-->

Wednesday, September 14, 2016

ரோவல்ட் தால் ஆங்கில எழுத்தாளர்

ரோவல்ட் தால் ஆங்கில எழுத்தாளர்
வேல்ஸ் நாட்டைச் சேர்ந்த உலகப் புகழ்பெற்ற எழுத்தாளர் ரோவல்ட் தால் (Roald Dahl) பிறந்த தினம் இன்று (செப்டம்பர் 13). அவரைப் பற்றிய அரிய முத்துக்கள் பத்து:
l
வேல்ஸ் நாட்டின் லேண்டாஃப் நகரில் (1916) பிறந்தார். தந்தை நார்வே நாட்டைச் சேர்ந்தவர் என்பதால், வீட்டில் நார்வேனிய மொழி பேசினர். இவருக்கு 3 வயது இருக்கும்போது தந்தை இறந்தார். அவரது விருப்பப்படி, குழந்தைகளின் கல்விக்காக வேல்ஸிலேயே தங்கிவிட்டார் தாய்.
l
பள்ளிப் பருவத்தில், தால் மிகவும் குறும்புக்காரச் சிறுவனாக இருந்தார். அதனால் இங்கிலாந்தில் உள்ள செயின்ட் பீட்டர்ஸ் பள்ளியில் சேர்க்கப்பட்டார். வாரம் தவறாமல் தாய்க்கு கடிதம் எழுதுவார். விடுதியில் தங்கிப் படிப்பது அவருக்குப் பிடிக்கவில்லை. ஆனாலும், இதுபற்றி தாயிடம் அவர் கூறியதே இல்லை.
l
பின்னர் தனியார் பள்ளியில் பயின்றார். அப்போதே, எழுத ஆரம்பித்தார். கால்பந்து, ஸ்குவாஷ் விளையாட்டுகளில் மிகுந்த ஆர்வம் கொண்டிருந்தார். அந்த அணிகளின் கேப்டனாக இருந்தார். புகைப்படக் கலையிலும் அதிக திறன் பெற்றிருந்தார்.
l
படிப்பை முடித்ததும், பல இடங்களுக்குச் சுற்றுப்பயணம் மேற்கொண்டார். ஆப்பிரிக்காவில் உள்ள ஷெல் பெட்ரோலியம் நிறுவனத்தில் சேர்ந்தார். 1939-ல் இரண்டாம் உலகப் போரில் ராயல் விமானப் படையில் பணியாற்றினார். விங் கமாண்டர் நிலைக்கு உயர்ந்தார்.
l
அப்போது ஒரு விபத்தில் படுகாயம் அடைந்தார். உடல்நிலை தேறியதும் வாஷிங்டனில் உள்ள பிரிட்டிஷ் தூதரகத்தில் துணை விமான அதிகாரியாக நியமிக்கப்பட்டார். அங்கு பணியாற்றியபோது, அமெரிக்காவின் பிரபல நாவலாசிரியர் சி.எஸ்.ஃபோரஸ்டர், போர் அனுபவங்களை எழுதுமாறு இவரை ஊக்கப்படுத்தினார்.
l
முதன்முதலாக 'சாட்டர்டே ஈவ்னிங் போஸ்ட்' என்ற பத்திரிகையில் இவரது சிறுகதை வெளியானது. பின்னர் முழுநேர எழுத்தாளரானார். ஏராளமான நூல்களை எழுதினார். இவரது கதைகள் தொலைக்காட்சிகளில் தொடர்நாடகங்களாக வந்தன.
l
குழந்தைகளுக்காக 19 நூல்களை எழுதினார். பெரியவர்களுக்கான நூல்களையும் எழுதினார். சிறுவயது அனுபவங்களே இவரது கதைகளின் கருவாக அமைந்தன. இவரது நூல்கள் விற்பனையில் சாதனைப் படைத்து, உலகம் முழுவதும் கோடிக்கணக்கில் விற்பனையாகின. 'சார்லி அண்ட் தி சாக்லேட் ஃபேக்டரி' கதை திரைப்படமாகவும் தயாரிக்கப்பட்டது.
l
சிறுவயதில் தான் எழுதிய கடிதங்கள் அனைத்தையும் தாய் பத்திரமாக சேர்த்து வைத்திருந்தார் என்பது 1967-ல் தாய் இறந்த பிறகுதான் தெரிந்துகொண்டார். சமீபத்தில் இவரது நூற்றாண்டு பிறந்தநாள் கொண்டாட்டத்தை முன்னிட்டு, இந்தக் கடிதங்கள் 'புக் ஆஃப் தி வீக்' என்ற தலைப்பில் பிபிசி ரேடியோவில் ஒலிபரப்பப்பட்டன.
l
தனது பள்ளி அனுபவங்கள் மற்றும் வாழ்வின் முக்கிய நிகழ்வுகளை 'பாய்: டேல்ஸ் ஆஃப் சைல்ட்ஹுட்' என்ற சுயசரிதை நூலில் சுவாரஸ்யமாக பதிவு செய்துள்ளார். தன் பெயரில் அறக்கட்டளை தொடங்கி, மருத்துவம், ஏழைகள் கல்வி ஆகியவற்றுக்குத் தாராளமாக நிதி வழங்கினார்.
l
'வேர்ல்டு ஃபேன்டசி' வாழ்நாள் சாதனையாளர் விருது, பிரிட்டிஷ் புத்தக விருதுகள் உட்பட ஏராளமான விருதுகள் பெற்றார். உலகப் புகழ்பெற்ற எழுத்தாளரும் குழந்தைகளுக்கான இலக்கியத்தில் சாதனை படைத்தவருமான ரோவல்ட் தால் 74-வது வயதில் (1990) மறைந்தார். 


No comments:

Guestbook

Enter your email address:முதலில் உங்கள் இ.மெயில் முகவரியை இங்கே பதிவு செய்து தினம் ஒரு புதிய செய்தி இ.மெயிலை இலவசமாக பெறுங்கள்.

இங்கே பதிவு செய்தப்பின், உங்கள் INBOX க்கு வரும் லிங்க்கை கிளிக் செய்தால் தான் புதிய செய்தி இமெயில்களை பெற முடியும்.