெற்றது. நாடு முழுவதும் சுமார் 3 லட்சத்துக்கும் மேற்பட்டோர் 72 நகரங்களில் அமைக்கப்பட்டு இருந்த மையங்களில் இந்த தேர்வை எழுதினார்கள். தமிழகத்தில் 20 ஆயிரத்துக்கும் மேற்பட்டோர் இந்த தேர்வை எழுதியதாக அதிகாரிகள் தெரிவித்து இருந்தனர். இந்த நிலையில் சிவில் சர்வீசஸ் முதல்நிலை தேர்வு முடிவு நேற்று வெளியானது. www.upsc.gov.in, www.upsc-o-n-l-i-ne.nic.in என்ற மத்திய அரசு பணியாளர் தேர்வாணைய இணையதளத்துக்கு சென்று தேர்வர்கள் தேர்வு முடிவை தெரிந்து கொள்ளலாம். நாடு முழுவதும் முதல் நிலை தேர்வு எழுதியவர்களில் சுமார் 11 ஆயிரம் பேர் தேர்ச்சி பெற்று இருப்பதாகவும், தமிழகத்தில் 600 பேர் தேர்ச்சி பெற்று இருப்பதாகவும் தகவல்கள் வெளியாகி இருக்கின்றன. நேற்று வெளியிடப்பட்ட முதல்நிலை தேர்வில் சைதை துரைசாமி மனிதநேய பயிற்சி மையத்தில் இலவசமாக படித்து தேர்வு எழுதியவர்களில் 55 பேர் (32 ஆண்கள், 23 பெண்கள்) தேர்ச்சி பெற்றுள்ளதாக மனிதநேய அறக்கட்டளை தலைவர் சைதை துரைசாமி தெரிவித்தார். இதுதொடர்பாக மனிதநேய பயிற்சி மையம் வெளியிட்டுள்ள செய்திக்குறிப்பில் கூறப்பட்டு இருப்பதாவது:- முதல்நிலை தேர்வில் தேர்ச்சி பெற்றுள்ள அனைத்து மாணவர்களுக்கும், முதன்மை தேர்வுக்கு பயிற்சி வகுப்புகள் இலவசமாக தொடர்ந்து நடத்தப்பட உள்ளன. மனிதநேயத்தில் பயிற்சி பெறாத பிற மாணவர்களும் இந்த பயிற்சியில் கலந்து பயன்பெறலாம். இதில் கலந்து கொள்ள விரும்பும் முதல்நிலை தேர்வில் தேர்ச்சி பெற்ற மாணவ-மாணவிகள் தங்களுடைய பாஸ்போர்ட் அளவு புகைப்படம், எழுத்து தேர்வுக்கான நுழைவுச்சீட்டு ஆகியவற்றுடன் ‘28, முதல் பிரதான சாலை, சி.ஐ.டி. நகர், சென்னை’ என்ற முகவரியில் உள்ள மனிதநேய பயிற்சி மைய அலுவலகத்துக்கு நேரில் வந்து இன்று(ஞாயிற்றுக்கிழமை) முதல் பதிவு செய்து கொள்ளலாம். பயிற்சி வகுப்பில் கலந்து கொள்ள விரும்பும் அனைத்து மாணவர்களுக்கும் தங்கும் இடம், உணவு, போக்குவரத்து வசதி ஆகியவை இலவசமாக செய்து தரப்படும். முதல்நிலை தேர்வில் வெற்றி பெற்று தேர்ச்சி அடைந்தவர்கள் அடுத்ததாக முதன்மை தேர்வை எழுத வேண்டும். முதன்மை தேர்வு வருகிற செப்டம்பர் மாதம் 28-ந்தேதி தொடங்குகிறது. செப்டம்பர் 28, 29, 30 மற்றும் அக்டோபர் 6, 7 ஆகிய 5 நாட்கள் இந்த தேர்வு நடைபெற உள்ளது. இதில் வெற்றி பெறுபவர்கள் நேர்முகத்தேர்வை எதிர்கொள்வார்கள்.

போலி பயிற்சியாளர் பள்ளி, கல்லூரிகளில் முகாம் நடத்தி ரூ.2 கோடி சுருட்டல்

2-வது மாடியில் இருந்து தள்ளியதில் மாணவி சாவு: போலி பயிற்சியாளர் பள்ளி, கல்லூரிகளில் முகாம் நடத்தி ரூ.2 கோடி சுருட்டல் சென்னை அலுவலகத்தில் சோதனை நடத்த முடிவு. கல்லூரி மாணவி சாவுக்கு காரணமான 2-வது மாடியில் இருந்து தள்ளிய போலி பயிற்சியாளர் ஆறுமுகம் 1,425 பள்ளி, கல்லூரிகளில் பேரிடர் பயிற்சி முகாம் நடத்தி ரூ.2½ கோடி சுருட்டியதாக பரபரப்பு தகவல் வெளியாகி உள்ளது. சென்னை அலுவலகத்தில் போலீசார் சோதனை நடத்த உள்ளனர். மாணவியை தள்ளிவிட்டார் கோவை நரசீபுரத்தில் உள்ள கலைமகள் அறிவியல் கல்லூரியில் பேரிடர் மேலாண்மை பயிற்சியின்போது 2-வது மாடியில் இருந்து மாணவி லோகேஸ்வரியை (வயது 19) பயிற்சியாளர் ஆறுமுகம் தள்ளியதால் பரிதாபமாக இறந்தார். இந்த சம்பவம் தமிழகம் முழுவதும் பெரும் அதிர்ச்சியை ஏற்படுத்தியது. இதுதொடர்பாக ஆலாந்துறை போலீசார் வழக்குப்பதிவு செய்து பயிற்சியாளர் ஆறுமுகத்தை கைது செய்தனர். விசாரணையில் அவர் போலி பயிற்சியாளர் என்றும், பேரிடர் மேலாண்மை அமைப்பின் அனுமதி இல்லாமல் போலி சான்றிதழ்கள் மூலம் தன்னை பயிற்சியாளர் எனக்கூறி மாணவ-மாணவிகளுக்கு பயிற்சி அளித்து வந்ததும் தெரியவந்தது. சென்னையில் அலுவலகம் சென்னையை அடுத்த மாம்பாக்கத்தில் அலுவலகம் அமைத்து, போலி சான்றிதழ் களை காண்பித்து தமிழ்நாடு முழுவதும் கடந்த 6 ஆண்டுகளாக பல்வேறு தனியார் பள்ளி, கல்லூரிகளில் மாணவர்களுக்கு பேரிடர் மேலாண்மை பயிற்சி அளித்து வந்துள்ளார். ஆறுமுகம் தனது முகநூல் பக்கத்தில் நெல்லை மாவட்டம் வள்ளியூர் அருகே உள்ள பழவூர் கிராமத்தை சேர்ந்தவர் என்றும், சென்னையில் உள்ள பிரபல தனியார் கல்லூரியில் எம்.காம். படித்ததாகவும் குறிப்பிட்டுள்ளார். ஆனால் அவர் தொலைதூர கல்வி மூலம் டிப்ளமோ படித்துள்ளது விசாரணையில் தெரிந்தது. அவரிடம் இருந்து கடிதம், சான்றிதழ்கள் கைப்பற்றப்பட்டன. அந்த கடிதத்தில் பேரிடர் மேலாண்மை ஆணையத்தில் அவர் 2 ஆண்டுகள் பயிற்சி பெற்று இருப்பதாக தெரிவிக்கப்பட்டு இருந்தது. இவை அனைத்தும் போலி என கண்டறியப்பட்டது. ரூ.2½ கோடி வசூல் அவர் இதுவரை தமிழகம் முழுவதும் 1,425 பள்ளி, கல்லூரிகளில் மாணவ-மாணவிகளுக்கு பேரிடர் மேலாண்மை பயிற்சி அளித்துள்ளார். இதற்காக அவர் கல்வி நிறுவனங்களிடம் பணம் ஏதும் பெறவில்லை. ஆனால் பயிற்சி முடிந்த பின்பு மாணவ-மாணவிகளிடம் தலா ரூ.50 வசூலித்து சான்றிதழ் கொடுத்துள்ளார். அந்த வகையில் அவர் ரூ.2½ கோடி வரை வசூலித்து இருப்பது தெரியவந்துள்ளது. இவரது பயிற்சியில் சேர்ந்த மாணவர்களில் சிலரை தன்னார்வ தொண்டர்களாக சேர்த்து, தன்னுடன் இணைந்து முகாம்கள் நடத்தினால் மத்திய, மாநில அரசு மூலம் வேலை கிடைக்கும் என்று கூறியதால் பலரும் உதவியாக இருந்துள்ளனர். மாற்றுத்திறனாளி ஆறுமுகம் மாற்றுத்திறனாளி ஆவார். நடப்பதற்கு சிரமப்படும் இவரை கல்லூரிகள் பேரிடர் மேலாண்மை பயிற்சிக்கு அழைத்து இருப்பது அதிர்ச்சி அளிப்பதாக உள்ளது. ஆரம்பத்தில் ஜவுளிக்கடை, தனியார் பள்ளி ஆகியவற்றில் பணிபுரிந்த அவர் பணம் சம்பாதிக்கும் ஆசையில் போலி பயிற்சியாளராக மாறியது தெரிந்தது. அவர் கோர்ட்டில் ஆஜர்படுத்தப்பட்டு 27-ந் தேதி வரை நீதிமன்ற காவலில் கோவை சிறையில் அடைக்கப்பட்டார். ஆறுமுகத்தை 7 நாள் போலீஸ் காவலில் எடுத்து விசாரணை நடத்த போலீசார் மனுதாக்கல் செய்துள்ளனர். இந்த மனு நாளை (திங்கட்கிழமை) விசாரணைக்கு வருகிறது. அலுவலகத்தில் சோதனை ஆறுமுகம் ‘முதலுதவி’, ‘பெர்சனாலிட்டி டெவலப்மெண்ட்’ என்ற புத்தகங்களையும் எழுதியுள்ளார். பொய்யான தகவல் களை கூறி சிறந்த இளைஞருக்கான விருதை தனியார் மூலம் பெற்றுள்ளதும் தெரியவந்தது. சென்னை மாம்பாக்கத்தில் உள்ள ஆறுமுகத்தின் அலுவலகத்திலும் போலீசார் சோதனை நடத்த முடிவு செய்துள்ளனர். ஆறுமுகத்துக்கு போலி சான்றிதழ் வழங்க உதவியதாக ஈரோடு பகுதியை சேர்ந்த அசோக், ஆறுமுகத்தின் கூட்டாளிகள் சதீஷ், வினிதா, தாமோதரன், கோபால் ஆகிய 5 பேரையும் பிடித்து போலீசார் விசாரணை நடத்தி வருகிறார்கள். சென்னையை சேர்ந்த ஒருவரை பிடிக்கவும் தீவிர தேடுதல்வேட்டை நடைபெறுகிறது.

வருமானவரி கணக்கு தாக்கல் செய்யாவிட்டால் ரூ.10 ஆயிரம் வரை அபராதம் வருமானவரித்துறை அறிவிப்பு

வருமான வரி கணக்கு தாக்கல் செய்யாவிட்டால் ரூ.10 ஆயிரம் வரை அபராதம் விதிக்கப்படும் என்று வருமானவரித்துறை அறிவித்துள்ளது. சென்னை வருமானவரித்துறை அலுவலகம் நேற்று வெளியிட்ட செய்திக் குறிப்பில் கூறப்பட்டு இருப்பதாவது:- வருமானவரி சட்டம் 44 ஏ.பி.ன் கீழ் தங்கள் கணக்குகளுக்கு தணிக்கை தேவைப்படாத பிரிவினர் 2018-2019 மதிப்பீட்டு ஆண்டுக்கான (2017-2018 நிதியாண்டு) வருமானவரி கணக்கை தாக்கல் செய்ய இந்த மாதம் (ஜூலை) 31-ந் தேதி கடைசி நாளாகும். மாத ஊதியம், ஓய்வூதியம், வீட்டுச் சொத்தில் இருந்து வருமானம் பெறுவோர் மூலதன மதிப்பு உயர்வு, வர்த்தகம் அல்லது தொழில் மூலம் வருமானம் பெறுவோர், இதர வருமானம் பெறுவோர் ஆகியோர் இந்த வகையின் கீழ் வருகின்றனர். வருமானவரி சட்டத்தில் புதிதாக சேர்க்கப்பட்டுள்ள 234 எப் பிரிவின் படி கால தாமதக்கட்டணம் (அபராதம்) செலுத்த வேண்டியவர்களுக்கு கட்டணம் நிர்ணயிக்கப்பட்டு உள்ளது. ரூ.10 ஆயிரம் வரை அபராதம் * வருமானவரி கணக்கை அதற்குரிய நாளான 31.07.2018-க்கு முன்னதாக தாக்கல் செய்வோர்களுக்கு அபராத கட்டணம் ஏதும் இல்லை. * மொத்த வருமானம் ரூ.5 லட்சத்திற்கு மிகாமல் உள்ளவர்கள் வருமானவரி கணக்கை 31.07.2018க்கு பிறகும் 31.03.2019-க்கு முன்பாகவும் தாக்கல் செய்தால் அபராதக் கட்டணம் ரூ.1000. * ஆண்டு வருமானம் ரூ.5 லட்சத்திற்கும் மேல் உள்ளவர்கள் வருமானவரி கணக்கை 31.07.2018-க்கு பிறகு ஆனால் 31.12.2018-க்கு முன்னதாக தாக்கல் செய்தால் அபராதம் ரூ.5,000. * மொத்த வருமானம் ரூ.5 லட்சத்திற்கு அதிகமாக இருப்போர் தங்கள் வருமானவரி கணக்கை 31.12.2018-க்கு பிறகு ஆனால் 31.03.2019-க்கு முன்னதாக தாக்கல் செய்தால் அபராதம் ரூ.10,000. வருமானவரி சட்டத்தின் புதிய நடைமுறையின்படி 139-வது பிரிவின் கீழ் சம்பந்தப்பட்ட மதிப்பீட்டு ஆண்டின் இறுதிக்கு பிறகு எவ்வித வருமானவரி கணக்கும் தாக்கல் செய்ய இயலாது. உதாரணமாக மதிப்பீட்டு ஆண்டு 2018-2019-க்கு 31.03.2019-க்கு பிறகு வருமானவரி கணக்கை தாக்கல் செய்ய முடியாது. மின்னணு முறை மேலும் அனைத்து வரி செலுத்துவோரும் தங்களது வருமானவரி கணக்குகளை மின்னணு முறையில் தாக்கல் செய்யவேண்டும். கீழே குறிக்கப்பட்டுள்ள பிரிவினர் விரும்பினால் காகித வடிவில் வருமானவரிக் கணக்கை தாக்கல் செய்யலாம். மாத ஊதியம், இதர ஊதியங்கள் மற்றும் ஒரேயொரு வீட்டு சொத்தில் இருந்து வருமானம் பெறுவோர் அல்லது தோராய வருமானம் உள்ளோர் ஐ.டி.ஆர்.1 அல்லது ஐ.டி.ஆர்.4 (சுகம்) படிவங்களில் வருமானவரி கணக்கை கீழ்கண்ட நிபந்தனைகளுக்கு உட்பட்டு தாக்கல் செய்யலாம். முந்தைய ஆண்டில் 80 வயது அல்லது அதற்கு மேற்பட்ட வயதை எட்டியவர்கள், 5 லட்சம் ரூபாய்க்கு உட்பட்ட மொத்த வருமானம் உள்ளவர்கள் மற்றும் தங்களது வருமானவரி கணக்கில் திரும்ப கிடைக்க வேண்டிய தொகை கோராதவர்கள். நாளை முதல் கவுண்ட்டர்கள் வரி செலுத்துவோர் தங்களது வருமானவரி கணக்கை செலுத்துவதற்கு ஏதுவாக சென்னை நுங்கம்பாக்கம் மகாத்மா காந்தி சாலை இலக்கம் 121-ல் செயல்படும் ஆயக்கர் பவன் வளாகத்தில் வருமானவரி கணக்கு முன் தயாரிப்பு கவுண்ட்டர்கள் செயல்படும். இந்த கவுண்ட்டர்கள் அனைத்து வேலை நாட்களிலும் 16-ந் தேதி முதல் 2018 ஆகஸ்டு 3-ந் தேதி வரை செயல்படும். வரி செலுத்துவோர் இந்த வாய்ப்பை பயன்படுத்திக் கொள்ளலாம். இவ்வாறு அதில் கூறப்பட்டு உள்ளது.

கர்நாடகாவில் தொடரும் கனமழை கிருஷ்ணராஜசாகர் அணை நிரம்பியது தமிழகத்துக்கு 80 ஆயிரம் கனஅடி நீர் காவிரியில் திறப்பு

கிருஷ்ணராஜசாகர் அணையில் இருந்து திறக்கப்பட்டுள்ள காவிரி நீர் தமிழகத்தை நோக்கி ஆர்ப்பரித்து பாய்கிறது. கர்நாடகாவில் தொடரும் கன மழை யின் காரணமாக காவிரி ஆற்றின் குறுக்கேயுள்ள கிருஷ்ணராஜசாகர், கபினி உள்ளிட்ட அணைகள் முழு கொள்ளளவை எட்டியுள்ளன. இதனால் காவிரியில் தமிழகத்துக்கு விநாடிக்கு 80 ஆயிரம் கனஅடி நீர் திறக்கப்பட்டுள்ளதால் காவிரியில் வெள்ளப் பெருக்கு ஏற்பட்டுள்ளது. கர்நாடகாவில் கடந்த இரு மாதங்களாக தென்மேற்கு பருவமழை பெய்து வருகிறது. இதனால் மண்டியா மாவட்டத்தில் 124.80 அடி உயரத்தில் உள்ள கிருஷ்ணராஜசாகர் அணையின் நீர்மட்டம் நேற்று மாலை 123.10 அடியாக உயர்ந்தது. அணைக்கு விநாடிக்கு 41,961 கனஅடி நீர் வந்து கொண்டிருந்ததால், முழு கொள்ளளவை நெருங்கியது. அணையின் பாதுகாப்பு கருதி, தமிழகத்துக்கு முதலில் விநாடிக்கு 20 ஆயிரம் கனஅடி நீர் மதகுகள் மூலம் திறக்கப்பட்டது. குடகில் தொடரும் கனமழையி னால் நீர்வரத்து அதிகரித்தது. இதன் காரணமாக மாலையில் 30 ஆயிரம் கனஅடி நீர் திறக்கப்பட்டது. கடந்த ஆண்டு இதே நாளில் 78.45 அடி நீர் மட்டுமே இருந்த கிருஷ்ணராஜசாகர் அணை, 4 ஆண்டுகளுக்குப் பின்னர் இந்த ஆண்டு முழு கொள்ளளவை எட்டியுள்ளது. இதனால், கர்நாடக விவசாயிகள் மகிழ்ச்சி அடைந்துள் ளனர். நிரம்பி வழியும் அணைகள் நேற்று மாலை 6 மணி நிலவரப்படி, கடல் மட்டத்தில் இருந்து 2,859 அடி உயரத்தில் உள்ள‌ ஹாரங்கி அணையின் நீர்மட்டம் 2857.50 அடியாக உயர்ந்திருக்கிறது. இந்த அணைக்கு விநாடிக்கு 13,324 கன அடி நீர் வந்து கொண்டிருக்கும் நிலையில், 18,784 கனஅடி நீர் வெளியேற்றப்படுகிறது. இதே போல கடல் மட்டத்தில் இருந்து 2,922 அடி உயரத்தில் உள்ள ஹேமாவதி அணையின் நீர்மட்டம் 2,920.40 அடியாக அதிகரித்துள்ளது. அணைக்கு விநாடிக்கு 24,743 ஆயி ரம் கனஅடி நீர் வந்துகொண்டிருப்பதால் 3,200 கனஅடி நீர் திறந்து விடப்பட்டுள்ளது. மைசூரு மாவட்டத்தில் கடல் மட்டத்தில் இருந்து 2,284 அடி உயரத்தில் உள்ள கபினி அணையின் நீர்மட்டம் 2,282.82 அடியாக அதிகரித்துள்ளது. அணைக்கு விநாடிக்கு 43,400 கனஅடி நீர் வந்து கொண்டிருப்பதால், 48,375 கனஅடி நீர் அனைத்து மதகுகள் மூலம் தமிழகத்துக்கு திறக்கப்பட்டுள்ளது. காவிரி நீர்ப்பிடிப்பு பகுதிகளில் பெய்துவரும் பலத்த மழையால் கிருஷ்ணராஜசாகர், கபினி, ஹாரங்கி, ஹேமாவதி ஆகிய 4 அணைகளும் முழு கொள்ளளவை எட்டிவிட்டதாக காவிரி நீர்ப்பாசன கழகம் அறிவித்துள்ளது. வெள்ள அபாய எச்சரிக்கை இந்நிலையில் முதல்வர் குமாரசாமி கூறும்போது, “காவிரியின் குறுக்கேயுள்ள 4 அணைகளும் நிரம்பியுள்ளதால், அணைகளில் இருந்து நீர் திறக்கப்படுகிறது. வெள்ளப்பெருக்கு ஏற்பட்டுள்ளதால் மைசூரு, மண்டியா உள்ளிட்ட மாவட்டங்களில் காவிரி கரையோர கிராம மக்களுக்கு அபாய எச்சரிக்கை விடுக்கப்பட்டுள்ளது. மக்கள் பாதுகாப்பான இடங்களுக்குச் செல்ல வேண்டும் என வலியுறுத்தப்பட்டுள்ளது. தேவையான அனைத்து பாதுகாப்பு வசதிகளையும் அந்தந்த மாவட்ட நிர்வாகம் செய்து வருகிறது. நிரம்பியுள்ள அணைகளுக்கு விரைவில் சிறப்பு பூஜை செய்வேன்” என்றார். தமிழகத்துக்கு கூடுதல் நீர் கர்நாடகாவில் தொடரும் கன மழையால் அணைகளின் பாதுகாப்பு கருதி, அவ்வப்போது அணைகள் கண்காணிக்கப்பட்டு நீர் திறப்பு அதிகரிக்கப்பட்டு வருகிறது. நேற்று மாலை நிலவரப்படி கிருஷ்ணராஜசாகர், கபினி, ஹாரங்கி, ஹேமாவதி ஆகிய 4 அணைகளில் இருந்து விநாடிக்கு 80 ஆயிரம் கனஅடி நீர் திறக்கப்பட்டுள்ளது. நீர்வரத்து தொடர்ந்து அதிகரித்து வருவதால், தமிழகத்துக்கு கூடுதலாக நீர் திறக்கப்பட வாய்ப்பு உள்ளது. கிருஷ்ணராஜசாகர், கபினி அணைகளில் இருந்து திறக்கப்பட்ட நீர், பிலிகுண்டுலுவை நேற்று மாலை வந்தடைந்தது. இந்த நீர் ஓரிரு தினங்களில் மேட்டூர் அணையை அடையும். இதனால் மேட்டூர் அணையின் நீர்மட்டம் வேகமாக உயரும் என்பதால், தமிழக விவசாயிகள் மகிழ்ச்சி அடைந்துள்ளனர்.