TNPSC - LAB ASSISTANT EXAM. HALL TICKET DOWNLOAD

​

தமிழ்நாடு அரசுப் பணியாளர் தேர்வாணையம் செய்தி வெளியீடு தமிழ்நாடு அரசுப் பணியாளர் தேர்வாணையத்தின் அறிவிக்கை எண். 02/2018 நாள். 25.01.2018-ன்படி 56 பணியிடங்களுக்கு அறிவிக்கை செய்யப்பட்ட ஆய்வக உதவியாளர் (Forensic Science Department) பதவிக்கான எழுத்துத்தேர்வு 06.05.2018 அன்று முற்பகல் மட்டும் சென்னை உட்பட 8 தேர்வு மையங்களில் நடைபெற உள்ளது. சரியான முறையில் விண்ணப்பத்தை பூர்த்தி செய்து தேர்வு கட்டணம் செலுத்தியுள்ள தகுதியான விண்ணப்பத்தாரர்களின் தேர்வுக்கூட நுழைவுச்சீட்டுகள் (Hall Ticket) தேர்வாணையத்தின் இணையதளங்களான www.tnpsc.gov.in மற்றும் www.tnpscexams.net-ல் பதிவேற்றம் செய்யப்பட்டுள்ளது. விண்ணப்பதாரர்கள் தங்களுடைய விண்ணப்ப எண்ணை உள்ளீடு செய்து தேர்வுக்கூட நுழைவுச்சீட்டினை பதிவிறக்கம் செய்து கொள்ளலாம். நுழைவுச்சீட்டினை பதிவிறக்கம் செய்வது குறித்து ஏதேனும் சந்தேகம் இருப்பின் 1800 425 1002 என்ற கட்டணமில்லா தொலைபேசி எண்ணிலோ அல்லது contacttnpsc@gmail.com என்ற மின் அஞ்சல் முகவரியிலோ தொடர்பு கொண்டு தெளிவு பெறலாம் என்று கேட்டுக்கொள்ளப்படுகிறார்கள். | The Commission has issued Notification No.02/2018 dated: 25.01.2018, for the Written Examination for 56 vacancies in the post of Laboratory Assistant in Forensic Science Department for the year 2016-2018 in the Tamil Nadu Forensic Science Subordinate Service. The examination which is scheduled to be held on 06.05.2018 FN at 8 district centres including Chennai. The Memo of admission (Hall Ticket) for the eligible candidates has been hosted in the Commission's website (www.tnpsc.gov.in and www.tnpscexams.net). If there is any doubt in downloading Hall Ticket, the candidate may got clarified from the Commission's e-mail ID contacttnpsc@gmail.com or the Commission's Grievance Cell toll free number 1800 425 1002.

மாணவர்களின் வெற்றிக்கு வித்திடும் பழக்கங்கள்!

வெறும் பள்ளிப்பாடங்கள் மட்டும் வெற்றியைத் தந்துவிடுவதில்லை. நாம் நாள்தோறும் கடைப்பிடிக்கும் பழக்க வழக்கங்களே நமக்கு அடையாளத்தையும், வெற்றியையும் தேடித் தருகின்றன. மாணவர் பருவத்தில் இருந்தே நல்ல பழக்கவழக்கங்களை பின்பற்றுவது வெற்றிக்கு வித்திடும். வெற்றியைத் தரும் அந்த பழக்கவழக்கங்களின் பட்டியல் இதோ... சுறுசுறுப்பு : வெற்றியின் அடிப்படையே சுறுசுறுப்பான இயக்கத்தில்தான் உள்ளது. சோம்பேறிகளால் சாதிக்க முடிவதில்லை. சுறுசுறுப்பை வளர்த்துக் கொண்டால் அவர்களால் அடைய முடியாத இலக்கு இல்லை. பலருக்குள்ளும் சோம்பேறித் தனம் எனும் பூதம் ஒளிந்து கொண்டிருக்கும். ஆனால் வெற்றியாளர்களிடம் மட்டுமே சுறுசுறுப்பு ஒட்டிக் கொண்டிருக்கும். ஆசிரியர்கள் பாடம் நடத்தும்போது கவனிக்காமல் இருப்பது, படிக்கும் நேரத்தில் அரட்டையடித்து பொழுதுபோக்குவது, விளையாடி மகிழ்வது, தேவையற்ற சிந்தனையில், செயல்களில் நேரத்தை வீணடிப்பது எல்லாமே சோம்பேறித்தனமும், அசட்டை எண்ணத்தின் வெளிப்பாடும்தான். கடும் முயற்சி இல்லாமல் சோம்பேறித்தனத்தை ஒழிக்க முடியாது. சோம்பல் ஒழிந்தால் சுறுசுறுப்பு தானே பிறந்துவிடும். வெற்றியும் துளிர்விடத் தொடங்கிவிடும். ஒழுங்குபடுத்தல் : எதற்கும் ஒரு திட்டம் வகுத்து, சீரான ஒழுங்குடன் செயல்படுவது வெற்றி மாணவர்களின் அடையாளம். பாடத்திட்டங்களை சீராக தினமும் படிப்பவர்கள், தேர்வில் உயர் மதிப்பெண் பெறுவதுபோல, எதிலும் திட்டமிட்டு செயல்படுபவர்கள் வெற்றியை எட்டுவது திண்ணம். பிரித்து செயல்படுங்கள் : பல பாடங்கள் படிக்கலாம். ஆனால் ஒரே நேரத்தில் இரண்டு செயல்களை செய்ய முடியாது. எனவே ஒன்றை திறம்பட செய்து முடித்துவிட்டு அடுத்த கட்டத்திற்கு செல்வது முக்கியமாகும். எனவே எத்தனை பாடங்கள், திட்டங்கள் இருந்தாலும் அவற்றை பகுதி, பகுதியாக பிரித்து செயல்படுத்துவது வெற்றியை எளிதாகப் பெற துணை செய்யும். நடப்பதை பதிவு செய்யுங்கள் : வகுப்பில் ஆசிரியர் பாடம் நடத்துவததை குறிப்பெடுப்பதுபோல, இலக்கை நோக்கிய பயணத்தையும் குறிப்பெடுப்பதும், நடப்பதை பதிவு செய்வதும் முக்கியமாகும். இதுதான் ஏற்ற இறக்கங்களை அறிந்து அடுத்த கட்ட திட்டமிடலுக்கு உதவும். ஆராய்ந்து செயல்படுங்கள் : வெற்றித் திட்டத்தை அவ்வப்போது ஆராயுங்கள். இப்போதைக்கு கல்விதான் இலக்கு என்றால் படிக்கும் இடம், படிக்கும் நேரம், உடன்படிக்கும் மாணவர் குழு ஆகியவற்றை தீர்மானிப்பதும், இந்த செயல்பாடு வெற்றிக்கு உதவுகிறதா? என்பதை ஆராய்வதும் முக்கியமாகும். கேள்வி கேளுங்கள் : கேள்வி ஞானம் எப்போதுமே வெற்றிக்கு அவசியமாகும். பாடங்கள் படிக்கும்போதும், ஒரு திட்டத்தை செயல்படுத்தும்போதும் ஏன், எதற்கு, எப்படி, எங்கே, யார் என பலவிதமான கேள்விகளை கேட்டு தெளிவுபடுத்திக் கொள்வது இலக்கை அடைய உதவும். ஓய்வு முக்கியம் : வெற்றிக்கு செயல்பாடுமட்டுமல்ல, போதிய ஓய்வும் அவசியம். நமது உள்ளம் ஓய்வின்றி செயல்படலாம். ஆனால் உடல் ஓய்வின்றி செயல்படாது. எனவே உடலுக்கு போதிய ஓய்வு எடுத்துக் கொண்டு செயல்பட்டால் உள்ளம் மேலும் புத்துணர்ச்சியுடன் செயல்பட்டு வெற்றியை துரிதப்படுத்தும். படிக்கும்போது வேண்டாத பழக்கங்களை பின்பற்றுபவர்களின் எதிர்காலம் பாழகிவிடுகிறது. மேற்கண்ட நற்பழக்க வழக்கங்களை பின்பற்றுபவர்களின் எதிர்காலம் பிரகாசமாக மாறுவது நிச்சயம்!

சமூக வலைத்தளம் வரமா? சாபமா?

சமூக வலைத்தளம் வரமா? சாபமா? தகவல் தொழில்நுட்ப நிபுணர், கணபதி.ம சமூக வலைத்தளங்கள் இன்று பெரும்பான்மையான மனிதர்களின் வாழ்வில் இன்றியமையாத அங்கமாக மாறிவருகின்றன. மக்கள்தொகையில் இளைஞர்கள் அதிகமாக கொண்ட நம்முடைய நாட்டில் சமூக வலைத்தளங்களின் வளர்ச்சி இன்னும் கூடுதலானது. நவீன உலகில் ஆதிக்கம் செலுத்தும் சக்தியாக சமூகவலைத்தளங்கள் திகழ்கின்றன என்பது மறுக்க முடியாத உண்மை. கையடக்க கணினி மற்றும் செல்போன்களின் பயன்பாடு அதிகரித்து வரும் சூழலில் சமூக வலைத்தளங்களை உபயோகிப்பவர்களின் எண்ணிக்கை பன்மடங்கு பெருகிவருகிறது. சமூக வலைத்தளம் என்பது பேஸ்புக், வாட்ஸ்அப், டுவிட்டர், இன்ஸ்டகிராம் போன்றவைகளாகும். ரெயிலிலும், பஸ்களிலும் ஒருவரையொருவர் பார்த்தால், புன்முறுவல் செய்ய நேரம் இல்லாத அளவுக்கு ஒவ்வொருவரும் தத்தம் செல்போன்களில் மூழ்கிவிடுகின்றனர். அதிலும் குறிப்பாக செல்போனில் சமூக வலைத்தளங்களை தான் எந்நேரமும் பலரும் பயன்படுத்திக்கொண்டு இருக்கிறார்கள். சமூக வலைத்தளங்களின் பயன்பாட்டில் நன்மைகளும், தீமைகளும் கலந்தே இருக்கின்றன. இதன் நன்மைகளை நாம் எப்படி நமது வாழ்வுக்கும், தொழிலுக்கும் பயன்படுத்திக்கொள்வது என்கின்ற பார்வை மட்டுமே நம்மை முன்னோக்கி நகர்த்தும். உலகின் எங்கோ ஒரு பகுதியில் வசிப்பவர் உலகெங்கும் உள்ளவர்களோடு தொடர்புகொள்ள சமூக வலைத்தளங்கள் பயன்படுகின்றன. புதிய உறவுகளையும், நட்புகளையும் உருவாக்கிக்கொள்ளவும் பழயனவைகளை புதுப்பித்துக்கொள்ளவும், தக்கவைத்துக்கொள்ளவும் சமூக வலைத்தளங்கள் பெரும் பயனளிக்கின்றன. இருபது முப்பது ஆண்டுகளுக்கு முன்பு படித்த பள்ளி, கல்லூரி நண்பர்கள் இன்றைக்கு ஆளுக்கு வெவ்வேறு ஊர்களில் வாழலாம். மீண்டும் தங்கள் நட்பை தொடர இனிமையான இளமைக்கால நாட்களை திரும்பப்பெற சமூக வலைத்தளம் வழிவகுக்கிறது. மேலும், தனி மனிதரோ, நிறுவனமோ தங்கள் வியாபாரத்தினை பெருக்கிக்கொள்ள சமூக வலைத்தளங்கள் பயன்படுகின்றன. சுந்தரி என்ற சாமானிய பெண், சென்னை மெரினா கடற்கரையில் மீன், இறால் என்று சுவையாக கடல் உணவுகளை விற்பவர். தற்போது, இவர் சமூக வலைத்தளங்களின் மூலம் மிகவும் பிரபலமாகிவிட்டார். லட்சக்கணக்கான நபர்கள் வலைத்தளம் மூலம் இவரின் செயல்பாட்டினை அறிகிறார்கள். இதனால் இவரின் வாடிக்கையாளர்களின் எண்ணிக்கையும் அதிகரித்து இருக்கிறது. இவருடைய கடையில் வரிசையில் நின்று மக்கள் சாப்பிடுவது அன்றாட காட்சியாகிவிட்டது. தரமான பொருட்களை, சேவைகளை சிறிய வட்டத்தைத் தாண்டி மற்றவர்கள் அறிய செய்வது சமீப காலங்கள் வரை எளிமையான காரியம் அல்ல. அதற்காக விளம்பர செலவுகள் லட்சக்கணக்கில் செலவிட வேண்டும். ஆனால் காசு செலவு இல்லாமல் மக்களை எளிதில் சென்றடைய சமூக வலைத்தளங்கள் பயன்படுகின்றன. இப்பொழுது உடனுக்கு உடன் செய்திகளையும் சமூக வலைத்தளங்கள் மூலம் தெரிந்துகொள்ள முடிகின்றது. ஒவ்வொருவரும், இதில் செய்தி சேகரிப்பவராகவும் செய்தியினை கொண்டு செல்பவராகவும் செயல்படுகின்றனர். ஜல்லிக்கட்டு போராட்டம் பெரும் எழுச்சியோடு நடந்ததற்கும், அதில் நாம் வெற்றி பெற்றதற்கும் சமூக வலைத்தளங்களின் பங்கு மிகப்பெரிய அளவில் இருந்தது. சில பாதகமான விஷயங்களும் சமூகவலைத்தளங்களால் ஏற்படுவது உண்டு. குறிப்பாக, ஆதாரமற்ற, மேம்போக்கான தவறான தகவல்கள் இடம்பெற வாய்ப்புகள் உள்ளன. அவற்றை உண்மை என்று நம்பிவிடும் அபாயமும் உள்ளது. மேலும் எளிதில் யார் மீதும் அவதூறு பரப்பும் செயலுக்கும் சமூக வலைத்தளங்கள் அடிபணிகின்றன. அதைப்போலவே, பேஸ்புக் புதிய நண்பர்களை உருவாக்கிக்கொள்ள வாய்ப்புகள் அளித்தாலும், சில நேரங்களில் கூடா நட்பு கேடாய் முடியும் விபரீதமும் அரங்கேற வாய்ப்புண்டு. குறிப்பாக, பெண்கள் இதில் பெருமளவில் பாதிக்கப்படும் செய்திகளை நாம் பார்க்கிறோம். தவறான நபர்கள் மூலம் உண்டாகும் நட்புகள் குடும்ப வாழ்க்கையையே சிதைத்துவிடும். எனக்கு நன்கு அறிமுகமான குடும்பம் ஒன்றில் பெண்மணி ஒருவர் கணவன், குழந்தைகள் வெளியே சென்றவுடன் பொழுது போக்கிற்கு பேஸ்புக்கில் நேரம் செலவழிப்பார். அதில் அறிமுகமான ஒரு ஆணுடன் உரையாடத் தொடங்கினார். நெருங்கிய நண்பர்களானார்கள். ஒருகட்டத்தில் அந்த ஆண், பெண்மணியை மிரட்டி பணம் கேட்கும் அளவிற்கு போய்விட்டது. தக்க சமயத்தில் கணவரிடம் நடந்ததை கூறியதால் பிரச்சினையின்றி சிக்கலிலிருந்து மீள முடிந்தது. இன்றைக்கு பெருகிவரும் மணவிலக்குகளுக்கு சமூக வலைத்தளங்களும் பெரும்பங்கு ஆற்றுகிறது என்பது வேதனையான ஒன்று. புதிய கண்டுபிடிப்புகளால் ஒரு பக்கம் நன்மை இருந்தாலும் இன்னொரு பக்கம் பாதகமும் இருக்கத்தான் செய்கிறது. மோட்டார் வாகனங்கள் கண்டுபிடிக்கப்பட்ட போதும் இதே நிலைதான். ஒரு பக்கம் பயணம் எளிதானாலும் இன்னொருப் பக்கம் விபத்துகள் அதிகரித்தன. அதற்காக நாம் அவைகளை பயன்படுத்தாமல் இருப்பதில்லையே. எதிலும் எச்சரிக்கையோடும் கவனத்துடனும் செயல்படும்போது எத்தகைய புதிய கண்டுபிடிப்புகளையும் நாம் எளிதில் ஆட்கொள்ளமுடியும். மாற்றங்கள் மட்டுமே மாறாதவை. மற்றவையெல்லாம் மாறிக்கொண்டே இருப்பவை. நமக்காக உலகம் காத்திருப்பதில்லை. உலகோடு ஒட்டி வாழ வேண்டுமெனில் சமூக வலைத்தளங்கள் அளிக்கும் நன்மைகளையும், வாய்ப்புகளையும் பயன்படுத்திக்கொள்வதும் விபரீதங்களில் இருந்து விலகி நிற்பதும் அவசியம்.

அண்ணாமலை பல்கலைக்கழகத்தில் உள்ள என்ஜினீயரிங் படிப்புகளுக்கு அண்ணா பல்கலைக்கழகம் மூலம் கலந்தாய்வு அரசாணை வெளியீடு

அண்ணாமலை பல்கலைக்கழகத்தில் உள்ள என்ஜினீயரிங் படிப்புகளுக்கு அண்ணா பல்கலைக்கழகம் மூலம் கலந்தாய்வு அரசாணை வெளியீடு | அண்ணாமலை பல்கலைக்கழகத்தில் உள்ள என்ஜினீயரிங் படிப்புகளுக்கு அண்ணா பல்கலைக்கழகம் மூலம் கலந்தாய்வு நடைபெறும் என அரசாணை வெளியிடப்பட்டுள்ளது. சிதம்பரத்தில் அண்ணாமலை பல்கலைக்கழகத்தில் நிர்வாக சீர்கேடு காரணமாக ஊழியர்களுக்கே சம்பளம் கொடுக்க முடியாத நிலை ஏற்பட்டது. அண்ணாமலை பல்கலைக்கழகத்தை அரசே ஏற்றது. அதனை தொடர்ந்து கடந்த ஆண்டு அண்ணாமலை பல்கலைக்கழகத்தில் உள்ள மருத்துவ படிப்புகளுக்கு தமிழக அரசே கலந்தாய்வு நடத்தி மாணவர் சேர்க்கையை மேற்கொண்டது. இந்த நிலையில் தற்போது அண்ணாமலை பல்கலைக்கழக என்ஜினீயரிங் படிப்புகளுக்கு, அண்ணா பல்கலைக்கழகமே கலந்தாய்வு நடத்தும் என்று தமிழக அரசு தெரிவித்துள்ளது. இதுதொடர்பாக அரசின் முதன்மை செயலாளர் சுனில் பாலிவால் நேற்று வெளியிட்டுள்ள அரசு ஆணையில் கூறப்பட்டு இருப்பதாவது:- என்ஜினீயரிங் மற்றும் தொழில்நுட்ப படிப்புகள் அண்ணாமலை பல்கலைக்கழகத்தில் 10 பிரிவுகள் உள்ளன. இது அகில இந்திய தொழில்நுட்ப கல்விக்கழகத்தின் அனுமதியுடன் நடத்தப்பட்டு வருகிறது. மொத்தம் இந்த பாடப்பிரிவுகளில் 1,020 மாணவர்களை சேர்ப்பதற்கு அனுமதி அளிக்கப்பட்டு இருக்கிறது. அண்ணாமலை பல்கலைக்கழகம் 2013-ம் ஆண்டு சட்டப்படி அரசின் நேரடி கட்டுப்பாட்டில் உள்ளது. எனவே தமிழ்நாடு என்ஜினீயரிங் சேர்க்கை-2018 ஒற்றைச்சாளர முறை கலந்தாய்வில் சேர்த்து நடத்த வேண்டும் என்று அண்ணாமலை பல்கலைக்கழக துணைவேந்தர் கோரிக்கை விடுத்து இருந்தார். அதை அரசு நன்கு பரிசீலனை செய்து என்ஜினீயரிங் பாடப்பிரிவுகளில் அண்ணாமலை பல்கலைக்கழகத்தில் மாணவர்கள் சேருவதற்கு தமிழ்நாடு என்ஜினீயரிங் சேர்க்கை ஒற்றைச்சாளர முறையில் ஆன்-லைன் கலந்தாய்வு நடத்த இந்த கல்வியாண்டு (2018-2019) முதல் அனுமதி அளிக்கப்படுகிறது. இவ்வாறு அதில் தெரிவிக்கப்பட்டுள்ளது. இதனால் அண்ணாமலை பல்கலைக்கழக என்ஜினீயரிங் படிப்புகளுக்கும் இனி அண்ணா பல்கலைக்கழகமே கலந்தாய்வு நடத்த இருக்கிறது.

தொடக்கக்கல்வித்துறை | Student Cumulative Record | மாணவர் சேர்க்கை வின்ணப்பம் DOWNLOAD.

தொடக்கக்கல்வித்துறை | Student Cumulative Record | மாணவர் சேர்க்கை வின்ணப்பம் - DOWNLOAD. | DOWNLOAD   | DOWNLOAD 

ரிலையன்ஸ் இண்டஸ்ட்ரீஸ் நிறுவனத்தின் ஒரு நாள் லாபம் ரூ.100 கோடி

ரிலையன்ஸ் இண்டஸ்ட்ரீஸ் நிறுவனம் நாளொன்றுக்கு ரூ.100 கோடி வரை லாபம் ஈட்டி வருகிறது. நிறுவனத்தின் நான்காவது காலாண்டு முடிவுகளில் இது தெரியவந்துள்ளது. மேலும் கடந்த நிதியாண்டின் (2017-18) நான்காவது காலாண்டில் இதுவரை இல்லாத வகையில் நிறுவனத்தின் லாபம் 17 சதவீதம் அதிகரித்து ரூ.9,435 கோடியாக உள்ளது. பெட்ரோ கெமிக்கல்ஸ், சில்லரை வர்த்தகம், மின்னணு சேவை துறைகளில் இருந்து நிறுவனத்துக்கு அதிக லாபம் கிடைத்துள்ளது. குறிப்பாக ஒரு நாளில் ரூ.105 கோடியை நிறுவனம் லாபமாக ஈட்டியுள்ளது. சுத்திகரிப்பு, எண்ணெய் மற்றும் இயற்கை எரிவாயு தொழில்களில் இருந்து குறையும் லாபத்தை பெட்ரோ கெமிக்கல், சில்லரை வர்த்தகத் தொழில்கள் ஈடுகட்டி வருகின்றன. கடந்த ஆண்டு இதே காலத்தில் நிறுவனத்தின் லாபம் ரூ.8,046 கோடியாக இருந்தது. ஜியோ பிராண்டின் கீழ் மின்னணு தொழில்களை ரிலையன்ஸ் மேற்கொண்டுள்ளது. கடந்த நிதியாண்டின் நான்காவது காலாண்டில் ஜியோ நிறுவனம் ரூ.510 கோடியை நிகர லாபமாக ஈட்டியுள்ளது. ஜியோ நிறுவனம் தொடர்ந்து இரண்டாவது முறையாக லாபத்தை பதிவு செய்துள்ளது. கடந்த 2016-ம் ஆண்டு செப்டம்பர் மாதம் அறிமுகம் செய்யப்பட்ட ஜியோ நிறுவனம், பார்தி ஏர்டெல் நிறுவனத்தை விட ஆறு மடங்கு அதிகமாக லாபம் ஈட்டியுள்ளது. ஏர்டெல் நிறுவனம் நான்காவது காலாண்டில் ரூ.83 கோடி நிகர லாபத்தினை பதிவு செய்துள்ளது. மின்னணு சேவைத் துறையின் செயல்பாட்டு லாபம் ரூ.1,495 கோடியுடன் ஒப்பிடுகையில், செயல்பாட்டு நஷ்டம் ரூ.32 கோடியாக உள்ளது. நான்காவது காலாண்டின் மொத்த வருமானம் ரூ.8,421 கோடியாக உள்ளது. சந்தாதாரர்களின் எண்ணிக்கை இந்த காலகட்டத்தில் 16 சதவீதம் அதிகரித்துள்ளது. ரிலையன்ஸ் இண்டஸ்ட்ரீஸ் நிறுவனத்தின் நான்காவது காலாண்டு ஒட்டுமொத்த வருவாய் 39 சதவீதம் உயர்ந்து ரூ.1.29 லட்சம் கோடியாக உள்ளது. நிறுவனத்தின் பெட்ரோ கெமில்லல் தொழிலில் புதிய திட்டங்கள் மூலம் வருவாய் உயர்ந்துள்ளது. சில்லரை வர்த்தகத் தொழில் 134 சதவீதம் வளர்ச்சி அடைந்துள்ளது. 2017-18 ஒட்டுமொத்த நிதியாண்டில் நிறுவனத்தின் லாபம் 21 சதவீதம் உயர்ந்து ரூ.36,075 கோடியாக உள்ளது. ஒட்டுமொத்த வருமானம் 31 சதவீதம் அதிகரித்து ரூ.4.3 லட்சம் கோடியாக இருக்கிறது. செயல்பாட்டு லாபம் 34 சதவீதம் உயர்ந்து 74,184 கோடியாக உள்ளது. 2017-18 நிதியாண்டு ரிலையன்ஸ் இண்டஸ்ட்ரீஸ் நிறுவனத்துக்கு முக்கியமான ஆண்டாக அமைந்துள்ளது. செயல்பாட்டு அளவிலும் லாபம் ஈட்டிய வகையிலும் பல சாதனைகளை செய்துள்ளது என்று நிறுவனத்தின் தலைவர் முகேஷ் அம்பானி கூறியுள்ளார். 1,000 கோடி டாலருக்கு மேல் செயல்பாட்டு லாபம் ஈட்டிய முதல் இந்திய நிறுவனமாக ரிலையன்ஸ் உள்ளது குறிப்பிடத்தக்கது. -பிடிஐ

இரவில் தூக்கமின்றி தவிக்கிறீர்களா?

• இயல்பாக நடைபெற்றுவந்த விஷயங்கள் எல்லாம் தற்போது முயற்சி மேற்கொண்டு செய்யவேண்டியவை ஆகிவிட்டன. அதற்கு உதாரணம், உறக்கம்.உறக்கம் ஓடிவரவில்லை என்று மருத்துவ உதவியை நாடுவோரின் எண்ணிக்கை அதிகரித்து வருகிறது. தூக்கத்துக்கு உதவுவதற்கு என்றே மருத்துவமனைகள்கூட உருவாகிவிட்டன.இந்நிலையில், சில எண்கள் வாயிலாக உறக்கத்தின் முக்கியத்துவம், கவனிக்க வேண்டிய விஷயங்களைப் பார்ப்போம்...
• உலகில் மூன்றில் ஒரு பங்கு மக்கள் தினமும் 7 மணி நேரத்துக்கும் குறைவாக உறங்குகிறார்கள். ஆனால் உலக சுகாதார நிறுவனத்தின் அறிவுறுத்தலின்படி, தினமும் 8 மணி நேர தூக்கம் அவசியம். உறக்கக் குறைவு, இதயநோய், மனஅழுத்தம், சர்க்கரை வியாதி, உடல் பருமன் என்று பல பிரச்சினைகளை கைப்பற்றி அழைத்துவரும்.
• தினமும் குறிப்பிட்ட ஒரே நேரத்தில் உறங்குவதையும் வழக்கமாக்கிக்கொள்ளுங்கள். தினமும் ஒரு குறிப்பிட்ட நேரத்துக்கு படுக்கைக்குச் சென்று குறிப்பிட்ட நேரத்தில் எழுந்திடுங்கள். ஞாயிற்றுக்கிழமையும் அந்த வழக்கத்தை மாற்ற வேண்டாம். அப்போது உங்கள் உடம்பு அந்த வழக்கத்துக்குப் பழகிக்கொள்ளும்.
• ஒவ்வொரு மாதமும் சராசரியாக 7 முறை இரவுத் தூக்கம், கவலைகளால் பாதிக்கப்படுகிறது. இரவில் நம்மை விழித்திருக்க வைத்திருப்பதில், பணப் பிரச்சினை, ஆரோக்கிய அச்சம், வேலையை பற்றிய கவலைகள் முக்கிய இடங்களைப் பிடிக்கின்றன. கவலையால் உறக்கத்தை இழந்திருப்பது தமது அன்றாட நலத்தைப் பாதிப்பதை உணர்வதாக 10-ல் 7 பேர் கூறுகின்றனர்.
•  மெத்தை சரியில்லாவிட்டாலும் தூக்கம் பாதிக்கப்படும். சிறந்த மெத்தைகூட 7 ஆண்டு உபயோகத்துக்குப் பின் மோசமாகிவிடுகிறது. சுமார் 20 ஆயிரம் மணி நேர உறக்கத்துக்குப் பின் எந்த நல்ல படுக்கையும் முன்பைப் போல வசதியாக இருப்பதில்லை என்பது உறக்கவியல் ஆலோசனை மையத்தினரின் ஆய்வுக் கருத்து.
• நாம் தினமும் இரவில் எத்தனை முறை கண் விழிக்கிறோம்? அதற்கு படுக்கை வசதிக் குறைவு காரணமாக இருக்கிறதா என்று உங்களை நீங்களே கேட்டுக்கொள்ளுங்கள். அப்போது தோன்றும் பதில்களைப் பொறுத்து, படுக்கையை மாற்றுங்கள்.
• படுக்கையறையின் வெப்பநிலை 18 டிகிரி செல்சியஸ் ஆக இருப்பதுதான் சரியானது. ஏன்? இயல்பாகவே இரவில் நம் உடல் வெப்பநிலை தணிகிறது. இந்நிலையில், படுக்கையறையின் குளுமை, நமது உடல் வெப்பநிலை யுடன் இணைந்து நல்ல உறக்கத்துக்கு உதவும்.
• உங்கள் கட்டிலின் அகலம் குறைந்தபட்சம் 180 செ.மீ. ஆக இருக்க வேண்டும். நமது உறக்கத்துக்கும் கட்டிலின் அகலத்துக்கும் தொடர்பு உண்டு. பலர் சரியாக உறங்க முடியாமைக்கு, உடன் படுத்திருப்பவரின் தொந்தரவும் காரணம். நாம் தினமும் இரவில் சுமார் 60 முறை வளைந்து நெளிந்து படுக்கிறோம். அதிலும் உடன் படுத்திருப்பவர் ‘சுற்றிச் சுழல்பவர்’ என்றால், சிறிய கட்டிலில் சங்கடம்தான். இருவர் ஒன்றாகப் படுக்க வேண்டிய நிலையில், எதிரெதிர்ப்புறமாக ஒருக்களித்துப் படுக்கலாம்.
• வெறும் 6 நிமிடங்கள் புத்தகம் வாசிப்பது 68 சதவீதம் அளவுக்கு மனஅழுத்தத்தைக் குறைக்கிறது என்கிறது இங்கிலாந்து பல்கலைக்கழக ஆய்வு. எனவே நூல் வாசிப்பு என்பது உறக்கத்துக்கு முன் செய்யக்கூடிய சரியான செயல். அது நம்மைத் தளர்த்துகிறது, நம் உறக்கத்தைப் பாதிக்கும் கவலைகளில் இருந்து திசைதிருப்புகிறது.
• படுக்கைக்குச் செல்வதற்கு 90 நிமிடங்களுக்கு முன் குளிப்பது நல்லது. குளியலுக்குப் பின் உடல் வெப்பநிலை உடனடியாகக் குறைவதால், தூக்கம் உங்களை தாலாட்டத் தொடங்கிவிடும்.
• படுக்கையில் உறக்கத்தை எதிர்நோக்கி, எவ்வளவு நேரம் கண்மூடிக் கிடப்பது? சுமார் 20 நிமிடங்கள் எடுத்துக்கொள்ளலாம் என்று கருத்துச் சொல்கிறார்கள் நிபுணர்கள். உறக்கம் உங்களைத் தழுவுவதற்கு அவ்வளவு நேரம் மட்டுமே அனுமதிக்கலாம். அதற்குப் பின்பும் உறக்கம் வரவில்லை எனில், குறைந்த ஒலியில் மெல்லிசை கேட்பது, ஏதாவது புத்தகம் வாசிப்பது போன்ற செயல்களில் ஈடுபடலாம்.
• உங்கள் படுக்கையில் உங்களுடைய வியர்வை, எண்ணெய் மட்டுமல்ல, இறந்த சரும செல்களும் படிகின்றன. இந்தச் செல்கள், கண்ணுக்குத் தெரியாத நுண்ணுயிரிகளுக்கு நல்ல உணவாகின்றன. இந்த நுண்ணுயிரிகள் ஒவ்வாமையை ஏற்படுத்தக் கூடும். தேசிய உறக்கவியல் நிறுவனம் மேற்கொண்ட ஆய்வின்படி, படுக்கை விரிப்பு சுத்தமாக இருக்கும்போது தங்களால் ஆழ்ந்து உறங்கமுடிவதாக 71 சதவீதம் பேர் கருத்துத் தெரிவித்திருக்கின்றனர். எனவே, 7 நாட்களுக்கு ஒருமுறை, அதாவது வாரம் ஒருதடவை படுக்கை விரிப்பு, தலையணை உறைகளை துவைத்து உலர்த்திப் பயன்படுத்துவதை வழக்கமாக வைத்திருங்கள்.
• காபி, செயற்கைக் குளிர்பானங்கள், டீ, சாக்லேட் ஆகியவற்றின் தாக்கம் முழுமையாக நீங்குவதற்கு சராசரியாக 8 மணி நேரம் ஆகிறது. எனவே நீங்கள் மாலையில் நேரங்கடந்து பருகும் ஒரு காபி, இரவில் உங்கள் தூக்கத்தில் குறுக்கிடக்கூடும். பிற்பகல் 2 மணிக்கு மேல் காபி பருகுவதைத் தவிர்ப்பது நல்லது.

எஸ்எம்எஸ் மூலம் 2 நிமிடத்தில் தேர்வு முடிவுகள் அமைச்சர் கே.ஏ.செங்கோட்டையன் தகவல்.

எஸ்.எம்.எஸ் மூலம் 2 நிமிடத்தில் தேர்வு முடிவுகள் அமைச்சர் கே.ஏ.செங்கோட்டையன் தகவல் | பத்தாம் வகுப்பு தேர்வு முடிவுகள் அரசு அறிவித்த தேதியில் குறுஞ்செய்தி (எஸ்.எம்.எஸ்.) மூலம் இரண்டு நிமிடத்தில் மாணவர்களுக்கு அனுப்பப்படும் என பள்ளிக் கல்வித் துறை அமைச்சர் கே.ஏ. செங்கோட்டையன் தெரிவித்தார். திண்டுக்கல்லில் தனியார் கல்லூரியில் நடைபெற்றுவரும் அரசு மற்றும் அரசு உதவிபெறும் மாணவ, மாணவிகளுக்கான நீட் தேர்வு பயிற்சி மையத்தை பள்ளி கல்வித்துறை அமைச்சர் கே.ஏ.செங்கோட்டையன் நேற்று ஆய்வு செய்தார். பின்னர், செய்தியாளர்களிடம் அவர் கூறியதாவது: அரசு அறிவித்த பத்தாம் வகுப்பு தேர்வு முடிவு வெளியாகும் தேதியில் இரண்டு நிமிடங்களில் எஸ்.எம்.எஸ். மூலம் மாணவர்களுக்கு தேர்ச்சி விவரங்கள் குறித்த தகவல் அனுப்பப்படும். போட்டித் தேர்வுகளுக்காக நடத்தப்படும் பயிற்சி முகாம்களால் கிராமப்புற மாணவர்கள் பெரிதும் பயனடைந்துள்ளனர். தமிழக அரசு சார்பில் அமைக்கப்பட்டுள்ள நீட் தேர்வு பயிற்சி மையங்களில் 3,146 மாணவர்கள் சேர்ந்துள்ளனர். இதில், 2 ஆயிரம் மாணவர்கள் நீட் தேர்வில் தேர்ச்சி பெறுவார்கள் என எதிர்பார்க்கப்படுகிறது. அரசு பள்ளிகளை மூடும் நோக்கம் ஏதும் அரசுக்கு இல்லை. எண்ணிக்கை குறைவாக உள்ள பள்ளி மாணவர்கள் அருகில் உள்ள பள்ளிகளில் சேர்க்கப்படுவார்கள். முதல் வகுப்பு, 6, 9, 11 ஆகிய வகுப்புகளுக்கு வரும் கல்வியாண்டு முதல் சிபிஎஸ்இ பாடத்திட்டத்தை மிஞ்சும் அளவுக்கு புதிய பாடத்திட்டம் கொண்டுவரப்படும். 6, 7, 8 வகுப்புகளுக்கு 3,000 பள்ளிகளில் ஸ்மார்ட் கிளாஸ் தொடங்கப்படும் என்றார். பள்ளிகள் மீது நடவடிக்கை இதற்கிடையே திருச்சியில் செய்தியாளர்களிடம் பேசும்போது, கோடைகால விடுமுறையின்போது பள்ளிகளில் மாணவர்களுக்கு சிறப்பு பயிற்சி வகுப்புகள் நடத்தக்கூடாது என உத்தரவிடப்பட்டுள்ளது. எங்கேனும் பயிற்சி வகுப்புகள் நடத்தப்படுவதாக புகார்கள் வரப்பெற்றால், கடும் நடவடிக்கை எடுக்கப்படும். தமிழ்நாட்டைச் சேர்ந்த மாணவ, மாணவிகள் தமிழ்நாட்டிலேயே நீட் தேர்வை எழுதுவதற்கான நடவடிக்கையை அரசு மேற்கொண்டு வருகிறது என்றார்.

30-ம் தேதி திங்கள் கிழமை வங்கிகள் இயங்கும்.தொடர்ந்து 4 நாட்கள் விடுமுறை என சமூக வலைதளங்களில் பரவியது தவறான தகவல்.

சமூக வலைதளங்களில் பரவும் தகவல் வங்கிகளுக்கு 4 நாட்கள் தொடர் விடுமுறையா? அதிகாரிகள் விளக்கம் வங்கிகளுக்கு தொடர்ச்சியாக 4 நாட்கள் விடுமுறை விடப்படுவதாக வாட்ஸ்அப், முகநூல் உள்ளிட்ட சமூக வலைதளங்களில் நேற்று தகவல் பரவியது. ‘28-ம் தேதி 4-வது சனிக்கிழமை, 29-ம் தேதி ஞாயிறு, 30-ம் தேதி புத்த பூர்ணிமா, மே 1 உழைப்பாளர் தினம் என தொடர்ச்சியாக 4 நாட்கள் வங்கிகளுக்கு விடுமுறை விடப்படுகிறது. எனவே, வாடிக்கையாளர்கள் வங்கி பரிவர்த்தனைகளை 27-ம் தேதியே (நேற்று) முடித்துக்கொள்ள வேண்டும்’ என்று அதில் கூறப்பட்டிருந்தது. இதுகுறித்து பொதுத்துறை வங்கி அதிகாரிகளிடம் கேட்டபோது, அவர்கள் கூறியதாவது: 28-ம் தேதி சனி, 29-ம் தேதி ஞாயிறு ஆகிய இரு நாட்களும் வங்கிகளுக்கு வழக்கம்போல விடுமுறை. மே 1-ம் தேதி செவ்வாயன்று உழைப்பாளர் தினத்தை முன்னிட்டு விடுமுறை. ஆனால், 30-ம் தேதி திங்கள் கிழமை வங்கிகள் இயங்கும். வட இந்தியாவில் மட்டுமே வங்கிகளுக்கு புத்த பூர்ணிமாவுக்காக விடுமுறை விடப்படுகிறது. தமிழகத்தில் விடுமுறை கிடையாது. எனவே, வங்கிகள் திங்கள்கிழமை வழக்கம்போல செயல்படும். அன்றைய தினம் பணப் பரிவர்த்தனை உள்ளிட்ட அனைத்துப் பரிவர்த்தனைகளும் நடைபெறும். தொடர்ந்து 4 நாட்கள் விடுமுறை என சமூக வலைதளங்களில் பரவியது தவறான தகவல். அடுத்தடுத்து விடுமுறை வருவதைக் கருத்தில் கொண்டு, அனைத்து வங்கி ஏடிஎம்களிலும் போதிய அளவு பணம் இருப்பு வைக்கவும் நடவடிக்கை எடுக் கப்பட்டுள்ளது. இவ்வாறு அவர்கள் கூறினர்.

அடுத்த மாதம் 20-ந் தேதிக்குள் அமல்: டாஸ்மாக் பணியாளர்களுக்கு பொது பணியிட மாறுதல் கொள்கை மண்டல மேலாளர்களுக்கு, மேலாண்மை இயக்குனர் உத்தரவு

டாஸ்மாக் பணியாளர்களுக்கு பொது பணியிட மாறுதல் கொள்கையை அடுத்த மாதம்(மே) 20-ந்தேதிக்குள் அமல்படுத்த மண்டல மேலாளர்களுக்கு மேலாண்மை இயக்குனர் உத்தரவு பிறப்பித்துள்ளார். டாஸ்மாக் கடைகள் டாஸ்மாக் நிர்வாகம் தமிழகத்தில் சென்னை, மதுரை, திருச்சி, சேலம், கோவை என 5 மண்டலங்களாக செயல்பட்டு வருகிறது. ஒவ்வொரு மண்டலத்துக்கும் விற்பனை வாரியாக தற்போது மையங்கள் பிரிக்கப்பட்டு உள்ளன. அதன்படி, சென்னை மண்டலத்தை பொறுத்தவரையில் ரூ.4 லட்சத்துக்கு மேல் விற்பனை செய்யும் டாஸ்மாக் கடைகள் ‘ஏ’ மையமாகவும், ரூ.2 லட்சம் முதல் ரூ.4 லட்சம் வரை விற்பனை செய்யும் கடைகள் ‘பி’ மையமாகவும், ரூ.2 லட்சத்துக்கும் குறைவாக விற்பனை செய்யும் கடைகள் ‘சி’ மையமாகவும் பிரிக்கப்பட்டுள்ளன. மையங்கள் மதுரை, திருச்சி மண்டலத்தில் ரூ.2 லட்சத்துக்கு மேல் விற்பனை செய்யும் கடைகள் ‘ஏ’ மையமாகவும், ரூ.1 லட்சம் முதல் ரூ.2 லட்சம் வரையில் விற்பனை செய்யும் கடைகள் ‘பி’ மையமாகவும், ரூ.1 லட்சத்துக்கும் குறைவாக விற்பனை செய்யும் கடைகள் ‘சி’ மையமாகவும் பிரிக்கப்பட்டு இருக்கின்றன. சேலம், கோவை மண்டலத்தில் ரூ.3 லட்சத்துக்கு மேல் விற்பனை செய்யும் கடைகள் ‘ஏ’ மையமாகவும், ரூ.1½ லட்சம் முதல் ரூ.3 லட்சம் வரை விற்பனை செய்யும் கடைகள் ‘பி’ மையமாகவும், ரூ.1½ லட்சத்துக்கு குறைவாக விற்பனை செய்யும் கடைகள் ‘சி’ மையமாகவும் பிரிக்கப்பட்டுள்ளன. மாறுதல் கொள்கை இதன் அடிப்படையில் தான், டாஸ்மாக் பணியாளர்களுக்கு பொது பணியிட மாறுதல் கொள்கை அமல்படுத்தப்பட இருக்கிறது. அதாவது ‘ஏ’ மையத்தில் மேற்பார்வையாளர், விற்பனையாளர் மற்றும் உதவி விற்பனையாளர்களாக தொடர்ந்து ஓராண்டுக்கு மேல் ஒருவர் பணிபுரிந்தால், அந்த இடம் காலியாக அறிவிக்கப்பட்டு அந்த இடத்தில் பணிபுரிந்தவர் பி மற்றும் சி மையத்தில் பணிமூப்பு அடிப்படையில் கவுன்சிலிங் நடத்தி இடமாற்றம் செய்யப்படுவார். அதேபோல், பி மையத்தில் 2 ஆண்டுகளாக தொடர்ந்து பணியாற்றுபவரும், சி மையத்தில் ஓராண்டாக பணியாற்றுபவரும் ஏ மையத்தில் பணிமூப்பு அடிப்படையில் கவுன்சிலிங் நடத்தி இடமாற்றம் செய்யப்படுவார். இந்த இடமாற்றம் அந்தந்த மண்டலத்தின் மாவட்டத்துக்குட்பட்ட பகுதிகளில் தான் இருக்கும். மேலாண்மை இயக்குனர் உத்தரவு இந்த பொது பணியிட மாறுதல் கொள்கையை அடுத்த மாதம் (மே) 5-ந்தேதி முதல் 20-ந்தேதிக்குள் அமல்படுத்த வேண்டும் என்று சம்பந்தப்பட்ட மண்டல மற்றும் மாவட்ட மேலாளர்களுக்கு டாஸ்மாக் நிர்வாக மேலாண்மை இயக்குனர் உத்தரவிட்டுள்ளார். இனிமேல் ஒவ்வொரு ஆண்டும் மே மாதம் 1-ந்தேதியில் இந்த மாறுதல் கொள்கை நடைமுறைப்படுத்தப்படும். இதன் மூலம் எந்த ஒரு பணியாளரும் ஒரே கடையில் 3 ஆண்டுகளுக்கு மேல் பணிபுரிய முடியாது. மேற்கண்ட பொது மாறுதல் கொள்கையை தமிழ்நாடு டாஸ்மாக் பணியாளர்கள் சங்கத்தின்(ஏ.ஐ.டி.யு.சி.) பொதுச்செயலாளர் தனசேகரன் வரவேற்றுள்ளார்.

ஏ.டி.எம்.களில் ஒரு முறை பணம் எடுத்தாலே கட்டணம்? வங்கி நிர்வாகங்கள் ஆலோசனை

ஏ.டி.எம்.களில் ஒரு முறை பணம் எடுத்தாலே கட்டணம் வசூலிப்பது குறித்து வங்கி நிர்வாகங்கள் ஆலோசிப்பதாக ஊழியர்கள் சம்மேளனம் தகவல் தெரிவித்துள்ளது. வங்கிகளுக்கு கடிதம் இந்திய வங்கி ஊழியர் சம்மேளனத்தின் (தமிழ்நாடு) தலைவர் தி.தமிழரசு, பொதுச் செயலாளர் சி.பி.கிருஷ்ணன் ஆகியோர் நேற்று வெளியிட்ட அறிக்கையில் கூறியிருப்பதாவது:- பாரத ஸ்டேட் வங்கி கடந்த 2012-ம் ஆண்டு ஜூலை மாதம் முதல் மார்ச் 2017-ம் ஆண்டு வரை குறைந்தபட்ச இருப்பு கட்டணம் வசூலிப்பதில்லை. அதே போல் சேமிப்பு கணக்கு வைத்திருப்பவர்களுக்கு பல வங்கிகள் காசோலை புத்தக கட்டணம் வசூலிப்பதில்லை. மேலும், ஏ.டி.எம்.களில் பணம் எடுக்கும்போது மாதத்தில் 3 முறையிலிருந்து 5 முறை வரை கட்டணம் வசூலிப்பதில்லை. கடந்த 2012 லிருந்து இப்படி வசூலிக்காத சேவை கட்டணத்திற்கு சேவை வரியும், அதற்கு 18 சதவீத வட்டியும், 100 சதவீதம் அபராதமும் சேர்த்து தற்போது செலுத்த வேண்டும் என்று அனைத்து வங்கிகளுக்கும் சரக்கு மற்றும் சேவை வரியின் உயர்மட்ட அலுவலகமான டைரக்டர் ஜெனரல் அலுவலகம் கடிதம் அனுப்பியுள்ளது. இலவச சேவை ரத்து? இது இந்திய பொருளாதாரத்தில் பல பாதிப்புகளை உருவாக்கும். மத்திய நிதி அமைச்சகத்தின் இந்த வாடிக்கையாளர் விரோத நடவடிக்கையை இந்திய வங்கி ஊழியர் சம்மேளனம் வன்மையாக கண்டிக்கிறது. இந்த கடிதத்தை காரணம் காட்டி அனைத்து இலவச சேவைகளும் ரத்து செய்யப்படக்கூடிய ஆபத்தும் உள்ளதாக தெரிகிறது. உதாரணமாக ஏ.டி.எம்.களில் ஒரு முறை பணம் எடுத்தாலே கட்டணம் வசூலிப்பதற்கு வங்கி நிர்வாகங்கள் ஆலோசிப்பதாக செய்திகள் வருகின்றன. மத்திய அரசும், ரிசர்வ் வங்கியும், வங்கி நிர்வாகங்களும் சாதாரண வாடிக்கையாளர்கள் மீது இத்தகைய சுமையை ஏற்றக்கூடாது. ஏழை மற்றும் நடுத்தர மக்கள் வங்கிகளில் தொடர்ந்து சேவை பெறும் வகையில் வங்கிக் கொள்கையை மாற்றி அமைக்க வேண்டும். இவ்வாறு அவர்கள் கூறியுள்ளனர்.

TNPSC. TRB LATEST STUDY MATERIALS DOWNLOAD

பிராட்பேண்ட் வசதிகளை மேம்படுத்த தயாரிக்கப்பட்ட ஜிசாட்- 11 செயற்கைக் கோள் விண்ணில் செலுத்தும் தேதி தள்ளிவைப்பு

பிராட்பேண்ட் வசதிகளை மேம்படுத்த தயாரிக்கப்பட்ட ஜிசாட்- 11 செயற்கைக் கோள் விண்ணில் செலுத்தும் தேதி தள்ளிவைப்பு இஸ்ரோ வெளியிட்ட செய்திக்குறிப்பில் தகவல் இணைய வசதி மற்றும் பிராட்பேண்ட் வசதிகளை மேம்படுத்துவதற்காக இஸ்ரோ சார்பில் உருவாக்கப்பட்டுள்ள ஜிசாட்-11 செயற்கைக் கோளை பிரெஞ்சு கயானாவில் இருந்து விண்ணில் செலுத்தும் திட்டம் தள்ளி வைக்கப்பட்டுள்ளதாக இஸ்ரோ அறிவித்துள்ளது. இந்தியாவில் இணைய வசதி மற்றும் பிராட்பேண்ட் வசதிகளை மேம்படுத்துவதற்காக ரூ.1,117 கோடி மதிப்பீட்டில் செயற்கைக் கோளை அனுப்பும் திட்டத்துக்கு மத்திய அமைச்சரவை கடந்த 2016-ம் ஆண்டு ஒப்புதல் அளித்திருந்தது. அதனைத் தொடர்ந்து சுமார் 5,700 கிலோ எடை கொண்ட மிகப்பெரிய ஜிசாட்-11 என்ற செயற்கைக் கோளை இஸ்ரோ தயாரித்திருந்தது. இவ்வளவு எடை கொண்ட பெரிய செயற்கைக் கோளை விண்ணில் செலுத்தும் தொழில்நுட்பம் இந்தியாவிடம் இல்லை. அதனால், ஏரியன் ஸ்பேஸ் நிறுவனத்தின் மூலமாக தென் அமெரிக்க நாட்டின், பிரெஞ்சு கயானாவில் உள்ள கொரு ராக்கெட் ஏவுதளத்தில் இருந்து வரும் மே 26-ம் தேதி ஏவ திட்டமிடப்பட்டிருந்தது. அதற்காக பெங்களூருவில் உருவாக்கப்பட்ட ஜிசாட்-11 செயற்கைக் கோள் பிரெஞ்சு கயானாவுக்கு அனுப்பி வைக்கப்பட்டு, கடந்த மார்ச் 30-ம் தேதி அங்கு சென்று சேர்ந்தது. இந்நிலையில் தொழில்நுட்ப ரீதியாக அந்த செயற்கைக் கோளை மீண்டும் பரிசோதிக்க இஸ்ரோ திட்டமிட்டுள்ளதாகக் கூறப்படுகிறது. இதற்கிடையில், ஜிசாட்-11 விண்ணில் செலுத்தும் நாள் மாற்றப்பட்டுள்ளது. அதன் விவரம் பிறகு தெரிவிக்கப்படும் என்று இஸ்ரோ தெரிவித்துள்ளது. இது விண்ணில் செலுத்தப்பட்டால், வினாடிக்கு 12 ஜிபி தரவுகளை பதிவிறக்கவும், பதிவேற்றவும் முடியும். இது இந்தியாவின் மற்ற தகவல் தொடர்பு செயற்கைக் கோள்களை விட திறன் பெற்றதாக இருக்கும்.

மனநல நிபுணர்களை நியமிக்கவில்லை என்றால் பள்ளிக்கல்வித்துறை செயலாளர் நேரில் ஆஜராக வேண்டும் ஐகோர்ட்டு உத்தரவு

மாணவர்கள் நலன் கருதி அனைத்து பள்ளிகளிலும் மனநல நிபுணர்களை நியமிக்கவில்லை என்றால், ஜூன் 5-ந் தேதி பள்ளிக் கல்வித்துறை செயலாளர், இயக்குனர் உள்ளிட்டோர் நேரில் ஆஜராக வேண்டும் என்று ஐகோர்ட்டு உத்தரவிட்டுள்ளது. ஆசிரியர் மீது நடவடிக்கை சென்னை மாநகராட்சி பெண்கள் மேல்நிலைப்பள்ளியில் பணிபுரிந்த ஆசிரியர் ஒருவர் மீது, மாணவிகளை திட்டியதாக குற்றம் சாட்டப்பட்டது. இந்த குற்றச்சாட்டை விசாரித்த உயர் அதிகாரிகள், அந்த ஆசிரியருக்கு 3 ஆண்டுகளுக்கு சம்பள உயர்வு இல்லை என்றும், வேறு பள்ளிக்கு இடமாற்றியும் உத்தரவிட்டு, நடவடிக்கை எடுத்தனர். இது தொடர்பாக ஐகோர்ட்டில் வழக்கு தொடரப்பட்டது. இந்த வழக்கை நீதிபதி எம்.வி.முரளிதரன் விசாரித்தார். பின்னர் நீதிபதி பிறப்பித்த உத்தரவில் கூறியிருப்பதாவது:- மன அழுத்தம் ஆசிரியர் மாணவர் உறவு என்பது சிறப்பான முறையில் இருக்க வேண்டும். ஆனால் பழைய காலத்தில் இருந்த நடைமுறை இப்போது இல்லை. இதனால் மன அழுத்தத்திற்கு ஆளாகும் மாணவர்கள் தவறான முடிவுகளை எடுத்து விடுவதால் துயர சம்பவங்கள் நடக்கின்றன. எனவே அனைத்து பள்ளிகளிலும் மாணவர்களிடம் ஆசிரியர்கள் எவ்வாறு நடந்து கொள்ள வேண்டும்? என்பதை ஆசிரியர்களுக்கு அறிவுறுத்த வேண்டும். அதுபோல, அனைத்து பள்ளிகளிலும் மாணவர்களின் நலன் கருதி மனநல நிபுணர்களை நியமித்து கவுன்சிலிங் வழங்க வேண்டும். ஆஜராக வேண்டும் இதுதொடர்பாக ஏற்கனவே இந்த ஐகோர்ட்டு உத்தரவிட்டுள்ளது. அந்த உத்தரவை தமிழக பள்ளிக் கல்வித்துறை அதிகாரிகள் அமல்படுத்தி, அதுதொடர்பான அறிக்கையை வருகிற ஜூன் 4-ந் தேதிக்குள் தாக்கல் செய்ய வேண்டும். அவ்வாறு செய்யவில்லை என்றால், ஜூன் 5-ந் தேதி பள்ளிக் கல்வித்துறைச் செயலாளர், பள்ளிக் கல்வித்துறை இயக்குநர் உள்ளிட்ட அதிகாரிகள் நேரில் ஆஜராக வேண்டும். இவ்வாறு நீதிபதி உத்தரவிட்டு உள்ளார்.

மாணவர்களுக்கு கிடைக்க வேண்டிய அரசின் நிதி உதவியை மறுத்த கல்வி அதிகாரிக்கு ரூ.2 லட்சம் அபராதம் மனித உரிமை ஆணையம் உத்தரவு

வேலூர் மாவட்டம் வாணியம்பாடியைச் சேர்ந்தவர் மகேந்திரன். இவர், சென்னையில் உள்ள மாநில மனித உரிமை ஆணையத்தில் தாக்கல் செய்த மனுவில் கூறியிருந்ததாவது:- நான், வாணியம்பாடி திரு.வி.க.நகரில் அரசு உதவி பெறும் பள்ளி நடத்தி வருகிறேன். பள்ளி வேறொரு முகவரிக்கு மாற்றப்பட்டதற்காக 2014-2015-ம் ஆண்டுக்கு பள்ளியில் படித்து வரும் மாணவர்களுக்கு அளிக்க வேண்டிய அரசின் நிதி உதவியை வழங்க அப்போதைய நாட்ராம்பள்ளி உதவி தொடக்கக்கல்வி அதிகாரி சித்ரா மறுத்து விட்டார். ஐகோர்ட்டு மற்றும் உயர் அதிகாரிகள் உத்தரவிட்ட போதும் அதை ஏற்க சித்ரா மறுத்து விட்டார். இதனால் மாணவர்களுக்கு கிடைக்க வேண்டிய சலுகை மறுக்கப்பட்டது. எனவே, அதிகாரி சித்ரா மீது உரிய நடவடிக்கை எடுக்க வேண்டும். இவ்வாறு அதில் கூறப்பட்டிருந்தது. இந்த மனுவை விசாரித்த நீதிபதி டி.ஜெயச்சந்திரன், ‘பள்ளி மாணவர்களுக்கு கிடைக்க வேண்டிய சலுகைகளை உரிய காரணம் இல்லாமல் தடுத்து இருப்பது மனித உரிமை மீறல் ஆகும். எனவே, அதிகாரி சித்ராவுக்கு ரூ.2 லட்சம் அபராதம் விதிக்கப்படுகிறது. இந்த தொகையை மனுதாரருக்கு தமிழக அரசு வழங்கி விட்டு சித்ராவின் சம்பளத்தில் இருந்து பிடித்தம் செய்து கொள்ளலாம். சித்ரா மீது ஒழுங்கு நடவடிக்கை எடுக்க வேண்டும். 2014-2015-ம் ஆண்டுக்கு வழங்க வேண்டிய அரசின் நிதி உதவியையும் பள்ளிக்கு வழங்க வேண்டும்’ என்று உத்தரவிட்டார்.

அமெரிக்காவில் ‘எச் 1-பி’ விசாவில் வேலை பார்க்கும் இந்தியர்களுக்கு நெருக்கடி ‘இனி வாழ்க்கை துணைவர்களுக்கு பணி அனுமதி கிடையாது’

அமெரிக்க ஜனாதிபதியாக ஒபாமா பதவி வகித்த காலத்தில் (2015-ம் ஆண்டு) ‘எச்-1’ பி விசாவில் அமெரிக்காவில் பணியாற்றுகிறவர்களின் வாழ்க்கைத்துணைவர்களுக்கு (ஆண் என்றால் மனைவிக்கும், பெண் என்றால் கணவருக்கும்) ‘எச்-4’ விசா அளித்து, வேலை பார்க்கும் வாய்ப்பினை வழங்கினார். இதன் காரணமாக ‘எச்-1’ பி விசாவில் அமெரிக்காவில் வேலை பார்க்கிற ஆண்களின் மனைவிமாருக்கும், பெண்களின் கணவர்களுக்கும் அங்கேயே வேலை பார்க்கும் வாய்ப்பு (ஒர்க் பெர்மிட்) கிடைத்தது. இது அமெரிக்காவில் வேலை பார்த்து வருகிற தகவல் தொழில்நுட்ப பணியாளர்களுக்கு வரமாக அமைந்தது. ஆனால் தற்போதைய டிரம்ப் நிர்வாகம், “அமெரிக்க பொருட்களையே வாங்குங்கள்; அமெரிக்கர்களையே வேலைக்கு அமர்த்துங்கள்” என்ற கொள்கையை அறிவித்து தீவிரமாக பின்பற்றி வருகிறது. இந்த நிலையில், ஒபாமா காலத்தில் ‘எச்-1’ பி விசாதாரர்களின் வாழ்க்கைத்துணைவர்களுக்கு வழங்கி வந்த ‘ஒர்க் பெர்மிட்’ முறையை முடிவுக்கு கொண்டுவர டிரம்ப் நிர்வாகம் முடிவு செய்து உள்ளதாக தகவல்கள் வெளியாகி உள்ளன. இதுபற்றி அமெரிக்க குடியுரிமை மற்றும் குடியேற்ற சேவைகள் (யு.எஸ்.சி.ஐ.எஸ்.) இயக்குனர் பிரான்சிஸ் சிஸ்னா, சுக் கிராஸ்லே என்ற செனட் சபை எம்.பி.க்கு எழுதிய கடிதத்தில் குறிப்பிட்டு உள்ளார். இதுகுறித்த அறிவிப்பு, இந்த கோடை காலத்தின் பிற்பகுதியில் வெளியிடப்படும் என அவர் அதில் தெரிவித்து உள்ளார். தற்போது அமெரிக்காவில் ‘எச்-1’ பி விசாதாரர்களின் வாழ்க்கைத்துணைவர்கள் 71 ஆயிரம் பேருக்கு வேலை வாய்ப்பு வழங்கப்பட்டு உள்ளது. அவர்களில் 90 சதவீதத்துக்கும் அதிகமானோர் இந்தியர்கள். இந்த விஷயத்தில் டிரம்ப் நிர்வாகம் அதிகாரப்பூர்வமாக அறிவிப்பு வெளியிட்டால், அவர்கள் பாதிப்புக்கு ஆளாவார்கள் என்பது குறிப்பிடத்தக்கது.

புரோட்டீன் மூலம் எலும்பு, சதையை உருவாக்கும் முறை: சென்னை டாக்டர் எஸ்.எம். பாலாஜிக்கு உயரிய அறிவியல் ஆராய்ச்சி விருது ஜெர்மனியில் நடந்த மாநாட்டில் வழங்கப்பட்டது

புரோட்டீன் மூலம் எலும்பு, சதையை உருவாக்கும் முறை: சென்னை டாக்டர் எஸ்.எம். பாலாஜிக்கு உயரிய அறிவியல் ஆராய்ச்சி விருது ஜெர்மனியில் நடந்த மாநாட்டில் வழங்கப்பட்டது ஜெர்மனியில் நடந்த மாநாட்டில் சென்னையை சேர்ந்த பல் மற்றும் முகச்சீரமைப்பு டாக்டர் எஸ்.எம்.பாலாஜிக்கு உயரிய அறிவியல் ஆராய்ச்சி விருதினை ஐ.சி.பி.எப். அமைப்பின் தலைவரும், உலக புகழ்பெற்ற முகம் மற்றும் கபால அறுவை சிகிச்சை நிபுணருமான அமெரிக்காவை சேர்ந்த பேராசிரியர் கென்னத் சல்யர் வழங்கியபோது எடுத்த படம். அருகில் மாநாட்டின் தலைவர் பேராசிரியர் அலெக்சாண்டர் ஹெம்பிரிச், அறங்காவலர் குழு உறுப்பினர் பேராசிரியர் மேரி டொலரோவா ஆகியோர் உள்ளனர். சென்னை, ஏப்.25- அன்னப்பிளவை சீரமைக்க புரோட்டீன் மூலம் எலும்பு, சதையை மறுபடியும் உருவாக்கும் முறை பற்றி ஆய்வு செய்ததற்காக சென்னை டாக்டர் எஸ்.எம்.பாலாஜிக்கு ஜெர்மனியில் நடந்த மாநாட்டில் உயரிய அறிவியல் ஆராய்ச்சி விருது வழங்கப்பட்டது. சர்வதேச அமைப்பு ஜப்பானை தலைமையிடமாக கொண்டு செயல்படும் உதடு மற்றும் அன்னப்பிளவிற்கான சர்வதேச அமைப்பு (ஐ.சி.பி.எப்.) கடந்த 30 ஆண்டுகளாக வாய் மற்றும் முகக்குறைபாடு உள்ளவர்களுக்கு புனர்வாழ்வு அளிக்கும் அமைப்பாக திகழ்கிறது. இது மருத்துவ விழிப்புணர்வை பரவலாக்குவதுடன், வளர்ச்சியற்ற மற்றும் வளர்ந்துவரும் நாடுகளுக்கு தன்னார்வ மருத்துவ சேவையளிக்கும் ஒரு லாபநோக்கமற்ற அமைப்பு ஆகும். அந்நாடுகளில் உள்ள அறுவை சிகிச்சை மற்றும் அன்னப்பிளவு சிகிச்சையில் ஈடுபடும் டாக்டர்களுக்கு ஐ.சி.பி.எப். அமைப்பு இலவசமாக பயிற்சி அளித்துவருகிறது. வியட்நாம், கம்போடியா, துனிசியா மற்றும் வளரும் நாடுகளில் செய்யப்படும் அறுவை சிகிச்சைகளுக்கு இந்த அமைப்பு நிதி உதவி அளித்து வருகிறது. ஐ.சி.பி.எப். அமைப்பில் உள்ள 3 ஆயிரத்துக்கும் மேற்பட்ட உறுப்பினர்கள் சுமார் 60 நாடுகளில் உள்ளனர். எஸ்.எம்.பாலாஜிக்கு விருது பேராசிரியர் டேவிட் பிரிசியஸ் இந்த அமைப்பை உருவாக்கியவர்களில் ஒருவர். இவர் வாய் மற்றும் முகப்பிளவு சீரமைப்பு துறையில் புரிந்த பல்வேறு மகத்தான மருத்துவம் சார்ந்த பங்களிப்புக்காக அவரை பெருமைப்படுத்தும் வகையில் ஐ.சி.பி.எப். அமைப்பு தனது மிகஉயர்ந்த விருதினை அவரது பெயரில் உருவாக்கியது. டேவிட் பிரிசியஸ் விருதினை யாருக்கு வழங்குவது என்பது உலக புகழ்பெற்ற பிளவு சீரமைப்பு அறுவை சிகிச்சை குழுவினரால் தீர்மானிக்கப்படுகிறது. அந்தவகையில், ஜெர்மனியில் நடந்த சர்வதேச அன்னப்பிளவு மற்றும் கபால சீரமைப்பு மாநாட்டில் சென்னையை சேர்ந்த பல் மற்றும் முகச்சீரமைப்பு டாக்டர் எஸ்.எம்.பாலாஜிக்கு உயரிய அறிவியல் ஆராய்ச்சி விருதான பேராசிரியர் டேவிட் பிரிசியஸ் விருது வழங்கப்பட்டது. மாநாட்டின் தலைவர் பேராசிரியர் அலெக்சாண்டர் ஹெம்பிரிச், அறங்காவலர் குழு உறுப்பினர் பேராசிரியர் மேரி டொலரோவா ஆகியோர் முன்னிலையில் இந்த விருதினை டாக்டர் எஸ்.எம்.பாலாஜிக்கு ஐ.சி.பி.எப். அமைப்பின் தலைவரான உலக புகழ்பெற்ற முகம் மற்றும் கபால அறுவை சிகிச்சை நிபுணரான அமெரிக்காவை சேர்ந்த பேராசிரியர் கென்னத் சல்யர் வழங்கினார். முதல் இந்தியர் பேராசிரியர் டேவிட் பிரிசியஸ் விருது முதன்முதலாக டோக்கியோ பல்கலைக்கழகத்தின் பேராசிரியர் கசூடோ ஹோஷிக்கு பிளவு புனர்வாழ்வு பணிகளுக்காக வழங்கப்பட்டது. இந்த ஆண்டு சென்னையை சேர்ந்த டாக்டரான எஸ்.எம்.பாலாஜிக்கு விருது வழங்கப்பட்டுள்ளது. மேலும் இந்த விருதினை பெற்ற முதல் இந்தியர் என்ற பெருமையையும் அவர் தட்டிச்சென்றுள்ளார். டாக்டர் எஸ்.எம்.பாலாஜி பிளவு சீரமைப்புக்காக புரோட்டீன்களை வைத்து எலும்பு மற்றும் சதை பகுதிகளை மறுபடியும் உருவாக்கும் முறை பற்றி செய்த ஆய்வுகளுக்காக இந்த விருதினை பெற்றுள்ளார். இந்த சிகிச்சை மூலம் தேவையில்லாமல் இரண்டாவது அறுவை சிகிச்சை தவிர்க்கப்படுகிறது. இந்த மருத்துவ முறை செயற்கை பொருட்களை உபயோகிப்பதால் ஏற்படும் சிக்கல்களையும் தவிர்க்கிறது என்பது குறிப்பிடத்தக்கது.

மலேரியாவை அறவே ஒழிப்போம்!

மருத்துவர் தி.நா.ரவிசங்கர், முன்னாள் மாநில தலைவர், இந்திய மருத்துவ சங்கம் ஒவ்வொரு ஆண்டும் ஏப்ரல் 25-ம் நாள் ‘மலேரியா ஒழிப்பு தினமாக’ அறிவிக்கப்பட்டு, உலகமெங்கும் மக்களுக்கு விழிப்புணர்வு ஏற்படுத்தப்படுகிறது. நம் அனைவருக்கும் மலேரியா என்றால் நினைவுக்கு வருவது கொசுக்கள்தான். மலேரியா என்ற நோயினை கொசுக்கள் பரப்புகின்றது என்றாலும் பிளாஸ்மோடியம் என்ற கிருமியினால் தான் மலேரியா மக்களை தாக்குகிறது. பிளாஸ்மோடியம் என்ற கிருமி தற்காலிகமாக மனித உடலிலும், நிரந்தரமாக கொசுக்களின் உடலிலும் இருக்கிறது. மலேரியா குறித்த சில விஞ்ஞான புள்ளிவிவரங்களை பார்க்கலாம். கடந்த 15 ஆண்டுகளில் மலேரியா காய்ச்சலின் தாக்குதல் தமிழகத்தில் சுமார் 60 சதவீதத்துக்கும் மேலாக குறைந்துள்ளது. 2013-ம் ஆண்டில் சுமார் 15 ஆயிரம் நபர்கள் மட்டுமே மலேரியா காய்ச்சலால் தமிழகத்தில் பாதிக்கப்பட்டு இருந்தனர். 2014-ம் ஆண்டு உலக சுகாதார நிறுவனம் வெளியிட்ட புள்ளிவிவரத்தில், தமிழகத்தில் சுமார் 80 சதவீதம் மலேரியா காய்ச்சல் குறைந்துள்ளது என்று அறிவித்தது. இது நமக்கு ஆறுதல் அளித்தாலும் மீதமுள்ள 20 சதவீத மலேரியா பாதிப்பை எதிர்கொள்ள மலேரியா காய்ச்சலின் பின்னணி என்ன என்பதை தெரிந்துகொள்வோம். மலேரியா காய்ச்சலுக்கு காரணமாக இருக்கும் பிளாஸ்மோடியம் கிருமிகள் மனித உடலிலும், கொசுக்களின் உடலிலும் இரண்டு வேறுபட்ட மாற்றத்துடன் தங்களது வாழ்க்கை சுழற்சியை அமைக்கின்றன. மனித உடலில் அனபோலிஸ் என்கிற வகையை சேர்ந்த கொசுக்கள் ரத்தத்தை உறிஞ்சும்போது கொசுக்களின் எச்சில் சுரப்பிகளின் வழியாக பிளாஸ்மோடியம் உருவாக காரணமான இருக்கும் ஸ்போரோசைட்களை மனித உடலில் செலுத்துகின்றன. மனித உடலில் இப்படி செலுத்தப்படும் ஸ்போரோசைட்கள் கல்லீரலில் தங்கி வளர்ச்சி பெற்று ரத்தத்திலும், சிவப்பு அணுக்களிலும் ஊடுருவுகின்றன. ஸ்போரோசைட் என்பது சுமார் நாற்பதாயிரம் முதல் அறுபதாயிரம் பிளாஸ்மோடியம்களாக வளர்ச்சி பெறுகிறது. இந்த கிருமிகள் கல்லீரலிலும், ரத்த சிவப்பு அணுக்களிலும் இருக்கின்றபோது மனிதனுக்கு மலேரியா காய்ச்சலை உண்டு பண்ணுகின்றன. மனிதனை கொசுக்கள் கடிக்கும்போது கொசுக்கள் உறிஞ்சும் ரத்தத்தின் வழியாக நோய் பரப்பும் கிருமிகள் கொசுக்களின் உடலுக்கு செல்கின்றன. அடுத்த முறை வேறு மனிதனை கடிக்கும் போது அந்த மனிதனுக்கும் மலேரியாவை கொசுக்கள் பரப்புகின்றன. ஆக, மனித உடலிலும், கொசுக்கள் உடலிலும் வளர்ந்து பெருகும் பிளாஸ்மோடியம் கிருமிகளை பரவாமல் கட்டுப்படுத்தினால் மட்டுமே மலேரியா காய்ச்சலை ஒழிக்கமுடியும். மலேரியா காய்ச்சலை தடுப்பதற்கு ஒரே வழி இந்த அனபோலிஸ் வகை பெண் கொசுக்கள் வளர்வதையும், அது மனிதனை கடிப்பதையும் ஒழிக்க வேண்டும். இந்த அனபோலிஸ் கொசு வகைகள் சுத்தமான ஓடுகின்ற நீரில் இன விருத்தி செய்யக்கூடியவை. இதனால் தான் மலேரியா காய்ச்சல் மழை காலத்தில் அதிகமாக மக்களை தாக்குகின்றது. இந்த கொசு வகைகளை நாம் கட்டுபடுத்த வேண்டுமென்றால் ஓடுகின்ற நீரில் கொசுக்களை கொல்ல கூடிய டி.டி.டி. மற்றும் இதர பூச்சி கொல்லிகளை நீரில் கலந்திட வேண்டும். இவ்வாறு கலக்கின்ற போது இந்த கொசுக்களை அழிப்பதுடன், கொசுக்கள் உற்பத்தியாவதையும் தடை செய்ய முடியும். கொசுக்களை இப்படி தடை செய்தாலும் மனிதன் தன்னை பாதுகாத்து கொள்ளவேண்டும் என்ற அடிப்படையில் முந்தைய காலத்தில் இருந்தே கொசு வலைக்குள் உறங்குவதை பழக்கமாக வைத்து இருந்தனர். இருப்பினும், இந்த அவசர வாழ்க்கை மாற்றத்தால் வீட்டில் இருக்கின்ற கொசுக்களை அழிப்பதற்கு பல வகையான காற்றில் பரவ கூடிய கொசு விரட்டிகளை நாம் பயன்படுத்துகிறோம். அதே போல் மனிதனின் தோலின் மீது தடவக்கூடிய திரவங்களும் பயன்பாட்டிலுள்ளன. இந்த பிளாஸ்மோடியம் வகை கொசுக்களில் மூன்று முக்கிய வகைகள் இருப்பினும், பால்சிபாராம் மட்டுமே மனிதனை மிகவும் அபாயகரமான கட்டத்துக்கு கொண்டு செல்ல கூடிய தன்மை வாய்ந்த பிளாஸ்மோடியம்களாக இருக்கின்றன. சிறு குழந்தைகளை இது தாக்குகின்றபோது மூளை காய்ச்சல், நுரையீரல் பாதிப்புகள் ஏற்பட்டு குழந்தைகள் இறப்பதற்கான வாய்ப்புகள் அதிகமாக உள்ளன. குழந்தைகளை கொசுக்கள் கடிக்காமல் இருக்க மாலை நேரத்தில் குழந்தைகளுக்கு கை, கால் மற்றும் உடல் முழுவதும் மூட கூடிய ஆடைகளை பயன்படுத்தி பாதுகாக்க வேண்டும். காய்ச்சல் குளிருடன் இருந்தால் மலேரியா காய்ச்சல் என்பதை அனைவரும் அறிவோம். சிலருக்கு தலைவலி, வாந்தி, காய்ச்சல், வயிற்று போக்கும் இருக்கலாம். விஞ்ஞான வளர்ச்சியின் காரணமாக மலேரியா காய்ச்சலை 100 சதவீதம் கண்டறியக்கூடிய எம்.பி.கியூ.பி.சி. போன்ற ரத்த பரிசோதனைகள் வந்துள்ளன. காய்ச்சல் அதிகமாக இருக்கின்ற போது நீர்சத்து குறைந்து காணப்பட்டால் அதிக நீரை உட்கொள்வது அவசியம். மலேரியா காய்ச்சல் சரியானாலும் கல்லீரலில் தொடர்ந்து கிருமிகள் இருக்கும். எனவே, மேலும் 14 நாட்களுக்கு மருந்து சாப்பிடுவது அவசியம். நம் வீட்டையும், சுற்றுப்புறத்தையும் சுத்தமாக வைத்து கொண்டு நீர் உள்ள இடங்களில் கொசுக்களை கொல்லும் பூச்சு கொல்லியை பயன்படுத்தினால் மலேரியாவை அறவே ஒழித்திடலாம்.

எழுத்தால் உயர்ந்த இமயம்

எழுத்தால் உயர்ந்த இமயம் மு.வரதராசனார் முனைவர் வேலூர் ம.நாராயணன் இன்று (ஏப்ரல் 25-ந் தேதி) மு.வரதராசனார் பிறந்த தினம். ‘உழைப்பே உயர்வு தரும்’ என்ற தாரக மந்திரத்துக்கு எடுத்துக்காட்டாக விளங்கியவர் டாக்டர் மு.வரதராசனார். எளிய வாழ்வும், கடின உழைப்பும், உயர்ந்த லட்சியங்களும் கொண்டிருந்த வரதராசனார் தமிழாசிரியராக இருந்து பல்கலைக்கழக துணை வேந்தராக உயர்ந்தவர். வேலூர் மாவட்டம் ஆற்காடு அருகே உள்ள வேலம் என்ற கிராமம் வரதராசனாரின் சொந்த ஊர். அங்கு அவர் 1912-ம் ஆண்டு ஏப்ரல் மாதம் 25-ந்தேதி பிறந்தார். தந்தை பெயர் முனுசாமி. தாயார் அம்மாக்கண்ணு அம்மாள். 1928-ம் ஆண்டு பள்ளி இறுதித்தேர்வில் சிறப்பாக தேறினார். கல்லூரியில் சேர்ந்து படிக்க வசதி இல்லாததால் திருப்பத்தூர் வட்டாட்சியர் அலுவலகத்தில் எழுத்தர் வேலையில் சேர்ந்தார். பின்னர் தமிழ்வித்துவான் முதல்நிலைத் தேர்வு எழுதி வெற்றி பெற்றார். சில காலம் திருப்பத்தூரில் நகராண்மைக்கழக உயர்நிலைப்பள்ளியில் தமிழாசிரியராக பணிபுரிந்தார். ஆங்கில நூல்களையும் அதிகம் கற்றார். சென்னை பல்கலைக்கழகம் நடத்திய பி.ஓ.எல். பரீட்சை எழுதி முதல் வகுப்பில் தேர்ச்சி பெற்று, சென்னை பச்சையப்பன் கல்லூரியில் தமிழாசிரியராக சேர்ந்தார். பின்னர், எம்.ஓ.எல். பட்டம் பெற்று கல்லூரி தமிழ்த்துறை தலைவராக உயர்ந்தார். ‘பழந்தமிழ் இலக்கியத்தில் இயற்கை’ என்பது பற்றி ஆராய்ந்து ‘பி.எச்.டி.’ பட்டம் பெற்றார். இலக்கிய ஆராய்ச்சி நூல்கள், வரலாற்று நூல்கள், கடித நூல்கள், சிறுகதை, நாவல்கள் என்று ஏராளமான நூல்களை எழுதினார். அவருடைய எழுத்துகளில் லட்சக்கணக்கான மக்கள் குறிப்பாக மாணவர்கள் மனதை பறிகொடுத்தனர். இளைஞர்களிடையே மேன்மையான மாற்றத்தையும், அறநோக்கத்தையும் நெறி பிறழா உறுதியையும் மு.வ.வின் எழுத்துகள் உண்டாக்கின. தமது அனைத்து சிந்தனைகளையும் சிந்தாமல் சிதறாமல் அப்படியே தமது நூல்களில் பதிவு செய்ய நினைத்தார். 1947-ம் ஆண்டு தொடங்கி தாம் மறைகின்ற காலம் வரை ஏறத்தாழ இருபத்தேழு ஆண்டுகள் டாக்டர் மு.வ. ஒரு மணித்துளியைக்கூட விரயமாக்கவில்லை என்பதற்கு இவர் எழுதிய 85 நூல்களே சாட்சி. மு.வரதராசனார் எழுதிய ‘திருக்குறள் தெளிவுரை’ 1949-ம் ஆண்டு வெளியிடப் பட்டது. இந்த கையடக்க நூல் இதுவரை 150 பதிப்புகள் விற்பனையாகி வரலாறு படைத்துள்ளது. இவரது திருவள்ளுவர் அல்லது வாழ்க்கை விளக்கம் என்ற நூல் வள்ளுவரை பாமரத்தமிழர்களின் குடில்களுக்கு அழைத்து வந்து பயன் தரவைத்தது. பத்துப்பாட்டு, எட்டுத்தொகை நூல்கள் இவரால் எளிய விளக்கங்கள் பெற்றன. அன்னைக்கு, தம்பிக்கு, தங்கைக்கு, நண்பர்க்கு என்ற தலைப்பில் கடித வடிவில் எழுதிய கட்டுரைகள் ஏராளம். அகல் விளக்கு, கள்ளோ காவியமோ?, செந்தாமரை, பாவை, அந்த நாள், மலர் விழி, பெற்ற மனம், அல்லி, கரித்துண்டு, கயமை, நெஞ்சில் ஒருமுள், வாடா மலர் உள்ளிட்ட 13 நாவல்களை எழுதியுள்ளார். குறட்டை ஒலி, பழியும் பாவமும் ஆகியவை இவருடைய சிறுகதை தொகுதிகள். டாக்டர் மு.வ.வின் பல நூல்கள் மத்திய, மாநில அரசின் பரிசைப் பெற்றன. இவர் எழுதிய ‘அகல் விளக்கு’ என்ற நூலுக்கு சாகித்திய அகாடமி விருது கிட்டியது. 1971-ம் ஆண்டு மதுரை பல்கலைக்கழக துணை வேந்தரானார். ஏற்றுக்கொண்ட பொறுப்புகள் அனைத்தையும் எவரும் குறைசொல்லா வண்ணம் நிறைவாக செய்துகாட்டினார். எழுதுவதற்கு தமது ஓய்வு நேரத்தை மட்டுமே பயன்படுத்திக் கொண்டார். இவர் ஆயிரக்கணக்கான தமிழ் பேராசிரியர்களை உருவாக்கினார். “புலமையும் வறுமையும் சேர்ந்தே பிறந்தவை” என்ற வறட்டு வேதாந்தத்தின் இடுப்பொடித்துத் தமது வாழும் நாளிலேயே மிகப்பெரிய செல்வந்தராக நிமிர்ந்து நின்றார். இலக்கிய மரபு, இலக்கியத் திறன், இலக்கிய ஆராய்ச்சி போன்ற மு.வ.வின் திறனாய்வு நூல்கள் தமிழ் கற்கும் மாணவர்களுக்கு எளிதில் செரிமானமாகும் அறிவு உணவாகத் திகழ்ந்தன. இன்றும் திகழ்கின்றன. அவர் எழுதிய தமிழ் இலக்கிய வரலாறு தமிழுக்கு கிடைத்த வரப்பிரசாதம். தமக்கு வாய்த்த எழுத்தாற்றலைக் கொண்டு புதியதோர் உலகம் செய்யவே பாடுபட்டார். மு.வ.வின் எழுத்துகள் எண்ணற்ற இளைஞர்களை மாற்றி இருக்கின்றன. பொது மக்களின் ஒத்துழைப்பும், அரசின் துணையும் அமையப் பெற்றிருக்குமேயானால் பெருமளவு மாற்றத்தை இந்த மாமனிதர் உருவாக்கிக் காட்டியிருப்பார் என்பதில் எள்ளளவும் ஐயமில்லை. மக்களின் மனம் உயராமைக்குக் காரணம் நாம் பின்பற்றுகின்ற தற்போதைய மக்களாட்சி நடைமுறையே என்பது மு.வ. கருத்து. சட்டம், சமுதாயம், கடவுள் என்ற மூன்றிற்கும் அல்லது எந்த ஒன்றிற்காவது அஞ்சும் அச்சம் தேவையாக உள்ளது. சட்டம், சமுதாயம், கடவுள் ஆகியவற்றின் மேல் அச்சம் இருக்கும் வரை சமுதாயத்தின் அமைதி குலையாது என்று மு.வ. நம்பினார். பணத்தின் செல்வாக்கு எதற்குமே அஞ்சாத ஒரு துணிவைக் கொடுத்துப் பலரையும் கெடுத்து வருகின்றது என்றார். 10-10-1974 அன்று டாக்டர் மு.வரதராசனார் சென்னையில் இருந்தபோது உடல்நலக்குறைவு காரணமாக காலமானார். வரதராசனாரின் மனைவி பெயர் ராதா அம்மையார். இவர்களுக்கு மூன்று மகள்கள். தமது எழுத்தாற்றலால் வரலாற்று ஏடுகளில் இமயமாய் எழுந்து நிற்கும் டாக்டர் மு.வரதராசனாரின் புகழ் தமிழ் உள்ளளவும் நிலைத்து நிற்கும்.

ஞானியார்

பக்தனைத் தேடி வந்த முருகப்பெருமான் ஞானியார் சமாதி பீடம் ஞானியார் சமாதி அமைந்த இடம் குலசேகரன்பட்டினத்தில் உள்ள படுக்கை வீட்டுக் கோவில் திருச்செந்தூருக்குத் தெற்கே எட்டு மைல் தூரத்தில் உள்ளது, குலசேகரன்பட்டினம் என்னும் சிறப்பான ஊர். இவ்வூரில்தான் தனது பக்தன் ஒருவருக்கு, திருச்செந்தூர் முருகன் அருள்புரிந்துள்ளார். அந்தக் கதையைப் பார்ப்போம். ஆன்மிக சிறப்பு வாய்ந்த நகரம் குலசேகரப்பட்டினம். இங்கு முற்காலத்தில் துறைமுகம் இருந்துள்ளது. தற்போதும் இங்கு கலங்கரை விளக்கம், அங்கசாலை விநாயகர் உள்பட பல பழமையின் நினைவு சின்னங்கள் காணப்படுகின்றன. இரண்டாம் தமிழ்சங்கம் இங்கு இருந்த தாகவும், இந்த ஊரை கபடபுரமென அழைத்ததாகவும் அறிஞர் பெருமக்களின் கருத்து. குலசேகர பாண்டியன் இந்நகரின் பல்வேறு இடங்களில் சிவ பெருமானுக்கு ஆலயம் அமைத்து திருப்பணி செய்த சிறப்பான ஊர். எல்லாவற்றிற்கும் மேலாக தசராத் திருவிழா நடைபெறும் குலசை முத்தாரம்மன் அருள்பாலிக்கும் அற்புதத் திருத்தலம் இது. இவ்வூரில்தான் முருகன் அடிமை ஞானியார் தோன்றினார். ஞானியாரின் இயற்பெயர் முத்தணைந்த பெருமாள் பிள்ளை. இவர் பிறப்பால் பெரும் செல்வந்தர். இவர் குலசேகரன் பட்டின குறுநில மன்னருக்குத் தலைமை அமைச்சராகவும் விளங்கியுள்ளார். சைவ ஒழுக்கம் நிறைந்தவர். திருச்செந்தூர் முருகனிடத்தில் சிறந்த பக்தி கொண்டவர். ஞான நூல்களை ஓதியும், ஓதுவித்தும் பெருமையுடன் வாழ்ந்து வந்தவர். மந்திர தந்திர நூல்களில் நிபுணராகவும் விளங்கினார். இவர் தினமும் இரவு நேர வழிபாட்டிற்காக திருச்செந்தூர் செல்வது வழக்கம். இதை தன் வாழ்க்கையில் கடமையாகவே செய்து வந்தார். ஆட்சித் திறன் அமைந்தவர் என்பதாலேயே இவரை பலரும் ‘ஞானியார்’ என்று அழைத்து வந்தனர். இவர் தனது தவ வலிமையால் பல அபூர்வ சக்திகளை, மக்களுக்கு நன்மை செய்வதற்காக வெளிப்படுத்தினார். கேரள மாநிலம் பூதப்பாண்டி என்ற ஊரில் பொல்லாப் பிள்ளை ஆசான் என்பவன் வாழ்ந்தான். இவன் கைதேர்ந்த மிகப்பெரிய மந்திரவாதி. அந்தப் பகுதி அரசனையே மிரட்டி தன் கைக்குள் வைத்திருந்தான். எனவே இவனும் ஒரு சிற்றரசன் போல வாழ்ந்தான். அந்தப்பகுதியில் ஒன்பது வீட்டு பிள்ளைமார்கள் வாழ்ந்தனர். இவர்களும் திறமை மிக்கவர்களே. ஒருநாள், மந்திரவாதியின் திறமையைச் சோதிக்க அவர்கள் எண்ணினர். அதன்படி அந்த மந்திரவாதியிடம் அபாயகரமான ஒரு வேலையைக் கொடுத்தனர். இலங்கை கண்டியில் அரச மாடத்தினுள் தூங்கிக் கொண்டிருக்கும் அரச கன்னியை தம் ஊருக்கு ஏவல் மூலம் உடனே கொண்டு வரவேண்டும் என்பதே அந்த வேலை. ‘என்னால் முடியும்’ என சவால் விட்டான் மந்திரவாதி. தன் மந்திர சக்திக்குக் கட்டுப்பட்ட பூதங்களைக் கூப்பிட்டான். அவைகளை கண்டிக்கு வான் வழியே ஏவினான். அவைகளும் ஆகாய மார்க்கமாக அரச கன்னியைக் கொண்டு வர புறப்பட்டன. அரச மாளிகையில் வான் வழியே உப்பரிகையில் குதித்த பூதங்கள், தூங்கிக்கொண்டிருந்த அரச கன்னிகையைக் கட்டிலோடு தூக்கிக் ெகாண்டு பூதப்பாண்டி நோக்கிச் சென்றன. ஒரு குறிப்பிட்ட நேரத்தில் கடல் கடந்து குலசேகரன்பட்டினம் வழியாக அவை சென்றுக்கொண்டிருந்தன. அந்த வேளையில் ஞானியார், குளத்தில் நின்றபடி இராப்பொழுது செய்ய வேண்டிய நாலாங்காலக் கடன் என்னும் துரிய சந்தியை முடித்துக் கொண்டிருந்தார். அப்போது விண்ணில் பூதங்கள் கட்டிலோடு கன்னிகையைத் தூக்கிப் போகின்ற நிழலை தண்ணீரில் கண்டார். அவரது ஞானசக்தியால் அசம்பாவிதத்தை உணர்ந்த ஞானியார், தன்னுடைய சக்தியால் பூதங்களோடு கட்டிலை கீழே இறக்கினார். அவரது சக்தியைக் கண்டு அஞ்சிய பூதங்கள், அவர் முன்பாக மண்டியிட்டன. அவைகளைப் பார்த்து, ஒரு பாவமும் அறியாத அரச கன்னியை முன்னிருந்த இடத்தில் கொண்டு விட்டு வரும்படி பூதங்களை ஏவினார். அவைகளும் அப்படிச் செய்து விட்டு, ஞானியாரிடம் திரும்பி வந்தன. அந்த பூதங்களிடம், ‘உங்களை ஏவிவிட்ட மந்திரவாதி யிடம் சென்று, இனி இவ்விதக் கொடிய செயல்களில் ஈடுபடக் கூடாதென சொல்லுங்கள்’ என்று அறிவுறுத்தினார். மந்திரவாதியிடம் சென்று பூதங்கள் நடந்த நிகழ்வுகளை கூறின. கோபம் கொண்ட மந்திரவாதி, ஞானியார் மீதே பல பூதங்களை ஏவினான். ஆனால் அந்த பூதங்களையெல்லாம் தனது தவ வலிமையால் விரட்டினார் ஞானியார். இறுதியாக வைரவ மூர்த்திக்குரிய மந்திரங்களை, மிக உக்கிரமாக உச்சாடணம் செய்து ஞானியாரிடம் ஏவினான் மந்திரவாதி. வைரவமூர்த்தி மிக உக்கிரமாக குலசேகரன்பட்டினம் வந்து சேர்ந்தார். ஞானியாரைக் கண்டதும், இவர் செந்தூரனின் சிந்தை கவர்ந்த பக்தன் என் பதைத் தெரிந்து கொண்டார். உடனே அவரது ஆவேசம் குறைய ஆரம்பித்தது. ஞானியாருடனேயே வைரவமூர்த்தி தங்கினார். குலசையில் ஞானியார் வீட்டில், வைரவருக்குத் தனிப்பீடம் போடப்பட்டிருக்கிறது. பூஜையும் செய்யப்பட்டு வருகிறது. இதற்கிடையில் மந்திரவாதி... வைரவ மூர்த்தியை காணாது சினம் கொண்டான். எனவே அவன் நேராக குலசேகரன்பட்டினம் வந்தான். அங்கே ஞானியாரைக் கண்டான். இருவருக்கும் பல தர்க்கங்கள் நடந்தது. இறுதியில் கொஞ்சம் கொஞ்சமாக மந்திரவாதியின் பிடி தளர்ந்தது. அவனைக் தன்னுடைய வீட்டிற்கு அழைத்துச் சென்ற ஞானியார், அங்குள்ள ஒரு அறையைத் திறந்து காண்பித்தார். அங்கு மந்திரவாதியின் மனைவி, தங்கை, தாய், தந்தை முதலியோர் சிறை வைக்கப்பட்டிருந்தனர். அந்தக் காட்சியைக் கண்டு நடுங்கிப்போனான் மந்திரவாதி. ஞானியாரிடம் சரணடைந்தான். மந்திரவாதியை மன்னித்த ஞானியார், ‘மந்திர ஆற்றலை இழி தொழிலுக்குப் பயன்படுத்த வேண்டாம்’ என்று அறிவுறுத்தி வழியனுப்பினார். ஞானியார் அடிகளின் புகழ் எங்கும் பரவியது. இதுபோலவே பல நற்பணிகளை செய்து வந்த ஞானியாருக்கு வயது 80-யை தொட்டது. வயது முதிர்ந்த காலத்திலும் திருச்செந்தூர் கோவிலுக்கு இரவு வழிபாட்டுக்கு முருகனை வழிபட தினசரி எட்டு மைல் தூரம் நடந்தே செல்வார். அங்கு செந்தூர் முருகனை தரிசித்துவிட்டு ஊருக்குத் திரும்பி வருவார். ஒரு நாள் கடற்கரை ஓரமாகச் சென்ற போது, மழை பெய்தது. இடியும்.. மின்னலும் மிரட்டின. தள்ளாத வயதில் வழிதவறி கடற்கரையை விட்டுச் சிறிது கரைக்கு மேல்புறம் நிலப்பகுதிக்கு போய் விட்டார். கையில் விளக்குமில்லை. வழிகாட்ட வழிப் போக்கர்கள் யாருமில்லை. மூப்பினால் தள்ளாடிக் கொண்டே கால்கள் போன பக்கம் நடந்தவருக்கு, திடீரென மயக்கம் ஏற்பட்டது. அப்போது ஒரு உருவம் கையில் சிறு விளக்கைப் பிடித்துக் கொண்டு ஞானியாரடிகள் முன்தோன்றியது. அந்த உருவம் அவரை, திருச்செந்தூர் சண்முக விலாசம் வரை கூட்டிச்சென்றது. அதன் பின் மறைந்தது. செந்திலாண்டவனே தனக்கு இவ்வாறு துணையாக வந்தார் என்று ஞானியாரடிகள் மெய் சிலிர்ப்புடன், நா தழு தழுக்க அவரை எதிர்பார்த்து காத்திருந்த வேத விற்பன்னர்களிடம் கூறி மகிழ்ந்தார். குலசேகரன்பட்டினம் திரும்பியதும், செந்திலாண்டவன் அவர் கனவில் தோன்றி, ‘அன்பா! உனக்கு வயது முதிர்ந்துவிட்டது. தளர்ச்சியடைந்து விட்டாய். இனி இராக்கால வழிபாட்டிற்கு திருச்செந்தூர் வரவேண்டாம். நாமே நாள்தோறும் திருச்செந்தூரில் இராக் காலம் ஆனதும், உன் வீட்டிற்கு படுக்கைக்கு வந்து விடுகிறோம்’ என்றருளி மறைந்தார். அன்று முதல் ஞானியாரடிகள் தனது வீட்டிலே உள்ள பூஜை மடத்தில் செந்திலாண்டவன் திரு உருவத்தை வைத்து வழிபட்டு வரலானார். இன்றும் ஞானியார் வழிபட்ட இடம் ‘படுக்கை வீட்டுக் கோவில்’ என்ற பெயரில் வழங்கி வருகிறது. இங்கு ஞானியார், முருகப்பெருமானை வழிபட்டு வந்த குத்துவிளக்கு உள்ளிட்ட பொருட்கள் உள்ளன. ஞானியார் சமாதி அடையும் காலம் வந்தது. நண்பகல் நேரம் அவரது பூத உடலை விட்டு குலசேகரன்பட்டினத்தில் உயிர் பிரிந்த போது அதிசயம் ஒன்று நடந்தது. அச்சமயம் திருச்செந்தூர் கோவிலில் உச்சி கால பூஜை நடந்து கொண்டிருந்ததாம். ஞானியாரடிகள் தன் பூத உடலுடன் மூலஸ்தானத்துக்குள் நுழைவதை அங்கு குழுமியிருந்த சேவார்த்திகள் பார்த்தனர். இவ்வாறு நூதனமாக மூலஸ்தானத்துக்குள் ஞானியார் செல்வதைக் கண்டு அங்குள்ள அனைவரும் திகைத்தனர். ஞானியாரின் உடல் குலசேகரன்பட்டினத்தில் மறைந்தாலும் உயிர் முருகப்பெருமானோடு கலந்து விட்டது என பக்தர்கள் அனைவரும் பரவசமடைந்தனர். ஞானியாருடைய பூத உடல், குலசேகரன் பட்டினத்தில் சமாதி வைக்கப்பட்டு பூஜை நடைபெற்று வருகிறது. -சித்தா்களைத் தேடுவோம்.

பொதுமக்களின் வங்கி கணக்கில் ரூ.15 லட்சம் எப்போது போடப்படும் என்பதற்கு பதில் அளிக்க முடியாது பிரதமர் அலுவலகம் விளக்கம்

பிரதமர் மோடி வாக்குறுதி அளித்தபடி, பொதுமக்களின் வங்கி கணக்கில் ரூ.15 லட்சம் எப்போது போடப்படும் என்பது குறித்து பதில் அளிக்க முடியாது என்று பிரதமர் அலுவலகம் கூறியுள்ளது. மோடி வாக்குறுதி கடந்த 2014-ம் ஆண்டு நாடாளுமன்ற மக்களவை தேர்தல் பிரசாரத்தின்போது, பா.ஜனதாவின் பிரதமர் வேட்பாளரான நரேந்திர மோடி தீவிர பிரசாரம் மேற்கொண்டார். அப்போது, வெளிநாடுகளில் பதுக்கப்பட்ட கருப்பு பணத்தை மீட்கும்போது, ஒவ்வொரு இந்தியனின் வங்கி கணக்கிலும் ரூ.15 லட்சம் போடப்படும் என்று அவர் வாக்குறுதி அளித்ததாக கூறப்படுகிறது. இந்நிலையில், தகவல் பெறும் உரிமை சட்ட ஆர்வலர் மோகன் குமார் சர்மா என்பவர், கடந்த 2016-ம் ஆண்டு நவம்பர் 26-ந் தேதி, மத்திய தகவல் ஆணையத்தில் ஒரு விண்ணப்பத்தை அளித்தார். எப்போது கிடைக்கும்? அதில், நரேந்திர மோடி வாக்குறுதி அளித்தபடி, பொதுமக்களின் வங்கி கணக்கில் தலா ரூ.15 லட்சம் எப்போது போடப்படும்? என்றும், பணமதிப்பு நீக்க நடவடிக்கை பற்றி பத்திரிகைகளுக்கு முன்கூட்டியே தெரிந்தது எப்படி? என்றும் அவர் கேள்விகள் கேட்டிருந்தார். இதுகுறித்து தலைமை தகவல் ஆணையாளர் ஆர்.கே.மாத்தூர் முன்பு விசாரணை நடந்தது. அப்போது, பிரதமர் அலுவலகத்தில் இருந்தும், ரிசர்வ் வங்கியில் இருந்தும் தனக்கு முழுமையான தகவல் கிடைக்கவில்லை என்று மோகன் குமார் சர்மா கூறினார். பதில் அளிக்க முடியாது அதற்கு தலைமை தகவல் ஆணையாளர் ஆர்.கே.மாத்தூர், “ரூ.15 லட்சம் எப்போது போடப்படும்?, பணமதிப்பு நீக்க நடவடிக்கையை பத்திரிகைகள் முன்கூட்டியே அறிந்தது எப்படி? என்ற கேள்விகள், தகவல் பெறும் உரிமை சட்டத்தின் 2(எப்) பிரிவுப்படி, ‘தகவல்’ என்ற வரம்புக்குள் வராது என்றும், எனவே, அவற்றுக்கு பதில் அளிக்க முடியாது என்றும் பிரதமர் அலுவலகமும், ரிசர்வ் வங்கியும் தெரிவித்துள்ளன” என்று கூறினார். மேலும், பிரதமர் அலுவலகம் மற்றும் ரிசர்வ் வங்கியின் இந்த நடவடிக்கை தனக்கு திருப்தி அளிப்பதாகவும் ஆர்.கே.மாத்தூர் கூறினார்.

பயண அட்டை கட்டணம் ரூ.10ல் இருந்து ரூ.50 ஆக உயர்வு: மெட்ரோ ரெயிலில் மீண்டும் டோக்கன் முறை அறிமுகம் பயணிகள் வரவேற்பு

சென்னை மெட்ரோ ரெயிலில் மீண்டும் டோக்கன் முறை அறிமுகப்படுத்தப்பட்டு உள்ளது. இதற்கு பொதுமக்கள் வரவேற்பு தெரிவித்துள்ளனர். அதேசமயம் பயண அட்டை கட்டணம் ரூ.10ல் இருந்து ரூ.50 ஆக உயர்த்தப்பட்டு உள்ளது. மெட்ரோ ரெயில் சென்னை நேரு பூங்காவில் இருந்து விமானநிலையம், ஆலந்தூரில் இருந்து பரங்கிமலை மற்றும் விமான நிலையம் முதல் சின்னமலை வரை சுமார் 40 கிலோ மீட்டர் தூரம் மெட்ரோ ரெயில் இயக்கப்பட்டு வருகிறது. இதில் குறைந்தபட்சமாக ரூ.10-ம் அதிகபட்சமாக ரூ.70-ம் கட்டணமாக வசூலிக்கப்பட்டு வருகிறது. ரெயில் நிலையங்களில் பயணிகள் செலுத்தும் கட்டணத்திற்கு ஏற்ப டிக்கெட்டுகளுக்கு பதிலாக டோக்கன் வழங்கப்பட்டு வந்தது. பின்னர் பயண அட்டை (டிராவல் கார்டு) அறிமுகப்படுத்தப்பட்டது. இதற்காக டோக்கன் வழங்குவதை குறைத்துக்கொண்டு பயண அட்டை மட்டுமே வழங்கப்பட்டு வந்தது. பயண அட்டை வாங்கும்போது பயண கட்டணத்துடன் கூடுதலாக முன்பணம் ரூ.10 செலுத்த வேண்டி இருந்தது. மீண்டும் டோக்கன் முறை இந்தநிலையில் பயணிகளின் கோரிக்கையை ஏற்று ஏற்கனவே வழங்கப்பட்டு வந்த டோக்கன் முறை தற்போது முழுவீச்சில் அனைத்து ரெயில் நிலையங்களிலும் செயல்படுத்தப்பட்டு வருகிறது. இதில் தேவையான டிக்கெட் கட்டணத்தை மட்டுமே செலுத்தினால் போதும் என்பதால் பயணிகள் வரவேற்பு தெரிவித்துள்ளனர். அதேநேரம் பயண அட்டைக்கான முன்பணம் ரூ.10ல் இருந்து ரூ.50 ஆக உயர்த்தப்பட்டு உள்ளது. இந்த அட்டையை பயணம் முடிந்தபின் தேவை என்றால் பயணிகள் வைத்துக்கொள்ளலாம். இதனை ரீசார்ஜ் செய்தும் பயன்படுத்தலாம். குடும்பத்தில் வேறு நபரும் அந்த பயண அட்டையை பயன்படுத்தலாம். தேவை இல்லை என்றால் ரெயில் நிலைய கவுண்ட்டர்களில் கொடுத்து ரூ.50 முன்பணத்தை திரும்ப பெற்றுக்கொள்ளலாம். பயணிகள் அதிகரிப்பு தற்போது மெட்ரோ ரெயிலில் சராசரியாக ஒரு நாளைக்கு 23 ஆயிரம் முதல் 24 ஆயிரம் பேர் பயணம் செய்து வருகின்றனர். கடந்த சில நாட்களாக பயணிகளின் எண்ணிக்கை 29 ஆயிரத்தில் இருந்து 31 ஆயிரம் வரை உயர்ந்து உள்ளது. மேலும் பயணிகள் எண்ணிக்கையை அதிகரிக்க அதிகாரிகள் திட்டமிட்டு உள்ளனர். மேற்கண்ட தகவலை மெட்ரோ ரெயில் நிறுவன அதிகாரிகள் தெரிவித்துள்ளனர்.

தமிழ் வளர்த்த ஜி.யு.போப்

தமிழ் வளர்த்த ஜி.யு.போப் ஜி.யு.போப் ஆசிரியை சுபா அருள்செல்வம் தமிழ்த்தாயின் தவப்புதல்வர்களில் ஒருவரான டாக்டர் ஜி.யு.போப் கனடா நாட்டுக்கு அருகில் உள்ள பிரின்ஸ் எட்வர்ட் தீவில் 1820-ம் ஆண்டு ஏப்ரல் 24-ந்தேதி பிறந்தார். அவருடைய முழுப்பெயர் ஜார்ஜ் உக்ளோ போப் என்பதாகும். தந்தை பெயர் ஜான் போப். தாயார் கேதரின். தந்தையாரின் வாணிபத்திற்காக எட்வர்ட் தீவு சென்றிருந்தபோது அங்கு போப் பிறந்தார். போப்புக்கு 6 வயதானபோது பெற்றோருடன் இங்கிலாந்து நாட்டுக்கு சென்றார். 19 வயது வரை ஹாக்ஸ்டன் கல்லூரியில் கல்வி பயின்றார். சிறு வயதிலேயே கிறிஸ்தவ சமயப்பணியில் ஈடுபட வேண்டும் என்ற எண்ணம் ஏற்பட்டது. கிறிஸ்தவ சமயப்பணிக்காக 1839-ம் ஆண்டில் அவரை தென்இந்தியாவுக்கு கிறிஸ்தவ திருச்சபை அனுப்பி வைத்தது. தூத்துக்குடி அருகே சிறு கிராமமாக இருந்த சாயர்புரத்தில் குடியேறினார். கிறிஸ்தவ சமயப் பணியாற்றியதுடன் கல்வி சாலை அமையவும், நூல் நிலையம் உருவாகவும் பாடுபட்டார். அங்கு தமிழ் தவிர தெலுங்கு, சமஸ்கிருதம் ஆகிய மொழிகளையும் கற்று தேர்ந்தார். 1849-ல் இங்கிலாந்துக்கு சென்றார். பின்னர் தமிழகத்திற்கு திரும்பி தஞ்சாவூரில் தங்கினார். அங்கு சமயப்பணியை தொடர்ந்தார். தொல்காப்பியம், நன்நூல் போன்ற நூல்களை மாணவர்கள் கற்பதற்கு கடினமாக இருந்ததால், எளிய தமிழில் இலக்கண நூல்களை எழுதி வெளியிட்டார். திருக்குறள் ஆங்கில பதிப்பு முன்னுரையில் தமிழின் சிறப்பு பற்றி ஜி.யு.போப் பின்வருமாறு கூறுகிறார். ‘தமிழ்மொழி பண்பட்ட மொழி. சொற்செல்வம் படைத்த தனிமொழி. தென்னிந்திய மொழிகளுக்கெல்லாம் அது தாய்மொழி. தமிழ் இலக்கியங்கள் ஒழுக்கத்தையும், அறநிலையையும் ஊட்டுவதற்கென்றே உருவானவை. அதற்கோர் எடுத்துக்காட்டு திருக்குறள். உயர்ந்த அறநெறியும், உயிரினும் சிறந்த ஒழுக்கத்தையும் காணப்பெறும் மக்கள் வாழும் நாட்டில் தான் திருக்குறள் போன்ற நீதிநூல் உருவாகும். உருவாக இயலும். அழுக்கு இல்லாத தூய நீரூற்றுப் போல திருக்குறள் தோற்றம் தருகிறது. ஆம், உலகின் அழுக்கினை போக்க வந்த உயர்தனித் திருநூல் திருக்குறள்’ என்று போப் கூறியுள்ளார். இது தமிழர் மீதுள்ள அவரின் தணியாத காதலை எடுத்து காட்டுகிறது. சமயப்பணிக்காகத் தமிழ்நாட்டுக்கு வந்த போப் சமயப்பணி, கல்விப்பணி, தமிழ்ப்பணி ஆற்றி தமிழ்த் தொண்டராகவே மாறிவிட்டார். தஞ்சையிலிருந்து ஊட்டிக்குச் சென்று வாழ்ந்த போப் இந்திய நாட்டு வரலாறு பற்றி இரண்டு நூல்களை வெளியிட்டார். 1871-ல் பெங்களூரு சென்று அங்கு கல்விப் பணியும், சமயப் பணியும் ஆற்றினார். 42 ஆண்டுகள் இந்தியாவில் வாழ்ந்த போப் 1882-ம் ஆண்டு தனது 62-வது வயதில் இந்தியாவை விட்டு இங்கிலாந்துக்கு புறப்பட்டு சென்றார். 1885-ல் இங்கிலாந்தில் உள்ள ஆக்ஸ்போர்டு பல்கலைக்கழகத்தில் பேராசிரியராக பணியாற்றினார். அங்கு மாணவர்களுக்குத் தமிழ், தெலுங்கு மொழிகளைக் கற்றுக்கொடுத்தார். போப் ஆங்கிலத்தில் மொழிபெயர்த்த திருவாசக நூல் அவருடைய 80-வது பிறந்தநாளில் வெளியிடப்பட்டது. அவருடைய இறுதி விருப்பம் அவருடைய எல்லையில்லாத தமிழ் பற்றை வெளிப்படுத்துவதாக இருந்தது. ‘நான் இறந்த பின் என் கல்லறையில் தமிழ் மாணவன் என்று குறிப்பிட வேண்டும். என் கல்லறையை அமைப்பதற்கு ஆகும் செலவில் ஒரு பகுதியாவது தமிழ் மக்களின் நன்கொடையாக அமைய வேண்டும்’ என்று தன் விருப்பத்தை எழுதி வைத்தார். பிறப்பால் ஐரோப்பியராக இருந்தாலும் உள்ளத்தால் தமிழராய் வாழ்ந்து தமிழ்த்தாயின் தவப்புதல்வரான ஜி.யு.போப் 1908-ம் ஆண்டு பிப்ரவரி மாதம் 11-ந்தேதி காலமானார். அவருடைய விருப்பப்படியே அவர் கல்லறையை அமைக்க பச்சையப்பன் கல்லூரி தமிழ் பேராசிரியர் செல்வ கேசவராய முதலியார் தமிழர்களிடம் நன்கொடை வசூலித்து இங்கிலாந்துக்கு அனுப்பிவைத்தார். ஆக்ஸ்போர்டில் வால்டன் தெரு என்ற வீதியில் உள்ள கல்லறைத்தோட்டத்தில் ஒரு மரத்தடியில் சலவைக்கல்லால் ஆன போப் கல்லறை உள்ளது. அதில் பொறிக்கப்பட்டு உள்ள ஆங்கில வாசகத்தின் தமிழாக்கம் வருமாறு:- தென்னிந்தியாவை சேர்ந்த ஜார்ஜ் உக்ளோ போப் ஆக்ஸ்போர்டு பல்கலைக்கழகத்தில் தமிழ், தெலுங்கு மொழிகளை போதிக்கும் பேராசிரியராக பணியாற்றினார். மொழிக்காகவும், சமயப்பணிக்காகவும் வாழ்நாள் முழுவதும் பாடுபட்ட போப் மீது பற்றுதல் கொண்ட தென்னிந்தியாவை சேர்ந்த அவருடைய தமிழ் அன்பர்களும், அவருடைய குடும்பத்தினரும் சேர்ந்து அமைத்த கல்லறை இது. இவ்வாறு அந்த வாசகம் அமைந்தது. தமிழாய்ந்த தமிழ் மகனின் புகழ் தமிழ் உள்ளளவும் வாழ்க! இன்று (ஏப்ரல் 24-ந்தேதி) ஜி.யு.போப் பிறந்த நாள்.

ரூ.49-க்கு புதிய சலுகை அறிவித்த ஏர்டெல்

ஏர்டெல் பிரீபெயிட் வாடிக்கையாளர்களுக்கு அந்நிறுவனம் புதிய சலுகையை அறிவித்துள்ளது.ரூ.49 விலையில் கிடைக்கும் புதிய சலுகையில் வாடிக்கையாளர்களுக்கு 3ஜிபி 3ஜி / 4ஜி டேட்டா ஒரு நாள் வேலிடிட்டியுடன் வழங்கப்படுகிறது. முன்னதாக ஏர்டெல் ரூ.49 விலையில் அறிவித்த சலுகையில் அனைத்து வாடிக்கையாளர்களுக்கும் 1 ஜிபி 3ஜி / 4ஜி டேட்டா வழங்கப்பட்டது.ரிலையன்ஸ் ஜியோ வழங்கும் ரூ.49 சலுகைக்கு போட்டியாக ஏர்டெல் புதிய சலுகை அறிவிக்கப்பட்டுள்ளது. எனினும் ஜியோ சலுகை 28 நாட்கள் வேலிடிட்டி கொண்டுள்ளது. ஏர்டெல் புதிய ரூ.49 சலுகையை பெற வாடிக்கையாளர்கள் மைஏர்டெல் செயலி அல்லது ஏர்டெல் அதிகாரப்பூர்வ வலைத்தளம் செல்ல வேண்டும். இந்த சலுகையை டேட்டா பிரவில் காண முடியும். இந்த சலுகை வழங்கப்பட்டிருப்பதை உறுதிசெய்த பின் வாடிக்கையாளர்கள் ரீசார்ஜ்செய்யலாம். புதிய சலுகை வழங்கப்படாத வாடிக்கையாளர்களுக்கு ரூ.49-க்கு 1ஜிபி 4ஜி டேட்டா வழங்கப்படுகிறது.ஜியோ வழங்கும் ரூ.49 சலுகை ஜியோபோன் வாடிக்கையாளர்களுக்கு மட்டுமே வழங்கப்படுகிறது. இதில் வாடிக்கையாளர்களுக்கு 1 ஜிபி டேட்டா, அன்லிமிட்டெட் வாய்ஸ் கால் உள்ளிட்டவை28 நாட்களுக்கு வழங்கப்படுகிறது. ஏர்டெல் வழங்கும் ரூ.65 சலுகையில் வாடிக்கையாளர்களுக்கு 1 ஜிபி 2ஜி / 3ஜி டேட்டா 28 நாட்களுக்கு வழங்கப்படுகிறது. இத்துடன் 4ஜி ஸ்மார்ட்போனிற்கு அப்கிரேடு செய்யும் வாடிக்கையாளர்களுக்கு ஏர்டெல் 30 ஜிபி இலவச டேட்டா வழங்குகிறது. இந்த சலுகை 2ஜி / 3ஜி மொபைல் பயன்படுத்துவோர் 4ஜி ஸ்மார்ட்போனிற்கு மாறும் போது இலவச டேட்டா வழங்கப்படுகிறது. முன்னதாக ஏர்டெல் அறிவித்த ரூ.249 சலுகையை அறிவித்து ரூ.349 சலுகையில் கூடுதல் சேவைகளை வழங்குவதாக அறிவித்தது.

இன்று (ஏப்ரல் 22-ந்தேதி) சர்வதேச பூமி தினம்.

பூமி எங்கும் தூய்மை காப்போம்! கோ.சுந்தர்ராஜன், பூவுலகின் நண்பர்கள் அமைப்பு இந்த பூமி நமது முன்னோர்கள் நமக்கு விட்டுச் சென்ற சொத்து இல்லை. நமது வருங்காலத்தினரிடமிருந்து நாம் பெற்றிருக்கும் கடன் என்கிறது ஒரு செவ்விந்திய பழமொழி. நூறு வருடங்கள் கூட இந்த பூமியில் முழுமையாக வாழ முடியாத நாம்தான், இந்த பூமியில் பல்லாயிரக்கணக்கான ஆண்டுகள் தழைத்துக் கொண்டிருக்கும் எல்லா ஆற்றல்களையும் நமது ஆளுகைக்கு கீழ் கொண்டு வர வேண்டும் என்று நினைக்கிறோம். நிலத்துக்கும் நீருக்குமாக ஒருவரையொருவர் அடித்துக்கொண்டிருக்கிறோம். இந்த பிரச்சினைகள் போக நமக்கு கடனாக கொடுக்கப்பட்ட பூமியை எப்படியெல்லாம் சிதைக்க முடியுமோ அப்படியெல்லாம் சிதைத்துக்கொண்டிருக்கிறோம். நெகிழி (பிளாஸ்டிக்) பயன்பாட்டின் மூலம் மட்டும் இந்த பூமியை எப்படி சிதைத்துக்கொண்டிருக்கிறோம் தெரியுமா? நாம் பயன்படுத்தும் ஒரு பிளாஸ்டிக் பாட்டில் முழுமையாக அழிந்து மறுசுழற்சியாக குறைந்த பட்சம் 450 ஆண்டுகள் ஆகும். பெரும்பாலும் பிளாஸ்டிக் பொருட்களை நம்மால் மறுசுழற்சி செய்யவே முடியாது. இதனால் நிலத்தையும் நிலத்தின் தன்மையையும் கடுமையாக பாதிக்கிறது பிளாஸ்டிக். கடல்களில் பிளாஸ்டிக் பைகளை தின்று இறந்து கொண்டிருக்கும் கடல்வாழ் உயிரினங்களின் எண்ணிக்கை வருடத்துக்கு வருடம் அதிகரித்துக்கொண்டிருக்கிறது. பிளாஸ்டிக் பொருட்கள் எரிக்கப்படும் போது வெளியாகும் வாயுக்கள் விஷத்தன்மை கொண்டவை என்கிறது அறிவியல். ஆக எல்லா விதங்களிலும் ஆபத்தானது பிளாஸ்டிக். ஆனாலும் நாம் அதை தொடர்ச்சியாக பயன்படுத்துவதை நிறுத்த முடியவில்லை. இப்படி சூழலுக்கு ஆபத்தான விஷயங்கள் மீது கவனத்தை குவித்து சூழல் பாதுகாப்பு பற்றி ஒரு விழிப்புணர்வை உண்டாக்க வேண்டும் என்பதுதான் சர்வதேச பூமி தினத்தின் நோக்கம். 1970-ம் ஆண்டு ஏப்ரல் 22-ந்தேதி அமெரிக்காவில் லட்சக்கணக்கான மக்கள் சாலைகளில் திரண்டார்கள். 150 வருடங்கள் தொழில் வளர்ச்சியின் மோசமான விளைவுகளை எதிர்த்து அவர்கள் போராட்டம் நடத்தினார்கள். சூழல் பற்றிய முழுமையான விழிப்புணர்வு ஏற்படாத காலகட்டம் அது. ஆனால் 1962-ல் வெளியான ரேச்சல் கார்சனின் மவுன வசந்தம் புத்தகம் ஒரு புரட்சியை உண்டுபண்ணி இருந்தது. மிக அதிகமாக பூச்சிக்கொல்லிகளை பயன்படுத்துவதால் பல்லுயிரியம் பாதிக்கப்படுவதை மக்கள் உணர்ந்திருந்தார்கள். இந்த நிகழ்வின் போது அமெரிக்க அதிபராயிருந்த நிக்சன் உடனடியாக எதிர்வினை ஆற்றினார். சூழலுக்கு ஆதரவான பல சட்டங்கள் நிறைவேற்றப்பட்டன. அமெரிக்காவில் சூழல் பாதுகாப்பு குழு உருவாக்கப்பட்டது. அப்போது அமெரிக்காவில் தூவப்பட்ட விதை இப்போது 192 நாடுகளில் பரவியிருக்கிறது. அந்த ஆண்டில் இருந்து ஒவ்வொரு வருடமும் எதாவது ஒரு நோக்கத்தை முன்னிறுத்தி பூமி தினம் உலகெங்கும் கொண்டாடப்படுகிறது. இந்த வருடம் சர்வதேச பூமி தினத்தின் நோக்கம், பிளாஸ்டிக் ஒழிப்பு. பிளாஸ்டிக் ஒழிப்பின் அவசரத் தேவை குறித்த பிரசாரங்கள் உலகெங்கும் முன்னெடுக்கப்பட்டு வருகின்றன. அன்றாடம் பிளாஸ்டிக் பயன்பாட்டை நிறுத்தினால் இந்த பூமி என்கிற கடனை நம்மால் வருங்கால சந்ததிக்கு செலுத்திவிட முடியும் என்பதுதான் இந்த வருடம் பூமி தினம் நமக்கு சொல்லும் எளிமையான செய்தி. பூமியை நேசிக்கிறோம் என்று நம்மில் எத்தனை பேர் சொல்லிக்கொள்கிறோம்? கடலிலும் மலைக்கருகிலும் செல்பி எடுத்து சமூகவலைத்தளங்களில் நமது இயற்கை மீதான நேசத்தை விளம்பரப்படுத்திக்கொள்ளும் நாம்தான் எந்தவிதமான குற்றவுணர்வுமின்றி பிளாஸ்டிக்கை பயன்படுத்தி பூமியை அழிக்கிறோம். குரங்கணி காட்டுத் தீவிபத்தில் இறந்து போன அத்தனை பேருமே இயற்கையின் மீது அபரிதமான நேசம் கொண்டவர்கள்தான். ஆனால் ஒன்றை நேசிப்பதற்கும் அதை புரிந்துகொள்வதற்குமான வித்தியாசத்தை அவர்கள் உணர்ந்திருக்கவில்லை. காட்டின் தன்மையும் காட்டுத் தீயின் தன்மையும் தெரியாமலேயே அவர்கள் இறக்க நேர்ந்தது. கிட்டத்தட்ட பிளாஸ்டிக் விஷயத்திலும் அதுவே நடந்துக்கொண்டிருக்கிறது. பிளாஸ்டிக் அழிய குறைந்த பட்சம் 450-ல் இருந்து ஆயிரம் வருடங்கள் ஆகுமென்றால் அப்போது நாம் இருக்கவா போகிறோம்? அப்போது பூமி என்ன ஆனால் நமக்கு என்ன? என்கிற அலட்சிய மனப்பான்மையும் அக்கறையின்மையும்தான் இன்று நமது அபரிதமான பிளாஸ்டிக் பயன்பாட்டின் அடித்தளம். ஆனால் பூமி என்பது என்ன? செடிகொடியும், மரமும், மலையும் கடலும் மட்டும்தானா? அதன் மீது வாழும் உயிரினங்களும் சேர்ந்ததுதான் பூமியும் இயற்கையும். இயற்கை என்பது நீங்களும் நானும். நம் எல்லா தாக்குதல்களையும் மீறி தன்னை தற்காத்துக்கொள்ளும் ஆற்றல் இயற்கைக்கு உள்ளது. அப்படி நிகழும் போது அந்த தாக்குதல்கள் நம் மீதே திரும்பவும் ஏவப்படும். அப்போது நாம் இயற்கையிலிருந்து முழுமையாக விலகி நிற்போம். இன்று நாம் சந்திக்கும் பல சூழல் பிரச்சினைகளுக்கு முக்கியமானதொரு காரணம் காலநிலை மாற்றம். திடீர் வெள்ளங்கள், நில நடுக்கங்கள் என்று பல பிரச்சினைகளுக்கு காரணம் கால நிலை மாற்றம். காலநிலை மாற்றம் மனித தவறு. அதே போல 100 ஆண்டுகள் கழித்து பிளாஸ்டிக் பயன்பாட்டிற்காக இந்த உலகமும் அதில் வாழும் உயிரினங்களும் பல விளைவுகளை சந்திக்கும் போது மனித வாழ்வின் பொறுப்பற்ற தன்மையே அதற்கு காரணம் என்பதை அப்போது அவர்கள் உணர்ந்திருப்பார்கள். நாம் விரும்புவது அதைத்தானா? பிளாஸ்டிக் என்னும் ஆயுதத்திற்கு நமது சந்ததியினரை பலியாக்குவதுதான் நமது விருப்பமா? நாம் நிச்சயம் இயற்கையின் ஒரு அம்சம்தான். ஆனால் இயற்கையிடமிருந்து நம்மை பிரிக்கும் பல விசயங்களை நாமே உருவாக்கி வைத்திருக்கிறோம். அதில் ஒன்று பிளாஸ்டிக். கொஞ்சம் பிளாஸ்டிக்கை நமது வாழ்விலிருந்து குறைத்துப் பார்ப்போம். மலை உச்சிகளுக்கும் கடற்கரைகளுக்கும் நாம் செல்ல வேண்டாம். இயற்கை நம்மைத் தேடி வரும். இன்று (ஏப்ரல் 22-ந்தேதி) சர்வதேச பூமி தினம்.

பரிணாமத் தொடர்ச்சியில் அடுத்து வரும் உயிரினம் எது?

குரங்கில் இருந்து மனிதன் வந்தான். பரிணாமத் தொடர்ச்சியில் அடுத்ததாக, மனிதனில் இருந்து என்ன உயிரினம் வரப்போகிறது என்பது நீண்ட நெடும் காலமாக விடையில்லாமல் தொடரும் மில்லியன் டாலர் கேள்வி. முக்கியமாக, அப்படி ஒரு புதிய உயிரினம் உருவாக சாத்தியக்கூறுகள் இருக்கின்றனவா என்பதும் பன்னெடுங்காலமாக விஞ்ஞானிகளால் ஆய்வு செய்யப்பட்டும், விவாதிக்கப்பட்டும் வருகிறது. ‘மாற்றம் ஒன்றே மாறாதது’ எனும் கூற்றுக்கு மனித பரிணாமமும் விதிவிலக்கல்ல என்று நிரூபித்துள்ளது ஆஸ்திரேலியாவிலுள்ள குயின்ஸ்லாந்து பல்கலைக்கழகத்தில் மேற்கொள்ளப்பட்ட சமீபத்திய வெகுசன மரபியல் ஆய்வு ஒன்று. அதாவது, பரிணாம வளர்ச்சி அல்லது மாற்றம் என்பது ஒருநாளும் நிற்பதில்லை என்பதற்கு, மனிதர்களின் உடலில் உள்ள மரபுத்தொகையில் (Human genome) தொடர்ச்சியாக நிகழும் பரிணாம மாற்றங்களே சாட்சி என்று அறிவியல் ஆதாரங்களை முன்வைக்கிறது இந்த ஆஸ்திரேலிய நாட்டு ஆய்வு. பரிணாமம் தொடர்பான இந்த மரபியல் மாற்றங்கள் காரணமாக மனிதர்களின் இனப்பெருக்கத் திறன் மற்றும் இருதய செயல்பாடு ஆகியவை மாறுகின்றன என்று இந்த புதிய ஆய்வில் கண்டறியப்பட்டுள்ளது. பரிணாம மாற்றத்தின் முக்கிய அங்கங்களில் ஒன்றான இயற்கைத் தேர்வு (Natural selection) என்பது பல சந்ததிகள் வரை தொடரக்கூடிய, மிக மிக மெதுவாக உருவாகும் மாற்றங்கள் கொண்ட ஒரு நிகழ்வாகும். துரதிர்ஷ்டவசமாக, அத்தகைய மாற்றங்களை இனம் காண்பது அல்லது கண்காணிப்பது சாத்தியமில்லை என்பது இங்கு கவனிக்கத்தக்கது. ஆனால், குயின்ஸ்லாந்து பல்கலைக்கழகத்தின் மரபியலாளர்கள் ஜியான்யாங் மற்றும் ஜியான் செங் ஆகிய இருவரும், டி.என்.ஏவில் ஏற்படக்கூடிய ‘மியூட்டேஷன்’ (Mutation) எனப்படும் மரபியல் பரிணாம மாற்றங்களை கண்டறியும் ஒரு புள்ளிவிவர ஆய்வுமுறை ஒன்றை உருவாக்கியுள்ளனர். இதன் உதவியுடன், இங்கிலாந்தின் பயோபேங்க்கில் உள்ள சுமார் 1,26,545 மனிதர்களின் மரபியல் தகவல்களை ஆய்வு செய்தனர். இந்த ஆய்வில், குதிகால் எலும்பின் கனிம அடர்த்தி (heel bone mineral density), ஆண் வழுக்கை (male pattern baldness), உடல் நிறைச் சுட்டெண் (BMI), பெண்களின் முதல் மற்றும் கடைசி மாதவிடாய் ஏற்படும் வயது, மற்றும் முதல் குழந்தைப் பெற்றுக்கொள்ளும் வயது உள்ளிட்ட, மனிதர்களின் சுமார் 28 குணாதிசயங்கள் மிகவும் கவனமாக கண்காணிக்கப்பட்டு ஆய்வு செய்யப்பட்டன. மேலே குறிப்பிட்ட குணாதிசயங்களுக்குக் காரணமான மரபணுக்களின் செயல்பாடுகளை ஒவ்வொரு மனிதனின் வெவ்வேறு வயதுகளில் ஆய்வு செய்தால் வெவ்வேறு சந்ததிகளுக்கு இடையிலான வித்தியாசங்களைக் கண்டறிய முடியும் என்று கூறப்படுகிறது. முக்கியமாக, இயற்கைத் தேர்வு அல்லது தக்கது நிற்கும் (natural selection, or ‘survival of the fittest') எனும் பரிணாமக் கோட்பாட்டின்படி ஒரு உயிரினத்தின் நிலைப்புத்திறனை மேம்படுத்தும் குணாதிசயங்கள் அதன் அடுத்த சந்ததிக்கு கடத்தப்படும். அதுபோலவே, உயிரினங்களின் உடல் ஆரோக்கியத்தைக் குலைக்கும் மரபணு மாற்றங்கள் எதிர்மறைத் தேர்வு (negative selection) எனும் இயற்கை விதியின்படி அடுத்த சந்ததிக்கு கடத்தப்படாது என்பதும் குறிப்பிடத்தக்கது. மனிதர்களின் இருதய செயல்பாடு மற்றும் இனப்பெருக்கத் திறன் ஆகிய குணாதிசயங்கள் பரிணாமத்தின் எதிர்மறைத் தேர்வுக்கு உள்ளாகியிருப்பது இந்த ஆய்வில் தெரியவந்துள்ளது. உதாரணமாக, இடுப்பைச் சுற்றியுள்ள கொழுப்பின் அளவு மற்றும் ரத்த அழுத்தம் ஆகியவை எதிர்மறைத் தேர்வு பரிணாம மாற்றத்துக்கு உள்ளாகியிருப்பதைக் கூறலாம். அடுத்ததாக, இனப்பெருக்கத் திறனுடன் தொடர்புடைய பெண்களின் மாதவிடாய் முற்றிலுமாக நின்றுபோகும் வயதும் எதிர்மறைத் தேர்வுக்கு உள்ளாகியிருப்பது இந்த ஆய்வில் கண்டறியப்பட்டுள்ளது. ஆக மொத்தத்தில், சந்ததி விட்டு சந்ததி செல்லும் மரபணு மாற்றங்கள் மற்றும் சில சந்ததிகளில் நீக்கப்படும் மரபணு மாற்றங்கள் ஆகிய இருவகையான பரிணாம மாற்றங்கள் மனிதர்களின் உடலில் தொடர்ந்து நிகழ்ந்து வருகின்றன என்பதை இந்த ஆய்வு தகுந்த அறிவியல் ஆதாரங்களுடன் நிரூபித்துள்ளது.

புத்தகம் - கவிதை

புத்தகங்கள் அறிவுக்கே ஆசான்

புத்தகங்கள் வாழ்வுக்கே பாடம்

புத்தகங்கள் வளமைக்கே வளம்

புத்தகங்கள் நூலகத்தின் கருவறை

புத்தகங்கள் நூறாண்டு வளர்பிறை

புத்தகங்கள் பாதைக்கே வழிகாட்டி

புத்தகங்கள் பகுத்தறிவுக்கே பலம்

புத்தகங்கள் இளமைக்கே இயல்பு

புத்தகங்கள் மரத்திற்கே நிழல்

புத்தகங்கள் வடிவத்திற்கே விளக்கம்

புத்தகங்கள் வேற்றுமைக்கே ஒற்றுமை..

நா.தேன்நிலவன், பி.எஸ்சி.,

பச்சையப்பன் கல்லூரி,

சென்னை-30.

உலகை கண்களால் அளப்போம்!

உலகை கண்களால் அளப்போம்! முனைவர் கரு.செந்தில்குமார், கல்லூரி நூலகர் இன்று (ஏப்ரல் 23-ந்தேதி) உலக புத்தக மற்றும் பதிப்புரிமை தினம். யுனெஸ்கோ அறிவித்தபடி 1995-ம் ஆண்டு முதல் ஏப்ரல் 23-ந்தேதி உலக புத்தக தினமாக கொண்டாடப்பட்டு வருகிறது. “ஒரு புத்தகம் என்பது கடந்த காலத்திற்கும், எதிர்காலத்திற்குமான இணைப்பு, தலைமுறைகள் மற்றும் கலாசாரங்களுக்கு இடையிலான பாலம்” என்கிறது யுனெஸ்கோ அமைப்பின் உலக புத்தக தினம் தொடர்பான இணைய பக்கம். நாட்டில் மட்டுமல்ல ஒவ்வொரு வீட்டிலும் ஒரு புத்தகசாலை அமைப்பது அவசியம். தேடுதல் இன்றி வாழ்க்கையில் எந்த உச்சமும் கிடைத்துவிடுவதில்லை. அப்படிப்பட்ட தேடுதலின் ஆரம்பப்புள்ளியே புத்தகம்தான். புத்தக வாசிப்பு என்பது ஓடும் நதியைப்போன்றது. ஒரு புத்தகம் இன்னொரு புத்தகத்துக்கு நம்மை அழைத்துச் செல்லும். அப்படிப்பட்ட புத்தகங்கள்தான் சான்றோர்களையும் சாதனையாளர்களையும் உருவாக்கும் என்பதால், வாசிப்பை நாம் தவறாது சுவாசிக்க வேண்டும். அடிமைகளின் சூரியன் எனப் போற்றப்பட்ட ஆபிரகாம் லிங்கன், புத்தகங்கள் படித்தே உயர்ந்தவர். தனது தீவிரமான புத்தக படிப்பினால் தேசம் புகழத் திகழ்ந்தார். முன்னதாக, ‘ஜார்ஜ் வாஷிங்டன் வரலாறு’ என்னும் நூலை இரவல் வாங்கிப் படித்தார். அந்த நூல், அவர் மனதில், தான் எதிர்காலத்தில் அமெரிக்காவின் குடியரசுத் தலைவராக வர வேண்டும் என்ற உயர்ந்த சிந்தனையை உருவாக்கியது. அந்த சிந்தனை, அவரை அமெரிக்காவின் குடியரசுத் தலைவராகவும் உயர்த்தியது! இது வரலாறு நமக்கு கூறும் செய்தி. புத்தகம் என்பது ஓர் தாய், சமுதாயத்தின் வளர்ச்சி. எந்த நேரமும் மூளையை உற்சாகமாக வைக்கும் இந்த புத்தக வாசிப்பு முதுமையில் வரும் அல்சைமர், டிமென்ஷியா போன்ற மறதி நோய்க்கு முற்றுப்புள்ளி வைக்கும். குழப்பமான மனநிலையில் சரியான முடிவெடுக்கும் திறன் மற்றும் மன அழுத்தத்தை போக்கும் ஆழ்நிலை தியான பயிற்சிக்கு ஈடான பலனை கொடுக்கும். வாழ்க்கையில் எதிர்கொள்ளும் சவால்களை சமாளிக்க போதுமான அறிவை புத்தகம் நமக்கு கொடுக்கும். இன்றைய போட்டிகள் நிறைந்த உலகில், எந்தத் துறையைச் சேர்ந்தவர்களாக இருந்தாலும், நம் அனைவருக்குமே தகவல் பரிமாற்றம் மிக முக்கியம். புதுப்புது எண்ணங்களை வெளிப்படுத்த புதுப்புதுச் சொற்கள் அவசியம். அத்தகைய சொற்களை புத்தக வாசிப்பு நமக்கு கற்றுக் கொடுக்கும். இதன் மூலம் நம் சொற்கள் அகராதியில் புதுப்புது சொற்கள் சேரும். வாசிப்பின் வசம் நம்மை ஒப்படைத்துவிட்டால் நல்ல பெற்றோரைப் போல புத்தகங்கள் நம்மை வளர்த்தெடுக்கும். பல இடங்களில் புத்தகங்கள் தான் பரிசாக கொடுக்கப்படுகின்றன. இது ஒரு ஆரோக்கியமான பழக்கம் என்றே தோன்றுகிறது. அதே சமயம் பரிசாக கிடைக்கும் புத்தகங்களை நிச்சயம் வாசிக்க வேண்டும். அதுதான் அடுத்தடுத்த புத்தகங்களை நோக்கி நம்மை பயணிக்க வைக்கும். புத்தகம் வாசித்தல் என்பது ஒரு பொழுதுபோக்கு மட்டுமன்று. அது அதையும் தாண்டிய ஒரு அறிவார்ந்த செயல். நம்மை செதுக்க, உணர, தற்காத்துக்கொள்ள நமக்கு உதவும் ஒரு கருவி. நவீன காலத்திற்கேற்ப நம் இளைய தலைமுறைக்கு நமக்கு கிடைத்ததை விட அதிகமான மின் புத்தகங்கள் சமூகவலைத்தளங்களில் கிடைக்கின்றன. நூலகங்கள் அனைத்தும் விரல் நுனியில் வலம் வருகின்றன. வாட்ஸ்அப் செயலிகள் மூலம் ஏராளமான நூல்கள் பகிரப்படுகின்றன. ஆனால் இதை இளைஞர்கள் முழுமையாக பயன்படுத்துகிறார்களா என்பதுதான் கேள்விக்குறி. புத்தகங்களுக்குச் செய்யும் செலவு நம் அறிவின் மூலதனம் என நாம் முழுமையாக நம்புவதில்லை. இன்றும் யாவரும் கைவிட்டுவிடும் நிலையிலும் புத்தகங்கள் தரும் ஆறுதலையும் நம்பிக்கையையும் வேறெதுவும் தந்துவிட முடிவதில்லை. குழந்தைகளை நூலகத்திற்கு அழைத்துச் செல்வோம். காட்சிகள் தரும் கற்பனையை விட கதைகளும் புத்தகங்களும் தூண்டி விடும் கற்பனைகள் குழந்தைகளின் வளர்ச்சியில் பெரும் பங்கு வகிக்கின்றன. நம் குறிக்கோளை நெருங்க சுற்ற வேண்டியது நம்மை சுற்றியுள்ள புத்தகங்களையே. வாசிப்போம், வாசிப்பு தரும் அழகிய உணர்வை, அது தரும் ஒரு துளி மகிழ்ச்சியை நேசிப்போம். இந்த உலகை கண்களால் அளப்போம்.

சிறுமிகளை பாலியல் பலாத்காரம் செய்தால் தூக்கு தண்டனை அவசர சட்டத்துக்கு ஜனாதிபதி ஒப்புதல் உடனடியாக அமலுக்கு வந்தது

நாட்டில் சிறுமிகளுக்கு எதிரான பாலியல் குற்றங்கள் சமீப காலமாக அதிகரித்து இருப்பது பல்வேறு தரப்பினரிடமும் கவலையை ஏற்படுத்தி உள்ளது. தொடர் கற்பழிப்புகள் காஷ்மீர் மற்றும் குஜராத்தில் முறையே 8 மற்றும் 9 வயது சிறுமிகள் கூட்டு பலாத்காரம் செய்து கொடூரமாக கொல்லப்பட்டதும், உத்தரபிரதேசத்தின் உன்னாவில் 17 வயது சிறுமி ஒருவர் பா.ஜனதா எம்.எல்.ஏ. உள்ளிட்டோரால் கற்பழிக்கப்பட்டதும் சமீபத்தில் நாட்டை உலுக்கியது. டெல்லி நிர்பயா கற்பழிப்பு சம்பவத்தை போல நாடு முழுவதும் கொந்தளிப்பை ஏற்படுத்திய இந்த சம்பவங்களால் அதிர்ச்சியடைந்த மகளிர் அமைப்பினரும், அரசியல் கட்சியினரும், சிறுமிகளை கற்பழிப்போருக்கு மரண தண்டனை விதிக்கும் வகையில் சட்ட திருத்தம் கொண்டு வர வேண்டும் என அரசை வலியுறுத்தினர். அவசர சட்டம் இதைப்போல பாலியல் குற்றங்களில் இருந்து குழந்தைகளை பாதுகாக்கும் ‘போக்சோ’ சட்டத்தில் திருத்தங்கள் மேற்கொள்ளுமாறு மத்திய மந்திரி மேனகா காந்தி உள்பட பல்வேறு தரப்பினரும் கோரிக்கை விடுத்தனர். இதைத்தொடர்ந்து மத்திய மந்திரிசபை நேற்று முன்தினம் பிரதமர் நரேந்திர மோடி தலைமையில் கூடியது. இந்த கூட்டத்தில், சிறுமிகளை பாலியல் பலாத்காரம் செய்வோருக்கு கடும் தண்டனை விதிக்கும் வகையில் அவசர சட்டம் கொண்டுவர முடிவு செய்யப்பட்டது. அதன்படி இந்திய குற்றப் பிரிவு சட்டம், சாட்சிய சட்டம், குற்றவியல் நடைமுறை சட்டம் மற்றும் ‘போக்சோ’ சட்டம் ஆகியவற்றில் திருத்தம் மேற்கொண்டு அவசர சட்டமாக ஜனாதிபதிக்கு அனுப்பி வைக்கப்பட்டது. ஜனாதிபதி ஒப்புதல் இந்த அவசர சட்டத்துக்கு நேற்று ஜனாதிபதி ராம்நாத் கோவிந்த் ஒப்புதல் அளித்தார். இது தொடர்பாக அரசாணை வெளியிடப்பட்டது. இந்த அவசர சட்டத்தின்படி 12 வயதுக்கு உட்பட்ட சிறுமிகளை கற்பழிப்போருக்கு அதிகபட்சமாக மரண தண்டனை வழங்கப்படும். இதில் குறைந்தபட்ச தண்டனையாக இருந்த 7 ஆண்டு கடுங்காவல், 10 ஆண்டுகளாக அதிகரிக்கப்படுகிறது. மேலும் குற்றத்தின் தன்மைக்கு ஏற்ப இதை வாழ்நாள் சிறையாகவும் விரிவுபடுத்த இந்த அவசர சட்டம் வகை செய்கிறது. அமலுக்கு வந்தது 16 வயதுக்கு உட்பட்ட சிறுமிகளை பாலியல் பலாத்காரம் செய்வோருக்கு வாழ்நாள் சிறை விதிக்கப்படும். இதில் குறைந்தபட்ச தண்டனையான 10 ஆண்டு சிறை, 20 ஆண்டுகளாக உயர்த்தப்படுகிறது. இதிலும் வாழ்நாள் சிறை தண்டனையாக விரிவுபடுத்த வகை செய்யப்பட்டு உள்ளது. மேலும் இந்த கற்பழிப்பு வழக்குகளின் விசாரணை 2 மாதங்களில் முடித்து, மேல்முறையீடு மனுக்கள் 6 மாதங்களுக்குள் முடித்து வைக்க வேண்டும். அத்துடன் 16 வயதுக்கு உட்பட்ட சிறுமிகளை கற்பழிப்பு அல்லது கூட்டு பலாத்காரம் செய்வோருக்கு முன்ஜாமீனும் கிடையாது என்பது குறிப்பிடத்தக்கது. இந்த அவசர சட்டம் உடனடியாக அமலுக்கு வந்ததாக அறிவிக்கப்பட்டு உள்ளது. இது மகளிர் அமைப்புகள் மற்றும் சமூக ஆர்வலர்களிடையே வரவேற்பை பெற்றுள்ளது. பொருளாதார குற்றவாளிகள் இதைப்போல பொருளாதார குற்றங்களில் ஈடுபட்டு விட்டு வெளிநாடுகளுக்கு தப்பி செல்வோரின் சொத்துகளை பறிமுதல் செய்ய அதிகாரம் அளிக்கும் வகையில் கொண்டு வரப்பட்ட ‘பொருளாதார குற்றவாளிகள் அவசர சட்டம் 2018’-க்கும் ஜனாதிபதி ஒப்புதல் அளித்தார். இந்தியாவின் பல்வேறு வங்கிகளில் இருந்து ரூ.9 ஆயிரம் கோடி அளவுக்கு கடன் வாங்கி மோசடியில் ஈடுபட்ட விஜய் மல்லையா, பஞ்சாப் நேஷனல் வங்கி மூலம் ரூ.13 ஆயிரம் கோடி அளவுக்கு மோசடியில் ஈடுபட்ட நிரவ் மோடி உள்ளிட்டோர் வெளிநாடு தப்பிச் சென்றிருக்கும் நிலையில், மேற்படி அவசர சட்டம் கொண்டு வந்திருப்பது கவனிக்கத்தக்கது. தீர்வாக அமையாது இதற்கிடையே, சிறுமிகளுக்கு எதிரான பாலியல் பலாத்கார குற்றங்களை தடுத்து நிறுத்த, குற்றவாளிகளுக்கு தூக்கு தண்டனை விதிப்பது மட்டுமே தீர்வாக அமையாது என்றும், இத்தகைய குற்றங்கள் குறித்து அதிகாரிகளிடம் புகார் செய்யப்பட்டால், சம்பந்தப்பட்ட குற்றவாளிகள் மீது நடவடிக்கை எடுப்பது உறுதி செய்யப்படவேண்டும் என்றும் ‘குழந்தைகளை பாதுகாப்போம்’ என்ற அமைப்பின் தலைவர் பிதிஷா பிள்ளை கூறி உள்ளார். இதுதொடர்பாக அவர் வெளியிட்டுள்ள அறிக்கையில், நாட்டில் ‘போக்சோ’ சட்டம் அமலுக்கு வந்த பின்னரும் கூட சிறுமிகளுக்கு எதிரான பாலியல் குற்றங்கள் குறையவில்லை என்றும், பாதிக்கப்பட்ட சிறுமிகளுக்கு மறுவாழ்வு அளிப்பது மற்றும் அவர்களுடைய மனநலனை மேம்படுத்துவது தொடர்பாக போதிய ஆலோசனைகள் வழங்கப்படுவது இல்லை என்றும் அவர் கூறி இருக்கிறார்.