உலகப்புகழ் சௌதாம்ப்டன் பல்கலை.யில் எம்.எஸ்சி படிக்க ஆசையா...!!

உலகப்புகழ் சௌதாம்ப்டன் பல்கலை.யில் எம்.எஸ்சி படிக்க ஆசையா...!!

பிரிட்டனில் புகழ்பெற்ற சௌதாம்ப்டன் பல்கலைக்கழகத்தில் எம்.எஸ்சி (ஆடியோலஜி) படிப்பதற்கு விண்ணப்பங்கள் வரவேற்கப்படுகின்றன.1972-ல் இந்தப் படிப்பு சௌதாம்ப்டன் பல்கலைக்கழகத்தில் தொடங்கப்பட்டது. ஆடியோலஜிக்குப் புதியவர்கள், பேச்சு தெரப்பி நிபுணர்கள், டாக்டர்கள் உள்ளிட்டோருக்கு இந்தப் படிப்பு மிகவும் உதவிகரமாக இருக்கும். இந்தப் படிப்பில் சேர ஹானர்ஸ் படித்திருக்கவேண்டும். மேலும் ஐஇஎல்டி தேர்வில் நல்ல மதிப்பெண் பெற்றிருக்கவேண்டும். கல்வி உதவித்தொகையும் மாணவர்கள்பெற முடியும்.2016 செப்டம்பரில் இந்த படிப்பு தொடங்கும்.ஜூன் 30-க்குள் விண்ணப்பங்களை ஆன்-லைனில் அனுப்பவேண்டும். விண்ணப்பங்களைப் பெற http://www.southampton.ac.uk/engineering/postgraduate/taught_courses/audiology/msc_audiology.page என்ற லிங்க்கைக் கிளிக் செய்யும்

விரிவாக படிக்க இங்கே கிளிக் செய்யுங்கள் | READ MORE | CLICK HERE

தோட்டத் தொழிலாளர்களின் தந்தை

தோட்டத் தொழிலாளர்களின் தந்தை

கன்னியாகுமரி மாவட்டத்திலுள்ள நெய்யாற்றில் 22.5.1910 அன்று பிறந்தார் பி.எச். டேனியல். 1940-இல் கோவைக்கு அருகிலுள்ள கருமலைப் பகுதியிலிருந்த தோட்டத் தொழிலாளர்களுக்கு மருத்துவராக நியமிக்கப்பட்டார்.அழைத்தால் வேலை, உழைத்தால் கூலி என்று அங்கு தொழிலாளர்கள் எந்நாளும் துயரத்தோடே வாழ்ந்து வந்தனர். குத்தகைதாரர்கள், தொழிலாளர்களை கொத்தடிமை போல் கடுமையாக நடத்தினர்.சுகாதாரமற்ற சுற்றுப்புறச் சூழலால் ஓலை குடிசைகளில், நுண்ணிய விஷக் கிருமிகளால் தொழிலாளர்கள் பெரிதும் பாதிக்கப்பட்டனர்.இதனை அறிந்த டேனியல், "அருகிலுள்ளவர்களை நேசி', "அன்பு செலுத்து', "துன்ப துயரங்களை துடை' போன்ற ஏசுபிரானின் போதனைகளை சுட்டிக்காட்டி, அரக்க குணமுடைய தோட்ட உரிமையாளர்களை இரக்க மனதுடையவராக மாற்றினார். இதனால், நோயுற்ற தொழிலாளர்கள் மருத்துவமனையில் சேர்க்கப்பட்டு, அவர்களுக்கு இலவச சிகிச்சையளிக்கப்பட்டது. இது டேனியலின் வாழ்நாள் சாதனையாகும். தொழிலாளர்களின் பாதுகாப்புக்கென சட்டபூர்வமாக சங்கம் அமைத்திட முயன்றார். ஆனால், "தொழிற்சங்கச் சட்டம், 1926'- இன்படி, தோட்டத்தில் உழைப்பவர்களைத் தொழிலாளர்களாகக் கருத முடியாது என்று கூறி, அரசுப் பதிவாளர் நிராகரித்தார். இதனால், அதிர்ந்து போன டேனியல், அன்றைய தொழிலாளர் நலத் துறை அமைச்சர் வி.வி. கிரியை சந்தித்தார். அவரது ஆலோசனையை ஏற்று, ஜெனிவா நகரை தலைமையிடமாகக் கொண்டு இயங்கும் அகில உலக தொழிலாளர் அமைப்பின் (ஐ.எல்.ஓ.) சட்ட ஆலோசகருக்கு விரிவன மனு ஒன்றை அனுப்பினார்.பல மாதங்கள் காத்திருந்த பின், அகில உலக தொழிலாளர் அமைப்பு, தோட்டங்களில் உழைக்கும் தொழிலாளர்களும் தங்களுக்கென்று சங்கம் அமைத்துக் கொள்ளலாம் என்று அனுமதி அளித்தது. தொழிலாளர்களின் அச்சம் அகன்று, சங்கம் பதிவு செய்யப்பட்டது.அரசின் அதிகாரபூர்வ ஆணையை, உயர் அதிகாரி ஏ. அந்தோனியிடம் அளித்து, சங்கத்திற்கு டேனியல் அங்கீகாரம் கோரினார். ஆனால் அவர் அதனை நிராகரித்ததுடன், டேனியலுக்கு உதவியாக இருந்ததால், ஏற்கெனவே பணி நீக்கம் செய்யப்பட்டவர்களை மீண்டும் வேலைக்கு எடுத்துக் கொள்ள முடியாது என்றும் கூறினார்.டேனியல் மனம் தளரவில்லை. அப்போது நடபெற இருந்த தொழிலாளர் மாநாட்டிற்கு அமைச்சர்கள் ஆர். வேங்கடராமன், மாதவ மேனன் ஆகியோரை அழைக்க அவர்களும் அந்த அழைப்பை ஏற்றனர்.அந்த மாநாட்டில் அந்தோனி எதிர்பாராமல் கலந்துகொள்ள, அவரை அன்போடு அழைத்து மேடையில் அமர்த்தினர். வரவேற்புரைக்குப் பின், டேனியலின் அனுமதியுடன் அந்தோனி பேசும்போது, தோட்டத் தொழிலாளர்களின் சங்கத்தை, தான் அங்கீகரிப்பதாகவும், பணி நீக்கம் செய்யப்பட்டவர்களை மீண்டும் பணியில் அமர்த்த முழுமனதுடன் சம்மதிப்பதாகவும் அறிவித்ததும், அரங்கமே பலத்த கரவொலி எழுப்பி நன்றியை தெரிவித்தது.டேனியலின் தன்னம்பிக்கை இந்தியாவிலுள்ள தோட்டத் தொழிலாளர்களுக்கு ஆதர்சமாக அமைந்து, ஆங்காங்கே தொழிலாளர் சங்கங்கள் உருவாயின. தேயிலை, காபி, ரப்பர் தோட்டங்களின் உழைப்போருக்கு சங்கங்கள் அமைக்கப்பட்டன. அவற்றைப் பதிவு செய்து, நிர்வாகிகளை தேர்வு செய்து, விதிகளை வகுத்து, அனைத்து சங்கங்களையும் இணைத்து இந்தியாவிலேயே முதன்முதலில், 24.3.1947இல் "தி எஸ்டேட் ஸ்டாப் யூனியன் ஆப் சவுத் இந்தியா'வை டேனியல் உருவாக்கினார். இதனால் இவர் "தோட்டத் தொழிலாளர்களின் தந்தை' என வரலாற்றில் இடம் பெற்றார். தோட்டத் தொழிலாளர்களின் வரலாற்றை உலகுக்கு உணர்த்திட "தி பிளேன்டேஷன் வொர்க்கர்' என்ற இதழை நடத்தியதோடு, "பிளான்டேஷன் பனோரமா' என்ற நூலையும், "ரெட் டீ' என்ற நாவலையும் எழுதி வெளியிட்டார்.கிராமப்புற மக்களுக்காக, கோவைக்கு அருகிலுள்ள குப்பனூரில் எல்லா வசதிகளுடன் கூடிய மருத்துவமனையை÷தனது வருமானத்தின் பெரும் பகுதியை செலவிட்டு அமைத்தார்.தோட்டத் தொழிலாளர் சங்கங்களுக்கு முதுகெலும்பாகவும் முன்னோடியாகவும் திகழ்ந்தாலும், தன்னை ஒரு "சமூக சேவகன்' என்றே அடக்கமாக கூறிக்கொள்வார்.இன்றும், தோட்டத் தொழிலாளர்கள், தங்களுக்கு சமூக அந்தஸ்தை பெற்றுத் தந்த டேனியலுக்கு நன்றி தெரிவிக்கும் விதமாக, தாங்கள் வாழும் பகுதிகளுக்கு "டாக்டர் பி.எச். டேனியல் நகர்' என பெயரிடுவதோடு, அவரது உருவப்படத்தை தங்களின் வீடுகளில் வைத்திருக்கின்றனர். பி.எச். டேனியலை இறையருள் பெற்ற ரட்சகர் என்று வழிபடுகின்றனர்.

விரிவாக படிக்க இங்கே கிளிக் செய்யுங்கள் | READ MORE | CLICK HERE

நடப்பதென்பது நடக்குமா?

நடப்பதென்பது நடக்குமா?

பிளாட்பாரங்கள் என்று குறிப்பிடப்படுகின்ற நகரங்களின் நடைபாதைகள் பற்றிய பார்வையிலும், அவற்றைப் பயன்படுத்துவதிலும் அனைத்துத் தரப்பினருமே தெளிவற்று இருக்கிறார்கள். நடைபாதைகள் என்பவை, நகரங்களின் ரத்த ஓட்டப் பாதைகளைப் போன்றவை, வாகனப் போக்குவரத்து சீராகவும் முறையாகவும் நிகழ வேண்டும் என்றால், நடைபாதைகள் மிகச் சரியாக இருக்கவேண்டும்.எல்லாருமே கார்களில் பயணிக்கிற மேலைநாடுகளில் நடைபாதைகள் அனைத்தும் அகலமாகவும், அழகாகவும், தூய்மையாகவும் இருக்கின்றன. பெரும்பான்மை மக்கள் நடந்தாக வேண்டியிருக்கின்ற நமது நாட்டின் நடைபாதைகளோ நெடுக ஆக்கிரமிக்கப்பட்டும், அசிங்கப்படுத்தப்பட்டும், அலங்கோலப்படுத்தப்பட்டும், மறிக்கப்பட்டும், மறைக்கப்பட்டும் காணப்படுகின்றன.நடைபாதைகளை யார் வேண்டுமானாலும், எதற்கு வேண்டுமானாலும் பயன்படுத்திக் கொள்ளலாம் எனும் கருத்து நமது மக்களின் பொதுப்புத்தியில் நெடுங்காலமாக அழுந்தப் பதிந்திருக்கிறது.தங்களது வீட்டு மனைகளின் கடைசி அங்குலம் வரை அளந்து சுவர் எழுப்பிக் கொள்கிற வீட்டு உரிமையாளர்கள், வீடுகளுக்குள் தங்களது வாகனங்களை ஏற்றவும் இறக்கவும் வசதியாக உறுதியான சிமெண்ட் சாய்வுப் பாதைகளை நடைபாதைகளின் குறுக்கே கொஞ்சமும் அச்சமோ கூச்சமோ இன்றி அமைத்து அவற்றை நிரந்தரமாக மறிக்கிறார்கள்.இப்படியான நடைபாதை இடைமறிப்புகள் நமது நகரங்களில் பல லட்சக்கணக்கில் இப்போதும் உள்ளன. கடைவீதிகள் நெடுகிலும், இருபுறங்களிலும் அமைந்துள்ள கடைகளுக்கு முன்பாக நிற்க வைக்கப்பட்டிருக்கும் விளம்பரங்கள் நடைபாதைகளைத்தான் மறித்துக் கொண்டு கம்பீரமாக நிற்கின்றன. மக்கள் ஒதுங்கி ஒதுங்கிப் போய்க்கொண்டிருக்கிறார்கள்.தங்களது வீடுகள், கடைகளுக்கு முன் அமைந்திருக்கும் நடைபாதைகளை ஆக்கிரமித்து அழகழகாகப் பூச்செடிகளை வளர்ப்போரும் நம்மிடையே உண்டு. இதுவும் நுட்பமான ஓர் ஆக்கிரமிப்புதான். அப்படியானவர்களின் நோக்கம் பூக்கள் அல்ல, தங்களது வீடுகள் மற்றும் கடைகளுக்கு முன்பாக இருக்கும் அரசு நிலத்தை நடப்போரும் மற்றவர்களும் பயன்படுத்திவிடக்கூடாது என்பதுதான்.தங்களுக்கெனச் சொந்தமாகக் கடைகள் இல்லாதவர்கள், தங்களது கடைகளை நடைபாதைகளில்தான் விரிக்கிறார்கள். தங்களுக்கென சொந்தமாக வீடுகள் இல்லாதவர்கள், தங்களுடைய வாழ்க்கையை நடைபாதைகளில் கழிக்கிறார்கள். தங்களுக்கான உணவை நடைபாதைகளில்தான் சமைக்கிறார்கள். பல இடங்களில் குளிப்பதும், துவைப்பதும் கூட நடைபாதைகளில்தான் நடக்கின்றன.நடைபாதைகளில் வாழ்ந்து, இரவில் அங்கேயே உறங்குவோரின் உயிர்களுக்கு உத்தரவாதம் இல்லை. கடந்த 2007-ஆம் ஆண்டு சென்னை கீழ்பாக்கத்தில் பணக்காரச் சிறுவன் ஓட்டி வந்த கார் நடைபாதையில் படுத்திருந்த 11 பேர் மீது ஏறிக் காயப்படுத்தி அவர்களில் இருவரைக் கொன்றது.கடந்த ஆண்டு எழும்பூரில் இன்னொரு பணக்கார இளைஞன் மதுபோதையில் ஓட்டி வந்த கார் நடைபாதையில் படுத்திருந்த ஐந்து பேர்களைக் காயப்படுத்தி ஒரு சிறுவனை படுகாயப்படுத்தியது.கடந்த ஜூன் மாதம் 2014-ஆம் ஆண்டு சென்னை சூளை பகுதியில் வேகமாகச் சீறிவந்த ஒரு கார் நடைபாதையில் தன் தாயிடம் சோறு சாப்பிட்டுக்கொண்டிருந்த குழந்தைமீது ஏற, அக்குழந்தையின் இரண்டு கால்களும் துண்டாகி அவன் நிரந்தர மாற்றுத்திறனாளியானான். அவனது தாயும் படுகாயமடைந்தார்.2002-ஆம் ஆண்டு மும்பையில் நடிகர் ஒருவர் மதுபோதையில் ஓட்டிச்சென்ற கார் நடைபாதையில் தூங்கிக் கொண்டிருந்த ஐந்து பேர் மீது ஏறியதில் ஒருவர் இறந்து போனார்.இவைபோன்ற சான்றுகள் நகரங்களின் அனைத்து நடைபாதைகளிலும் நீக்கமற நிறைந்திருக்கின்றன. இத்தகைய விபத்துகள் பெரும்பாலும் வழக்குகளாக மாறி நீதிமன்றங்களின் தீர்ப்பைப் பெறாமல் பணக்கட்டுப் பரிவர்த்தனைகள் வாயிலாகவே சரி செய்யப்படுகின்றன.நமது நாட்டில் மது வெள்ளம் மட்டுமீறிய பிறகு பல வாகனங்கள் நடைபாதைகளின் மீதேறி, யாரையேனும் காயப்படுத்தி, யாரையேனும் கொன்று அல்லது எதையேனும் சிதைத்து அதன்பிறகே நிற்கின்றன.தனியார் மட்டுமல்ல, அரசுகளும் தங்களது பங்கிற்கு நடைபாதைகளை நிறையவே ஆக்கிரமிப்பு செய்கின்றன. மின் விநியோகப் பெட்டிகள், தொலைபேசி இணைப்புப் பெட்டிகள், மின் விளக்குக் கம்பங்கள், பேருந்து நிழற்குடைகள் போன்றவை நடைபாதைகளில் நின்றுதான் தங்களது சேவைகளை மக்களுக்கு வழங்குகின்றன. மேலும் மின் கம்பி, தொலைபேசி, இணையம் போன்றவற்றின் மிகச்சிக்கலான, நீண்ட வடங்கள் அனைத்துப் பகுதிகளிலும் நடைபாதைகளுக்குக் கீழே புதைக்கப்பட்டுள்ளன. அவற்றின் செயல்பாடுகளில் தடங்கல் ஏற்படும்போது குதறிப்போடப்படுவது நடைபாதைகள்தான்.பல இடங்களில், பல காரணங்களால், குதறியது குதறியபடியே மாதக்கணக்கில் கிடப்பதுண்டு. அவ்வாறான பள்ளங்களில் தேங்கும் மழைநீரில் விழுந்தும், அந்த நீரில் பாய்ந்திருக்கும் மின்சாரம் தாக்கியும் பலர் இறந்துள்ளனர்.அரசியல் கட்சிகள் மற்றும் அனைத்து வகையான அமைப்புகளின் விளம்பரங்களும் நடைபாதைகளை நம்பியே தயாரிக்கப்படுகின்றன. நடைபாதைகளில் வைத்துதான் அவை மக்களின் பார்வைக்குப் பரிமாறப்படுகின்றன. அதிலும், "பிளக்ஸ் பேனர்' எனப்படும் விளம்பரத் தொழில்நுட்பம் நடைமுறைக்கு வந்தபிறகு நடைபாதைகளை உரிமையோடு மறிக்கலாம் என்ற நிலை வந்துவிட்டது.சாலைகளை விரிவுபடுத்தி வாகனப் போக்குவரத்து இயக்கத்தைச் சீராக்கும் பணிகளின் விளைவாக, நமது நகரங்களில் இப்போது பெரும்பாலும் நடைபாதைகளே இல்லை. புகழ்பெற்ற தலைவர்களின் சிலைகளும், பல்வேறு வகையான மதங்கள் சார்ந்த கடவுள்களும் நடைபாதைகளில் நிறுவப்படுவது இன்றளவும் தொடர்கிறது. இவ்வகையான ஆக்கிரமிப்புகளை அகற்ற முற்படும்போது, அது மக்களின் உணர்வு சார்ந்த பிரச்னையாகத் திரிக்கப்பட்டு அடிதடிக் கலவரமாக மாறுகிறது.கிட்டத்தட்ட 27 ஆண்டுகளுக்கு முன்பாக தமிழக முன்னாள் முதல்வர் எம்.ஜி.ஆர். உடல் நலம் பாதிக்கப்பட்டிருந்தபோது, அவர் நலம்பெற வேண்டும் என்பதற்காக, சென்னை உயர்நீதிமன்ற வாயிலின் நடைபாதையில் கட்டப்பட்டு "நீதி கருமாரி அம்மன் கோயில்' என்று பெயர் சூட்டப்பட்ட ஒரு கோயில், பெரும் சிரமங்களுக்கும், போராட்டங்களுக்கும், நீதிமன்ற உத்தரவுகளுக்கும் பிறகு அண்மையில் 6-12-2014-ஆம் நாள் அப்புறப்படுத்தப்பட்டது.இந்தக் கோயிலை அப்புறப்படுத்த வேண்டும் எனும் நீதிமன்ற உத்தரவை மறு ஆய்வு செய்யவேண்டும் என்று மாநகராட்சியின் சார்பிலேயே நீதிமன்றத்தில் முறையிடப்பட்ட நகைச்சுவையும் நடந்தது.ஓர் ஆண்டுக்கு 16 லட்சம் புதிய வாகனங்கள் தமிழகத்தின் சாலைகளில் இறங்குகின்றன. இவற்றில் எத்தனை விழுக்காடு வாகனங்களுக்குச் சொந்தமாக நிறுத்துமிடங்கள் உள்ளன? சொந்தமாக நிறுத்துமிடங்கள் உள்ளவர்களுக்கு மட்டுமே வாகனங்கள் விற்கப்படும் எனும் நிலை ஏற்படுத்தப்பட்டால், விளைவுகள் எப்படியிருக்கும்?பொதுமக்கள் நெருக்கடியில்லாமல் நடந்து செல்ல தரமான நடைபாதைகள் அமைக்கப்பட்டால், வாகனப் போக்குவரத்து நெரிசல் குறையும். அலுவலகப் பணி முடிந்து காலார கொஞ்ச தூரம் நடந்து செல்லவே பலர் விரும்புகின்றனர்.ஆனால், அத்தகையோருக்கான வசதியான நடைபாதைகள் இன்று நமது நகரங்களில் இல்லை. சென்னையில் நாம் காலார நடக்கவேண்டுமெனில், கடற்கரைச் சாலையின் நடைபாதைகள் மட்டுமே அதற்கு உகந்தவையாக உள்ளன.பெருநகரங்களில் பங்களாக்கள் மிகுந்திருக்கும் சில பகுதிகளில் நடைபாதைகள் தரமாக அமைக்கப்பட்டிருக்கின்றன. ஆனால், அங்கெல்லாம் பொதுமக்கள் நடப்பதற்கான வாய்ப்புகள் இல்லை.பெருநகரங்களின் மிக முக்கியமான வாகனப் போக்குவரத்து சாலைகளின் இருபுறங்களிலும் நடைபாதைகள் அகலமாகவும், தரமாகவும், சமமாகவும், மக்கள் நடப்பதைத் தவிர வேறு எதற்கும் பயன்படுத்தப்படாத, பயன்படுத்தவும் கூடாத, தீவிரமான கண்காணிப்பில் இருக்கும் பட்சத்தில், தாங்கள் போக வேண்டிய இடங்களுக்கு நடைபாதையைத் தேர்ந்தெடுப்போரின் எண்ணிக்கை லட்சக்கணக்கில் பெருகும்.நகரவாசிகளின் உடல் நலம் பெறுவதற்கும், வாகனங்களின் ஒலி, புகை, நெரிசல், விபத்து போன்ற நலக் கேடுகள் குறைவதற்கும் தரமான நடைபாதைகளே காரணமாக அமையும். பெருநகரங்களில் அனைத்துப் பகுதிகளிலும் இருக்கும் அனைத்து நடைபாதைகளும் முழுமையாக மீட்கப்பட வேண்டும். விரிவுபடுத்தப்பட வேண்டும். தரமாக அமைக்கப்படவேண்டும்.இவற்றுக்கெல்லாம் மேலாக அவற்றுக்கென்றே அமைக்கப்பட்ட, தனித்த அதிகாரங்களைக் கொண்ட ஓர் அமைப்பினால் அவை கண்காணிக்கப்பட வேண்டும். நடப்பதற்கு மட்டுமே பயன்படுத்தப்படுகிற நடைபாதைகள்தான் பெருநகரங்களின் நிர்வாகச் சிறப்பிற்கான சிறந்த சான்றாகும்.

விரிவாக படிக்க இங்கே கிளிக் செய்யுங்கள் | READ MORE | CLICK HERE

தெளிவான முடிவு தேவைM

தெளிவான முடிவு தேவை

மத்தியில் யார் ஆட்சிக்கு வந்தாலும் முந்தைய ஆட்சியாளர்களின் திட்டங்களை முடக்குவதும், ரத்து செய்வதும் வழக்கமாக உள்ளது. அந்த வகையில் ஒரு திட்டம்தான் ஆதார் அட்டை.காங்கிரஸ் ஆட்சிக் காலத்தில்தான் இந்தத் திட்டம் கொண்டுவரப்பட்டது. அப்போது எதிர்க்கட்சியாக இருந்த பாஜக இதை கடுமையாக எதிர்த்தது. இத் திட்டத்துக்காக ஏராளமான தொகை செலவழிக்கப்பட்டது. இப் பணிகள் தனியார் வசம் ஒப்படைக்கப்பட்டன.அப்போது மக்கள் தொகை கணக்கெடுப்பை நடத்தி அதன் அடிப்படையில் ஆதார் அட்டை வழங்க முடிவெடுக்கப்பட்டது. இதில் அவசரத்தில் அள்ளித் தெளித்த கதையாக இஷ்டத்துக்கு இக் கணக்கெடுப்பு தனியாரால் எடுக்கப்பட்டது. விடுமுறையின்போது எடுக்கப்பட்ட இக் கணக்கெடுக்கும் பணி முழுமை பெறவில்லை. ஏராளமானோர் பெயர்கள் விடுபட்டிருந்தன. முந்திக் கொண்டவர்களுக்கு தனியார் மூலம் கணினி உதவியால் கருவிழிப் படம் எடுக்கப்பட்டது.இதற்குப் பிறகு பல்வேறு பிரச்னைகள் ஏற்பட்டன. அதனால் எடுக்கப்பட்டவை ரத்து செய்யப்பட்டன. நாளடைவில் மீண்டும் தனி மையங்கள் ஏற்படுத்தி அரைகுறையாக அட்டைகள் வழங்கப்பட்டன.இந்நிலையில், காங்கிரஸ் கூட்டணி அரசு ஆட்சியை இழந்தது. பாஜக மத்தியில் ஆட்சிப் பொறுப்பைக் கைப்பற்றியது. அப்போதும் ஆதார் அட்டை தேவையற்றது என பாஜக தெரிவித்தது. இதனால் ஆதார் எடுக்க முடியாதவர்கள் நிம்மதியடைந்தனர். ஆனால், இந்த மகிழ்ச்சி நீண்ட நாள் நீடிக்கவில்லை. காரணம் தற்போது மத்திய அரசு மீண்டும் ஆதாரை கையில் எடுத்துள்ளது. பழைய மொந்தையில் புதிய கள் போல காங்கிரஸின் திட்டங்களை நகலெடுத்தது மாதிரி ஆதார் அட்டைக்கான பணிகள் முடுக்கி விடப்பட்டன.அக்கட்சியைப் பொருத்தவரை குடியுரிமைக்கான அடையாள அட்டை வழங்க வேண்டும் என்று நீண்ட நாள் கனவு இருந்தது. அந்தத் திட்டம் கிடப்பில் போடப்பட்டுவிட்டது.இப்போது குடும்ப அட்டை, வாக்காளர் அடையாள அட்டை, காப்பீட்டு அட்டை, பான் அட்டை என பல அட்டைகளை வைத்துக் கொள்ள வேண்டிய கட்டாயத்துக்கு மக்கள் தள்ளப்பட்டுவிட்டனர்.ஆதாரமில்லாமல் வாழ்க்கை நடத்த முடியாது. இப்படி ஏராளமான அட்டைகளுக்குப் பதிலாக ஒரே அட்டையாக கொடுத்தாலே போதும் என்ற மனநிலைக்கு மக்கள் வந்துவிட்டார்கள்.மேலும் இப்போதைய ஆதார் அட்டையின் முதல் செயல்பாடு சமையல் எரிவாயுக்கு மானியம் பெற உதவும் என்பதுதான். இதற்காக மக்கள் எரிவாயு விநியோகஸ்தர்களை முற்றுகையிட்டு படும்பாடு கொஞ்சநஞ்சமல்ல.படித்தவர்களே திண்டாடும்போது படிக்காதவர்களின் நிலையைக் கேட்க வேண்டாம்.4 படிவங்களை எப்படி, எங்கே வாங்குவது, நிரப்புவது என அவர்கள் திணற வேண்டியிருந்தது. இதை பயன்படுத்திக் கொண்டு பலரும் விண்ணப்பங்களுக்கு கட்டணம் நிர்ணயித்து தனி தொழிலே ஏற்படுத்திக் கொண்டுவிட்டனர். ஒன்றுமறியாதவர்கள் இந்த நடவடிக்கைகாகக் குறைந்தபட்சம் ரூ.50 வரை செலவழிக்க வேண்டியிருக்கிறது. இதற்கு எதிர்ப்பு கிளம்பியதால் ஒரே படிவம் போதும் என அறிவிக்கப்பட்டது.இப்படி பல்வேறு குழப்பங்கள். மேலும் எரிவாயு உருளை பதிய கைப்பேசி மூலம் குறுஞ்செய்தி அனுப்ப வேண்டும் என கட்டாயப்படுத்தப்பட்டுள்ளது.இதில் அதிகம் பாதிக்கப்படுவது படிப்பறிவில்லாத கிராமவாசிகள்தான். ஏதோ இந்தியா முழுவதும் 100 சதம் பேர் எழுத்தறிவு பெற்றவர்கள் மாதிரி இந்த நடைமுறையை எரிவாயு நிறுவனங்கள் செயல்பாட்டுக்கு கொண்டு வந்துவிட்டன.இந்த குளறுபடியில் சிக்கித் தவித்த மக்களுக்கு தற்போது பேரிடியாக மானியத் திட்டம் வந்துள்ளது. மக்களுக்கு நல்ல திட்டங்கள் தேவைதான்.அதை சுலபமான முறையில் நடைமுறைப்படுத்தாமல் சிக்கலாக்கி வருவதால் அரசுக்கு கெட்டபெயர்தான் வருமே ஒழிய நல்ல பெயர் கிட்டாது.எனவே தெளிவான முடிவெடுக்க வேண்டியது மத்திய அரசின் கடமை.

விரிவாக படிக்க இங்கே கிளிக் செய்யுங்கள் | READ MORE | CLICK HERE

அண்ணாமலைப் பல்கலை: மீண்டெழும் கலைக்கோயில்

அண்ணாமலைப் பல்கலை: மீண்டெழும் கலைக்கோயில்

அண்ணாமலைப் பல்கலைக் கழகம் என்ற ஆலவிருட்சம் 1929-ஆம் ஆண்டு, அப்போதைய தென்னாற்காடு மாவட்டம் சிதம்பரம் அருகே அண்ணாமலைநகரில் தோற்றுவிக்கப்பட்டது.பொருளாதார ரீதியாக, சமூக ரீதியாக, கல்வி ரீதியாக மிகவும் பின்தங்கிய மாவட்டமான தென்னாற்காடு மாவட்டத்தை செட்டிநாட்டரசர் கொடைவள்ளல் அண்ணாமலைச் செட்டியார் தேர்ந்தெடுத்ததன் நோக்கமே பின்தங்கிய இப்பகுதியில் வாழும் ஏழை எளிய மக்கள் கல்வியறிவு பெற்று முன்னேற வேண்டும் என்பதே.இந்திய அளவில் தலைசிறந்த அறிஞர்கள் மற்றும் கல்விமான்களை அண்ணாமலைக்கு அழைத்து வந்து பணியமர்த்தி அழகு பார்த்தவர் அண்ணாமலைச் செட்டியார் ஆவார். இதனால் இப்பல்கலை வளர்ச்சி விரைவில் உயரிய நிலையை எட்டியது.தென் இந்தியாவின் நாளந்தா என புகழப்படும் அளவுக்கு பல்கலைக்கழகம் தரம் உயர்ந்தது. உலகின் மிகப்பெரிய உண்டு உறைவிடப் பல்கலையாக அண்ணாமலைப் பல்கலை மாறியது. ஆரம்பம் முதலே இது ஒரு அரசுப் பல்கலைக்கழகம்தான்.சில சிறப்பு அதிகாரங்களுடன் இணைவேந்தர் பதவி மட்டுமே அண்ணாமலைச் செட்டியாருக்கு வழங்கப்பட்டது. அண்ணாமலைச் செட்டியார் ரூ.20 லட்சத்தையும் ஏற்கனவே அவர் நடத்தி வந்த மீனாட்சி கல்லூரியோடு இணைந்த 300 ஏக்கர் நிலத்தையும் அப்போதைய சென்னை மாகான அரசுக்கு தானமாக அளித்து விட்டார்.ஆனால், அன்றைய சென்னை மாகாண அரசோ ரூ.25 லட்சத்தை பல்கலைக்கழகத்திற்காக வழங்கியது. அன்று முதல் இன்று வரை அரசு இப்பல்கலை வளர்ச்சிக்கு பல ஆயிரம் கோடி பணத்தை செலவிட்டுள்ளது.இந்த பல்கலைக்கழக செயல்பாடுகளை ஆய்வு செய்து சட்ட திருத்தங்களை மேற்கொள்ள 1965-இல் அப்போதைய முதல்வர் பக்தவத்சலம் ஒரு குழுவை நியமித்தார். ஆனால், அக்குழு அறிக்கைகள் அமல் படுத்தப்படவில்லை.1980-களில் பல துறை பிரிவுகளுடன் பல்கலை வளர்ந்தது. அதே சமயம் பிரச்னைகளும் கூடவே வளர்ந்தது.ஆசிரியர்கள் ஊழியர்கள் நிரந்தரப் படுத்தப்படாமல் தாற்காலிக அடிப்படையிலேயே பணியில் தொடர அனுமதிக்கப்பட்டனர். சொற்ப சம்பளமே வழங்கப்பட்டது. இதை எதிர்த்து மிகப் பெரிய போராட்டம் வெடித்தது. ஆசிரியர், ஊழியர், ஆராய்ச்சி மாணவர்கள் இணைந்து போராடினர். அப்போது உருவானதுதான் கூட்டு நடவடிக்கைக் குழு.மிகப் பெரிய போராட்டத்திற்குப் பிறகு ஆசிரியர், ஊழியர்கள் பணி நிரந்தரம் பெற்றனர். அதன் பிறகும் பல போராட்டங்கள் தொடர்ந்தன.1983-இல் அப்போதைய முதல்வர் எம்.ஜி. ராமச்சந்திரன் இப்பல்கலையின் இணை வேந்தரை மாற்ற முடிவு செய்தார். பிறகு அப்போதைய இணை வேந்தர் முத்தையா செட்டியாரின் தலையீட்டையடுத்து அம்முயற்சியை கைவிட்டார். இதன்பிறகு மருத்துவக்கல்லூரி, பல் மருத்துவக் கல்லூரி ஆகியவை ஆரம்பிக்கப்பட்டன.ஏறக்குறைய 85 ஆண்டுகளைக் கடந்துவிட்ட நிலையில் இன்று அப்பல்கலைக்கழகம் 10 புலங்கள், 45 துறைகளுடன் சிறப்பாக இயங்கி வருகிறது. பல்கலைக்கழகத்தில் பணியாற்றும் ஆசிரியர்கள், ஊழியர்களின் எண்ணிக்கை சுமார் 12,500. பல்கலைக்கழகத்தில் நிதி நெருக்கடி மற்றும் நிதி முறைகேடு காரணமாக பல்கலைக்கழக ஆசிரியர், ஊழியர் கூட்டமைப்பினர் பல்வேறு போராட்டங்களை நடத்தினர்.இதையடுத்து, விசாரணை நடத்த தமிழக அரசு இரு குழுக்களை நியமித்தது. அக்குழுக்கள் விசாரணை நடத்தி, முறைகேடுகள் நடந்திருப்பதாக அரசுக்கு அறிக்கை தந்தன.பல்கலை ஊழல் நிர்வாகத்தின் விளைவாக வரலாறு காணாத நிதிச் சிக்கலில் சிக்கித் தவித்தபோது அரசு பல்கலையின் இணைவேந்தர், துணைவேந்தரை மாற்றி விட்டு கல்வியமைச்சரை இணைவேந்தராகவும், ஷிவ்தாஸ் மீனா ஐ.ஏ.எஸ்.ûஸ நிர்வாகியாகவும் அப்போதைய தமிழக முதல்வர் ஜெயலலிதா நியமித்தார்.பல்கலைக் கழகம் ஒரு தன்னாட்சி அமைப்பு. அரசு தலையீடு வரையறைக்கு உள்பட்டது. பல்கலை அதிகார அமைப்புகளான ஆட்சிமன்றக் குழுவும், கல்விக் குழுவும் நிதிக்குழுவும் தான் முடிவு எடுக்கும் அதிகாரம் படைத்தது.மேலும் தற்போது நடைமுறையில் உள்ள கல்விக் கட்டணங்கள் யாவும் முந்தைய நிர்வாகத்தால் முடிவு செய்யப்பட்டது. அரசு தலையீட்டுக்கு பிறகு கட்டணம் ஏதும் உயர்த்தப்படவில்லை.நிதி நிலைமையை சீர்படுத்த, பாழ்பட்ட ஊழல் கறை படிந்த நிர்வாகத்தை சீரமைக்க போதிய கால அவகாசமென்பது அவசியமானது. பல்கலைக்கழகத்தை பொறுத்தவரை இந்தக்காலம் நிர்வாக மாற்றக் காலமாகும் (பதஅசநஐபஐஞச டஉதஐஞஈ). சட்ட ரீதியான கட்டமைப்புகளை ஏற்படுத்த இவ்வளவு காலம் தேவைப்பட்டது.இப்போது ஆசிரியர் ஊழியர் டெபுடேஷன் செய்ய திட்டமிடப்பட்டுள்ளது. அதிக நிதி ஒதுக்கீட்டுக்கு ஏற்பாடுகள் நடந்து வருகின்றன. மருத்துவக் கல்லூரி அரசுக் கட்டுப்பாட்டுக்கு கொண்டுவர ஏற்பாடுகள் நடந்து வருகின்றன.அரசு வழிமுறைப்படிதான் இவை நடக்க இயலும். மாணவர்கள் லட்சக் கணக்கில் செலுத்திய கேபிடேஷன் பீஸ் முறை ஒழிக்கப்பட்டுள்ளது. கட்டணக் குறைப்பும் நிர்வாக சீர்திருத்தங்களுக்குப் பிறகு சாத்தியமாகும்.பல்கலைக்கழக நிர்வாகியாக ஐஏஎஸ் அதிகாரி ஷிவ்தாஸ் மீனா பொறுப்பேற்ற பின்னர் பல்வேறு சீரமைப்புப் பணிகள் மேற்கொள்ளப்பட்டன. பல்கலைக்கழக ஆசிரியர்கள் மற்றும் ஊழியர்களின் சான்றிதழ்களின் உண்மைத்தன்மை சோதனை செய்யப்பட்டு, போலிச் சான்றிதழ் தந்து பணியில் சேர்ந்திருந்தவர்கள் மீது நடவடிக்கை எடுக்கப்பட்டது. கூடுதல் அலுவலர்களை வேறு அரசுக் கல்லூரிகளுக்கு பணியிட மாறுதல் செய்ய அரசுக்குப் பரிந்துரைக்கப்பட்டது. பல்கலையில் கல்விக் கொள்ளை தடுக்கப்பட்டுள்ளது. பொது கலந்தாய்வு மூலம் தகுதி அடிப்படையில் மட்டுமே மாணவர் சேர்க்கை என்ற நிலையை உறுதி செய்யப்பட்டிருக்கிறது. பல லட்சம் ரூபாய் கேபிடேஷன் தொகை என்ற முந்தைய நிலை தற்போது ஒழிக்கப்பட்டுள்ளது.மாணவர்களுககான விடுதி வசதிகள் மற்றும் உள் கட்டமைப்பு வசதிகள் அதிகரிக்கப்பட்டுள்ளன. மாணவிகளுக்காக தனி விடுதி ஒன்றும் கூடுதலாக திறக்கப் பட்டுள்ளது.பல்வேறு சான்றிதழ்கள் மாணவர் நலன் கருதி விரைவாக கிடைக்க ஏற்பாடுகள் செய்யப்பட்டுள்ளன. கல்விக் கட்டணம் தாமதமாக செலுத்தும் மாணவர்களுக்கு கால நீட்டிப்பு வழங்கப்படுகிறது. கல்வி உதவித் தொகைகள் அரசு வழங்கிய உடனேயே மாணவர்களுக்கு தாமதமின்றி சென்று சேர்ந்து விடுகிறது. ஒவ்வொரு துறைக்கும் மாணவர் நல மையங்கள் ஏற்படுத்தப்பட்டுள்ளன. புல வாரியாக மாணவர் சேவையாற்ற யு.ஜி.சி. விதிப்படி சம வாய்ப்பு மைய ஆலோசனைக் குழுக்கள் ஏற்படுத்தப்பட்டுள்ளன. புல வாரியாக வேலைவாய்ப்பு மையங்கள் ஏற்படுத்தப்பட்டு, மாணவர்களுக்கு வேலைவாய்ப்புக்கு ஏற்பாடுகள் செய்யப்பட்டுள்ளன.அரசு தலையிட்டு நிர்வாகம் மாறிய பிறகு ஆசிரியர் ஊழியர்கள் போராட்டம் ஏதும் நடத்தவில்லை. நிர்வாகத்துடன் இணைந்து நிர்வாகச் சீர்திருத்தங்களில் முழுமனதுடன் ஈடுபட்டு வருகிறார்கள்.கடந்த நவம்பர் மாதம் இந்திய உயர்கல்வி தரமதிப்பீட்டு அமைப்பு (சஅஅஇ)கமிட்டி பல்கலைக்கு தரமதிப்பீடு செய்ய வந்த போது ஆசிரியர்கள் ஊழியர்கள் மாணவர்கள் இணைந்து ஒற்றுமையுடன் செயல்பட்டு "ஏ' கிரேடு அந்தஸ்டு பெற்றது.பல்கலைக்கழகத்தில் பயிலும் மாணவர்களுக்கும், தொலைதூரக் கல்வி இயக்கத்தில் பயிலும் மாணவர்களுக்கும் அரசு வழங்கும் அனைத்து உதவித் தொகைகளும் வழங்கப்படுகின்றன.அவர்கள் கல்லூரியில் சேரும்போதே அரசு உதவித்தொகை நீங்கலாக மீதமுள்ள தொகையைக் கட்டினாலே போதுமானது. அவற்றை சிலர் தாமதமாகக் கட்டினாலும் அபராதம் எதுவும் விதிக்கப்படுவதில்லை.அதுபோன்றே, பள்ளி மேற்படிப்புக்கான கல்விக் கட்டணச் சலுகையும் தகுதியுள்ள அனைத்து மாண்வர்களுக்கும் கல்லூரியில் சேரும்போதே வழங்கப்படுகிறது.கடந்த கல்வி ஆண்டில், ஆயிரத்திற்கும் மேற்பட்ட மாணவ-மாணவிகளுக்கு முதல் தலைமுறை பட்டதாரி கல்வி உதவித்தொகை அளிக்கப்பட்டுள்ளது. நிகழாண்டில், சுமார் இரண்டாயிரம் பேருக்கு அந்த உதவித்தொகை வழங்க அரசுக்கு ஒப்புதல் விண்ணப்பம் அனுப்பப்பட்டுள்ளது.பல்கலையின் வரலாறு மற்றும் இன்றைய நிலையை மருத்துவ கல்லூரி மாணவர்கள் வழக்கில் சென்னை உயர்நீதிமன்ற நீதியரசர் வி.ராமசுப்ரமணியன் மிகத் தெளிவாக விளக்கியுள்ளதுடன் அரசின் நிலைப்பாட்டையும் உறுதி செய்துள்ளார். இந்தத் தீர்ப்பு (ரட 20720 ஹய்க் 223052014) வரலாற்று ஆவணமாகும்.பல்கலைக்கழகம் தற்போது மேற்கொண்டு வரும் நிர்வாக சீர்த்திருத்தங்கள் வாயிலாகவும் ஆசிரியர்கள், ஊழியர்கள் மற்றும் மாணவர்களின் அயராத உழைப்பாலும் ஏற்கனவே இழந்துவிட்ட பெயரையும், புகழையும் அண்ணாமலைப் பல்கலைக்கழகம் தற்போது மீண்டும் பெற்று புதுப்பொலிவுடன் விளங்குகிறது.விரைவில் இப்பல்கலைக்கழகம் தென்னகத்தின் நாளந்தாவாக மீண்டும் பிரகாசிக்கும் என்பதில் ஐயமில்லை.

விரிவாக படிக்க இங்கே கிளிக் செய்யுங்கள் | READ MORE | CLICK HERE

மதுவை விலக்குவோம்

மதுவை விலக்குவோம்

அண்மைக்காலமாக பூரண மதுவிலக்கு என்ற குரல் தமிழகம் மட்டுமன்றி இந்தியா முழுவதுமே ஓங்கி ஒலித்துக்கொண்டிருக்கிறது. அண்டை மாநிலமான கேரளத்தில், அரசு மதுவிலக்கை படிப்படியாக அமல்படுத்த முடிவெடுத்துள்ளது.குஜராத், நாகாலாந்து, மிúஸாரம் ஆகிய மாநிலங்கள் ஏற்கெனவே பூரண மதுவிலக்கை அமல்படுத்தியுள்ளன. தமிழகத்திலோ ஆண்டுதோறும் மதுவிற்பனை இலக்கு வைத்து விற்கப்படுவதோடு, விற்பனையில் சாதனையும் படைத்து வருகிறது."சரக்கு' என்பதற்கு அர்த்தமே மாறிவிட்டது. முன்பு பலசரக்கு கடைக்காரர்கள் பொருள்கள் வாங்கச் செல்வதை சரக்கு வாங்கச் செல்வதாகக் கூறுவார்கள். சலூன் கடைக்குச் சென்றால் கட்டிங்கா? ஷேவிங்கா? என்பார்கள்.இப்போது "சரக்கு' என்ற சொல்லையும், "கட்டிங்' என்ற சொல்லையும் உச்சரித்தாலே அது மதுவைக் குறிப்பதாக ஆகிவிடுகிறது.காதலில் தோல்வி, உடல்வலி, மன அழுத்தம், கடன் பிரச்னை முதலிய காரணங்களுக்காக பலரும் குடிப்பதுண்டு. ஆனால், அவர்கள் எல்லாம் குடிப்பதை மறைமுகமாக வைத்திருந்தனர்.ஆனால், தற்போது அப்படி இல்லை. மகிழ்ச்சியோ, துக்கமோ எதுவாக இருந்தாலும் மது முக்கிய பங்கு வகிக்கிறது. சிறுவயதினர் முதல் பெரியவர்கள் வரை எவ்வித கூச்சமோ, அச்சமோ இன்றி திறந்தவெளியிலேயே குடிக்கின்றனர்.ஒரு நிகழ்ச்சி நடைபெறுகிறது என்றால் மதுப்பழக்கம் உள்ளவர்கள் ஒதுக்கப்படும் நிலை மாறி, அப்பழக்கம் இல்லாதவர்கள் தனிமைப்படுத்தப்படும் நிலை தற்போது உள்ளது. தமிழர்களிடையே மது கலாசாரம் அதிகரித்து வருகிறது. எந்த ஒரு நிகழ்ச்சியாக இருந்தாலும் மது இருந்தால் மட்டுமே உற்சாகம் காணப்படுகிறது.பெற்ற பிள்ளைகளை, கட்டிய கணவனைப் பெண்கள் கட்டுப்படுத்த முடிவதில்லை. மாறாக, யார்தான் குடிக்காமல் இருக்கிறார்கள் என தங்களுக்குள் சமாதானம் சொல்லிக்கொள்கிறார்கள். காரணம், தொலைக்காட்சிகளில் வரும் தொடர்களில் மது குடிப்பது போன்ற காட்சி அமைப்புகள் வருவது அவர்களை இந்த அளவுக்கு சாதாரணமாக எடுத்துக்கொள்ளச் செய்துள்ளது.விளைவு? தமிழகத்தின் பல பகுதிகளிலும் 25 முதல் 35 வயதுக்குள் இளம் விதவைகள் எண்ணிக்கை அதிகரித்து வருகிறது. வழிப்பறி, கொலை, கொள்ளை, பாலியல் வன்முறை, சமூக விரோதச் செயல்கள் என அனைத்து குற்றப்பின்னணியிலும் மது முக்கிய பங்கு வகிக்கிறது.சாலை விபத்துகள் அதிகரிக்க மதுவே முக்கிய காரணம் என்பதை மறுக்க முடியாது. குடும்பத் தலைவரை இழக்கும் பெண்கள் குடும்பத்தைக் காப்பாற்ற, சமூகத்தில் எத்தனையோ அவமானங்களைச் சந்திக்கின்றனர்.மதுப்பழக்கம் உள்ள இளைஞர்கள் சிந்திக்க வேண்டும். நாம் இல்லாத இந்த உலகத்தில் நம் மனைவி சந்திக்கப் போகும் பிரச்னைகள்; நம் குழந்தைகள் விரும்பும் கல்வி கிடைக்காத சூழல்; நம் குழந்தைகள் தொழிலாளர்கள் ஆகும் நிலை என எத்தனை எத்தனையோ பிரச்னைகள்.தன் கண் முன்னால் தன் வீட்டுப் பெண்களைத் தெரியாமல் ஒருவர் உரசி விட்டால் கூட கொதித்து எழுபவர்கள், தனது இறப்புக்குப் பின்னர் தன் வீட்டுப் பெண்கள் சந்திக்கப் போகும் பிரச்னைகளை ஒரு நிமிடம் மனதில் அசை போட்டுப் பார்த்தாலே மதுவின் பிடியிலிருந்து மீண்டு வந்துவிடுவார்கள்.அரசுக்கு வருவாயைப் பெருக்க எத்தனையோ வழிகள் உள்ளன. இன்றைய சூழ்நிலையில் தமிழகத்தில் எந்தக் கட்சி ஆட்சிக்கு வந்தாலும் மதுவிலக்கு கொண்டு வரப்படுவதை விரும்பாது. மதுக்கடைகள் மூலம் அரசுக்கு வருவாய் வருவதை மட்டுமே கருத்தில்கொள்ளும்.மத்திய அரசு தேசிய அளவில் மதுவிலக்குக் கொள்கையை அறிவிக்க வேண்டும். அதோடு மதுப்பழக்கத்துக்கு அடிமையானவர்களுக்கு மறுவாழ்வு மையங்களை அமைக்க வேண்டும்.உடனடியாக இயலாவிட்டாலும் கேரளம் போல தமிழக அரசும் படிப்படியாகவாவது மதுவிலக்கை அமல்படுத்த முன்வர வேண்டும்.

விரிவாக படிக்க இங்கே கிளிக் செய்யுங்கள் | READ MORE | CLICK HERE

அவரும் ஒரு குழந்தையே

அவரும் ஒரு குழந்தையே

கூத்தபிரானுடன் வானொலியில் நான்கு ஆண்டுகள் பணிபுரிந்துள்ளேன். எளிமையானவர், சூதுவாது தெரியாதவர். 1945-இல் கூத்தபிரான் பெற்றோருடன் சென்னை வந்தார். நாடு சுதந்திரம் பெற்ற அன்று நள்ளிரவில் ஒரு பூங்காவில் மூவர்ணக்கொடி ஏற்றியபோது அவரும் இருந்தார்.இந்த உணர்வு பிற்காலத்தில், "மூவர்ணக்கொடி ஏற்றுவோம்' எனும் சிறுவர் தொடர் நாடகம் சென்னை வானொலியில் ஒலிபரப்ப கருவாக அமைந்தது. அந்த நாடகத்தை காஞ்சிப் பெரியவர் முழுமையாகப் படித்துப்பார்த்து, "சன்மார்க்கப் பிரகாசமணி' விருது வழங்கினார்.வானொலியில் நிகழ்ச்சி அறிவிப்பாளராகத்தான் சேர்ந்தார் என்றாலும், அப்போதே அன்றைய வானொலி அண்ணா, ரா. அய்யாசாமிக்கு உதவியாளராகப் பணிபுரிந்தார். அவர் ஓய்வு பெற்ற பின், மழலை அமுதம், பாப்பா மலர், சிறுவர் சோலை ஆகியவற்றை கூத்தபிரானே தயாரித்து நடத்தினார்.பெரியசாமி தூரனின் சிறுவர் கலைக் களஞ்சியத்தை முழுமையாகப் படித்து ஜீரணித்து, தொடராக ஒலிபரப்பினார்.ராஜாஜி, அழ. வள்ளியப்பா, தூரன், பூவண்ணன், ராமகிருஷ்ண மடத்தின் அண்ணா ஆகியோரது குரலிலேயே, பாப்பாவுக்கு ஒரு கதை எனும் தொடரை ஒலிபரப்பச் செய்தார்."பாதி சொல்வோம் மீதி என்ன' போன்ற நிகழ்ச்ச்சிகளையும், "சொப்பனக் குழந்தை' போன்ற தொடர் நாடகங்களையும் தயாரித்தளித்தார். இவற்றில் எல்லாம் குழந்தைகளே கதாபாத்திரங்கள்.வானொலியில் சிறுவர் நிகழ்ச்சி என்றாலே விழாக்கோலம் பூணும். குழந்தைகளை வாயிலுக்கே சென்று அவர் வரவேற்பார். பிழையறப் பேசுங்கள் எனும் தொடர் மூலம் தமிழைச்சரியாக உச்சரிக்கக் கற்றுத்தந்தார்.1955-ஆம் ஆண்டு மார்ச் மாதம் 24-ஆம் தேதி, அழ. வள்ளியப்பா ஏற்பாடு செய்து, ராஜாஜி கலந்துகொண்ட சிறுவர் நாடக விழாவில் கூத்தபிரான் முதல் பரிசு பெற்றார். ராஜாஜியின் ஆசி கிடைத்ததைப் பெரும் பாக்கியமாக அவர் கருதினார்.1952-இல் டி.கே.எஸ்ஸின் கள்வனின் காதலி நாடகம் பார்த்தபோது, மேடையேறி, டி.கே. ஷண்முகத்தைப் பாராட்டினார். அன்று துவங்கியது அவரது நாடக வாழ்க்கை. 1953-இல் ரசிக ரஞ்சனி சபாவில் அவர் எழுதித் தயாரித்த "அவள் நினைவு' அரங்கேறியது.1954-இல் துக்ளக் ஆசிரியர் சோ, விவேகா ஃபைன் ஆர்ட்ஸ் துவக்கியபோது, முதல் நாடகம், தேன் மொழியாள், கூத்தபிரான் எழுதியது. பகீரதன் கல்கியில் எழுதிய நாவலை நாடகமாக்கியது தான் இது. பின்னர், சோ எழுதிய ஒருசில நாடகங்களிலும் நடித்தார்.கல்கி ஃபைன் ஆர்ட்ஸ் துவக்கினார். பின்னர் நவ பாரத் எனும் குழுவைத் துவக்கி 26 ஆண்டுகள் நடத்தினார். கூத்தபிரானின் கதாபாத்திரப் படைப்பு, இயற்கையாக இருக்கும் என்று சோ சொல்வார். அவர்களுக்கிடையே இருந்தது, வாடா நட்பு. ஆம், வாடா போடா என்றுதான் பேசிக்கொள்வார்கள்.அவரது இயற்பெயர் நடராஜன். அவரது மனைவி லலிதாவின் யோசனையை ஏற்று, கூத்தபிரான் என்று மாற்றிக்கொண்டார். பெயர் மாற்றம் நடந்தது, வைத்தீஸ்வரன் கோயிலில்.கூத்தபிரான், 26 நாடகங்களையும், குழந்தைகளுக்காக 20 நூல்கள் எழுதியுள்ளார். ஆறாயிரம் நாடகங்களில் நடித்துள்ளார். 80 வயதிலும், "காசிக்குப் போன கணபதி' நாடகத்தை எழுதி அரங்கேற்றினார்.குழந்தைகளைப் பார்க்கும்போதும், அவர்களுடன் சரிசமமாகப் பேசும்போதும், கதைகளுக்குக் கரு கிடைப்பதாக அவர் சொல்வார்.ஒவ்வொரு குழந்தைக்கு உள்ளேயும் நூற்றுக்கணக்கான கதைகள் புதைந்திருக்கும், என்பார். இவற்றைக் கூர்ந்து கவனித்து, ஆயிரத்துக்கும் மேற்பட்ட கதைகளை எழுதி ஒலிபரப்பினார்.குழந்தைகளே உலகம் என்று உறுதியாக எண்ணினார். அதை எடுத்துச்சொல்வதற்காகவே தாம் பிறந்ததாக நினைத்தார். குழந்தைகளுக்கு நல்ல எண்ணங்களே தெரியும். அவர்களிடம் தீய எண்ணங்களை அண்டவிடக்கூடாது, என்பார். குழந்தைகளுக்காக ஒரு சிறுவர் சங்கத்தை, இறுதி மூச்சு வரை நடத்திவந்தார். குழந்தைகள் நாடகக்குழு வைத்திருந்தார். குழந்தை உள்ளம் படைத்த அவரும் ஒரு குழந்தையாகவே மாறிவிட்டிருந்தார்.

விரிவாக படிக்க இங்கே கிளிக் செய்யுங்கள் | READ MORE | CLICK HERE

கச்சா எண்ணெய் உற்பத்தியும் வீழ்ச்சியும்

கச்சா எண்ணெய் உற்பத்தியும் வீழ்ச்சியும்

உலக நாடுகளின் பொருளாதார வளர்ச்சியிலும், தளர்ச்சியிலும் பின்னிப் பிணைந்திருக்கும் பெட்ரோலின் மூலப்பொருள் கச்சா எண்ணெய். தொழிற்சாலைகளின் இயக்கத்திலும், தொழில் வளர்ச்சியிலும் பெட்ரோலிய பொருள்கள் பெரும்பங்கு வகிப்பதால், அவற்றின் உற்பத்தி அளவு மற்றும் விலையை உலக நாடுகள் மிகுந்த அக்கறையோடு, உன்னிப்பாகக் கவனிக்கின்றன.விலை ஏற்றங்களும், இறக்கங்களும், எண்ணெய் வள மற்றும் இறக்குமதி செய்யும் நாடுகளின் பொருளாதாரத்தை நேரிடையாகப் பாதிக்கும் என்பதுதான் அந்த அக்கறைக்கு முக்கிய காரணமாகும். ஒவ்வொரு நாட்டின் பணவீக்க காரணி பட்டியலில், பெட்ரோலிய பொருள்களின் விலை முக்கிய பங்கு வகிப்பதால், அது பிரத்தியேக கவனத்துக்கு உள்ளாகிறது.1847-ஆம் ஆண்டில் முதன் முதலாக, கச்சா எண்ணெயில் இருந்து மண்ணெண்ணெய் (கெரசின்) பிரித்தெடுக்கப்படும் முறை கண்டுபிடிக்கப்பட்டு, அந்த நிகழ்வு, பிற பெட்ரோலிய பொருள்களைப் பிரித்தெடுப்பதற்கு வழிகாட்டியாக அமைந்தது. உலக நாடுகளின், ஒரு நாளைய கச்சா எண்ணெய் தேவை சுமார் 100 மில்லியன் பீப்பாய்களாகக் கணக்கிடப்பட்டிருக்கிறது.பெட்ரோலிய ஏற்றுமதி நாடுகளின் கூட்டமைப்பில் (OPEC) அங்கம் வகிக்கும் அல்ஜீரியா, அங்கோலா, ஈக்வெடார், ஈரான், இராக், குவைத், லிபியா, நைஜீரியா, கதார், செளதி அரேபியா, ஐக்கிய அரபு குடியரசு, வெனிசூலா ஆகிய நாடுகள் கச்சா எண்ணெய் உற்பத்தியில் முக்கிய பங்கு வகிக்கின்றன.இவை தவிர, கச்சா எண்ணெய் உற்பத்தியில், அமெரிக்கா, ரஷியா, பிரிட்டன், நார்வே ஆகிய நாடுகளின் பங்கும் கணிசமானதாகும். உலக நாடுகளின் மொத்த எண்ணெய் உற்பத்தியில், இந்த நாடுகள் 70 சதவீதப் பங்கு வகிக்கின்றன.பிரிட்டனில் உற்பத்தியாகும் எண்ணெய் Brent crude  என்றும், அமெரிக்க கச்சா எண்ணெய் ரபஐ WTI (West Texas Intermediate)  என்றும், பெட்ரோலிய உற்பத்திக் கூட்டமைப்பு நாடுகளின் எண்ணெய் OPEC crude என்றும் குறியீடுகள் மூலம் அடையாளம் காணப்படுகின்றன.2008 ஜுன் மாதம், கச்சா எண்ணெயின் ஒரு பீப்பாய் விலை 140 டாலர் என்ற உச்சத்தைத் தொட்டு கீழிறங்கியது. 2011-இல் அதன் விலை 100 டாலரைத் தொட்டது. அது 2013-ஆம் ஆண்டில், 110 டாலர் வரை சென்று, ஆண்டின் பெரும்பகுதியை 100 டாலருக்கு அருகிலேயே கழித்தது.இந்த ஆண்டு அக்டோபர் வரை, ஏற்ற இறக்கத்துடன் காணப்பட்ட கச்சா எண்ணெயின் விலை, நவம்பர் முதல் வாரத்திலிருந்து படிப்படியாகக் குறைய ஆரம்பித்து, கடைசி வாரத்தில் 66 டாலராக வீழ்ச்சி அடைந்தது.இந்த விலை வீழ்ச்சி, தாற்காலிகமான ஒன்றுதான் என்று உற்பத்தி நாடுகள் கணித்திருந்த நிலையில், எதிர்பாராமல், விலை வீழ்ச்சி மேலும் தீவிரமடைந்து, டிசம்பர் 19-ஆம் தேதி, அதன் விலை 57 டாலரைத் தொட்டு நின்றது. இது 2005-ஆம் ஆண்டு நிலவிய விலை நிலவரத்துக்கு ஒப்பானதாகும்.கச்சா எண்ணெயின் விலை வீழ்ச்சி, அதை இறக்குமதி செய்யும் நாடுகளுக்கு ஆறுதலாகவும், உற்பத்தி நாடுகளுக்குப் பொருளாதார இடியாகவும் அமைந்தது எனலாம்.நீண்ட காலமாகக் கூட்டணி அமைத்து (cartel), உற்பத்தியை குறைப்பதன் மூலம் விலை இறக்கத்தைத் தடுத்து வந்த எண்ணெய் வள நாடுகள், தற்போது, அந்த உக்தி பலன் அளிக்காததால், செயலற்று வேடிக்கை பார்க்க வேண்டிய கட்டாயத்துக்குத் தள்ளப்பட்டுள்ளன.அமெரிக்காவில் அதிக கச்சா எண்ணெய் உற்பத்தி, ஜப்பான், ஆசியா மற்றும் ஐரோப்பிய நாடுகளின் பொருளாதார மந்த நிலை போன்ற காரணிகள், தற்போதைய எண்ணெய் விலை வீழ்ச்சியில் பெரும் பங்கு வகிக்க ஆரம்பித்துவிட்டன.ஆசியாவைப் பொறுத்தவரை, சீனப் பொருளாதார ஓட்டத்தின் தேக்க நிலையால், கச்சா எண்ணெயின் தேவை குறையும் என்ற காரணம், கச்சா எண்ணெய் விலை வீழ்ச்சிக்கு முக்கிய காரணமாகச் சொல்லப்படுகிறது.கச்சா எண்ணெயின் விலை, 60 டாலருக்குக் கீழே சென்றால், உற்பத்தியாளர்களுக்குக் கட்டுப்படியாகாது என்று கணக்கிடப்படுவதால், பல எண்ணெய் உற்பத்தி மையங்கள் மூடப்படும் அபாயமும் காத்து நிற்பதாக நிபுணர்கள் கருத்துத் தெரிவிக்கின்றனர். வளைகுடா நாடுகள் தங்கள் கவனத்தை மற்ற தொழில்களுக்கு விரிவாக்கம் செய்யவும் (Diversification of Industrial activities) வாய்ப்புகள் உள்ளன.கச்சா எண்ணெய் வீழ்ச்சியால் பாதிக்கப்பட்ட நாடுகளில் ஒன்று நைஜீரியா. அந்த நாட்டின் 70 சதவீத வருவாய் கச்சா எண்ணெய் உற்பத்தி மூலம் கிடைக்கிறது. ஏற்றுமதியில், 90 சதவீதம் கச்சா எண்ணெயாகும்.நவம்பர் மாதம் திடீர் விலை சரிவால், அந்த நாட்டின் நாணயமான "நைரா'வின் மதிப்பு 10 சதவீதம் அதிரடியாகக் குறைக்கப்பட்டு, வட்டி விகிதம் ஏற்றப்பட்டது. இந்தப் பொருளாதார அதிர்ச்சியிலிருந்து மீள பல ஆண்டுகளாகும் என்று அந்த நாட்டின் மத்திய வங்கி கவலை தெரிவித்துள்ளது.ஏற்கெனவே, உக்ரைன் பிரச்னையால் பொருளாதாரத் தடைகளுக்கு உள்படுத்தப்பட்ட ரஷியாவின் நிலைமை, கச்சா எண்ணெய் விலை வீழ்ச்சியால் மேலும் மோசமடைந்துள்ளது. ரஷியாவின் மொத்த வருவாயில், 50 சதவீதம், பெட்ரோலிய பொருள்கள் இடம் வகிக்கின்றன.கச்சா எண்ணெய் விலை வீழ்ச்சியால், கடந்த டிசம்பர் 16-ஆம் தேதி, ரஷியாவின் நாணயமான ரூபிளின், அமெரிக்க டாலருக்கு எதிரான மதிப்பு 20 சதவீதம் சரிந்தது. வட்டி விகிதம் 10.5 சதவீதத்திலிருந்து, 17.5 சதவீதமாக அதிரடியாக உயர்த்தப்பட்டது. ஒரு நாட்டு நாணயத்தின் மதிப்பு குறைந்தால், சர்வதேச சந்தையில் அதன் வாங்கும் திறன் குறைந்து, அத்தியாவசிய இறக்குமதிகள் பாதிக்கப்படும் அபாயம் ஏற்படும். நாட்டின் மொத்த தொழில் உற்பத்தி குறைந்து, பணவீக்கம் அதிகமாகும்.கச்சா எண்ணெய் விலை ஏற்றத்தால் பாதிக்கப்பட்டிருந்த நாடுகளில் ஒன்றான இந்தியாவுக்கு இந்த விலை வீழ்ச்சி ஓர் ஆறுதலான செய்தியாகும். நாட்டின் 80 சதவீத கச்சா எண்ணெய் தேவையை இந்தியா இறக்குமதி செய்கிறது. கச்சா எண்ணெயை அதிக விலை கொடுத்து இறக்குமதி செய்யும்போது, அதோடு, இலவச இணைப்பாக பண வீக்கமும் இறக்குமதி (Imported inflation) செய்யப்படுகிறது.அன்னியச் செலாவணி, நடப்பு கணக்கில் விரிசல் (Current Account Deficit), அரசு வரவு, செலவின பற்றாக்குறை ஆகிய எதிர்மறை நிகழ்வுகளுக்கு இது முக்கிய காரணமாக அமைகிறது. கடந்த ஜூன் முதல் தற்போது வரை ஏற்பட்டிருக்கும் 40 சதவீத எண்ணெய் விலை வீழ்ச்சி, இந்தப் பிரச்னைகளை ஓரளவு தீர்க்க வல்ல நிகழ்வாகும். கச்சா எண்ணெயின் சர்வதேச சந்தை விலையில் ஒவ்வொரு டாலர் விலை சரிவும், இந்தியாவிற்கு 40 பில்லியன் ரூபாயை மிச்சப்படுத்தும்.சர்வதேச கச்சா எண்ணெய் விலை குறைப்பால், கடந்த ஆறு மாதங்களில் ஒன்பது முறை பெட்ரோல் விலை குறைக்கப்பட்டிருக்கிறது. இதனால், நாட்டில் பணவீக்கம் தொடர்ந்து குறைந்து கொண்டு வருகிறது. கடந்த நவம்பர் மாத புள்ளி விவரப்படி, நுகர்வோர் பண வீக்கம் (CPI inflation) 4.38 சதவீத அளவுக்கு சரிந்திருக்கிறது.கச்சா எண்ணெய் விலை குறைவைப் பயன்படுத்தி, மத்திய அரசு கடந்த மாதம் பெட்ரோல் மற்றும் டீசல் மீதான கலால் வரியை இரு முறை உயர்த்தியது. இதனால், அரசுக்கு நடப்பு நிதியாண்டில் 9,900 கோடி ரூபாயும், அடுத்த நிதி ஆண்டில், சுமார் 30 ஆயிரம் கோடி ரூபாயும் வருமானம் கிடைக்கும் என்று கணைக்கிடப்பட்டிருக்கிறது. இத்துடன், கச்சா எண்ணெய் இறக்குமதி செலவு, ஒரு லட்சம் கோடி ரூபாய் வரை குறைந்து, அதற்கான மானிய செலவுகளும் குறையும். இது, அரசாங்க வரவு - செலவு விரிசலைக் குறைக்கப் பெரிதும் உதவும்.அதே சமயம், எண்ணெய் வள நாடுகளின் பொருளாதார சுருக்கத்தால், அவற்றின் இறக்குமதி தேவைகள் குறையும் வாய்ப்புகள் இருக்கின்றன. இதனால், இந்தியா போன்ற நாடுகளின் ஏற்றுமதி வியாபாரம் பாதிக்கப்படும் அபாயமும் காத்து நிற்பதை கவனத்தில் கொள்ள வேண்டும்.சர்வதேச சந்தையில், கச்சா எண்ணெய் விலை குறையும் காலத்தை இந்திய அரசு சாதகமாகப் பயன்படுத்திக்கொள்ளவேண்டியது மிக அவசியமாகும். நிலைமை மாறுவதற்குள், பெட்ரோலிய துறையில் நீண்ட கால சீர்திருத்தங்கள் அறிமுகப்படுத்தப்படவேண்டும். இந்த சீர்திருத்தங்களில் ஒன்று, கச்சா எண்ணெய்க்கான சேமிப்புக் கிடங்குகளை உருவாக்குவதாகும்.2004-ஆம் ஆண்டில், இதற்கான திட்டங்கள் வகுக்கப்பட்டாலும், கட்டமைப்பு வசதிகளுக்கான முதலீடுகள் அரசால் ஒதுக்கப்படவில்லை. இம்மாதிரியான சேமிப்புகளால், கச்சாய் எண்ணெய் விலை உயரும்போது ஏற்படும் பொருளாதார அதிர்வுகளைப் படிப்படியாக எதிர்கொள்ளும் வலிமை கிடைக்கும். கச்சா எண்ணெயின் உள்நாட்டு உற்பத்தியைப் பெருக்கி, இறக்குமதியைக் குறைப்பதற்குத் தீவிர முயற்சிகள் மேற்கொள்ளப்பட வேண்டும்.எதிர்பாராத இம்மாதிரி உலக சந்தை நிகழ்வுகள், இந்தியப் பொருளாதாரத்திற்கு ஒரு தாற்காலிக ஆறுதல்தான். உள்நாட்டு தொழில் உற்பத்திக்கு சாதகமான, உள் கட்டமைப்பு வசதிகள் Infra structure facilities) மேம்படுத்தப்பட்டால்தான், இம்மாதிரியான நிகழ்வுகளின் பயன்களை, அடித்தட்டு மக்கள் வரை உணரமுடியும் என்பதில் சந்தேகமில்லை.

விரிவாக படிக்க இங்கே கிளிக் செய்யுங்கள் | READ MORE | CLICK HERE

அறிவு விளக்கை அணையாமல் காப்போம்!

அறிவு விளக்கை அணையாமல் காப்போம்!

அண்ணாமலைப் பல்கலைக்கழக நிறுவனரான ராஜா சர். அண்ணாமலைச் செட்டியார் பிரிட்டனுக்குச் சென்றிருந்தபோது அங்குள்ள கேம்பிரிட்ஜ், ஆக்ஸ்போர்டு ஆகிய பல்கலைக்கழகங்களைச் சுற்றிப் பார்க்கும் வாய்ப்பினைப் பெற்றார். அப்போதே அவர் மனதில் இப்பல்கலைக்கழகங்களைப் போன்ற தரமான பல்கலைக்கழகம் ஒன்றை, தமிழ்நாட்டில் நிறுவி, கல்வித் தொண்டு புரிய வேண்டும் என்ற எண்ணம் உருவாயிற்று.அதற்கிணங்க அவர் 24-06-1920 அன்று சிதம்பரத்தில் மீனாட்சி கல்லூரியைத் தொடங்கினார்.1927-ஆம் ஆண்டில் தமிழ்க் கல்லூரியையும் வடமொழிக் கல்லூரியையும் தொடங்கினார். 1929-இல் இசைக் கல்லூரியைத் தொடங்கினார்.சங்க இலக்கியங்களைத் தேடித்தேடி கண்டுபிடித்துப் பதிப்பித்த உ.வே. சாமிநாதய்யரை தமிழ்க் கல்லூரியின் தலைவராக நியமித்தார். இதைப்போன்றே அவர் அமைத்த ஒவ்வொரு கல்லூரிக்கும் புகழ் பெற்றவர்களையே தலைமைப் பொறுப்புக்கு நியமித்தார்.அனைத்துக் கல்லூரிகளையும் இணைத்து ஒரு பல்கலைக்கழகத்தைத் தோற்றுவிக்க முன்வந்தார். அதற்காக 1,000 ஏக்கர் நிலமும், ரூபாய் 20 இலட்சமும் வழங்கினார். அண்ணாமலைச் செட்டியாரின் நோக்கம் நிறைவேறுவதற்கு பி.டி. இராசன், பெரியார் ஈ.வே. இராமசாமி போன்ற பலரும் துணை நின்று அன்றைய ஆங்கிலேய ஆளுநரைச் சந்தித்து 1928-ஆம் ஆண்டு அண்ணாமலைப் பல்கலைக்கழகச் சட்டம் கொண்டுவர வழி வகுத்தார்கள். அந்தப் பல்கலைக்கழகத்தின் ஒவ்வொரு துறைக்கும் பேராசிரியர்களைத் தேடித்தேடித் தேர்ந்தெடுத்துக் கொண்டுவந்தார் அண்ணாமலைச் செட்டியார். அண்ணாமலைப் பல்கலைக்கழகத்தை வளர்ச்சியடையச் செய்ய வேண்டும் என்பது அவருடைய முக்கியக் குறிக்கோளாக அமைந்தது. குறிப்பாக, தமிழ் வளர்ச்சிக்கும், தமிழிசையைப் பரப்புவதிலும் அப்பல்கலைக் கழகம் முதன்மை வகித்தது.இன்றைய கடலூர், விழுப்புரம், தஞ்சாவூர், நாகப்பட்டினம், திருவாரூர் ஆகிய மாவட்டங்களைச் சார்ந்த ஒடுக்கப்பட்ட, பிற்படுத்தப்பட்ட, மிகவும் பிற்படுத்தப்பட்ட மாணவர்கள் அண்ணாலைப் பல்கலைக்கழகத்தில் சேர்ந்து பயின்றார்கள்.அந்த நாளில் மேற்கண்ட மாவட்டங்களில் ஒன்று அல்லது இரண்டு கல்லூரிகளுக்கு மேல் கிடையாது. எனவே, மேற்படிப்புக்கான வழியின்றி மாணவர்கள் பள்ளிக்கல்வியோடு தங்கள் படிப்பை நிறுத்த வேண்டிய நிலை இருந்தது.அந்த நாளில் பட்ட மேற்படிப்பு படிக்க வேண்டுமானால், சென்னையில் உள்ள சில கல்லூரிகளில் மட்டுமே சேர வேண்டும். தமிழ்நாட்டின் வேறு எந்தப்பகுதியிலும் பட்ட மேற்படிப்பு வசதி கிடையாது. எனவே, தமிழ்நாடெங்கிலுமிருந்து மாணவர்கள் பட்டமேற்படிப்புக்காக அங்கு வந்து சேர்ந்தார்கள்.பல்கலைக்கழகம் நாளுக்கு நாள் வளர்ந்தது.50 துறைகளில் 390 படிப்புகள் கற்பிக்கப்பட்டன.மேலும், மாணவர்கள் அங்கேயே தங்கிப் படிக்க வேண்டிய ஒரே பல்கலைக்கழகமாக அப்பல்கலைக்கழகம் அந்த நாளில் திகழ்ந்தது. புகழ்பெற்ற அறிஞர்கள் பலர் அப்பல்கலைக்கழகத்தின் துணைவேந்தர்களாகவும் பேராசிரியர்களாகவும் பணியாற்றி சிறந்த மாணவர்களை உருவாக்கினார்கள்.தமிழகத்தில் சிறந்து விளங்கும் பல தலைவர்கள், துணைவேந்தர்கள், பேராசிரியர்கள், ஐ.ஏ.எஸ்., ஐ.பி.எஸ். அதிகாரிகள் போன்ற பலரும் அங்கு படித்தவர்களே.80 ஆண்டுகள் கடந்த இப்பல்கலைக்கழகம் அண்மைக் காலமாகச் சீரழிவிற்கு ஆளாயிற்று. மாணவர்கள், ஆசிரியர்கள், அலுவலர்கள் ஆகியோர் போராட்டங்களை நடத்தினர். அவற்றின் விளைவாக, தமிழக அரசு தலையிட்டு அப்பல்கலைக்கழகத்தை அரசே ஏற்கும் சட்டத்திருத்தத்தை 2013-ஆம் ஆண்டு ஏப்ரலில் சட்டமன்றத்தில் கொண்டுவந்து நிறைவேற்றியது.முறைகேடுகளுக்குக் காரணமாக இருந்ததாக பல்கலைக்கழகத்தின் துணைவேந்தர் நீக்கப்பட்டார். பதிவாளர் தாமாகவே பதவி விலகினார். பல்கலைக் கழகத்தின் சிறப்பு அதிகாரியாக ஒருவரை அரசு நியமித்தது. அவருக்கு உதவியாக மேலும் சில அதிகாரிகள் நியமிக்கப்பட்டார்கள்.அரசு, இப்பல்கலைக்கழகத்தை ஏற்று ஓராண்டு காலம் ஆனபோதிலும், நிலைமை சீர்திருந்தவில்லை. மீண்டும் போராட்டங்கள் வெடித்தன.அரசு இதை ஏற்றபோது, அண்ணாமலை நகரைச் சுற்றியுள்ள கிராமப்புற மாணவர்களுக்கு உயர்கல்வியை அளிக்க வேண்டும் என்பதை உறுதிசெய்யும் வகையில் தற்போதைய அண்ணாமலைப் பல்கலைக்கழகச் சட்டம் கொண்டுவரப்பட்டுள்ளது என கல்வியமைச்சர் அறிவித்தார். ஆனால், இந்த நோக்கம் எந்த அளவிற்கு நிறைவேறியிருக்கிறது என்றுப் பார்த்தால் ஏமாற்றம்தான் மிஞ்சுகிறது. அரசு இப்பல்கலைக்கழக நிர்வாகத்தை ஏற்றுக்கொண்ட பிறகும், மாணவர்களின் கல்விக் கட்டணங்கள் பிற அரசுக் கல்லூரிகளில் உள்ளவாறு குறைக்கப்படவில்லை. எடுத்துக்காட்டாக, பொறியியல் படிப்பிற்கு அரசுக் கல்லூரியில் ஆண்டிற்கு ரூ.12 ஆயிரம் முதல் 16 ஆயிரம் வரை உள்ளது. ஆனால், இங்கு ரூ.75 ஆயிரம் முதல் 85 ஆயிரம் வரை உள்ளது. மருத்துவப் படிப்பிற்கு அரசுக் கல்லூரிகளில் ரூ.15 ஆயிரம் கட்டணம்.ஆனால், இங்கு ரூ.5.5 இலட்சம் வசூலிக்கப்படுகிறது. கலை - அறிவியல் படிப்புகளுக்கும் கட்டணம் தாறுமாறாக உயர்த்தப்பட்டுள்ளது.விடுதிகளில் அறைக்கு 10 முதல் 12 பேர் வரை மாணவர்கள் அடைக்கப்பட்டுள்ளனர். உணவு வழங்குவது தனியாரிடம் ஒப்படைக்கப்பட்டுள்ளது. அறைக்கும் உணவுக்கும் மாணவர்கள் ரூ.5 ஆயிரம் வரை மாதந்தோறும் கொடுக்கவேண்டியுள்ளது.அரசாணை (நிலை) எண்.6, ஆதிதிராவிடர் மற்றும் பழங்குடியினர் நலத்துறை: 9-1-2012 தேதியிட்ட அரசாணையின்படி, சிறுபான்மையினர் நிறுவனங்கள் உள்பட சுயநிதிக் கல்லூரி நிறுவனங்களில் அனைத்துவிதமான படிப்புகளிலும் ஒடுக்கப்பட்ட பழங்குடியின மாணவ - மாணவியருக்கான கட்டணங்களை அரசே தருகிறது.அரசு நியமித்த சுயநிதிக் கல்லூரிகளுக்கான கட்டணக் குழு நிர்ணயித்த கல்விக் கட்டணங்களை மாணவர்களுக்கு வழங்க அரசு ஆணையிட்டது. ஆண்டுக்கு ரூபாய் 2 இலட்சத்திற்குக் குறைவான வருமானம் உள்ளவர்களின் பிள்ளைகளுக்கு மட்டுமே இது வழங்கப்படும்.ஆதிதிராவிடர் நல ஆணையர், கல்விஆண்டின் தொடக்கத்திலேயே கல்லூரிக் கல்வி இயக்ககத்திலிருந்து இத்தொகையைப் பெற்று, தனது நிர்வாகத்தில் உள்ள அனைத்து சுயநிதிக் கல்லூரிகளுக்கும் வழங்க நடவடிக்கை எடுக்க வேண்டும்.

ஆதி திராவிட மாணவ - மாணவியரிடமிருந்து எந்தவிதமான கல்விக் கட்டணங்களையும் தொடர்புடைய சுயநிதி கல்வி நிறுவனங்கள் வசூலிக்கக் கூடாது. அரசின் உத்தரவு இவ்வளவு தெளிவாக இருந்தும், அண்ணாமலைப் பல்கலைக்கழகத்தில் இது பின்பற்றப்படுவது இல்லை. கல்வி உதவித் தொகை அந்தந்த ஆண்டு தரப்படாமல் கல்வி ஆண்டு முடிந்தபிறகு கொடுக்கப்படுகிறது. அதுவரை மாணவர்கள் தங்கள் சொந்தப் பணத்திலிருந்து கட்டணத்தைச் செலுத்த வேண்டும். அப்படிச் செலுத்தாதவர்களுக்கு மிக அதிக தொகை அபராதமாக விதிக்கப்படுகிறது. கட்டணம் ஐந்தாயிரம் ரூபாய் என்றிருந்தால் அபாராதமும் ஐந்தாயிரம் ரூபாய் விதிக்கப்படுகிறது. இதைக் கட்டாதவர்கள் நீக்கப்படுகிறார்கள். இரண்டாண்டுகளாகப் பட்டமளிப்பு விழாவும், மாணவர்களின் வேலைக்கான வளாக நேர்காணலும் நடைபெறவில்லை. இந்தக் குறைகளை எதிர்த்துப் போராடிய மாணவர்கள் மிகக்கடுமையான முறையில் ஒடுக்கப்பட்டார்கள்.ஆசிரியர்கள், அலுவலர்கள் பிரச்னையும் தீராமல் உள்ளது. இங்கு 12,500 பேர் வேலை பார்க்கிறார்கள். கடந்த சில ஆண்டுகளில் வரைமுறையில்லாமல் ஏராளமான பேர் சேர்க்கப்பட்டார்கள்.அண்மையில், இவ்வாறு சேர்க்கப்பட்ட பேராசிரியர்கள் மற்றும் அலுவலர்களில் 6 பேர் போலிச் சான்றிதழ் கொடுத்து பணியில் சேர்ந்திருக்கிறார்கள் என்ற திடுக்கிடும் உண்மை வெளிவந்து அவர்கள் பணிநீக்கம் செய்யப்பட்டிருக்கிறார்கள்.இதுபோல எத்தனைபேர் சேர்க்கப்பட்டிருக்கிறார்கள் என்பது ஆராயப்பட வேண்டும். இதற்குப் பொறுப்பானவர்கள் மீது நடவடிக்கை எடுக்க வேண்டும்.உண்மையில் படித்து உரிய தகுதிகளைப் பெற்று வேலையில் சேர்ந்திருக்கிற பேராசிரியர்கள், ஊழியர்கள் ஆகியோர் குறித்துக் கவனமாக செயல்படவேண்டும். பல ஆண்டு காலம் வேலை பார்த்தவர்களுக்குப் பணிப் பாதுகாப்பு இருக்க வேண்டும். தேவைக்கு அதிகமானவர்கள் இருந்தால் அரசு கல்லூரிகளில் காலியாகும் இடங்களில் அவர்களை நியமிக்க வேண்டும்.பல ஆண்டு காலமாக தினக்கூலி அடிப்படையில் பணியாற்றி வருபவர்கள் நிரந்தரம் செய்யப்படவேண்டும். புதிதாக ஆள்களை நியமிக்கக்கூடாது.காரைக்குடி அழகப்பா பல்கலைக்கழகத்தை அரசே ஏற்றுக்கொண்டதைப்போல, அண்ணாமலைப் பல்கலைக்கழகத்தையும் ஏற்றுக்கொள்ள வேண்டும். அங்கு உள்ள மருத்துவக் கல்லூரி, மருத்துவமனை ஆகியவற்றையும் அரசு ஏற்க வேண்டும். அதற்கும் பல்கலைக்கழகத்திற்கும் தொடர்பில்லை என்று கூறுவது சரியல்ல. சுற்றுவட்டாரத்தில் உள்ள ஏழை மாணவர்கள் படிப்பதற்கும், ஏழை நோயாளிகள் உரிய மருத்துவ வசதி பெறுவதற்கும் உதவும் வகையில் இதைச் செய்ய வேண்டும்.அரசு அதிகாரிகள் பொறுப்பில் இப்பல்கலைக்கழகம் ஒப்படைக்கப்பட்டிருப்பதற்கு காலவரை நிர்ணயிக்க வேண்டும். சிறந்த கல்வியாளர்கள் பொறுப்பில் இப்பல்கலைக்கழகம் கொண்டுவரப்பட வேண்டும்.நெடிய வரலாறு கொண்ட அண்ணாமலைப் பல்கலைக்கழகத்தின் பொலிவும் பெருமையும் குன்றாமல் பாதுகாக்கப்பட வேண்டும். அந்த அறிவு விளக்கு அணையாமல் காக்க வேண்டிய கடமை அரசுக்கும் மக்களுக்கும் உண்டு.

விரிவாக படிக்க இங்கே கிளிக் செய்யுங்கள் | READ MORE | CLICK HERE

மனித உரிமைகள் காப்போம்!

மனித உரிமைகள் காப்போம்!

நவம்பர் 25-ஆம் தேதி பெண்களுக்கு எதிரான வன்முறை ஒழிப்பு தினமானதால், அதற்கான விழிப்புணர்வை மனித உரிமை நாளான டிசம்பர் 10-ஆம் தேதி வரை ஏற்படுத்த வேண்டும் என்பது ஐக்கிய நாடுகள் சபை மனித உரிமை ஆணையத்தின் வேண்டுகோள்.ஆனால், இடைப்பட்ட நாள்களில்தான் மனித சமுதாயத்திற்கு எதிராக எத்தனை வன்முறைகள்? சிட்னி மாநகர சிற்றுண்டி விடுதியில் மும்பையின் 26/11 தினத்தாக்குதல் போல் ஒரு பயங்கரவாதியின் வன்முறை; பாகிஸ்தான் பெஷாவர் நகரில் ராணுவ நிர்வாகத்தில் உள்ள பள்ளிக்கூடத்தில் 132 குழந்தைகள் படுகொலை. ஈவிரக்கமில்லா தலிபான் பயங்கரவாத மிருகங்களின் கொடுஞ்செயல்."விஷப்பாம்பை பாலூட்டி வளர்க்கிறார்கள். அது வளர்த்தவர்களையே தாக்கும் நாள் வெகுதூரம் இல்லை' என்றார் முந்தைய அமெரிக்க வெளியுறவுத் துறை அமைச்சர் ஹிலாரி கிளிண்டன். பயந்தது போலவே பாகிஸ்தானை தாக்கிவிட்டது தலிபான்.குற்றவியல் ஆளுமையில் காவல் துறை சிறைத் துறை ஆகியவை முக்கியப் பங்கு வகிக்கின்றன. ஜனநாயகத்தின் தூண்களாக கருதப்படுபவை நீதித் துறை, மக்கள் மன்றம், அரசாளுமை, ஊடகங்கள்.காவல் துறையில் எல்லா நடவடிக்கைகளும் நீதியைச் சார்ந்து இருக்க வேண்டும். சட்டத்தின் அடிப்படையில் இயங்க வேண்டும்.நீதியரசர் கிருஷ்ணய்யர் காவல் துறையை சாடியிருக்கிறார். தவறுகளைக் கண்டித்திருக்கிறார். அதேசமயம் காவல் துறை சுதந்திரமாக சட்டத்திற்கு உள்பட்டு செயல்பட வேண்டும் என்பதை வலியுறுத்தி காவல் துறையை மேம்படுத்த விழைந்திருக்கிறார்.மனித உரிமைகள், பொது நலன் பாதுகாப்பு இவை இரண்டும் வளமிகு சமுதாயத்திற்கு இன்றியமையாதவை. நீதியரசரின் எந்த ஒரு தீர்ப்பை எடுத்துக் கொண்டாலும் அதில் இவ்விரு கோட்பாடுகள் அடிப்படையாக இருக்கும்."டைனமிக் லாயெரிங்' என்ற அவரது கட்டுரைத் தொகுப்பு எல்லோரும் படிக்க வேண்டியதொன்று. முக்கியமாக இளைஞர்கள் படித்துப் பயனுற வேண்டும்.சட்ட ஆளுமையை வழக்குரைஞர் பக்தியோடும், சிரத்தையோடும் கையாள வேண்டும் என்று வலியுறுத்துகிறார். ஆன்மிக வழியில் பக்தியோடும் சிரத்தையோடும் வழக்காடலை எடுத்துச் செல்ல வேண்டும் என்கிறார். மேலும், அரசியல் சாசனம் திருத்தப்பட்டு, செயல்திறன் மேம்படுத்துவதற்கு நீதித்துறை வழக்குரைஞர்கள் கமிஷன் அமைக்க வேண்டும் என்று கூறியுள்ளார்.பழங்குடியினர் உரிமைகளுக்கு பல தீர்ப்புகள் வழங்கியிருக்கிறார். அரசியல் சாசனம் பழங்குடியினருக்கு உதவியாக இல்லை என்பதை "Indian constitution is " Deaf and dumb in these tribal region. The locomotive of people's liberation is the spirit of autonomy, more Human rights, less centralization less illusions about peace through Police action" என்று தனது தீர்ப்பில் கூறியுள்ளார்.தனது தீர்ப்புகள் மூலம் அவர் தொடாத துறையே இல்லை. எடுக்காத மக்கள் நலம்  சார்ந்த பிரச்னையே இல்லை எனலாம்.மாசுக்கட்டுப்பாடு, சுற்றுப்புற சூழல், பழங்குடியினர் உரிமைகள், புவி சூடாதல், மதச்சார்பின்மை, அரசு ஊழியர் உரிமை, ஓய்வூதியம் பெறுவோர் உரிமை, பொதுநல வழக்குகள், விலங்குகள் பாதுகாப்பு, அண்டை நாடுகளுடன் நல்லுறவு, இலங்கை வாழ் தமிழர்களின் உரிமை என்ற இவரது பல்நோக்கு சிந்தனையின் வீச்சு கணக்கிலடங்காது.காவல் துறை மேம்பாட்டிற்கும் விஞ்ஞான அடிப்படையில் புலன் விசாரணை அமைய வேண்டும் என்ற அவரது அறிவுரையை காவல் துறை எப்போதும் மனதில் கொள்ள வேண்டும்."He says in one judgement "in the long run that investigation is best which uses torture stratagems least, that Policeman deserves respect who gives fist rest and wits restlessness. மனதில் உரைக்கும்படி சொன்னால் "லத்தியை தூக்காதே புத்திக்கு வேலை கொடு'. நெத்தியடி அறிவுரை, உயர் கோட்பாடுகள் எல்லோருக்கும் பொருந்தும்.டிசம்பர் 16 நிர்பயா தினம். என்ன கொடுமை? வன்முறை அனுசரிப்பு தினங்கள் கூடிக்கொண்டே போகின்றன. பாலியல் வன்முறை நிகழ்வுகள் நாட்டில் குறைந்தபாடில்லை.எவ்வாறு இந்தப் பிரச்னையை அணுகுவது என்பதிலேயே குழப்பம். கடுமையான சட்டத்தாலா? காவல்துறையின் சீரிய நடவடிக்கையாலா? பொது இடங்களில் கண்காணிப்பை அதிகப்படுத்துவதாலா? கல்விக் கூடங்களில் விழிப்புணர்வு ஏற்படுத்துவதாலா என்று பல்நோக்கு செயலாக்க முறைகள் விவாதிக்கப்படுகின்றன. உணர்ச்சிகளை தூண்டும் வகையில் பெண்கள் உடையணியக் கூடாது என்ற அறிவுரை மகளிர் அமைப்புகளைக் கொதிப்படைய செய்துள்ளது. பாதிக்கப்பட்டவர்களையே குறை கூறும் நல்லுலகம் நமது சமுதாயம்தான்.குற்றம் செய்பவர்கள் கடுமையான சட்டத்தை கண்டு அசருவதில்லை. அவர்கள் பயப்படுவது திறமை வாய்ந்த, நேர்மையான காவல் துறையைக் கண்டுதான். அந்தத் திறமையையும், நேர்மையையும் காவல் துறையில் வேரூன்றச் செய்தால்தான் கடுங்குற்றங்கள் குறையும்.குற்றவாளிகள் துப்பாக்கியைப் பார்த்து பயப்படுவதில்லை. விறைப்பாக நெஞ்சை நிமிர்த்தி பணிபுரியும் காவலன் தான் நன்மக்களால் மதிக்கப்படுகிறான். அதை உணர்ந்தால் தீர்வு பிறக்கும்.உலக அளவில் பாலியல் வன்முறை பற்றிய புள்ளிவிவரம் அதிர்ச்சியளிக்கும். 35 சதவீத பெண்கள் ஏதாவது ஒரு விதத்தில் உடல் ரீதியான பாலியல் கொடுமைக்கு ஆளாகிறார்கள். சில நாடுகளில் 70 சதவீதம் பேர் கொடுமைக்கு உள்ளாகிறார்கள்.மேலும், உலகில் மூன்று கோடி பெண்கள் உடல் உறுப்புகள் சிதைக்கப்படும் கொடுமைக்கு இரையாகியுள்ளார்கள். அது போதாதென்று உலக அளவில் 70 கோடி சிறுமிகள் கட்டாயத் திருமணம் செய்து வைக்கப்படுகிறார்கள். அதில் 30 சதவீதம் பதினைந்து வயதுக்குள்பட்ட சிறுமிகள். அந்தக் குழந்தைகளுக்கு கல்வி கிடையாது. பிள்ளைப் பிராயத்தின் வசந்தங்கள் இல்லை.இத்தகைய வன்முறை, சமுதாயத்தை, பொருளாதாரத்தை நாட்டின் வளத்தை பாதிக்கிறது என்ற எச்சரிக்கை தகவலை ஐக்கிய நாடுகள் சபை வெளியிட்டுள்ளது.நமது நாட்டில் பெண்களுக்கு எதிரான குற்றங்கள் 2013-இல் 3,09,546. வழக்குகள், முந்தைய ஆண்டைவிட 11.5 சதவீதம் அதிகரித்துள்ளது.நவம்பர் 25 சுதந்திரப் போராளிகள் மிராபில் சகோதரிகள் டாமினிக்கன் நாட்டின் கொடுங்கோலன் ராபின் ட்டூஜில் போவால் 1960-ஆம் வருடம் கொல்லப்பட்டார்கள். அந்த தினம்தான் பெண்களுக்கு எதிரான குற்றங்களைக் களைவதற்கான விழிப்புணர்வு நாள்.ஒவ்வொரு வருடமும் மனித உரிமை நாளன்று மையக் கருத்து ஒன்றை ஐக்கிய நாடுகள்  சபையின் மனித உரிமை ஆணையம் அளிக்கும். இந்த வருடம் மனித உரிமை 365 என்பதுதான் ஆணையத்தின் அறைகூவல்.தினமும் நமது சிந்தனையில், பேச்சில், செயலில் மனித உரிமை பரிமளிக்க வேண்டும் என்ற உயரிய நோக்கம் கொடுக்கப்பட்டுள்ளது. முந்தைய வருடங்களில் வறுமை ஒழிப்பு, மனித உரிமை, கல்வி, சித்தரவதை ஒழிப்பு, குழந்தைகள் பணியில் ஈடுபடுத்துவதை ஒழித்தல் போன்ற கணக்கில் அடங்கா மனித உரிமை பிரச்னைகளை, ஆணையம் உலக நாடுகளின் கவனத்திற்கு கொண்டு வந்துள்ளது.பாகிஸ்தானைச் சேர்ந்த மலாலா, நமது நாட்டின் கைலாஷ் சத்யார்தி இருவருக்கும் குழந்தைகள் உரிமைக்காக போராடியதற்காக உலக அமைதிக்கான நோபல் பரிசு கிடைத்திருப்பது நமது துணை கண்டத்திற்கே பெருமை.மேற்கு வங்கத்தைச் சேர்ந்த அனயோரா கட்டூன் என்ற சந்தேஷ்காலி கிராமத்திலுள்ள பதினைந்து வயது பெண், குழந்தை திருமணத்திற்கு எதிராகப் போராடி பல பச்சிளம் பெண்களை மீட்டிருக்கிறாள் என்ற விவரம் நமது ஊடகங்களில் வரவில்லை.மலாலா தனது முக நூலில் புதுமைப் பெண் கட்டூனின் சாதனையைப் பாராட்டிய பிறகுதான் அனயோரா பிரபலமானாள். 180 கடத்தப்பட்ட குழந்தைகளை இது வரை மீட்டிருக்கிறாள். 35 குழந்தைத் திருமணங்களை நிறுத்தியிருக்கிறாள். நூற்றுக்கும் மேற்பட்ட குழந்தைத் தொழிலாளர்களைக் காப்பாற்றியிருக்கிறாள். மேலும் கல்வியிலிருந்து விடுபட்ட 200 குழந்தைகளை மீண்டும் கல்வி பயில உதவியிருக்கிறாள். இதுவன்றோ சாதனை!நிர்பயா கொடுமை நிகழ்ந்து இரண்டு வருடங்கள் கடந்து விட்டன. மீண்டும் தில்லியில் சர்வதேச நிறுவனமான உபேர் கால் டாக்சியில் பயணம் செய்த பெண், பாலியல் கொடுமைக்கு இரையாகியிருக்கிறாள். பெங்களூரில் பள்ளிகளில் பெண் குழந்தைகளுக்கு பாலியல் கொடுமை நிகழ்வுகள் நடந்தவண்ணம் இருக்கின்றன. எத்தகைய அணுகுமுறை தேவை என்ற விவாதம் இன்றும் தொடர்கிறது.நெட்டை மரங்களாக நின்று புலம்பிக் கொண்டிருக்கிறோம். பெட்டைப் புலம்பல் துணையாகாது. ஒருவரையொருவர் சாடுவதில் பயனில்லை. பிரச்னை என்று வந்து விட்டால் காவல்துறை தலையில்தான் விடியும்.இதற்குத் தீர்வு கடுமையான, தீர்க்கமான, நேர்மையான நடவடிக்கை. காவல் நிலைய அளவில் அதற்கு உயர் அதிகாரிகள் ஊக்கமும் ஆக்கமும் அளிக்க வேண்டும்.அநீதிக்கு எதிராகப் போராடினால்தான் நீதியை நிலைநாட்டமுடியும்.

விரிவாக படிக்க இங்கே கிளிக் செய்யுங்கள் | READ MORE | CLICK HERE